1 ဒေါ အန် တီ ခဲင် အာမူ အာမာတ် ဇဝ်ဖြာ ဘူ ကာဒင် အီ ဂူင့် ဆီလယ့် ဘူ ဘ့လ တွိုန်၊ အူ ကာဒင် ဟဲ့ တး ဒူင် ကွယ် အုဝ်။ အန် တဝ်း ဒီ အုဝ်၊ “တး၊ အုဝ် ဒီ ဘျ ဒီ မဲ ပီ ဒီ ပါယ် ဇဝ်ဖြာ ဒီ ဒမ် မှာပ် ဒီ မိူင် တာင် အီ ကွယ် ခူပ် ဘ့လဲင် အိုမ် ဘဲန် ညွင့် ဘဲန် ညွင့်။ အန် ဟဲ့ ပီ ယာ မာလမ် ပဲ့ ဟဲ့ နပ် အီ ဒွန် အီ။ 2 အန် ဟဲ့ လာယ် လုတ့် လာယ် လာယ် ဒီ ဂေ ခုန်ဒီခမ် ဒဲင် ကာဒါယ် ဘောကာဂ့လျီတ်။ ဒူအီ ဒဲင် ကာဒါယ် ဘောကာဂ့လျီတ် ဟဲ့ ဘူင် အီ မွှိုမ် ကာအိး၊ လာယ် လုတ့် လာယ် လာယ် ဒီ အန်၊ တဲး န့ ပီ ဂေ ယိုတ့် အိုမ် မာငုန်။”

3 အန် ဟဲ့ ဟွတ့် ကာလာင် ပါယ် တီ၊ နဝ်း ဖွိုမ် ဇဝ်ဖြာ မိူဝ် ဝီ ပ့လိုက် အုဝ်။ အာမူ အာမာတ် ဇဝ်ဖြာ ဘော စုဝ့် ဟာဝ် အုဝ် ခဲင် ပြဲ ကာဟဝ်း။ ဒီ တီ အုဝ် ဝီ ယိုဝ် အီဘိုန့် အူ ဝီ။ အန် တုတ့် ဒဲင် မာဒုဝ် ပြဲ အီ ရေန့် ဂဲ။ ဒီ ဒုဝ် မာဒုဝ် ပြဲ တီ ဘော ဒုဝ် န့ မိုဝ်း ဒီ ဒဲမ် စိူဝ် ဘဲန် မျုဝ် ဘဲန် မျုဝ် အီ ကာခဲန့် ဒီ ဇဝ်ဖြာ။ အန် မိုဝ်း ဂိန့် ဘူ ဘူင့် ဘော နိုင် ဂိုဝ် ဘူင့်။ 4 အီဘိုန့် တီ၊ ဟဲ့ စှိုပ် ခြိုင် ရေန့် ဘော ခြိုင် ရေန့် ဂဲ။ အန် ဟဲ့ ပီစှိတ် အန်၊ ဒိုက် ခြိဝ် ဘော ဆဲန့် ဘော ပွိုန် မာဟွယ် ဒီ အန်။ ဒီ ဒဲ အန်၊ အန် ဟဲ့ ဂူင့် ကွက့် ခြိဝ် အူ ဘူင့်။ ခဲင် ကွက့် တီ၊ ဟဲ့ နုဝ့် အီ မွှိုမ် ကာအိး၊ မွှိုမ် ကာဒါတ့် ကူပ် ပဲ့ ဟဲ့ လာယ် လုတ့် လာယ် လာယ် အန်။ 5 ဒီ ကာတဝ်း အန်၊ န့ ဟဲ့ ဒဲမ် စိူဝ် အီ မိုဝ်း ဆီဖဝ် ပီ တူ နပ် အီ။ န့ တဝ်း၊

6 အုဝ် ဝီ ယိုဝ်၊ အီဘိုန့် တီ ဟဲ့ ယိုတ့် ကူပ် ဟဲ့ ဒျီင် အန် နှာမ် ဂေ ဒူအီ အီ ဆီငါ ဘွတ် ဘော နှာမ် ဂေ အီ ဟဲ့ ခမ် ဒီ ယမ် ကူပ် ညှိုမ် ဂေ ဒီ ဇဝ် ယေဆူ။

