Johanes sach woo Jesus von Gott ne Schreftsroll nämen woat, soo daut hee daut openboaren kaun waut doarenn jeschräwen steit
5
Dan wort mie mea jewäsen von waut noch enne Tookunft passieren woat. Un ekj sach woo dee waut em Himmel de Vollmacht haft, opp sien Troon jesäten haud, un daut hee en siene rajchte Haunt ne Schreftsroll jehoolen haud. Un de Schreftsroll wia von beid Sieden beschräwen, un dee wia met säwen Stampelsa aufjestampelt, soo daut daut kloa wia daut nich bloos irjentwäa dee opmoaken durf. 2 Un ekj sach een stoakja Enjel, un de Enjel roopt gaunz lud, un fruach, "Wäa haft daut Rajcht de Stampels von dise Schreftsroll entwei to moaken, soo daut hee de Schreftsroll opmoaken kaun?" 3-4 Oba doa wia kjeena em Himmel, ooda oppe Ieed, ooda en daut Doodenrikj, dee daut Rajcht haud de Schreftsroll optomoaken.Un aus ekj daut hieed, dan funk ekj aun bettalich to roaren. Wiel doa wia kjeena waut eenem daut openboaren kunn, waut en de Schreftsroll jeschräwen stunt. 5 Un eena von de 24 Ooms säd to me, "Hia met däm roaren opp! Kjikjt doch, eena von Juda siene Nokomen, dee aus de Leiw von Juda bekaunt es, un dee dän Kjennich David siene Rejierungsmacht jeorwen haft, dee haft de Äwahaunt äwa Soton un dän Doot jekjräajen, un soo haft hee daut Rajcht de Stampels von de Schreftsroll entwei to moaken, soo daut hee de Schreftsroll opmoaken kaun."
6 Un ekj kjikjt, un ekj sach een Laum, waut soo leet aus wan daut mol aus een Opfa wia jeschlacht worden, un daut stunt mank de 24 Ooms, dee tweschen de fea läwendje Jestaulten, un dän Troon stunden. Un daut Laum haud säwen Häna, un säwen Uagen, dee eenem Gott siene säwen Jeista väastalen, dee Gott nämlich deenen, un dee eenem dän Heiljem Jeist siene groote Krauft väastalen, dee Gott äwa de gaunze Welt veschekjt haud. 7-9 Un daut Laum jinkj, un neem sikj de Schreftsroll von de rajchte Haunt, von dän dee opp de Troon jesäten haud, un doamet läden sikj de vea läwendje Jestaulten, un de 24 Eltaschtasch sikj plaut ver daut Laum han. Un de läwendje Jestaulten un de 24 Ooms hauden jieda ne Hoap, un een goldnet Weiruakdinkj waut voll Weiruakb wia, waut eenem nämlich de Jebäda, von Gott sien Volkj väastalen, un dan sungen see daut Laum een nieet Leet väa. Un dit es waut see am dan hauden väajesungen,
"Du hast daut Rajcht de Schreftsroll to nämen,
un de Stampels entwei to moaken.
Wiel du hautst die aus een Opfa daut Läwen jejäft,
un hautst de Sinden von väle Menschen, met dien Bloot betolt,
un hautst äant dan aus een Volkj,
von mank aul de veschiedne Velkja oppe Ieed fa Gott jekoft,
un soo jehieren see nu too am.
10 Un Gott sien Volkj hautst du aus Kjennichs un Priestasch aunjestalt,
dee tweschen Menschen un Gott vemedlen kjennen,
un dee nochmol oppe Ieed rejieren woaren."
11 Un ekj sach woo de vea läwndje Jestaulten, mank de 24 Ooms jestonen hauden, dee nämlich rom daut Laum un de Troon stunden, un Butakaunt rom de vea Läwendje Jestaulten sach ekj soo väl millionen von Enjel, daut eena dee nich aula talen kunn. 12 Un de Enjel freiden sikj uk daut daut Laum sikj de Schreftsroll haud nämen kunt, un dan hauden see am gaunz lud een Leet väajesungen. Un dit es waut see am dan väasungen,
"Daut Laum, waut sikj aus een Opfa haud schlachten loten,
haft daut Rajcht jekjräajen,
daut hee sikj Gott siene groote Krauft, un Rikjdom, un Weisheit, un Macht, oppnämen kaun,
un daut am nu aus Harscha saul je-ieet un jeloft woaren."
13 Un ekj hieed aules waut Läwen haud, waut nämlich em Himmel, un oppe Ieed, un en daut Doodenrikj, un en em Mäa jeläft haud, un see sungen Gott un daut Laum een Leet väa, un dit es waut see äant dan hauden väajesungen,
"Mucht de Gott, dee opp sien himlischen Troon setten deit,
un sien Laum, doch je-ieet woaren.
Mucht äant fa äare groote Krauft, un Rikjdom, un Weisheit, un Macht, eewich jeloft woaren."
14 Un de fea läwendje Jestaulten säden, "Jo, soo lot daut mau aula passieren!" Un de 24 Ooms follen ver daut Laum han, un see bäden am aun.