Paulus haud de gleubje Tessalonicha erkjläat, daut see sikj nich fa dän Harn sien Jerechtsdach ferchten brukten
5
1-2 Oba leewe jeistliche Jeschwista, daut es doch nich needich, daut wie junt waut Nieet wudden schriewen brucken, von de Tieden wan de Har aus Rechta trigj no de Ieed komen woat, un von woo daut dan enne Welt sennen woat, wiel junt es de Lia von dän Harn sien Jerechtsdacha aul goot bekaunt. Jo, un soo weet jie doch sea goot, daut wan de Har trigj no de Ieed komen woat, daut hee dan soo offerhoffs komen woat, aus wan een Deef wäm de Nacht bestälen kjemt. 3 Un krakjt wan de Weltmenschen sikj woaren secha feelen, un sajen, "Wie läwen frädlich un onen Jefoa!", dan woat de Har soo offerhoffs komen, de Welt to venichten, aus wan ne schwangere Fru äare Weedoag met eemol aunfangen, wan see nämlich bat doa es, daut see äa Kjint to Welt brinjen mott. Jo, un de Weltmenschen woaren dän Harn sien Jerecht nich utkleiwen kjennen.4 Oba jie, leewe jeistliche Jeschwista, läwen jeistlich nich soo em Diestren, daut junt dän Harn sien Jerechtsdach, soo äwarauschen wudd aus een Deef, wan dee wäm bestälen kjemt. 5-7 Jie sent jeistlich doch aula, soo aus de Menschen, dee äa Läwen äwadach em Licht utfieren, un dee jeistlich aules enwoaren, waut rom äant passieet. Jo, wie aus Gott sien Volkj, sent doch nich soo aus dee, waut de Nacht enne jeistliche Diestanis läwen, un dee nämlich nich seenen kjennen, waut jeistlich rajcht ooda orrajcht es. Nä, wie läwen jeistlich äwadach em Licht, un soo well wie jeistlich mau waka un nichta sennen, un emma doonen waut rajcht es, soo daut wie ons nich vefieren wudden, wan de Har aum Jerechtsdach trigj komen woat. Jo, un soo well wie jeistlich dan nich em Diestren läwen, wiel em Diestren woat doch emma jeschlopen un jesopen, un daut es oba nich woo wie jeistlich läwen sellen.
8 Oba wie, dee jeistlich soo läwen aus Menschen dee äa Läwen äwadach utfieren, well wie mau nichta sennen, un ons jeistlich soo beschitzen, aus wan een Soldot sikj siene Kjriejeskjleeda äwatrakjt. Jo, un soo aus een Soldot sikj de Brost dan met een Broststekj beschizt, soo well wie ons doch jeistlich beschitzen, doamet daut wie ons gaunz opp Jesus veloten wudden, un doamet daut wie Gott un aundre Menschen von Hoaten leewen wudden. Un soo aus een Soldot sikj dan een Kjriejeshoot oppsaten wudd, om sikj dän Kopp to beschitzen, soo well wie ons doch emma gaunz opp Jesus veloten, daut hee ons von Gott sien tookjinftje Strof jerat haft.
9 Jo, wie kjennen ons doch opp Jesus fa de tookjinftje Radunk veloten, wiel Gott haud daut niemols fa ons aus sien Volkj bestemt, daut hee ons en sien Oaja bestrofen wudd. Nä, waut Gott fa ons bestemt haud, es daut de Har Jesus Christus ons nochmol raden woat. 10 Jo, de Har Jesus wia fa ons jestorwen, om onse Sinden to betolen, doaropp daut wie nochmol wudden met am toop läwen, un auf wie dan woaren jeistlich waka sennen ooda nich, wan hee trigj kjemt, doawäajen woa wie nochmol met am toop läwen.
11 Un wiel jie junt opp dit veloten kjennen, waut wie hia met junt metdeelen, dan treest junt doch omzajcht, un but junt jeistlich mau wieda soo opp, aus jie daut aul doonen.
