ခါန် 18
လွင် မိူင် ဘာဘဲ ဒီ လိုဝ် စှိုမ်
1 အာမူ အာမာတ် ဇဝ်ဖြာ ဟဲ့ ဟွတ့် ကာလာင် ဂြုဝ်း တီ ဒီ အုဝ်၊ အုဝ် ဝီ ယိုဝ် အာမူ အာမာတ် ဇဝ်ဖြာ ပေါ အူ ကာဒင်။ အန် လူင် ခဲင် ဂါင်ဟြာဝ်။ ပွုန် အန် တာင် ကာဆဝ်၊ အာရူင် အန် ဘော တဲး န့ ဘ့လာင် ဒဲင် ကာဒါယ်။ 2 အန် ဘော ဒတ် တာင် တဝ်း၊
“မိူင် ဘာဘဲ ဟဲ့ ဟွတ့် ကာပျာတ့် လိုဝ်၊ ဟဲ့ ဘဲန် ဒူင် ကွယ် ကာနမ် ဟာယ် ဘော ကာနမ် အီ မွှိုမ် ကာအိး ဒွန် မျုဝ်။ အန် ဟဲ့ ဘဲန် ဘော ဒူင် တး ကာဇု မာဆိမ် အီ မွှိုမ် ကာအိး မွှိုမ် ကာဒါတ့် ဒွန် မျုဝ်။
3 ခုဝ်၊ ဂေ ဒူအီ ဒွန် မျုဝ်၊ ဂေ ဟဲ့ လာယ် လုတ့် လာယ် လာယ် ခဲင် မိူင် တီ၊ တဲး န့ ပီ ဂေ ဟဲ့ ယိုတ့် အိုမ် မာငုန်။ ခဲ့ ကွယ် ခုန်ဒီခမ် ဒဲင် ကာဒါယ် နီ ဘောကာဂ့လျီတ်၊ ဂေ ဟဲ့ လာယ် လုတ့် လာယ် လာယ် ဒီ အန်။ ဂေ ဒါ ကာညာ ကြုဝ် အီ ကာစိုဝ်း ကာယွင့် ခဲင် မိူင် တီ၊ ဂေ မိူဝ် ဟဲ့ ခြမ် ဒူပ် နဝ်း ဆီ ပွိုန် ဂေ ဘဲန် မျုဝ် ဘဲန် မျုဝ် တူ နပ် ဒီ စူ။”
4 ဟဲ့ ဟွတ့် ပန် တီ အုဝ် ပီ ဝီ ယိုဝ် ဂြုဝ်း ပေါ အူ မျုဝ် အီ လေး ခဲင် ဂါင်ဟြာဝ် တဝ်း၊
“အိုယ် ဘေ ဒူအီ ပီ အိုပ် အုဝ်၊ တဲး ဘေ လေး ခဲင် မိူင် တီ၊ ကွဲ့ တဲး ဘေ ဘူင် ဒူပ် မှာပ် ပီ ဘူင် ဂေ၊ ကွဲ့ တဲး ဘေ လုဝ် ခမ် ဒုက် ကူပ် မှာပ် ပီ ဘူင် ဂေ ခဲင် မိူင် တီ။
5 ခုဝ်၊ မှာပ် ပီ ဘူင် ဂေ ခဲင် မိူင် တီ ဟဲ့ ကိူန် ကာဆဝ်။ န့ ပီ ဟဲ့ မ့ပိုမ် စာ ဒုး ဘ့လေန့်။ ဇဝ်ဖြာ ဟဲ့ လှုဝ်း အီ တူ မွှိုမ် ပီ ဘူင် ဂေ။
6 ဒူအီ ခဲင် မိူင် တီ၊ ဂေ ဟဲ့ ဒွိုမ် ဘူင် ပါယ် မှဝ် ဒီ အီ၊ တဲး ဘေ ဝီ ဘူင် ဝျီ့ ဒီ ဂေ ပါယ် တီ။ ခဲ့ ပီ ဘူင် ဂေ ဒီ အီ၊ အီ လုဝ် ဝီ ဝျီ့ ဝိဝ် ဒီ ဂေ အာ ဘုန်၊ တဲး န့ ပီ ဘေ ဒိုဝ်း ပဝ်း ဝီ ဟပ် ခဲင် ကွက့် ပီ ဒျီင် ဂေ။ တဲး န့ ယီ ပြာင် လွှိုမ် အာ ဘုန် ပဝ်း ပဲ့ ဟဲ့ ဒွါ ဂေ ဒီ အီ။
