4-5 Un aus Paulus, un Silas, un Timotäus von eene Staut no de aundre jegonen wieren, dan vetalden see de Gleubje, von dän Beschluss von de Apostel un Ooms von Jerusalem, nämlich, daut de Nich-Juden sikj nich brukten beschnieden loten, un daut see sikj oba nich met irjent Aufjetta aufjäwen sullen, un daut see nich Bloot äten sullen, ooda Fleesch von Tieren dee nich rechtich utjeblat wieren, un daut see sikj nich jeschlajchtlich veläwen sullen. Un Paulus un siene Bejleita rooden de Nich-Juden sea too, sikj no dise Väaschreften to rechten, un soo worden de gleubje Vesaumlungen em Gloowen jestoakjt, un auledach kjeemen emma mea Menschen toom Gloowen.

6-8 De Heilje Jeist haud Paulus, un siene Bejleita veboden, derch de Jäajent von Asieen to reisen, un soo jinjen see wieda nom Nuadwasten derch de Jäajende von Phrygieen un Galatieen. Un aus see bat de Jäajent von Mysieen kjeemen, dan wullen see nom Nuaden reisen, no de Jäajent von Bithynieen, oba Jesus sien Jeist veboot äant daut, un soo jinjen see derch de Jäajent von Mysieen, bat de Howe von de Staut von Troas.

9 En Troas wia Gott de Nacht no Paulus jekomen, un haud am em Jeist met jenomen. Un Gott wees am een Maun von Mazedonieen, dee doa jestonen haud, un dee am prachad, un säd, "Komm äwa no de Jäajent von Mazedonieen, un halp ons!" 10 Un wiel de Har ons^b soo kloa jefieet haud, dan muak wie ons uk fuaz reed, un wie reisden loos no Mazedonieen, om de Menschen von Mazedonieen de goode Norecht to prädjen.

11 En Troas wia wie opp een Schepp enjestäajen, waut ons jlikj nom Nuadwasten, bie de Insel von Samothrazieen vebie neem, un dän näakjsten Dach kjeem wie bat de Howe von de Staut von Neapolis. 12 Von Neaoplis jinj wie too Foot nom Nuadwasten, bat de Staut von Filippi, un doa vebrocht wie atelje Doag. Filippi es eene von de wichtichste Städa, von de ieeschte Bezirkj von de Jäajent von Mazedonieen, un Filippi wort von de Reema rejieet.

13 Un aus de Sabat jekomen wia, dan jinj wie bat Butakaunt Staut, no eene Städ aum Riefa, wua wie dochten daut de Juden sikj wudden toom bäden vesaumlden. Un aus wie bat de Städ kjeemen, dan hauden atelje Frues sikj doa uk aul vesaumelt, un soo sad wie ons bie äant dol, un fungen aun met äant toop to räden.

14 Eene von de Frues heet Lydia, un see wia ne nich-judische Fru, dee sikj mol too daut Judentum bekjieet haud. Lydia wia ne Jeschaftsfru, dee mol von de Staut von Thyathirer jekomen wia, un see schachad met Rootbleiwet Zeich. Un aus see sikj Paulus siene Bootschoft haud aunjehorcht, dan muak de Har äa daut Vestentnis op, soo daut see daut venämen, un aunnämen kunn waut Paulus säd. 15 Un Lydia un äa gaunzet Hushault leeten sikj deepen, un see loot ons sea en, un säd, "Wan jie meenen daut ekj werkjlich toom Gloowen aum Harn jekomen sie, dan komt un blieft bie ons aus Jast." Un see jeef uk nich no, bat wie äa daut toosäden.

16 Un daut wia soo rom jekomen, daut aus wie wada nom Riefa jinjen, no de Städ wua de Juden sikj emma toom bäden vesaumelden, dan bejäajend ons eene Sklowenmejal, dee met een beesen Jeist besäten wia. See haud een Woasajajeist, dee äa doamet veholp de Menschen em verut to sajen, waut äant passieren wudd, un see brocht äare Wieets väl Jelt en. 17 De Sklowenmejal kjeem ons aulewäajen hinjaraun, un see schrieech bloos eegol, un säd, "Dise Menschen deenen dän aulahechsten Gott, un see vetalen junt woo jie kjennen jerat sennen!"

18 Un soo wia de Sklowenmejal ons auledach hinjaraun jekomen, bat Paulus daut nich mea uthoolen kunn. Un dan dreid hee sikj om, un hee räd dän beesen Jeist aun, un säd, "Ekj befäl die en de Vollmacht von Jesus Christus, daut du von dise Mejal rut komen saust!" Un fuaz veleet äa de beesa Jeist.

