ခါန် 19
လွင် ဂေ အီ ကွယ် ခဲင် ဂါင်ဟြာဝ် အိူပ် ဇဝ်ဖြာ
1 ဝါယ် အန် တီ အုဝ် ဝီ ယိုဝ် ဂြုဝ်း တာင်။ န့ ပီ ဒူအီ ကိူန် ဟဲ့ တး ကာဇု ခဲင် ဂါင်ဟြာဝ်။ ဂြုဝ်း တီ တဝ်း၊
“တဲး အေ အိူပ် ဇဝ်ဖြာ။ ဇဝ်ဖြာ မုး အန် ဇဝ် အီ ချွတ် အီ။ အန် ဘော မိုဝ်း ပွုန်၊ မိုဝ်း ဘော အာဖုင် ဒင်ခုဝ် တာင်။
2 ပီ ဆုင်ဖျာတ် အန် ဇဝ် ဟဲ့ မုး ဟဲ့ မှာန် အာခါခ်ု။ အန် ဇဝ် ဟဲ့ ဒမ် မှာပ် ဒီ ယာ မာလမ် ပဲ့ ဟဲ့ နပ် အီ ဒွန် အီ တွိုန်။ ယာ မာလမ် တီ ဟဲ့ တဲး ဒူအီ ဘော ကာဒါယ် လာယ် လုတ့် လာယ် လာယ် ဒီ အန်။ အန် ဟဲ့ ငဝ်း ယမ် ဘော ဒဲစေန့် ဇဝ်ဖြာ။ ခုဝ်၊ ဇဝ်ဖြာ ဟဲ့ ဒမ် မှာပ် ဒီ အန်။”
3 ဂေ ပီ ဝီ ဒတ် တာင် ပေါ အူ ဇေန့် တဝ်း၊ “တဲး အေ အိူပ် ဇဝ်ဖြာ။ ဒက် အီ လေး ခဲင် ငဝ် အီ ကာဆိုမ် မိူင် တီ၊ န့ ဒီ မိုဝ်း ဆေဆေ၊ အာဝ် ယတ် ဒေါ မှဝ်။”
4 ဂေ ဒါ တာင် အာ ဂိုဝ် ဒီ ဖွုန် ဝီ ဘော ဒုဝ် ဆတ်ဒါဝါ ဖွုန် ဒုဝ် အီ အိမ် တွိုန်၊ ဂေ ဘော ခြိုပ်ခြဝ် ကြိုပ် ဇဝ်ဖြာ အီ တုတ့် ဒဲင် မာလာင် အန်။ ဂေ ဘော တဝ်း၊
“ဆာတူ၊ ယေ အိူပ် မဲ ဇဝ်ဖြာ။”
5 ဝါယ် အန် တီ န့ ဝီ မိုဝ်း ဂြုဝ်း အီ လေး ဒီ မာလာင် အန် ဇဝ် တီ တဝ်း၊
“အိုယ် ဘေ ဒဲစေန့် ဇဝ်ဖြာ ဘော ဘေ အီ ရုဝ်ဆေ အန် ဇဝ်၊ ဘော အီ တျီ့ အီ တာင် ဘောကာဂ့လျီတ်၊ တဲး ဘေ အိူပ် ဇဝ်ဖြာ။”
6 ဟဲ့ ဟွတ့် ပန် တီ အုဝ် ပီ ဝီ ယိုဝ် ဟမ် ဆီနန် ဆီနိူင် အီ ပီ ဒူအီ ကိူန် ဟဲ့ တး ကာဇု။ ဟမ် တီ ဘော ပီ ဟမ် အိုမ် ဒီစှာ ဘော ဟမ် ကာနမ်။ န့ တဝ်း၊
“တဲး အေ အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် အေ အီ အိုပ် တူတ့် ဒွန် မျုဝ်။
7 တဲး အေ ဘျုဝ် ဒါခိုယ် ဒီ အိူပ် အန် ဇဝ် အီ ဘွတ် မျာတ်။ ခုဝ်၊ န့ ဟဲ့ ဟွတ့် ဇမ် ဆီငဲ ဒီ ဘူင် ဂွန် မာဘူ ဘ့လွယ် ခတ်။ ဒီဘျာ အန် မိူဝ် ဟဲ့ ဟွတ့် မ့ပြာယ် အုန် ဒုဝ် အန်၊ ဘ်ု ဒီ လိုပ် ဘ့လွယ် တီ။
8 ဒီဘျာ တီ ဟဲ့ ပွိုန် ဒီ စှိုပ် ဒီ တာ ဘိက် ကာတမ် လုယ် အီ ဒဝ့် တာ ဆေန့် ဒီတဲတ်၊ အီ လုယ် ဆီငါ။” (ဘိက် တီ၊ န့ မုး ပီ ဘူင် ဂေ ဒူအီ အီ ဆီငါ ဘွတ် အီ မုး နာ ဘွတ် နာ မွှိုမ်)။