7 အန် ဟဲ့ ပီဖုင် အန်၊ ဟဲ့ ဘျုဝ် ဒီ ဘူင် ဒူပ် ပီ အိုင် အန် ကိူန် ခဲ့ မှဝ်၊ တဲး အန် ဝီ ခမ် ဒုက် တာင် ဘော က့လိုဝ် ခဲ့ တီ။ ခုဝ်၊ အန် ဟဲ့ ကာဖာ ခဲင် နဝ်း အန် တဝ်း၊ ‘အုဝ် ဟဲ့ ပီ နာင် ဟောခမ်။ အုဝ် တူ မုး ယာ ဆီပြး။ နဝ်း တူ ဒါခိုယ် နဝ်း က့လိုဝ်၊ အုဝ် တူ မိုဝ်း ဒေါ မှဝ်။’
8 ခုဝ် အန် တီ ဒေါ မုး အူ ဆီငဲ ဒုက် ဒွန် မျုဝ် ဒီ တး ကာဇု ဒီ အန် အူ ဇေန့်။ န့ မုး ဆဝ် ရောဂါ အီ တဲး အီ ယမ်၊ ဘော ဒုက် ဒီ နဝ်း ဘော ဒုက် ဒီ အေတ့် ပီ ဒီ ဟူမ် ဘော ငဝ် အီ ဒီ ကာဆိုမ် မိူင် တီ။ ခုဝ်၊ ဇဝ်ဖြာ မိုဝ်း ပွုန် တာင်။ အန် ဒီ ဒမ် မှာပ် ဒီ အန် ပါယ် တီ။”
9 ဂေ ခုန်ဒီခမ် ဒဲင် ကာဒါယ် အီ ဟဲ့ လာယ် လုတ့် လာယ် လာယ် ခဲင် မိူင် တီ၊ အီ ဟဲ့ ဒူပ် နဝ်း ကာဝါတ့် ဂေ၊ ဒေါ ယိုဝ် ဂေ ဒက် ငဝ် ဘော ပ့လဲ့ ငဝ် အီ လေး ခဲင် မိူင် တီ၊ ဂေ ဒီ ဘော ယာမ် တာင် ဘော က့လိုဝ် ဘော ငှုန်။ 10 ဂေ ဘော ယိုဝ် ဒုက် တာင် တီ၊ န့ ဘဲန် နဝ်း ယုဝ် ကာဆဝ် ဒီ ဂေ။ ခုဝ်၊ ဂေ ကွယ် တူင့် ယွတ်။ ဂေ ဘော တဝ်း၊
“ပီ ဆော နာယ် ဒီ ဒုက် ကာဆဝ်၊ ပီ ဆော နာယ် ဒီ မွှိုမ် ယုဝ် ရိုဝ်။ အိုယ် မိူင် တာင်၊ အီ မုး မိူင် ဘာဘဲ၊ အူ နာရီ မိူဝ် အာဝ် နုဝ့်၊ မဲ ဟဲ့ ကာဒုး ဒီ ခမ် ဒုက် တာင် ဘဲန် မျုဝ် ဘဲန် မျုဝ်။”
11 ဘော ဂေ ဒါ ကာညာ ကြုဝ် ဒဲင် ကာဒါယ်၊ ဂေ ဘောကာဂ့လျီတ် ဘော ယာမ် ဘော က့လိုဝ် ကူပ် မိူင် တီ။ ခုဝ်၊ အာဝ် ဟူ မိုဝ်း အီ ဒီ စိုဝ်း ကြုဝ် ဂေ။ 12 ကြုဝ် ပီ ယွင့် ဂေ တီ၊ န့ ဘော မုး ခြိဝ်၊ ရွိုန်၊ ဆဲန့် ဘွတ်၊ ဘော ပွိုန် မာဟွယ်၊ ဘော ဘိက် ကာတမ် လုယ်၊ ဘိက် ခွင်၊ ဘိက် ဖြဲ၊ ဘော ဘိက် ရေန့် ဂဲ။ န့ ဘော မုး ဘော ဟေ အုး ငှုန် ဒွန် မျုဝ်၊ ဘော ပ့လဲ့ မာဆာင်၊ ဘော ဟေ အီ ငဝ်း ကာဆဝ် ဒွန် မျုဝ်၊ ဘော ဟိန်၊ ဂေ ဘွင့် ဘော မာဝ် လုယ်။ 13 ဘော ဂ့လဲ့ ဟေ ဆီနာမူန်၊ မှီ ဒွန် မျုဝ်၊ ဆီနမ် အုး ငှုန်၊ ဒဝ် မောရာ ဘော ကာညန် လေဘူန်၊ ဘော အိုမ် မာငုန် ဘော နာမန် အီ လေး ခဲင် ဘ့လေ နာမန်၊ ဘော ခဝ်ချုင် ဘော ကာပဲ့ ခဝ်ချုင်၊ မာမက် ဂေ မာဘူ၊ မ့ပြွင့် ဂေ လက်လဝ်၊ ဘော ဒူအီ အီ ဘဲန် မှာယ် အီ ဘော ဒူအီ ပီ မှေတ့် ဂေ ဒါ ဆိုက်။
