1 အုဝ် ဝီ ယိုဝ် ဘော ဂါင်ဟြာဝ် အီ ကာမာယ် ဘော ကာဒါယ် အီ ကာမာယ်။ ခုဝ်၊ ဂါင်ဟြာဝ် အီ ဘြိမ် ဘော ကာဒါယ် အီ ဘြိမ် ဟဲ့ ဟွတ့် ဟြာယ်။ အိုမ် နမ်မုက်ဆာရာ မိူဝ် ဟဲ့ ဟွတ့် ဟြာယ်။ 2 အုဝ် ဝီ ယိုဝ် ဘော မိူင် အီ ဆီငါ ဘွတ် အီ မုး မိူင် ယေရူဆာလဲမ် ကာမာယ် အီ လေး တး ခဲင် ဂါင်ဟြာဝ် ဒူင် ကွယ် ဇဝ်ဖြာ။ မိူင် တီ၊ န့ ဟဲ့ ပီ ဒီဘျာ အီ ဒီ ခတ် ဟာဝ် ဘဲန် အဝ် ကာမာယ် အီ။ အန် ဟဲ့ စှိုပ် ခြိုင် စှိတ်။ ဘ်ု ဒီ ရွုး အီမာယ် အန်။ 3 အုဝ် ဝီ ယိုဝ် ဂြုဝ်း တာင် လေး ခဲင် ဂါင်ဟြာဝ် တဝ်း၊ “ဒေါ တီ နီ၊ ဒူင် ကွယ် ဇဝ်ဖြာ ဟဲ့ ကွယ် ရိုမ် ဒူပ် ဂေ ဒူအီ။ အန် ဇဝ် ဒီ ကွယ် ဒူပ် ဂေ။ ဂေ ဒီ ဘဲန် ဒူအီ ပီ အိုပ် အန်။ ဇဝ်ဖြာ မိူဝ် ဒီ ကွယ် ရိုမ် ဒူပ် ဂေ၊ ဘဲန် ဇဝ်ဖြာ ပီ ကြိုပ် ဂေ။ 4 အန် ဇဝ် ဒီ ခုတ် ဝဲန် တူတ့် အိုမ် ငါယ် ဒီ ငါယ် ဂေ ဒွန် အီ။ ဝါယ် တီ၊ ဂေ မိူဝ် အာဝ် ဟူ လုဝ် ယမ် ဒေါ မှဝ်။ ဂေ မိူဝ် အာဝ် ဟူ လုဝ် က့လိုဝ်၊ အာဝ် ဟူ လုဝ် ယာမ်၊ အာဝ် ဟူ မိုဝ်း ဆဝ် ဒေါ မှဝ်။ ခုဝ်၊ အီ ဘြိမ် ဟဲ့ ဟွတ့် ဟြာယ် တူတ့် ဒွန် မျုဝ်။”

5 အန် ဇဝ် အီ တုတ့် ဒဲင် မာလာင် တွိုန် မိူဝ် ဝီ တဝ်း၊ “ဒေါ တီ နီ အုဝ် ဒီ ဘူင် တဲး န့ ကာမာယ် တူတ့် ဒွန် မျုဝ်။” အန် ဇဝ် ဟဲ့ ဟွတ့် တဝ်း ပါယ် တီ၊ အန် ပီ ဝီ တဝ်း၊ “ဒဲမ် အုန် ဂြုဝ်း နီ။ န့ မုး ဂြုဝ်း မုး၊ ဂြုဝ်း မှာန်၊ ဟဲ့ ကာအာပ် ညှိုမ်။”

6 အန် ပီ ဝီ ကာလာင် ဒီ အုဝ် ပေါ မ့ပွါ တဝ်း၊ “ဟဲ့ ဟွတ့် တူတ့်။ အုဝ် အီ ကာစုး တူတ့် ဒွန် မျုဝ်၊ အုဝ် ဒီ ဘော ဘူင် တဲး န့ ကော ဟွတ့်။^a အာဆေ ဆီ ဒျီင် အိုမ်၊ အုဝ် ဒီ ဒွါ အန် ဒျီင် အိုမ် အီ လေး ခဲင် အိုမ် ခိုမ် အီ ဒွါ အာဆာက်၊ အာဝ် လုဝ် တူတ့် မာဆေ။ 7 အာဆေ ဟဲ့ အွင်၊ အန် ဒီ ပွိုန် ခါဂုန် ပီ ဒွါ အုဝ်။ အုဝ် ဒီ ဘဲန် ဇဝ်ဖြာ ပီ ကြိုပ် အန်။ အန် ဒီ ဘဲန် ဂွန် အုဝ်။ 8 မာလဲ၊ ဂေ ဒူအီ အီ တူ ယ ကာလာင် လွင် ဇဝ် ယေဆူ ဘော ဂေ အီ တူ ညှိုမ်၊ ဂေ အီ ဘူင် မွှိုမ် ကာအိး၊ မွှိုမ် ကာဒါတ့်၊ ဘော ဂေ အီ ငဝ်း အာဆာက် အီ ဟဝ်၊ ဂေ အီ လာယ် လုတ့် လာယ် လာယ်၊ ဂေ အီ ဘူင် မျလှယ့်၊ အီ ကြိုပ် အာရိုပ် ရာင် ဘော ဂေ အီ ဆီမာ ကာလုဝ်၊ ဂေ ဒူအီ ဇိုဝ် တီ ဘောကာဂ့လျီတ် ဒီ စုဝ်း ခဲင် ငဝ် အီ ပီ အိုမ် ဒိုင် အီ မိုဝ်း ဂန်ဒိူက်။ ဒေါ အန် တီ ဂေ ဒီ ယမ် ပေါ အူ ဇေန့်။”

9 အန် ဇဝ် ဟဲ့ ဟွတ့် ကာလာင် ဂြုဝ်း တီ၊ န့ ဝီ မိုဝ်း အာမူ အာမာတ် ဇဝ်ဖြာ အူ ကာဒင်။ အန် ဟဲ့ ကွယ် ရိုမ် ဒူပ် ဂေ အာမူ အာမာတ် ဇဝ်ဖြာ ဘူ ကာဒင် အီ ဂူင့် ဆီလယ့် ဘူ ဘ့လ အီ မိုဝ်း ဒုက် တာင် ဘူ မျုဝ် အီ ဒီ တး ဒီ ကာဒဲ့ ဆိူတ် တွိုန်။ အန် တဝ်း ဒီ အုဝ်၊ “တး ဒီ နီ၊ အုဝ် ဒီ နှဲ ဒီ မဲ ဝီ အီ ဒီ ဘဲန် အဝ် ကာမာယ်၊ အီ ဒီ ဒိုဝ်း ဂွန် မာဘူ တွိုန်။” 10 နဝ်း ဖွိုမ် ဇဝ်ဖြာ မိူဝ် ပ့လိုက် အုဝ်။ အာမူ အာမာတ် ဇဝ်ဖြာ တီ ဘော စုဝ့် ဟုဝ့် အုဝ် ဒဲင် နွန် စာ။ အန် ဘော ဘျ တဲး အုဝ် ယိုဝ် မိူင် တာင် အီ ဆီငါ ဘွတ်၊ အီ မုး မိူင် ယေရူဆာလဲမ်။ န့ တး ဒူင် ကွယ် ဇဝ်ဖြာ လူင် ခဲင် ဂါင်ဟြာဝ်။ 11 ခဲင် မိူင် တီ မိုဝ်း အာဖုင် ဒင်ခုဝ် ဇဝ်ဖြာ။ အာရူင် အီ လေး ခဲင် မိူင် တီ၊ န့ ဟဲ့ ဘ့လာင် ပီ ဆဲန့် ဘွတ် အီ ငဝ်း တာင် ကာဆဝ်။ န့ ဟဲ့ ပီ ဆဲန့် ငျီန် ဒေန့် ဒီပုန်။ န့ ဘော ဘ့လာင် ဆီငါ ပီ မာဝ် မင်ပွင့်။ 12 ရဲင် မိူင် တီ၊ န့ ဘော တာင် ဘော စာ။ န့ မိုဝ်း ကာဒဝ် မာလုဝ်း ဂိုဝ် ဒီ အာ မာလုဝ်း။ အာမူ အာမာတ် ဇဝ်ဖြာ ဂိုဝ် ဒီ အာ ကာဒင် မိူဝ် ဘ်ု မာလုဝ်း ဂေ တီ။ စိူဝ် ဂေ ဒူအီ အီဆာရေလ ဂိုဝ် ဒီ အာ ခြိုဝ် မိူဝ်၊ ဟဲ့ ဒဲမ် ဒိုက် ဒီ မာလုဝ်း ဂိုဝ် ဒီ အာ မာလုဝ်း တီ။ 13 ဒီ ရဲင် အူ ဘ့လာက် မိုဝ်း အူယ် မာလုဝ်း။ နာ လေး ဆီငဲ အူယ် မာလုဝ်း၊ နာ ကွာ အူယ် မာလုဝ်း၊ နာ တေတ့် အူယ် မာလုဝ်း၊ ဘော နာ ဂေတ့် ဆီငဲ အူယ် မာလုဝ်း။ 14 စေန့် ရဲင် မိူင် တီ၊ ဟဲ့ ဘ့လေး ဒဲင် မာဝ် ဂိုဝ် ဒီ အာ ဘူင့်။ ဒဲင် မာဝ် တီ၊ ဟဲ့ ဝီ ဒဲမ် စိူဝ် ဂေ ဂိုဝ် ဒီ အာ ဝီ အီ မုး ဒူအီ ပီ ရဝ်း ပီ တိုယ် ဂွန် မာဘူ။

15 အာမူ အာမာတ် ဇဝ်ဖြာ အီ ကာလာင် ဂြုဝ်း ဒီ အုဝ် တီ၊ အန် ဟဲ့ ဂူင့် မင် ဂဝ် ခြိဝ် အူ ညွင့်၊ တဲး အန် ဂဝ် ဒီ ယွတ် မိူင် တီ၊ ဘော မာလုဝ်း ဘော ရဲင် အန်။ 16 မိူင် တီ၊ န့ မိုဝ်း ဖွုန် ကာတုဝ့်။ နာ တူင့် ဘော နာ ကာဝဝ်း အန် မုး အူ မျုဝ်။ အာမူ အာမာတ် ဇဝ်ဖြာ တီ ဘော ဂဝ် ဒီ ယွတ် မိူင် တီ။ နာ တူင့် အန် န့ ကွယ် အူ ဟြဲန့် ဒီ ဖန် မာယဝ်း လွှက့်။ နာ တူင့်၊ နာ ကာဝဝ်း ဘော နာ စာ န့ ကာရမ် တူတ့်။ 17 အန် ဘော ဂဝ် ဒီ ယွတ် ခဲ့ ဟေတ့် ရဲင် မိူင် တီ။ န့ မုး ကာနိး ဒူအီ ပီ တာ အာမူ အာမာတ် ဇဝ်ဖြာ တွိုန်။ န့ ကွယ် အူ မာယဝ်း ဒီ ဖွုန် ဂိုဝ် ဒီ ဖွုန် ကာနိး။ 18 ရဲင် မိူင် တီ၊ ဟဲ့ ဂုဝ် တာ ဆဲန့် ငျီန် ဒေန့် ဒီပုန်။ မိူင် တီ ဟဲ့ ဂုဝ် တာ ခြိဝ် ဇဲတ်၊ ဟဲ့ မာဘြိဝ် ကာလ ပီ ဇမ်။ 19 စေန့် ရဲင် ဂေ ဟဲ့ ဘူင် တဲး န့ စှိတ်။ ဂေ ဟဲ့ ဟပ် ဆဲန့် အီ ဘွတ် အီ ငဝ်း တာင် ဒွန် မျုဝ်။ ဒင် စေန့် ရဲင် ဘူင့် ဒေါ ဂုဝ်၊ န့ မုး ဆဲန့် ငျီန် ဒေန့် ဒီပုန်။ ဒင် ဟာ အာ မုး ဆဲန့် ငျီန် ဘ့လေန့်။ ဒင် ဟာအူယ် မုး ဆဲန့် လုယ် ဒီပုန်။ ဒင် မ့ဖွုန် မုး ဆဲန့် ငျီန် ခွင်။ ဒင် မ့ဖန် မုး ဆဲန့် အီ မိုဝ်း ပန် အီ လုယ် ရေန့်။ 20 ဒင် န့ဒဝ် မုး ဆဲန့် ရေန့် ဒေန့်။ ဒင် မ့ဘူ ဟဲ့ မုး ဆဲန့် ငျီန် ဘ့လာင်။ ဒင် န့ဒါ မုး ဆဲန့် ငျီန် ဝွင့်။ ဒင် န့ဒိမ် မုး ဆဲန့် ဒေန့် ဘ့လာင်။ ဒင် ဂိုဝ် မုး ဆဲန့် ငျီန် ကာတုန်။ ဒင် ဂိုဝ် ဒီ လှေး မုး ဆဲန့် ခွင်။ ဒင် ဂိုဝ် ဒီ ဟာအာ မုး ဆဲန့် ရေန့် ဝွင့်။ 21 မာလုဝ်း ဂိုဝ် ဒီ အာ ဘူင့် တွိုန်၊ ဟဲ့ မုး တူတ့် ပွိုန် မာဟွယ် ဒွန် ဘူင့်။ မာလုဝ်း အူ ဘူင့် မုး ပွိုန် မာဟွယ် အူ ဘူင့်။ န့တေန့် တာင် ခဲင် မိူင် တီ ဟဲ့ မုး တူတ့် ခြိဝ် ဇဲတ်။ ဟဲ့ ဘ့လာင် ကာလှုဝ်း ပီ ဇမ်။

22 ခဲင် မိူင် တီ၊ အုဝ် ယီ တူ ယိုဝ် ဟုဝ် ဇဝ်ဖြာ။ ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် ဘော ဂွန် မာဘူ တွိုန် ဟဲ့ ဟွတ့် ကွယ် ခဲင် မိူင် တီ၊ ဟဲ့ ကာဒါင် ဟုဝ် ဇဝ်ဖြာ။ 23 ခဲင် မိူင် တီ၊ အာဝ် ဟူ လုဝ် ဘ့လာင် ဆီငဲ ဘော ဘ့လာင် မာဂျီန်။ ခုဝ်၊ အာဖုင် ဒင်ခုဝ် ဇဝ်ဖြာ တဲး န့ ဘ့လာင် ခဲင် မိူင် တီ။ ဂွန် မာဘူ တွိုန် မိူဝ် ဟဲ့ ဘဲန် ပီ ငဝ် အွမ် ခဲင် မိူင် တီ။ 24 ဂေ ဒူအီ ဒွန် မျုဝ် ဒဲင် ကာဒါယ်၊ ဂေ ဒီ ဟာဝ် ဝိဝ် ဟာဝ် ဝေန့် ခဲင် ဘ့လာင် အန် ဇဝ် တီ။ ဂေ ခုန်ဒီခမ် ဒဲင် ကာဒါယ်၊ ဂေ ဒီ ဘော တိုယ် တး ခဲ့ မိုဝ်း ဂေ အာဖုင် ဒင်ခုဝ် ခဲင် မိူင် တီ။ 25 မာလုဝ်း ခဲင် မိူင် တီ၊ အာဝ် မိုဝ်း ဒေါ ကာဘိတ်။ ခုဝ်၊ အာဝ် မိုဝ်း အပ်၊ အာဝ် မိုဝ်း ခဲင် မှိုဝ်။ 26 ဂေ ဒူအီ ဒွန် မျုဝ် ဒီ ဘော တး လဲ ခဲင် မိူင် တီ၊ တး တိုယ် ဒွန် မျုဝ် အီ တဲး ဂေ မိုဝ်း ဆာရေ၊ မိုဝ်း ဘော အာဖုင် ဒင်ခုဝ်။

27 မာလဲ၊ အီ တူ မွှိုမ် အာဝ် မိုဝ်း မာဆေ အီ ပွိုန် ဒီ လိုပ်။ ဘော ဒူအီ အီ ဘူင် နာ မွှိုမ် ကာအိး၊ နာ မွှိုမ် ကာဒါတ့် ဘော ဒူအီ အီ ဆီမာ ကာလုဝ်၊ ဂေ တူ ပွိုန် ဒီ လိုပ် ခဲင် မိူင် တီ။ ဂွန် မာဘူ တွိုန် မိုဝ်း ဘပ် ဇာရာင် ဂေ ဒူအီ အီ ဟဲ့ ပွိုန် အာဆာက် ကာမာယ်။ န့ မိုဝ်း မီ ဂေ အီ မိုဝ်း စိူဝ် ခဲင် ဇာရာင် တီ၊ ဂေ ဒီ ပွိုန် ဒီ လိုပ်။