1 ဟဲ့ ဟွတ့်၊ အုဝ် ဝီ ယိုဝ် အာမူ အာမာတ် ဇဝ်ဖြာ အူ ကာဒင် လူင် ခဲင် ဂါင်ဟြာဝ်။ အန် ဟဲ့ ဂူင့် လခတ်ဆဝ် ကာဒဝ် ဟူလဝ် ဘော ဝန် ဟိန် တာင်။ 2 အန် ဘော မှေတ့် မာကြာယ် အီ မုး မာဟန့်။ ဂေ ဘော တဝ်း အန် မုး ဘုဝ် ကာနမ်၊ အီ စိူဝ် ဆာတာန် အီ ကွယ် ဆိန့် ဘာန် ဒေါ မွိုန်။ အန် ဘော ပက် အုန် မာကြာယ် တီ အာဒါ အူ ဟြဲန့် ဆီနမ်။ 3 အန် ဟဲ့ ဟွတ့် ပက်၊ အန် ဘော ဘျွာ မာကြာယ် တီ ခဲင် ကာဒဝ် ဟူလဝ်၊ ဝီ ကာပိတ် ကာဒဝ် ဟူလဝ် တီ၊ ဝီ ဟပ် ဆဲ အန် ဒွက် ဒိုက် ဘော ဇိုမ်၊ ကွဲ့ ဟူ တဲး မာကြာယ် ဆီ ပွိုန် ဒီ ကာလုဝ် ဒူအီ ဒွန် မျုဝ်၊ တဲး န့ ကော နုဝ့် အူ ဟြဲန့် ဆီနမ်။ ဝါယ် အန် တီ အန် ပီ ဒီ ဝီ ဘ့လေး လေး မာကြာယ် အာဒါ အူ ကာစန်။

4 ပန် တီ အုဝ် ဝီ ယိုဝ် န့ မိုဝ်း မာလာင် ကိူန်။ ဂေ အီ တုတ့် ဒဲင် မာလာင် တီ၊ ဟဲ့ ပွိုန် ဒီ ဆုင်ဖျာတ် အာမူ အီ။ အုဝ် ဝီ ယိုဝ် ဘော ကာပြဝ် ဂေ အီ ဟဲ့ ခမ် အီ ဟဝ် ဒဲပ် မဲင် ဂေ ကူပ် ကာလာင် ဂေ လွင် ဇဝ် ယေဆူ ဘော ကူပ် ကာလာင် ဂေ ဂြုဝ်း ဇဝ်ဖြာ။ ဂေ မိူဝ် တူ ကြိုပ် မာဒုဝ် ပြဲ ဘော အာရိုပ် အန်။ ဂေ မိူဝ် တူ ဒိုဝ်း ဇိုမ် မာဒုဝ် ပြဲ ဒိုက် ဒီ ကာတဝ်း၊ ဒိုက် ဒီ ဒဲ ဂေ။ ဂေ ဒူအီ ဇိုဝ် တီ၊ ဂေ ဟဲ့ ဝီ ယိတ့် ဝီ အိမ်၊ ဘော အိုပ် ကာဒါယ် ဒူပ် ဇဝ် ယေဆူ အာဒါ အူ ဟြဲန့် ဆီနမ်။ 5 အီ မုး အီ ဟဝ် အီ ဟဲ့ ဟွတ့် ယမ်၊ ဂေ တူ ပွိုန် ဒီ ဝီ ယိတ့် ဝီ အိမ် အာတ့် ပွုန် အူ ဟြဲန့် ဆီနမ် တီ။ ဂေ အီ ဟဲ့ ဟွတ့် ဝီ ယိတ့် ဝီ အိမ် တွိုန်၊ ဂေ မုး ဒူအီ ပီ တဲး ဇဝ်ဖြာ ဝီ ယိတ့် ဝီ အိမ် အာခြာဝ် ဒေါ ဂုဝ်။ 6 ဂေ အီ ဝီ ယိတ့် ဝီ အိမ် ဒေါ ဂုဝ် နီ ဟဲ့ ဘွတ်၊ ဟဲ့ ဒါခိုယ်။ ဂေ မိူဝ် အာဝ် ဟူ လုဝ် ယမ် ပေါ အူ ဇေန့်၊ အာဝ် ဟူ လုဝ် စုဝ်း ကာလုဝ့် ငါရာယ်။ ဂေ ဒီ ဘဲန် ဒူအီ အီ လှူ ဒီ ဇဝ်ဖြာ၊ ဘူင် ဂါန် ဇဝ်ဖြာ ဘော ဂါန် ဇဝ် ယေဆူ။ ဂေ မိူဝ် ဒီ ပွိုန် ဒီ အိုပ် ရိုမ် ဒူပ် ဇဝ် ယေဆူ၊ တဲး ကော နုဝ့် အူ ဟြဲန့် ဆီနမ်။

