1 အုဝ် ဝီ ယိုဝ် ပေါ အူ မျုဝ် ခဲင် ဂါင်ဟြာဝ် အီ ဟဲ့ မွှိုမ် အာမ် ကာဆဝ်။ အာတီ၊ န့ မုး အာမူ အာမာတ် ဇဝ်ဖြာ ဘူ ကာဒင်။ ဂေ ဒိုဝ်း တး ဒုက် ဘူ မျုဝ်။ ဒုက် ဘူ မျုဝ် တီ၊ ဟဲ့ မုး ဒီ ကာဒဲ့ ဆိူတ်။ ပီ ပါယ် ဇဝ်ဖြာ ဒီ ရူ၊ န့ ဒီ တူတ့် ဝါယ် အန် တီ။

2 အုဝ် ဝီ ယိုဝ် အိုမ် ဒိုင် တာင် အီ ပီ အဲပ် ဇမ် ဘော ငဝ်။ အုဝ် ဝီ ယိုဝ် ဘော ဂေ အီ ဟဲ့ အွင် မာဒုဝ် ပြဲ ဟာယ် တွိုန်၊ အီ တူ ကြိုပ် အာရိုပ် အန်၊ တူ ဒိုဝ်း ဒုဝ် ခါနှာန် အီ မုး စိူဝ် အန်။ ဂေ အီ ဟဲ့ အွင် ပါယ် တီ၊ ဂေ ဟဲ့ ဂူင့် ဘော ဒိင် ပီ ဒွါ ဇဝ်ဖြာ ဒီ ဂေ ဘော ကွယ် ခူပ် အိုမ် ဒိုင် တာင် အီ ပီ အဲပ် ဇမ် တီ။

3 ဂေ ဘော တဝ်း မှုဝ် ပဲ့ ဟဲ့ ဒွိုမ် တဝ်း အာမုဝ်ဆဲ အီ မုး ဒဲစေန့် ဇဝ်ဖြာ။ န့ ဘော မုး မှုဝ် လွင် ဂွန် မာဘူ။ ဂေ တဝ်း၊ “အိုယ် မဲ ဇဝ်ဖြာ၊ မဲ မုး ဇဝ်ဖြာ အီ အိုပ် တူတ့် ဒွန် မျုဝ်။ မဲ ဇဝ် ဟဲ့ ဘူင် နာ ဘွတ် နာ မွှိုမ် အီ မွှိုမ် အာမ် ကာဆဝ်။ မဲ ဘော မုး ခုန်ဒီခမ် အီ အိုပ် အာမျုဝ် ဒူအီ ဆိန့် ဘာန် ဒေါ မွိုန်။ ပီ ဘူင် မဲ ဇဝ် ဟဲ့ မုး ဟဲ့ မှာန် အာခါခ်ု။

4 ဒွန် အီ ဒီ ဘော ရီမာတ် မဲ ဇဝ်ဖြာ၊ အာဝ် မိုဝ်း အာဆေ အီ တူ ရုဝ်ဆေ မဲ ဇဝ်။ ခုဝ်၊ မဲ ဇဝ် အူ ကာဒင် ဟဲ့ ဆီငါ ဘွတ်။ မဲ မိူဝ် ဟဲ့ ဘူင် နာ မုး နာ မှာန် အီ ဟဲ့ လိုဝ်း ဆီချာ။ ခုဝ် အန် တီ ဂေ ဒူအီ ဒွန် မျုဝ်၊ ဂေ ဒီ တး ကြိုပ် မဲ။”

5 ဂေ ဟဲ့ ဟွတ့် တဝ်း ပါယ် တီ၊ အုဝ် ဝီ ယိုဝ် ခဲင် ဂါင်ဟြာဝ်၊ န့ မိုဝ်း ဒူင် ဘွတ် ယီ ပီ ထိုပ် ဘိက် ဘွတ် တွိုန် အီ မုး ဒူင် ကွယ် ဇဝ်ဖြာ။ ဒူင် ဘွတ် တီ ဟဲ့ ဟွတ့် ဝိုဝ်း အုန်။

6 အာမူ အာမာတ် ဇဝ်ဖြာ ဘူ ကာဒင် အီ ဒိုဝ်း တး ဒုက် ဘူ မျုဝ် တွိုန် ဘော လေး ခဲင် ဒူင် ဘွတ် တီ။ ဂေ ဟဲ့ စှိုပ် ခြိုင် အီ ဆီငါ အီ လုယ် ရာဝ်။ ဂေ ဟဲ့ မိုဝ်း ဘိက် ခြိဝ် ဝါယ် လဲင် ဒီ ဘာင် နဝ်း ဂေ။

7 ခဲင် ဒုဝ် ဆတ်ဒါဝါ ဖွုန် ဒုဝ် တွိုန်၊ န့ မိုဝ်း အာဒါ အူ ဒုဝ်၊ အန် ဒိုဝ်း ဆီလယ့် ခြိဝ် ဘူ ဘ့လ ဝီ ဒွါ ဒီ အာမူ အာမာတ် ဇဝ်ဖြာ ဘူ ကာဒင် တီ။ ဇဝ်ဖြာ အီ ကွယ် ဒွန် စုဝ် ဒွန် ဇာတ်၊ အန် ဟဲ့ ဟပ် ဝူတ် ဘဲန် မျုဝ် ဘဲန် မျုဝ် ခဲင် ဆီလယ့် တီ၊ တဲး န့ ကော နုဝ့်။

8 အာဖုင် ဒင်ခုဝ် ဇဝ်ဖြာ ဘော ပွုန် အန် တဲး န့ မိုဝ်း ဒက် ငဝ် အီ ကွယ် ကော နုဝ့် ခဲင် ဒူင် ဘွတ် တီ။ အာဝ် မိုဝ်း အာဆေ အီ ပွိုန် လိုပ် ဒူင် တီ အာတ့် ပွုန် တူတ့် ဒုက် ဘူ မျုဝ် ပီ ဒီ လုဝ် ဒွါ ဂေ အာမူ အာမာတ် ဇဝ်ဖြာ ဘူ ကာဒင် တွိုန်။