1 ဝါယ် အန် တီ အာမူ အာမာတ် ဇဝ်ဖြာ တွိုန် ပီ ဝီ နှဲ ဘ့လဲင် အိုမ် အူ ဘ့လဲင် ဒီ အုဝ်။ န့ မုး ဘ့လဲင် အိုမ် အီ ဒွါ အာဆာက် ဒီ အီ အီ ဟဲ့ ဆီငါ ပီ မာဝ် မင်ပွင့်။ န့ လှဲ တး ဒီ မာလာင် ဒူင် ကွယ် ဇဝ်ဖြာ ဂါယ် ဂွန် မာဘူ တွိုန်။ 2 န့ ဘော လှဲ ဟာဝ် ဒူပ် န့တေန့် တာင် အီ ကွယ် ကာတဲ မိူင်။ အာ ဘ့လာက် အိုမ် တီ၊ န့ ဝီ မိုဝ်း ဟေ။ ဘ့လေ ဟေ တီ နပ် ဒီ ဒွါ အာဆာက် ဒီ အီ။ ဟေ ဘ့လေ တီ၊ န့ မိုဝ်း ဘ့လေ ဂိုဝ် ဒီ အာ မျုဝ်။ န့ ဘော ဘ့လေ ဒွန် မာဂျီန်။ လှာ ဂေ ဘော ပဲ ပီဟြာယ် ဆဝ် ရောဂါ ဂေ ဒူအီ ဒွန် မျုဝ်။ 3 ခဲင် မိူင် တီ၊ န့ မိူဝ် တူ မိုဝ်း ခေါ အူ မျုဝ် ပဲ့ ဟဲ့ ဒိူင် ဟဲ့ အေး ဇဝ်ဖြာ။ မာလာင် ဇဝ်ဖြာ ဘော ဂွန် မာဘူ တွိုန် ဘော ကွယ် ခဲင် မိူင် တီ။ ဂေ ဒဲစေန့် ဇဝ်ဖြာ ဒီ ဘူင် ပီ ဆုတ့် ပီ စ်ု ဇဝ်ဖြာ ဂေ ဘူင်။ 4 ဂေ ဒီ ဘော ယိုဝ် နာ အန် ဇဝ်။ စိူဝ် အန် ဇဝ် ဂေ ဒီ ဘော ဒဲမ် ဒိုက် ဒီ ကာတဝ်း ဂေ။ 5 ခဲင် မိူင် တီ၊ အာဝ် ဟူ မိုဝ်း ခဲင် မှိုဝ်။ ငဝ် အွမ် မိူဝ် အာဝ် ဟူ လုဝ်။ ဘ့လာင် ဆီငဲ မိူဝ်၊ အာဝ် ဟူ လုဝ်။ ခုဝ်၊ ဘ့လာင် ဇဝ်ဖြာ အီ ဒီ ဘ့လာင် ဒီ ဂေ။ ဂေ ဒီ ဘော အိုပ် မိူင် ဒွန် စုဝ် ဒွန် ဇာတ်။

6 ဝါယ် အန် တီ အာမူ အာမာတ် ဇဝ်ဖြာ တွိုန် ပီ ဝီ ကာလာင် ဒီ အုဝ် တဝ်း၊ “ဂြုဝ်း နီ ဟဲ့ မုး ဂြုဝ်း မုး၊ ဂြုဝ်း မှာန် အာခါခ်ု။ ဇဝ်ဖြာ အီ တဲး နဝ်း ဖွိုမ် အန် ဒီ ဒူအီ အီ ဘျာန် ဂြုဝ်း ဇဝ်ဖြာ၊ အန် ဟဲ့ စ်ု အာမူ အာမာတ် အန် ဘျ နှဲ ဒီ ဂေ ဒီဘဲ အန် လွင် အီ ဒီ စေဝ် ဘဲန်။”

7 ဇဝ် ယေဆူ တဝ်း၊ “ဘ်ု ဘေ ယွတ်၊ အုဝ် ဒီ စေဝ် တး။ ဂေ အီ ဘူင် ဒူပ် ပီ ကာလာင် အုန် အုဝ် ခဲင် ဘပ် ပဲ့ နီ၊ ဂေ ဒီ ဘျုဝ် ဒါခိုယ်။”