9 ပန် တီ အာမူ အာမာတ် ဇဝ်ဖြာ တွိုန် ဝီ တဝ်း ဒီ အုဝ်၊ တဲး အုဝ် ဒဲမ် အုန်။ “ဂေ ဒူအီ ပဲ့ ဟဲ့ ဘာင် အန် ဇဝ်၊ တဲး ဂေ တး လိုပ် ဘ့လွယ် ခတ် ဂွန် မာဘူ တီ၊ ဂေ ဟဲ့ ဒါခိုယ်။” အန် ပီ ဝီ ကာလာင် ဒီ အုဝ် တဝ်း၊ “ဂြုဝ်း နီ၊ န့ မုး ဂြုဝ်း ဇဝ်ဖြာ အာခါခ်ု။”
10 ဒေါ အန် တီ အုဝ် ဘော မုတ် ဂိုပ် ဒီ ပ့လဝ် အာမူ အာမာတ် ဇဝ်ဖြာ တီ၊ ဝီ ကြိုပ် အန်။ မာလဲ၊ အန် ဝီ တဝ်း ဒီ အုဝ်၊ “မဲ ကွဲ့ ဘူင် ပါယ် တီ၊ အုဝ် မိူဝ် မုး အီ ဘူင် ဂါန် ဇဝ်ဖြာ ပီ မဲ။ အုဝ် ဘော ဘူင် ဒူပ် ဂေ ဘီနွင် မဲ အီ ကာလာင် လွင် ဇဝ် ယေဆူ။ တဲး မဲ ကြိုပ် မီ ဇဝ်ဖြာ။ ခုဝ်၊ န့ မုး နဝ်း ဖွိုမ် ဇဝ်ဖြာ အီ ဟဲ့ တဲး ဒူအီ ဘျာန် ဂြုဝ်း ဇဝ်ဖြာ။ အန် ဘော တဲး ဂေ ကာလာင် လွင် ဇဝ် ယေဆူ။”
11 ဝါယ် အန် တီ အုဝ် ဝီ ယိုဝ် ဂါင်ဟြာဝ် ဟဲ့ န့ဝိုဝ်း။ န့ ဝီ မိုဝ်း မင်ပြွင့် လုယ် အူ ဒုဝ်။ ဝီ အီ ပဝ့် မင်ပြွင့် တီ၊ အန် စိူဝ်၊ “နဝ်း မှာန် အီ ဘူင် နာ မွှိုမ် ဆေဆေ။” အန် ဒူပ် နာ မှာန် ဒေါ ဆုင်ဖျာတ် အန် အာမူ အီ ဘော ဒေါ ကာဂုဝ်း အန် ဒီ ရန်ဆူ။ 12 ငါယ် အန် ဟဲ့ ပီ ပ့လဲ့ ငဝ်။ ဒဲင် ဂိန့် အန် ဟဲ့ မိုဝ်း မင်ဂိုမ် ဘဲန် ဘူင့် ဘဲန် ဘူင့်။ အန် မိူဝ် မိုဝ်း စိူဝ် အီ ဟဲ့ ဒဲမ် ဒီ ဒုဝ် အန်။ စိူဝ် တီ၊ မီ အန် ဟဲ့ နပ်။ အီ ဟဝ် မိူဝ် တူ နပ် ဒီ တိး။ 13 ခြိုင် ပီ တာ အန်၊ ဟဲ့ စိုပ် ခဲင် နှာမ်။ စိူဝ် အန် ဘော မုး၊ “ဂြုဝ်း ဇဝ်ဖြာ။” 14 ဘော ဂေ ဖိုင် ဒါ ဆိုက် အီ ကွယ် ခဲင် ဂါင်ဟြာဝ်၊ ဂေ ဟဲ့ စှိုပ် ဒီ တာ ဘိက် ကာတမ် လုယ် အီ လုယ် ဆီငါ၊ ဂေ ဘော ပဝ့် မင်ပြွင့် လုယ်၊ ဒူပ် ဒီ ပန် အန်။ 15 ခဲင် မူတ့် အန်၊ န့ မိူဝ် လေး မာပွါ့ လာင် အီ မိုဝ်း ဘ့လာ အာ ဘ့လာက်၊ အီ လမ် ကာဆဝ်။ အန် ဒီ တာ မာပွါ့ လာင် တီ ပဲ ဒူအီ ဒွန် မျုဝ်။ အန် ဒီ ဘော အိုပ် ဂေ၊ တဲး န့ ပီ အန် ဂူင့် လျီး ဟိန်။ န့ ဘော ပီ အန် ဒီ ဒိုဝ်း ဟပ် ဂေ ခဲင် ဒူင် ကြိတ် အီ ဘ့လေ မာငုန်။ ပါယ် တီ၊ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဒွါ ဝူတ် အီ စန် ကာဆဝ် ဒီ ဂေ ကူပ် ရူ အန်။ 16 ဒီ ခြိုင် ပီ တာ အန် ဘော ဒီ ဂိုမ် အန်၊ န့ မိုဝ်း စိူဝ် အီ တဝ်း၊
