Un Paulus wees met de Haunt, daut hee sikj veauntwuaten wull, un säd, "Ekj frei mie Kjennich Agrippa, daut ekj mie fa aul de Aunkjläaj von de Juden, ver die veauntwuaden doaf. 3 Wiel ekj weet daut du onse judische Sitten goot kjanst, un du weetst uk waut fa Froagen wie unja ons emma bestrieden. Un soo bedd ekj die soo goot too sennen, un mie jeduldich aunhorchen.

4 "De Judenfierasch von Jerusalem kjanen mie aula sea goot. See weeten wua ekj jebuaren sie, un woo ekj mank mien Frintschoft oppjewossen sie, un see weeten uk woo ekj bat Jerusalem jekomen sie, un waut ekj doa aules jedonen ha. 5 Un wan see daut wudden toostonen, dan wudden see daut uk goot bestädjen kjennen, daut ekj een Pharisäa wia, dee ne Grupp sent, dee sikj bie ons daut dolste bemieejen, no daut Jesaz to läwen.

6 "Un de Uasoak wuarom ekj mie hia verem Jerecht veauntwuaten mott, es wiel ekj mie doaropp veloten doo, daut Gott aules doonen woat, waut hee onse Väavodasch vesproaken haft. 7 Un doawäajen doonen onse Menschen, dee von Jakob siene twalw Säns aufstaumen, Gott emma Dach un Nacht aunbäden, wiel see luaren uk daut Gott sien Vespräakjen fa äant volfellen saul. Un daut es oba wiel ekj mie opp dise nämelje Vespräakjunk veloten doo, O Kjennich Agrippa, daut see mie verem Jerecht jenomen hant. Wiel see wellen daut nich soo han, daut Gott een Mensch von mank dee Doodes haft oppjewakjt. 8 Wuarom es junt daut soo onjleeflich, daut Gott een Mensch von mank de Doodes oppwakjen kaun?

9 "Ekj selfst docht mol krakjt soo aus onse Judenfierasch, un ekj schauft emma soo sea aus mäajlich jäajen Jesus von Nazaret, un jäajen aules waut en sien Nomen jedonen wort. 10 Un doaropp hauden de väastonende Priestasch mie dan uk de Vollmacht jejäft, soo daut ekj Gott sien oppoat jesadet Volkj en Jerusalem vefoljen durf. Un soo stoppt ekj uk väle von de Gleubje em Jefenknis en, un wan de Judenfierasch dee rechten un ombrinjen wullen, dan wäld ekj emma soo daut see stoawen sullen. 11 Un aul de Judenschoolen von de Jäajent von Judäa wia ekj uk foaken runt jegonen, un ekj bestroft de Gleubje doaropp daut see sikj von Jesus sullen aufsajen, un ha äant bedwungen, daut see Gott fluchen sullen. Un ekj wia uk soo wuttich äwa de Gleubje, daut ekj dee bat em Utlaunt vefolcht ha.

12-13 "Un daut kjeem soo rom, daut de väastonende Priestasch mie hauden de Vollmacht jejäft, om de gleubje Juden von Damaskus fausttonämen. Un ekj saj die leewa Kjennich, aus ekj un miene Bejleita opp Meddach, meist bat Damaskus jekomen wieren, dan dacht doa met eemol een Licht vom Himmel rom ons opp, waut dacha wia aus de Sonn. 14 Un wie follen aula no de Ieed, un ekj hieed ne Stemm, dee mie oppe Aramäische Sproak aunräd, un fruach, 'Saul, Saul, wuarom vefolchst du mie? Du holst doch bloos vejäfs no mie ut.'"^a

15 "Un ekj fruach dän, 'Har, wäa best du?'

