De Judenfierasch un äa Offkot beschuljden Paulus ver däm Harscha Felix
24
Fief Doag lota wia de Huagapriesta Hananias, met atelje von de Ooms vom Volkj, un een Offkot, dee Tertullus heet, no Cäsarea jekomen, om Paulus ver dän Harscha Felix to vekloagen. 2-3 Un aus see Paulus hauden ver dän Rechtastool jeroopt, dan vekloagd Tertullus am, un säd,"Je-ieeda Felix, ekj bejrees die toieescht, un well mie bie die bedanken. Wiel wie aus Juden, erkjanen waut du aules fa ons jedonen hast, un wiel du soo väabedocht best, woaren väle Dinja em Launt vebätat. Un daut es uk wiel du soon gooda Harscha best, daut wie hia soo frädlich läwen kjennen.
4 Un wiel ekj die nich lenja vesiemen well, dan bedd ekj die soo goot too sennen, un mie een bät aunhorchen. 5 Wie hant faust jestalt, daut dis Maun een sea jefäadelja Mensch es, wiel hee es eena von de väaschte von de Nazarener Partie, dee aulewäajen jäajen de reemische Rejierunk schauft, un wuaemma hee es, doa räajcht hee de Juden emma opp. 6 Un doatoo vesocht hee uk noch, dän Tempel en Jerusalem to entheiljen, un doawäajen hauden onse Menschen am faustjenomen. 7 Un aus wie am no onse Jesazen no rechten wullen, dan kjeem Lysias de Äwahauptmaun met siene Soldoten doa mank, un see reeten am met groota Jewault von ons wajch. Un Lysias schekjt ons no die, un säd daut wie am bie die vekloagen sullen. 8 Wan du Paulus selfst auf froagen wurscht, dan wurscht du daut fuaz utfinjen, daut dit aula stemt waut ekj saj."
9 Un de aundre Judenfierasch, dee Tertullus bejleit hauden, bestädijden daut aules waut Tertullus jesajcht haud, soo wia.
Paulus veauntwuad sikj ver däm Harscha Felix
10 Dan jeef Felix een Tieekjen, daut Paulus sikj veauntwuaden durf, un dan funk Paulus aun to räden, un säd,
"Ekj weet daut du aul väle Joaren aus Rechta äwa onse Menschen jedeent hast, un soo frei ekj mie, daut ekj mie ver die veauntwuaden doaf. 11 Du kaust die daut leicht no stonen, daut ekj aul väle Joaren nich wia en Jerusalem jewast, un daut ekj twalw Doag trigj wada bat Jerusalem jekomen wia, wiel ekj Gott em Tempel aunbäden wull. 12 Dise Mana waut mie bie die vekloagen, hant mie niemols doabie aunjetroffen wan ekj mie met irjentwäm jesträden ha, ooda wan ekj irjentwua een Opprua aunjefongen ha; nich em Tempel, un nich en eene Judenschool, un uk nich oppe Gausen. 13 See hant kjeen Bewies, fa waut see mie beschuljen.
14 "Oba ekj sto die daut wellich too, daut ekj mie no de Lieren vom Harn Jesus rechten doo, un daut sent dise Lieren krakjt waut dise Mana fa ne faulsche Lia erkjanen. Un ekj deen dän nämeljen Gott, dän onse Väavodasch emma hant aunjebät, un ekj jleew uk aun aules, waut en de Schreften von Moses un de Profeeten jeschräwen steit. 15-16 Un ekj weet daut dise Mana sikj doaropp veloten, daut Gott aule Menschen nochmol vom Doot oppwakjen woat, eendoont auf eena jerajcht es ooda nich. Un wiel ekj dise nämelje Hopninj uk ha, dan bemieej ekj mie emma, daut ekj ver Gott un Menschen, een kloaret Jewesse ha."
17 Un Paulus erkjläad Felix woo sikj daut en Jerusalem aula haud utjespält, un säd, "Daut kjeem soo rom, no dän ekj atelje Joaren em Utlaunt jeläft haud, dan kjeem ekj ver twalw Doag wada no Jerusalem, om onse oame Menschen met Jelt mettohalpen, un uk wiel ekj Gott em Tempel aunbäden wull. 18-19 Un atelje Juden von Asieen, hauden mie toofalich em Tempel jeseenen, aus ekj mie doa jesazlich jereinicht haud, un doa wieren oba weinich Menschen rom, un doa wia uk kjeen Opprua aus daut passieed. Un wan wäm daut traffen wudd mie to vekloagen, dan sullen de Juden von Asieen doch selfst hia sennen, un mie ver die vekloagen. 20 Ooda froag dise Mana doch, fa waut daut Huage Rot mie haud schuldich jefungen, aus Lysias mie wäajen de Juden von Asieen, ver daut Huage Rot jebrocht haud. 21 Daut eensje wuafäa see mie beschuljen kjennen, es daut ekj gaunz lud säd, 'Mie woat vondoag vekloacht, wiel ekj mie doaropp velot, daut de Doodes wada oppstonen woaren.'"
22 Felix haud goot om de Lieren vom Harn Jesus jewist, un haud sikj entschloten, daut hee Paulus noch nich uadeelen wull, un säd, "Wan Lysias, de Äwahauptmaun bat hia kjemt, dan woa ekj bäta weeten, woo ekj Paulus rechten saul." 23 Un dan roopt Felix een Hauptmaun, un befool am Paulus to bewoaken, un daut hee am uk wesse Väarajchten jäwen sull. Nämlich, daut wan Paulus Jast oppnämen wull, ooda wan siene Frind am met irjent waut uthalpen wullen, dan sull de Hauptmaun daut nich vehindren.
Paulus vetald dän Harscha Felix un siene Fru Drusilla, von woo eena sikj opp dän Harn Jesus veloten saul
24 No atelje Doag wieren Felix, un siene judische Fru Drusilla jekomen, un aus Felix sikj haud Paulus no sikj brinjen loten, dan erkjläad Paulus äant waut daut bediet, wan eena sikj opp Jesus Christus velat. 25 Un aus hee äant von Gott siene Jerajchtichkjeit vetald, un daut eena sikj selfst beharschen saul, un daut Gott aulem nochmol rechten woat, dan enjst Felix sikj, un säd, "Paulus, dit rieekjt opp eemol too. Wan mie daut paust, dan kaust du mie nochmol mea vetalen." 26 Un Felix interesieed sikj fa daut Wuat Gottes, un to jlikja Tiet wenscht hee sikj oba daut Paulus sikj von am frie kjeepen wudd, un soo leet hee Paulus foaken no am komen, soo daut hee met am nobren kunn.
27 Un soo vejinjen twee Joa bat Porcius Festus, de nia Harscha jeworden wia. Un wiel Felix de Juden een Jefaulen doonen wull, dan leet hee Paulus em Jefenkjnis ensetten.