14 ဒါ ကာညာ ကြုဝ် ဂေ တီ၊ ဝီ တဝ်း ဒီ မိူင် တီ၊ “ခဲ့ ကွယ် ကြုဝ် ပီ ဆီ ပွိုန် ကာဆဝ် မဲ၊ အီ ဘွတ် အီ ငဝ်း တာင်၊ န့ ဟဲ့ ဟွတ့် ဟြာယ် တူတ့် ဒွန် မျုဝ်။ ဝါယ် နီ၊ မဲ မိူဝ် အာဝ် ဟူ ဝီ ပွိုန် ကြုဝ် တီ ဒေါ မှဝ်။” 15 ဂေ ဒါ ကာညာ ကြုဝ် အီ ဟဲ့ ကာစိုဝ်း ကာယွင့် ခဲင် မိူင် တီ၊ ဂေ ဟဲ့ ခြမ် ကူပ် မိူင် တီ၊ ဂေ ဒီ ဘော ဟာဝ် ကွယ် ကာတူင့် ဘော ယုဝ် ဒေါ ယိုဝ် ဂေ ဒုက် တီ။ ဂေ ဒီ ဘော က့လိုဝ် ဘော ယာမ် တာင် တဝ်း၊
16 “ပီ ဆော နာယ် ဒီ ဒုက် ကာဆဝ်။ ပီ ဆော နာယ် ဒီ မွှိုမ် ယုဝ် ကာဆဝ် ခဲင် မိူင် တာင် တီ။ ဒူအီ ခဲင် မိူင် တီ ဟဲ့ ဒွိုမ် စှိုပ် ဒီ တာ ဘိက် ဘွတ်၊ ဘိက် အီ ခွင် အီ ရေန့် ဂဲ။ ဂေ ဟဲ့ တာ ဘော ခြိုင် ခြိဝ်။ ခြိုင် ဆဲန့် ဘော ပွိုန် မာဟွယ် ဟဲ့ စှိုပ် ဒီ ဂေ။
17 အူ နာရီ မိူဝ် အာဝ် နုဝ့်၊ ကြုဝ်ကြာမ် ဂေ တီ ဟဲ့ ဟွတ့် ဝီ စှိုမ် ဟြာယ် တူတ့်။”
ဂေ ဒါ တာင် အီ အိုပ် ရိုဝ် ဆင်ဖုဝ် ဘောကာဂ့လျီတ် ဘော ဒူအီ အီ ပဝ့် ရိုဝ် ဆင်ဖုဝ် ဒွန် အီ၊ ဘော ဒူအီ အီ ဘတ် ရိုဝ် ဆင်ဖုဝ် ဒွန် အီ၊ ဘော ဂေ အီ ဘူင် ဂါန်၊ ဂေ ဟာဝ် ခဲင် အိုမ် နမ်မုက်ဆာရာ ဒွန် အီ၊ ဂေ ဒီ ဘော ကွယ် တူင့်၊ ယွတ် ဒုက် ဂေ တီ။ 18 ဂေ ဘော ယိုဝ် ဒေါ ကာဆိုမ် ငဝ် ခဲင် မိူင် တီ၊ ဂေ ဘော ယာမ် တာင် တဝ်း၊ “န့ တူ ဒွိုမ် မိုဝ်း မိူင် အီ ပီ မိူင် တာင် နီ။” 19 ဂေ ဒီ ဘော ဒိုဝ်း ကာပုး ဟပ် ဒဲင် ဂိန့် ဂေ ဘော က့လိုဝ် ဘော ယာမ် တဝ်း၊
“ပီ ဆော နာယ် ဒီ မွှိုမ် ယုဝ်၊ ပီ ဆော နာယ် ဒီ မွှိုမ် ယုဝ် ခဲင် မိူင် တာင် တီ။ ဂေ ဒါ ကာညာ ရိုဝ် ဆင်ဖုဝ် အီ ကာလုဝ်း အိုမ် နမ်မုက်ဆာရာ၊ ဂေ ဟဲ့ ဘဲန် ဒူအီ ခြမ် ကူပ် ကြုဝ်ကြာမ် အီ ကွယ် ခဲင် မိူင် တီ။ အူ နာရီ မိူဝ် အာဝ် နုဝ့်၊ ဒွန် မျုဝ် ဟဲ့ ဟွတ့် ဝီ ဟြာယ် စှိုမ် တူတ့်။