ဒေါ ယိုဝ် အုဝ် အီဘိုန့် တီ၊ အုဝ် ဘော အာမ် ကာဆဝ်။ 7 အာမူ အာမာတ် ဇဝ်ဖြာ တွိုန်၊ ဝီ ဒီမွှတ် အုဝ် တဝ်း၊ “မှဝ် န့ ပါယ် ပီ အာမ် မဲ ပါယ် တီ။း အုဝ် ဒီ ကာလာင် ဒီ မဲ ပီ ပါယ် ဆီဖဝ် လွင် အီဘိုန့် တီ၊ ဘော လွင် မာဒုဝ် ပြဲ ဟာယ် အီ မိုဝ်း ဂိန့် ဘူ ဘူင့် ဘော နိုင် ဂိုဝ် ဘူင့် ပီ ပဝ့် အီဘိုန့် တီ။ 8 မာဒုဝ် ပြဲ ပီ ယိုဝ် မဲ တီ၊ ဒေါ မွိုန် အန် ဟဲ့ ကွယ်။ ဒေါ တီ နီ၊ အန် အာဝ် ဟူ မိုဝ်း။ အန် ဟဲ့ လေး ခဲင် ကာဒဝ် ဟူလဝ်၊ တဲး အန် လိုဝ် စှိုမ်။ ဂေ ဒူအီ အီ ကွယ် ဒဲင် ကာဒါယ် ဘောကာဂ့လျီတ်၊ ဂေ ဒီ အာမ် ကာဆဝ်။ ဂေ မုး ဒူအီ အီ တူ မိုဝ်း စိူဝ် ခဲင် ဘပ် ဇာရာင် ဒူအီ အီ ဟဲ့ ပွိုန် အာဆာက် ကာမာယ်။ ဘပ် တီ မုး ဘပ် အီ ကွယ် ဆိန့် ဒေါ ဖာန် ဘ့လေး ဇဝ်ဖြာ ကာဒါယ် နီ။ ဂေ ဒူအီ ဇိုဝ် တီ၊ ဂေ ဒီ ယိုဝ် မာဒုဝ် ပြဲ နီ အီ ဟဲ့ ဒွိုမ် ကွယ် အာတ့် နီ။ အန် ယီ တူ ဝီ ကွယ် ဒေါ တီ နီ။ မာလဲ၊ အန် ပီ ဒီ ဝီ တး ကွယ်။ ဆေ ဂေ ယိုဝ် လွင် အန် တီ၊ ဂေ ဒီ အာမ် ကာဆဝ်။

9 လွင် အန် တီ၊ တဲး ဘေ မိုဝ်း အာငျာန်။ ဂိန့် ဘူ ဘူင့် တွိုန်၊ န့ ဘော မုး နွန် ဘူ နွန်၊ အီ မုး ဒူင် တုတ့် အီဘိုန့် တွိုန်။ 10 ဂိန့် တီ ဘော မုး ခုန်ဒီခမ် ဘူ ကာဒင်။ အာဒါ ဖန် ကာဒင် ဟဲ့ ဟွတ့် စုဝ်း။ အာဒါ အူ ကာဒင် ယီ ဆီ ကွယ်။ ပေါ အူ ကာဒင် ညှမ် တး။ ဆေ အန် ဟီ တး၊ အန် ဒီ အိုပ် အာဒါ အူ ကာစန်။ 11 မာဒုဝ် ပြဲ တွိုန် အီ ဟဲ့ ဒွိုမ် ကွယ် ဒေါ မွိုန်၊ အီ တူ ဝီ ကွယ် ဒေါ တီ နီ၊ အန် မုး ခုန်ဒီခမ် ကာဒင် န့ဒါ။ အန် ဘော ဘာ့ ခဲင် ဘူ ကာဒင် တီ။ ဘော အန် ဒီ လိုဝ် စှိုမ်။