8 အုဝ် အာယောဟာန်၊ အုဝ် ဟဲ့ ယိုဝ် လွင် အန် တီ။ ဒေါ ယိုဝ် အုဝ် လွင် အန် တီ၊ အုဝ် ဘော ဝီ မုတ် ဂိုပ် ခူပ် ပ့လဝ် အာမူ အာမာတ် အီ ဟဲ့ ဘျ ဇိုဝ် တီ ဒီ အုဝ်။ အုဝ် ဘော ဝီ ကြိုပ် အန်။ 9 မာလဲ၊ အန် ဝီ တဝ်း ဒီ အုဝ်၊ “အာဝ် လုဝ် ဘူင် ပါယ် တီ၊ အုဝ် မိူဝ် မုး ဒဲစေန့် ဇဝ်ဖြာ ပီ မဲ။ အုဝ် ဘူင် ဂါန် ရိုမ် ဒူပ် မဲ ဘော ဘီနွင် မဲ အီ မုး ဒူအီ အီ ဘျာန် ဂြုဝ်း ဇဝ်ဖြာ၊ ဘော ဘူင် ရိုမ် ဒူပ် ဂေ အီ ဘူင် ဒူပ် ပီ ဒဲမ် အုန် ခဲင် ဘပ် ပဲ့ နီ။ တဲး မဲ ကြိုပ် မီ ဇဝ်ဖြာ။” 10 အန် ပီ ဝီ တဝ်း ဒီ အုဝ်၊ “ပီ ဘျ၊ ပီ ကာလာင် အုန် ခဲင် ဘပ် နီ၊ အာဝ် လုဝ် ချြီင်၊ အာဝ် လုဝ် ကာဘိတ်။ ခုဝ်၊ အာခြာဝ် ဒီ ဘဲန် တူတ့် ဒွန် မျုဝ် ဟဲ့ ကာတတ် ဒီ တး။ 11 ဂေ အီ ဘူင် မိူက်၊ တဲး ဂေ ဘူင် ဟာဝ် အီ မိူက်။ ဂေ အီ ဘူင် အီ ကာဒါတ့်၊ တဲး ဂေ ဘူင် ဟာဝ် အီ ကာဒါတ့်။ ဂေ အီ ဘူင် နာ ဘွတ်၊ တဲး ဂေ ဘူင် ဟာဝ် နာ ဘွတ်။ ဂေ အီ ဆီငါ ဘွတ်၊ တဲး ဂေ ဆီငါ ဘွတ် ဟာဝ် ပါယ် တီ။”

12 ဇဝ် ယေဆူ ဝီ တဝ်း၊ “ဘ်ု ဘေ ယွတ်၊ အုဝ် ဒီ စေဝ် တး။ အုဝ် ဒီ ဘော ဂူင့် ရုး ပီ ဒီ ပွိုန် ဒွန် အီ။ အုဝ် ဒီ ဝီ ဝျီ့ ဒီ ဂေ ဒူအီ ဒွန် အီ ခဲ့ ပီ ဘူင် ဂေ ဝီ မှဝ် ဝီ အန်။ 13 အုဝ် မုး အီ ဒီ အာတ့် ဆိူတ် ဘော အီ ဒီ ပန် ဆိူတ်။ အုဝ် မုး အီ ကာစုး တူတ့် ဒွန် မျုဝ်။ အုဝ် ဒီ ဘော ဘူင် တဲး န့ ကော ဟွတ့် ဒွန် မျုဝ်။

14 ဂေ အီ ဟဲ့ လး ခြိုင် ပီ တာ ဂေ၊ ဂေ ဒီ ဘျုဝ် ဒါခိုယ်။ ဂေ ဒီ ပွိုန် ဒီ ဟူမ် ဘ့လေ အီ ဒွါ အာဆာက်။ ဂေ ဒီ ပွိုန် ဒီ လိုပ် ဘော ဒီ မာလုဝ်း မိူင် တွိုန်။ 15 နာ ရေတ့် မိူင် တီ၊ န့ မိုဝ်း ဂေ အီ ပီ မာဆုဝ် ဘော ဂေ အီ ဘူင် မျလှယ့်၊ ဂေ အီ လာယ် လုတ့် လာယ် လာယ်၊ ဂေ အီ ငဝ်း အာဆာက် အီ၊ ဂေ အီ ကြိုပ် အာရိုပ် ရာင် ဘော ဂေ အီ ဆီမာ ကာလုဝ်၊ အီ အိုင် ဒီ ဘူင် နာ တူ မှာန်။