Paulus haud de gleubje Tessalonicha väajeschräwen, woo see aus Gott sien Volkj toop läwen sullen
12 Un nu prachren wie junt, leewe jeistliche Jeschwista, daut jie dee Menschen mau huach aunerkjanen wudden, dee aus june Leidasch sea fa dän Harn schaufen, doamet daut see junt jeistlich belieren un trajchtwiesen, äwa woo jie läwen sellen. 13 Leeft äant, un wiest äant väl Respakjt om äare Oabeits haulwa, un läft frädlich eena met däm aundren toop.
14 Un leewe jeistliche Jeschwista, nu rod wie junt sea too, daut jie dee trajchtwiesen wudden, dee bie junt nuscht doonen, un dee bloos een onnordentlichet Läwen fieren, un daut jie dee oba treesten wudden, waut bie junt jeistlich schuchta sent. Jo, un daut jie dee unjastetten wudden, waut bie junt jeistlich schwak sent, un daut jie met aulem wudden jeduldich sennen.
15 Un seet daut wan junt von irjentwäm schlajcht behaundelt woat, daut jie kjeenem met Beeset trigjtolen wudden, un daut jie oba eena fa dän aundren, un uk fa aule Menschen, emma daut baste em Senn wudden han.
16-18 Un wiel jie jeistlich met Christus Jesus toop ve-eenicht sent, dan es daut Gott sien Wellen, daut jie too aule Tieden wudden froo sennen, un daut jie emma to Gott bäden wudden, un daut jie en aule Omstend wudden dankboa sennen.
19-20 Un jie sellen daut nich veachten, waut de Heilje Jeist, derch irjent eena von junt doonen well, waut nämlich soo wudd sennen, aus wan eena een Fia utjeeten wudd, un doot uk kjeene profeetische Bootschoft veachten, waut de Heilje Jeist junt, derch irjent eena von junt metdeelen lat.
21-22 Besent junt äwa aules waut jie hieren, om to seenen waut werkjlich von Gott kjemt, un dan hoolt junt aun daut goode, un habt oba nuscht met irjent waut to doonen waut bees es.
Toom Schluss haud Paulus de gleubje Tessalonicha aulet Baste jewenscht
23 Un wie bäden to dän nämeljen Gott, dee ons emma Fräd jeft, daut hee junt gaunz fa sikj oppoat saten wudd, soo daut jie soo läwen wudden aus Gott sien Volkj nämlich läwen saul. Un wie bäden uk, daut hee junt emma bewoaren wudd, soo daut jie en aules waut jie denkjen, un en waut junt jankat, un en waut jie doonen, emma soo läwen wudden, daut kjeena junt fa irjent waut wudd beschuljen kjennen, wan de Har Jesus, aus Gott sien Enjesäajenda Kjennichb trigj komen woat. 24 Un jie kjennen junt doaropp veloten, daut Gott junt soo aus dit bewoaren woat, wiel de Gott dee junt beroopt haft to sien Volkj to jehieren, es een trua Gott, opp dän jie junt gaunz veloten kjennen.
25-26 Leewe jeistliche Jeschwista, wie bedden junt, daut jie fa ons bäden wudden, un daut jie aul onse jeistliche Jeschwista von Tessalonich, soo met een breedalichen Kussc von ons bejreesen wudden, aus wan wie doa selfst wieren, un äant selfst bejreesten. 27 Ekj räd to junt, aus eena dee vom Harn de Vollmacht haft fa am to räden, un soo deen ekj junt aun, daut jie disen Breef soo ver de gaunze Vesaumlunk läsen wudden, daut aul onse oppoat jesade Jeschwista, dän wudden to hieren kjriejen.
28 Un mien jebät fa junt es, daut de Har Jesus Christus junt wudd leeftolich sennen, un daut hee junt jeistlich aules wudd tookomen loten waut goot es. Jo, soo lot daut mau aula passieren!