20 န့ ယီ မုး ဘေ အီ ကွယ် ခဲင် ဂါင်ဟြာဝ်၊ တဲး ဘေ ဒါခိုယ် ကူပ် ဟဲ့ လိုဝ် မိူင် တီ။ အိုယ် ဘေ ဒူအီ အီ ညှိုမ် ဇဝ်ဖြာ ဘော ဘေ ဒူအီ ပီ ရဝ်း ပီ တိုယ် ဇဝ် ယေဆူ ဒွန် အီ၊ ဘော ဘေ ဒူအီ အီ ဘျာန် ဂြုဝ်း ဇဝ်ဖြာ၊ တဲး ဘေ ဒါခိုယ်။ ခုဝ်၊ ဇဝ်ဖြာ ဟဲ့ ဒမ် မှာပ် ဒီ ဂေ ခဲင် မိူင် တီ ကူပ် ပဲ့ ဟဲ့ ဘူင် ဂေ ဒီ ဘေ။”
21 ဝါယ် အန် တီ န့ ဝီ မိုဝ်း အာမူ အာမာတ် ဇဝ်ဖြာ အူ ကာဒင် အီ မိုဝ်း အာဖုင် ဒင်ခုဝ်၊ အန် ဝီ ဒိုဝ်း မာဝ် တာင် အူ ဘူင့်။ မာဝ် တီ၊ န့ တာင် ခဲ့ မာဝ် ပီ ကြိတ် အီ ဒီ ငှုဝ်။ အန် ဝီ ဇတ့် မာဝ် တီ ခဲင် အိုမ် နမ်မုက်ဆာရာ တဝ်း၊
“မိူင် ဘာဘဲ အီ တာင် ကာဆဝ်၊ အန် ဒီ လိုဝ် ကာပျာတ့် ပါယ် နီ။ ဝါယ် နီ၊ အာဝ် ဟူ မိုဝ်း အီ ဝီ ယိုဝ် အန် ပေါ အူ ဇေန့်။
22 ဟမ် ဒိင် ပီ ဘး ဂေ ဘော ဟမ် ဒိင် ဒီရဝ် ပီ ကြိတ် ဂေ ဘော ဂြုဝ်း ဒူအီ၊ အီ တဝ်း မှုဝ် ဘော ဟမ် ဝဝ် ပီ ဘုတ် ဂေ၊ အာဝ် ဟူ ပွိုန် ယိုဝ် ခဲင် မိူင် မဲ တီ ဒေါ မှဝ်။ ဒူအီ အီ ဘဲန် လက်ဆာမာ အီ လှဲဝ် ဒီ ဘူင် ဘဲန် မျုဝ် ဘဲန် မျုဝ် မိူဝ်၊ အာဝ် ဟူ မိုဝ်း ခေါ အူ ဝီ ဝါယ် နီ။ ဟမ် ကြိတ် ငှုဝ် မိူဝ်၊ အာဝ် ဟူ မိုဝ်း။
23 ဘ့လာင် ငဝ် အွမ် မိူဝ်၊ အာဝ် ဟူ ပွိုန် ယိုဝ်။ ဂြုဝ်း ကာညူမ် ဒီဘျာ အီ ဒီ ခတ် မိူဝ်၊ အာဝ် ဟူ မိုဝ်း ခဲင် မိူင် မဲ တီ။ ဂေ ဒါ ကာညာ ကြုဝ် အီ ကွယ် ခဲင် မိူင် မဲ တီ၊ ဂေ ဟဲ့ ဘဲန် ဒူအီ ခြမ် ဒဲင် ကာဒါယ် နီ။ မဲ ဟဲ့ ဘူင် မျလှယ့် ဘော ပီလွှက့် ဘော ကာလုဝ် ဒူအီ ဒွန် မျုဝ် ဒဲင် ကာဒါယ် နီ၊ တဲး ဂေ ဘောကာဂ့လျီတ် ကာလိုပ်။
24 မိူင် ဘာဘဲ ကာဒုး ဒီ ခမ် ဒုက် တာင် တီ။ ခုဝ်၊ ဂေ အီ ကွယ် ခဲင် မိူင် တီ၊ ဂေ ဟဲ့ ငဝ်း ယမ် ဒူအီ အီ ဘျာန် ဂြုဝ်း ဇဝ်ဖြာ ဘော ဒူအီ အီ ဆီငါ ဘွတ်။ ဘော ဂေ အီ ဟဲ့ ခမ် ဒီ ယမ် ဒဲင် ကာဒါယ် နီ ဒွန် အီ၊ ဟဲ့ မုး မှာပ် ဂေ။”
အာမူ အာမာတ် ဇဝ်ဖြာ ဟဲ့ ကာလာင် ဒီ အုဝ် ခဲ့ တီ။