7 ဝါယ် ဟဲ့ ပွုန် အူ ဟြဲန့် ဆီနမ် တီ၊ အန် ဇဝ် ဒီ ဘ့လေး လေး ဘုဝ် ကာနမ် ခဲင် ကာပိုမ်။ 8 ဘုဝ် ကာနမ် တီ ဒီ ဝီ တး ကာလုဝ် ဒူအီ ဒွန် မျုဝ် အီ ကွယ် ဒဲင် ကာဒါယ် ဒွန် နာ ဒွန် ပ့လုဝ့် အီ စိူဝ် ကုဝ်က ဂါယ် မာကုဝ်က။ အန် ဒီ တဲး ဂေ ဒူအီ ကိူန် တး ကာဇု၊ တဲး ဂေ ရဲန် ဆိုက်။ ဒူအီ ဂေ တီ၊ ဂေ ကိူန် ပီ ကာဟာတ့် အီ ကွယ် ခူပ် အိုမ် နမ်မုက်ဆာရာ။ 9 ဒူအီ ဂေ တီ ဒီ ဝီ ဟာဝ် ဒဲင် ကာဒါယ် ဒွန် ပ့လုဝ့်၊ တဲး ဂေ ပွိုန် ဒီ ဝဲင် ရူပ် ဒူင် ကွယ် ဂေ ဒူအီ ပီ အိုပ် ဇဝ်ဖြာ ဘော မိူင် ပီ ရွက့် အန် ဇဝ်။ န့ ယီ မိုဝ်း ငဝ် အီ လေး တး ခဲင် ဂါင်ဟြာဝ်၊ ဝီ ကာဆိုမ် ဒူအီ ဂေ တီ။ 10 ဟဲ့ ဟွတ့် ပါယ် တီ၊ ဘုဝ် ကာနမ် အီ ကာလုဝ် ဒူအီ ဂေ တီ၊ အန် ဝီ ခမ် ဒီ ဘျွာ စုဝ်း ခဲင် ငဝ် အီ ပီ အိုမ် ဒိုင်၊ အီ မိုဝ်း ဂန်ဒိူက်။ န့ မုး ဒူင် ကွယ် မာဒုဝ် ပြဲ တွိုန် ဘော ဒူအီ အီ ညိုင်ရာင် ဒီ ဘျာန် ဂြုဝ်း ဇဝ်ဖြာ။ ဂေ ဒီ လုဝ် ခမ် ဒုက် တာင် ဒွင် ဝန် ဒွင် ခိူန် ဒွန် စုဝ် ဒွန် ဇာတ်။

11 ပန် တီ အုဝ် ဝီ ယိုဝ် မာလာင် တာင် အီ လုယ် အူ ဘူင့်။ အုဝ် ယိုဝ် ဘော အန် ဇဝ် အီ တုတ့် ဒဲင် မာလာင် တီ။ ဘော ဘ့လေန့် ဘော ကာဒါယ် ဘော ဟြာယ် ဒေါ တး အန် ဇဝ် တီ၊ အာဝ် ဟူ မိုဝ်း အာဆေ အီ ဝီ ယိုဝ် ဘ့လေန့် ဂါယ် ကာဒါယ် တီ ဒေါ မှဝ်။ 12 အုဝ် ဝီ ယိုဝ် ဘော ဂေ အီ ဟဲ့ ဟွတ့် ယမ် ဘော အီ တျီ့ အီ တာင်၊ ဂေ ကွယ် နာ အာတ့် မာလာင် အန် ဇဝ်။ န့ ဘော မိုဝ်း ဘပ် ဘဲန် ဖိူန် ဘဲန် ဖိူန် ပဲ့ ဟဲ့ ဟွတ့် ဝိုဝ်း အုန် အီ။ န့ ဝီ မိုဝ်း ဘပ် ပေါ အူ ဖိူန် အီ မုး ဘပ် ဇာရာင် ဂေ ဒူအီ အီ ဟဲ့ ပွိုန် အာဆာက် ကာမာယ်။ ဘပ် တီ မိူဝ် ဟဲ့ ဟွတ့် ဝိုဝ်း အုန်။ ဂေ အီ ဟဲ့ ဟွတ့် ယမ် ဂေ ဝီ ခမ် အီ ဆုင်ဖျာတ် ပီ ဘူင် ဂေ ဒူပ် ပဲ့ ဟဲ့ ဒဲမ် အုန် ခဲင် ဘပ် တီ။ 13 အိုမ် နမ်မုက်ဆာရာ မိူဝ် တဲး ဂေ ဒူအီ အီ ဟဲ့ ဟွတ့် ယမ် ဝီ လေး။ ဇဝ် မာရာန ဘော မိူင် မာရာန မိူဝ် တဲး ဒူအီ ယမ် အီ ကွယ် ခဲင် မိူင် တီ ဝီ လေး။ ဒူအီ ဂေ တီ ဒွန် အီ ဘော ခမ် အီ ဆုင်ဖျာတ် အာမူ ဂေ ဒူပ် ပီ ဘူင် ဂေ ဝီ မှဝ် ဝီ အန်။ 14 ဒေါ အန် တီ ဇဝ် မာရာန ဘော မိူင် မာရာန ဘော စုဝ်း ခဲင် ငဝ် အီ ပီ အိုမ် ဒိုင်။ ဂေ အီ ယမ် ခဲင် ငဝ် တီ၊ ဂေ ဟဲ့ ဒွိုမ် ယမ် အူ ဇေန့်၊ ပီ ဝီ လုဝ် ယမ် ပေါ အူ ဇေန့်။ 15 ဝီ မှဝ် အီ တူ မိုဝ်း စိူဝ် ခဲင် ဘပ် ဇာရာင် ဂေ ဒူအီ အီ မိုဝ်း အာဆာက် ကာမာယ်၊ အန် ဒီ လုဝ် ခမ် ဒီ စုဝ်း ခဲင် ငဝ် တီ။