16 အုဝ် အီ မုး ဇဝ် ယေဆူ၊ အုဝ် ဟဲ့ စ်ု အာမူ အာမာတ် အုဝ် ဟာဝ် ကာလာင် ဒီ ဘေ ခဲင် ဖိုင် ဇဝ် ယေဆူ။ အုဝ် ဘော မုး လှုက်လှာန် အာဒါဝိတ်။ အုဝ် မုး ဘော ဒင် ခြိုဝ် အန်။ အုဝ် မုး မာလာင် ညှာ အီ ဘ့လာင် ဆိန့်ဝး။”

17 နဝ်း ဖွိုမ် ဇဝ်ဖြာ ဘော အဝ် ကာမာယ် တွိုန် ဝီ တဝ်း၊ “တဲး မဲ တး။” ဂေ အီ ဟဲ့ ယိုဝ် ဂြုဝ်း တီ၊ ဂေ မိူဝ် ဝီ တဝ်း၊ “တဲး မဲ တး။” ပါယ် တီ၊ တဲး ဘော ဂေ အီ ဆီ ဒျီင် အိုမ် တး။ အာဆေ မိုဝ်း နဝ်း ဆီ ပွိုန်၊ တဲး အန် တး ဒိုဝ်း အိုမ် အီ ဒွါ အာဆာက်။ အာဝ် လုဝ် တူတ့် မာဆေ။

18 အုဝ် အာယောဟာန်၊ အုဝ် ဒမ် ဆာဒိက် ဒီ ဂေ ဒွန် အီ အီ ထူမ် ဂြုဝ်း ပီ ဘျ အုန် အန် ဇဝ် ခဲင် ဘပ် ပဲ့ နီ။ အာဆေ ဝီ ပွါ ဂြုဝ်း ခဲင် ဘပ် ပဲ့ နီ၊ ဇဝ်ဖြာ မိူဝ် ဒီ ဝီ ဒိုဝ်း ဒုက် ဝီ ပွါ ဒီ ဝီ တီ။ လွင် ဒုက် တီ ဇဝ်ဖြာ ဟဲ့ ဒဲမ် အုန် ခဲင် ဘပ် နီ။ 19 အာဆေ ဝဲန် ဂြုဝ်း မင် ဒုဝ် ပဲ့ ဟဲ့ ဘျ အုန် အန် ဇဝ် ခဲင် ဘပ် ပဲ့ နီ၊ ဇဝ်ဖြာ မိူဝ် ဒီ ဒိုဝ်း ဝဲန် မင် မျုဝ် ပဲ့ ဟဲ့ တဝ်း အန် ဒီ ဒွါ။ ပီ တဝ်း ဇဝ်ဖြာ ဒီ ဒွါ၊ န့ ဘော မုး ဘ့လေ အီ ဒွါ အာဆာက်၊ ဘော မုး အာခ့ဝါင် ဒီ ပွိုန် ဒီ လိုပ် ခဲင် မိူင် အီ ဆီငါ ဘွတ်။ လွင် အန် တီ ဇဝ်ဖြာ ဟဲ့ ဘျ တူတ့် ဒွန် မျုဝ် ခဲင် ဘပ် နီ။

20 အန် ဇဝ် အီ ဟဲ့ ကာလာင် လွင် ဇိုဝ် တီ ဒွန် မျုဝ် အန် တဝ်း၊ “ဟဲ့ မှာန်၊ အုဝ် ဒီ စေဝ် တး။” ယေ ဘော တဝ်း၊ “ဆာတူ၊ မဲ ဇဝ် ယေဆူ၊ ယေ ဘာင် တဲး မဲ တး။”

21 ဘေ ဒူအီ အီ ဆီငါ ဘွတ်၊ တဲး ဇဝ် ယေဆူ ဂေဇူ ဘေ ဒွန် အီ။ ဆာတူ။