19 Oba aus de Sklowenmejal äare Wieets daut wieren enjeworden, daut de Mejal äant nich mea wudd Jelt vedeenen, dan jreepen see sikj Paulus un Silas, un schlapten äant nom Moakjt, no de Harschasch vone Staut. 20-21 Un see vekloagden äant ver de hechste reemische Rechtasch von Filippi, un säden, "Dit sent Juden, dee onse Menschen bloos oppräajen wellen, wiel see lieren Sitten, dee wie aus Reema jesazlich nich aunnämen, ooda utfieren derwen."

22 Un soo haud sikj doa ne groote Häad Menschen vesaumelt, waut de Wieets uk hauden biejestonen, un soo jeewen de Rechtasch daut Befäl, daut see Paulus un Silas de Kjleeda aufrieten sullen, un daut see äant met ne Stang vekjielen sullen. 23 Un aus see Paulus un Silas sea vekjielt hauden, dan leeten de Rechtasch äant em Jefenkjnis enstoppen, un see befoolen dän Wajchta, daut hee äant secha bewoaken sull. 24 Un soo stoppt de Wajchta, äant en eene von dee hinjaschte Jefenkjnis Stowen en, wua see secha bennen bliewen wudden, un dan bunk hee äant de Feet tweschen twee Holt Kjlatz faust.

25 Un bie Meddanacht rom, hauden Paulus un Silas opp ludes jebät un jesungen, un dee aundre Jefangne hauden sikj daut aula aunjehorcht. 26 Un met eemol wia doa een groota Ieedbäben, waut daut Jefenkjnis bat enne Ieed vescheddad, un doamet fluagen de Jefenkjnis Däaren uk platzlich op, un aul de Jefangne follen de Kjäden auf. 27 Un aus de Wajchta vom Schlop oppwuak, dan sach hee daut de Jefenkjnis Däaren aula op stunden, un soo trock hee sikj daut Schwieet rut, om sikj selfst daut Läwen nämen. Wiel de Wajchta haud jedocht, daut de Jefangne aula utjekleift wieren, un hee wia schlieslich ver de reemische Rejierunk veauntwuatlich doafäa. 28 Oba Paulus schrieejch dän Wajchta von em Jefenkjnis aun, un säd, "Doo die nuscht aun, wiel wie sent aula hia!"

29 Un aus de Wajchta sikj haud een Licht brinjen loten, dan rand hee em Jefenkjnis nen, un hee flautad soo ut Angst, daut hee ver Paulus un Silas han foll. 30 Dan brocht de Wajchta äant vom Jefenkjnis rut, un fruach, "Harn, waut mott ekj doonen daut ekj kaun jerat sennen?"

31 Un eena von dee beid auntwuad am, un säd, "Jleew aun dän Harn Jesus Christus, un dan woaren du, un dien gaunze Famielje jerat sennen!" 32 Un Paulus un Silas erkjläaden am, un siene gaunze Famielje, daut Wuat vom Harn. 33 Un de Wajchta neem äant enne Nacht noch, un wosch äant de Wunden rein. Un dan leeten hee, un siene gaunze Famielje sikj em Gloowen deepen. 34 De Wajchta brocht Paulus un Silas en sien Hus nen, un dan sad hee äant waut toom äten väa. Un hee un siene gaunze Famielje wieren sea froo, daut see toom Gloowen aun Gott jekomen wieren.

35 Un aus daut zemorjes jedoacht haud, dan schekjten de Rechtasch äare Stautsdeena nom Jefenkjnis, om dän Wajchta to sajen, daut hee Paulus un Silas sull gonen loten. 36 Un de Stautsdeena jinjen met dän Wajchta toop no Paulus un Silas, un de Wajchta säd, "De Rechtasch loten junt sajen, daut jie gonen kjennen. Jie sent nu frie!"

37 Oba Paulus auntwuad dän Wajchta un de Stautsdeena, un säd, "Wie sent reemische Birja, un de Rechtasch leeten ons oba ver aule Menschen em Moakjt vekjielen, ea see ons jesazlich verem Jerecht jenomen hauden, un dan leeten see ons em Jefenkjnis enstoppen, un nu wellen see ons bloos plietsch wajch schekjen. Oba nä!", säd Paulus, "De Rechtasch sellen selfst komen, un ons vom Jefenkjnis rut loten!"

38 Aus de Stautsdeena de Rechtasch vetalt hauden, waut Paulus jesajcht haud, dan vefieeden see sikj aus see daut enworden, daut see Reema wieren. 39 Un de Rechtasch kjeemen perseenlich no Paulus un Silas, om sikj to entschuljen, un dan leeten see äant vom Jefenkjnis rut, un prachaden äant Filippi to veloten. 40 Un Paulus un Silas jinjen no Lydia äa Hus, un aus see sikj met de Gleubje vesaumelt hauden, dan spruaken see äant väl Moot too, un dan reisden see wieda.