12 နိုင် ဂိုဝ် ဘူင့် ပီ ယိုဝ် မဲ တွိုန်၊ န့ မုး ခုန်ဒီခမ် ဂိုဝ် ကာဒင် အီ ညှမ် ပွိုန် ဒီ အိုပ်။ မာလဲ၊ ဂေ ဒီ မိုဝ်း ပွုန် ခုန်ဒီခမ်။ ဂေ ဒီ အိုပ် ရိုမ် ဒူပ် မာဒုဝ် ပြဲ တီ အာဒါ အူ နာရီ။ 13 ခုန်ဒီခမ် ဂိုဝ် ကာဒင် တီ၊ ဂေ ဒီ လာယ် ဖြူမ် ဒီ ဒွါ ပွုန် ဂေ ဟဲန့် ဒီ မာဒုဝ် ပြဲ တီ။ 14 ဂေ ဒီ ဘော ကာဂုဝ်း ဒီ ဂွန် မာဘူ တွိုန်။ မာလဲ၊ ဂွန် မာဘူ တီ၊ အန် ဒီ အွင် ဂေ။ ခုဝ်၊ အန် ဘော မုး ဒါ ကာညာ အီ အိုပ် ဒဲင် ဂေ ဒါ ကာညာ အီ ဟဝ် ဘောကာဂ့လျီတ်။ အန် ဘော မုး ခုန်ဒီခမ် အီ အိုပ် ဒဲင် ဂေ ခုန်ဒီခမ် အီ ဟဝ် ဘောကာဂ့လျီတ်။ ဂေ ဒူအီ ပီ ဒွိုမ် ဒဲ့ အန် ဘော ဂေ ဒီဘဲ ပဲ့ ဟဲ့ ရဝ်း အန်၊ ဂေ ဒီ ကွယ် ရိုမ် ဒူပ် ဂွန် မာဘူ တီ ဆေဆေ။”

15 အာမူ အာမာတ် ဇဝ်ဖြာ တွိုန် ဟဲ့ ဟွတ့် ကာလာင် လွင် အန် တီ၊ အန် ပီ ဝီ တဝ်း ဒီ အုဝ်၊ “အိုမ် ပဲ့ ဟဲ့ ယိုဝ် မဲ၊ အီ မုး ဒူင် တုတ့် ယာ မာလမ် တီ၊ န့ မုး ဒူအီ အီ ကွယ် ဒွန် မာန် ဒွန် မိူင်၊ ဒူအီ ဒွန် ခြိုဝ် ဒွန် မျုဝ်၊ ဘော ဂေ ဒူအီ အီ ကာလာင် ဂြုဝ်း ဒွန် မျုဝ်။ 16 မာဒုဝ် ပြဲ ဘော နိုင် အန် ဂိုဝ် ဘူင့် ပီ ယိုဝ် မဲ တီ၊ ဂေ ဒီ ဝီ ဇွင့် ယာ မာလမ် တီ။ ဂေ ဒီ ဖာတ် ဒိုဝ်း တူတ့် ခဲ့ ပီ မိုဝ်း အန်။ ဂေ ဒီ တဲး အန် ကွယ် ဒုဝ် ဂ့လ။ ဂေ ဒီ ဟူမ် ယင် အန် ဘော ဒုဝ့် အန် ခဲင် ငဝ်။ 17 ခုဝ်၊ န့ မုး ဇဝ်ဖြာ အီ တဲး ဂေ ဘူင် ပါယ် တီ၊ တဲး ဂေ လာယ် ဖြူမ် ဒီ အာပ် ဘော အာဖုင် ဒင်ခုဝ် ဂေ ဒီ မာဒုဝ် ပြဲ တီ၊ တဲး န့ ကော ဇမ် ပန် ဒီ ဇေ့ဇုင် တူတ့် ပဲ့ ဟဲ့ ကာလာင် ဇဝ်ဖြာ။ 18 အီဘိုန့် ပီ ယိုဝ် မဲ တီ၊ အန် မုး မိူင် တာင် ပီ အိုပ် ခုန်ဒီခမ် ဒဲင် ကာဒါယ် ဘောကာဂ့လျီတ်။”