Paulus veleet Ephesus, un reisd derch de Jäajende von Mazedonieen un Achaja
20
1-2 No dän Opprua en Ephesus, haud Paulus sikj de Gleubje von Ephesus aula toop jeroopt, om äant noch eemol Moot too tospräakjen. Un aus Paules von de Gleubje haud aufscheet jenomen, dan reisd hee loos derch de Jäajent von Mazedonieen, bat hee bat Griechenlaunt† kjeem. Un aul de Gleubje, dee hee hinjawäajes auntroff, spornd hee sea aun, daut see sikj sullen opp Gott veloten.3-6 Un no dän daut Paulus dree Moonat en Griechenlaunt vebrocht haud, dan haud hee jeplont opp een Schepp trigj no Syrieen to foaren, un daut atelje Mana am bejleiten sullen, nämlich,
Sopater, de Sän von Pyrrhus, von Beräa,
un Aristarchus, un Sekundus von Thessalonich,
un Gajus von Derbe,
un Timotäus,
un Tychikus, un Trophimus, dee beid von Asieen kjeemen.
Oba aus Paulus haud to hieren jekjräajen, daut atelje Juden am ombrinjen wullen, dan entschloot hee sikj leewa derch Mazedonieen to gonen, un de Mana dee am sonst bejleiten sullen, stieejen doawäajen opp een Schepp en, un fuaren veropp bat Troas. Un Paulus un ekj† jinjen derch Mazedonieen bat Filippi, un aus daut 'Fast von Onjesuadet Broot' vebie wia, dan stieej wie en Filippi opp een Schepp en, un fief Doag lota kjeem wie bat Troas. En Troas troff wie ons wada met de Mana toop, dee ons veropp jefoaren wieren, un wie bleewen eene Wäakj en Troas, ea wie wieda reisden.
Eutychus foll von daut dredde Stock no de Ieed, un Paulus wuak am vom Doot opp
7 Sindach zeowes haud wie ons met de Gleubje von Troas vesaumelt, om met äant toop Owentmol to fieren. Un Paulus haud jeplont daut wie dän näakjsten Dach wieda reisen wullen, un wiel hee noch väl met de Gleubje metdeelen wull, dan prädijd hee bat medden enne Nacht. 8-9 Un doa brenden väle Laumpen, en de bowa Stow wua wie ons vesaumelt hauden, un een junga Maun, dee Eutychus heet, saut en een opnet Fensta un horcht. Un aus Paulus aul lang jeprädicht haud, dan schleepad Eutychus soo sea, daut hee doa wia enjeschlopen. Un soo kjeem daut soo rom, daut hee von daut dredde Stock no de Ieed jefollen wia. Un aus de Gleubje bat am kjeemen, dan wia hee aul doot.
10 Un aus Paulus rauf jegonen wia, dan schmeet hee sikj opp Eutychus nopp, un hee foot am om, un säd, "Moakt junt kjeene Sorjen, hee läft!" 11 Un aus Paulus un de aundre wada wieren trigj nopp jegonen, dan fieed wie daut Owentmol, un wie eeten ne Moltiet, un Paulus prädijd bat daut zemorjes aunfunk to doagen, un dan reisd wie wada loos. 12 Un de Gleubje neemen Eutychus jesunt no Hus, un see wieren aula sea jetreest.
Paulus reisd von Troas bat Milet
13-14 Paulus haud beschloten, daut hee bat de Staut von Assos gonen wull, un daut wie oba opp een Schepp foaren sullen. Un aus wie bat Assos kjeemen, dan stieech hee opp daut nämelje Schepp en, wuaropp wie bat doa jekomen wieren, un von doa fua wie bat daut Darp von Mitylene. 15 Dän näakjsten Dach fua wie von Mitylene wieda bat ne Städ, dee von de Insel von Chios jäajenäwa wia, un aun dän dredden Dach kjeem wie bat de Insel von Samos, un een Dach lota kjeem wie bat de Howe von de Staut von Milet.
16-17 Paulus haud beschloten, daut hee noch to daut Pinjstfast en Jerusalem sennen wull, un soo kunn wie nich lenja en Asieen bliewen, un soo fua wie dan bie Ephesus bloos vebie bat Milet, un von Milet bestald Paulus, daut de Ooms von de gleubje Vesaumlunk von Ephesus, bat doa komen sullen.