“ခုန်ဒီခမ် အီ အိုပ် ဒဲင် ခုန်ဒီခမ် ဘောကာဂ့လျီတ်။ ဒါ ကာညာ အီ အိုပ် ဒဲင် ဒါ ကာညာ ဘောကာဂ့လျီတ်။”
17 ဟဲ့ ဟွတ့် ပန် တီ အုဝ် ဝီ ယိုဝ် အာမူ အာမာတ် ဇဝ်ဖြာ ပေါ အူ ကာဒင် အီ စွင့် ဒဲင် ဆီငဲ။ အန် ဘော ဒတ် တာင် ဒဲ့ ခဲ့ ကွယ် မာဆိမ် အီ ဘိုန့် ခဲင် ဘ့လေန့်။ အန် တဝ်း၊ “တဲး ဘေ တး၊ တဲး ဘေ တး ကာဇု ဒူင် ဘူင် ဇဝ်ဖြာ ဒီ ဘ့လွယ် တာင်။ 18 တဲး ဘေ တး ဟူမ် ယင် ဂေ ခုန်ဒီခမ် ဘော ယင် ဒါ တာင် အီ အိုပ် ဒါ ဆိုက် ဘော ယင် ဂေ ဒါ ဆိုက် ဘော ယင် မင်ပြွင့် ဘော ယင် ဂေ ဒူအီ အီ ပဝ့် မင်ပြွင့် ဘော ယင် ဒူအီ ဘောကာဂ့လျီတ် ဘော အီ မုး မှာယ်၊ အီ တူ မုး မှာယ် ဘော အီ တျီ့ အီ တာင်။”
19 ဟဲ့ ဟွတ့်၊ အုဝ် ပီ ဝီ ယိုဝ် ဘော မာဒုဝ် ပြဲ တွိုန်၊ ဘော ခုန်ဒီခမ် ဒွန် ကာဒင် အီ ကွယ် ဒဲင် ကာဒါယ် ဘော ဒါ ဆိုက် ဂေ။ ဂေ ဟဲ့ တး ကွယ် ကာဇု တဝ်း ဒီ ကာဂုဝ်း ဒီ အန် ဇဝ် အီ ပဝ့် မင်ပြွင့် တွိုန် ဘော ဒီ ဂေ ဒါ ဆိုက် အီ ဒူပ် အန်။ 20 မာဒုဝ် ပြဲ တွိုန် ဘော ဒါ အီ ညိုင်ရာင် ဒီ ဘျာန် ဂြုဝ်း ဇဝ်ဖြာ၊ ဂါယ် ကာဒုး မှေတ့် ကာဒုး ပက်။ ဒါ တီ၊ အန် ဟဲ့ ဒွိုမ် ဘူင် အီ မွှိုမ် အာမ် ကာဆဝ် အာဒါ မာဒုဝ် ပြဲ တွိုန်။ ပါယ် တီ၊ ဂေ အီ မိုဝ်း ဇိုမ် မာဒုဝ် ပြဲ ဘော ကြိုပ် အာရိုပ် အန်၊ ဂေ ဟဲ့ ကာလိုပ် တူတ့် ကူပ် အီ မွှိုမ် အာမ် ကာဆဝ် ပဲ့ ဟဲ့ ဘူင် ဝီ တီ။ မာဒုဝ် ပြဲ ဟာယ် ဘော ဒါ အီ တီ၊ ဂါယ် ဘော ကာဒုး ဒီ စုဝ်း ဘော အိမ် ခဲင် ငဝ် အီ ပီ အိုမ် ဒိုင်၊ အီ မိုဝ်း ဂန်ဒိူက်။ 21 အီ မုး ဂေ အီ ဒူပ် ဂါယ်၊ ဂေ ဘော ကာဒုး ဒီ ယမ် ဒီ မာပွါ့ လာင် အီ လေး ခဲင် မူတ့် အန် ဇဝ် အီ ပဝ့် မင်ပြွင့် တွိုန်။ ခဲ့ ကွယ် မာဆိမ် ဘော တး ဟူမ် ယင် ဂေ ကော ဖဲ။