"Un de Har säd, 'Ekj sie Jesus, dee nämelja dän du vefoljen deist. 16-17 Sto nu mol opp, wiel ekj ha mie aun die openboat, om die aus mien Deena un Zeij, no de Nich-Juden to schekjen. Wiel du saust äant vetalen, waut du aules von mie jeseenen hast, un waut ekj die uk noch aula wiesen woa, un ekj woa die von diene Menschen, un von de Nich-Juden beschitzen. 18 Du saust de Nich-Juden de Uagen jeistlich opmoaken, soo daut see von Soton siene diestre Macht rut finjen kjennen, un soo daut see daut jeistlichet Licht erkjanen muchten, soo daut see wudden seenen kjennen, woo Gott äwa äant rejieren well. Un dan woat Gott äant fa äare Sinden vezeien, un äant een jeistlichet Oafschoft^b met sien Volkj toop jäwen, dän hee sikj derch äa Gloowen aun mie oppoat jesat haft.'

19 Un Paulus räd wieda, un säd, "Un soo, Kjennich Agrippa, ekj wia Jesus en aules jehuarsom, un deed waut hee mie vom Himmel ut befolen haud. 20 Toieescht vetald ekj siene Bootschoft en Damaskus wieda, un dan prädijd ekj daut uk en Jerusalem, un en de gaunze Jäajent von Judäa wieda, un dan jinkj ekj mank de Nich-Juden prädjen. Un ekj erkjläad äant aula, woo see äare beese Denkjens Oat endren sullen, un daut see sikj opp Gott veloten sellen, un daut see een goodet Läwen fieren sellen, wuamet see aundre bewiesen kjennen, daut see sikj opp Gott veloten.

21 Un daut wia wiel ekj soo mank de Nich-Juden jeprädicht haud, daut atelje Juden mie em Tempel aunjreepen, un mie vesochten doot to moaken. 22-23 Oba Gott haft mie beschitzt, soo daut ekj am bat vondoag noch emma deenen kaun. Un soo sto ekj ver huage un jerinje Menschen, un ekj prädij äant bloos waut en de Schreften von Moses, un de Propheeten, aul lang em verut jeschräwen steit. Un de Bootschoft waut ekj wieda prädij es, daut de Christus wudd lieden un stoawen motten, un daut hee dee ieeschta sennen wudd, dee von mank de Doodes oppstonen wudd, un daut hee de Juden, un uk de Nich-Juden een jeistlichet Licht jäwen wudd, soo daut see wudden seenen kjennen, waut de Woarheit es."

24 Un aus Paulus daut jesajcht haud, dan säd Festus gaunz lud, "Paulus, du best domm! Du hast soo väl studieet, daut du best verekjt jeworden!"

25 Oba Paulus auntwuad dän Harscha, un säd, "Huach je-ieeda Festus, ekj kaun kloa denkjen, un ekj sie nich domm. Aules waut ekj jesajcht ha es de reine Woarheit. 26 Un ekj sie mie secha daut de Kjennich Agrippa om dise Dinja goot om weet, un soo räd ekj frie ver am von dise Dinja, wiel dee sent nich hinja ne Akj wua, em Plietschen passieet. 27 Un soo froag ekj die Kjennich Agrippa, jleefst du waut en de profeetische Schreften jeschräwen steit? Ekj weet daut du aun dee jleefst!"

28 Un Agrippa auntwuad Paulus, un säd, "Daut fält nich väl, un dan haudst du von mie een Christ jemoakt."

29 Un Paulus auntwuad am, un säd, "Auf du fuaz toom Gloowen kjemst ooda lota, kjemt nich soo em Froag, waut em Froag kjemt es daut du toom Gloowen kjemst. Un soo bäd ekj to Gott, daut nich bloos du, oba daut aul jie dee mie nu hieren, soo toom Gloowen komen muchten aus ekj sie, un daut jie oba nich doafäa ensetten brukten soo aus ekj nu mott."

30-31 Aus Paulus daut jesajcht haud, dan stunden de Kjennich Agrippa, un de Harscha Festus, un Berenike, un aul dee aundre opp, un aus see von de Haul wieren rut jegonen, dan beräden see sikj waut Paulus aules jesajcht haud. Un see kjeemen too dän Entschlus, daut Paulus oschuldich wia, un daut hee sikj dän Doot, ooda daut ensetten nich vedeent haud.

32 Un Kjennich Agrippa säd too Festus, "Wan Paulus daut nich velangt haud, daut de Kjeisa am vehieren sull, dan haudst du am frieloten kunt."