Paulus spornd de Ooms von Ephesus aun, de Vesaumlunk tru to deenen
18-19 Un aus de Ooms von Ephesus bat Milet jekomen wieren, dan spornd Paulus äant aun, un säd, "Jie kjanen mie aul von don, aus ekj bat hia no Asieen jekomen sie, un soo weet jie woo ekj mie emma vehoolen ha. Jie weeten woo ekj dän Harn emma deemootich un met väle Tronen jedeent ha, un woo ekj de Vefoljunk von de Juden ha derchmoaken must. 20 Un aus ekj junt de goode Norecht haud väa jeprädicht, dan ha ekj niemols waut trigj jehoolen waut junt jeistlich waut halpen kunn. Daut Wuat Gottes ha ekj en Ephesus ver groote Gruppen jeprädicht, un daut ha ekj uk met eenselne Persoonen, en äare Hiesa met jedeelt. 21 Un ekj ha junt aula emma eene Bootschoft väa jeprädicht, nämlich, daut jie june beese Denkjens Oat endren sullen, un daut jie aun Gott jleewen sullen, un daut jie junt opp dän Harn Jesus Christus veloten sullen. Un mie hilt sikj daut uk emma jlikj auf ekj mie met Juden ooda Nich-Juden aufjeef, miene Bootschoft wia fa aulem äwareen.
22 "Un nu bedwinkjt de Heilje Jeist mie no Jerusalem to reisen, un ekj weet oba nich waut mie doa aules passieren woat. 23 Ekj weet bloos, daut wan ekj von eene Staut no de aundre go, dan wiest de Heilje Jeist mie doaropp han, daut ekj noch woa lieden un ensetten motten. 24 Auf ekj läw ooda nich, daut es mie dolla eendoont. Mien eensjet Zeil es daut ekj de Oabeit un daut Apostel Aumt, waut ekj von dän Har Jesus jekjräajen ha, mau tru foadich moaken kaun, nämlich, daut ekj de goode Norecht von Gott siene Jnod, doa wieda vetalen mucht, wua Gott mie han fieet.
25-27 "Ekj weet daut jie, un aul de Gleubje von Ephesus, woaren mie nich wada seenen. Un wiel ekj mien Poat jedonen ha om de goode Norecht met junt mettodeelen, dan saj ekj junt, daut ekj nich wieda veauntwuatlich sie, wan nu noch wäa veloaren jeit. Wiel aus ekj junt de goode Norecht haud väa jeprädicht, von waut Gott aules fa sien Volkj jeplont haft, dan ha ekj nuscht trigj jehoolen.
28 "Un wiel jie weeten woo Gott rejieren deit, dan paust fa junt selfst opp, un fa de gaunze gleubje Vesaumlunk. Wiel de Heilje Jeist haft junt aus Ooms bestäticht, om de Vesaumlunk jeistlich soo to ernäaren un beschitzen, aus wan een gooda Hoad, no sien Wieet siene Schop oppaust. Jesus wia aum Kjriez jestorwen, un haud sikj de Gleubje von Soton siene Macht friejekoft. Un soo denkjt dan doaraun, daut see am jehieren, un nich junt.
29 Ekj weet daut faulsche Lierasch soo aus rietende Wilw oppkomen woaren, un wan jie dee met äare Läajnise woaren tochloten, dan woaren see de Vesaumlunk soo venichten, aus wan een Wolf mank ne Häad Schop kjemt. 30 Un von june ieejne Vesaumlunk, woaren Mana met vedreide Lieren oppkomen, un see woaren de Vesaumlunk soo vesieekjen to veleiden, daut see äant jehorchen sellen. 31 Doarom blieft jeistlich waka, un denkjt emma aun woo ekj mank junt jedeent ha. Wiel fa dree Joa ha ekj junt Dach un Nacht emma, met väle Tronen vemont un trajchtjewäsen, soo daut jie weeten wudden waut de Woarheit es, un soo daut jie junt nich wudden veleiden loten.
32 "Un nu äwajäw ekj junt aun Gott, un aun de goode Norecht von siene Jnod, wiel doaderch kjenn jie junt jeistlich stoakjen. Un wan jie de goode Norecht jehorchen woaren, dan woat Gott junt uk een jeistlichet Oafschoft jäwen, wan hee sien oppoat jesadet Volkj nochmol beloonen woat.
33-34 "Jie weeten daut ekj niemols no Jelt ooda straume Kjleeda hinjaraun wia, wiel jie hant doch jeseenen woo ekj selfst met dise Henj jeschauft ha, un woo ekj fa mie, un fa miene Metoabeida vesorcht ha. 35 Un ekj ha junt uk emma väajeläft, woo eena sea oabeiden mott, soo daut eena de Schwaken, un de Oame methalpen kaun. Denkjt doch emma aun dän Har Jesus siene Wieed, wiel Jesus säd, 'Wäa jäwen deit, kjricht doch vom jäwen ne väl jratre Freid, aus dee waut kjriejen deit.'"
36 Un aus Paulus utjerät haud, dan kjneed hee sikj met de Ooms von Ephesus toop han, un dan bäd hee met äant toop. 37-38 Un de Ooms fungen aula aun to hielen, un see footen am om, un see kusten am. Un waut äant besondasch truarich muak, wia daut hee säd, daut see am niemols wada seenen wudden. Un aus daut Tiet wia, dan jinjen de Ooms met Paulus toop nom Schepp.