1 အုဝ် ဝီ ယိုဝ် ပေါ အူ ဇေန့်၊ န့ မုး ဂွန် မာဘူ အီ ဟဲ့ ကွယ် ဒဲင် နွန် ဇီအူန်။ ဘော ဒူအီ အူ ဆဲန် ဒီ ဖွုန် မှိုန့် ဒီ ဖွုန် ဟြဲန့် ဝီ တွိုန်၊ ဂေ ဟဲ့ ကွယ် ရိုမ် ဒူပ် အန်။ ဒူအီ ဂေ တီ ဟဲ့ မိုဝ်း စိူဝ် ဂွန် မာဘူ ဘော စိူဝ် ဂုန့် အန် အီ ဒိုက် ဒီ ကာတဝ်း ဂေ ဒွန် အီ။ 2 အုဝ် ပီ ဝီ ယိုဝ် ဂြုဝ်း တာင် လေး ခဲင် ဂါင်ဟြာဝ်။ န့ ပီ ဟမ် အိုမ် ဒီစှာ ဘော ဟမ် ကာနမ်။ ဟမ် ပီ ယိုဝ် အုဝ် တီ၊ န့ ပီ ဟမ် ဒိင် ပီ ဘး ဒူအီ ကိူန် အီ ဟဲ့ လှဲဝ် ဒီ ဘး။ 3 ဒူအီ အူ ဆဲန် ဒီ ဖွုန် မှိုန့် ဒီ ဖွုန် ဟြဲန့် ဝီ တီ၊ ဂေ ကွယ် နာ အာတ့် မာလာင် အန် ဇဝ် ဘော နာ အာတ့် ဒုဝ် ဆတ်ဒါဝါ ဖွုန် ဒုဝ် အီ အိမ်၊ ဘော နာ အာတ့် ဒါ တာင် ဂေ တွိုန်။ ဂေ ဘော တဝ်း မှုဝ် ကာမာယ်။ ဒဲင် ဒူအီ ဂေ တီ အီ မုး တူတ့် ဒူအီ ပဲ့ ဟဲ့ ထုတ် လေး ဇဝ်ဖြာ ဒဲင် ကာဒါယ်၊ အာဝ် မိုဝ်း အာဆေ အီ နပ် ဒီ ဟေန် မှုဝ် ကာမာယ် တီ။ 4 ဒူအီ ဂေ တီ၊ ဂေ မုး ဒူအီ အီ ပဲ ဒီ အိုပ် ဒုဝ် ဘြိမ် ဂေ။ ဂေ မိူဝ် တူ လာယ် လုတ့် လာယ် လာယ် ဒီ အီဘိုန့်။ ဂေ ဘော ပီ ဒီဘျာ ဇဲတ်။ ဂွန် မာဘူ ဟာဝ် နာ မှဝ်၊ ဂေ ဘော ဟာဝ် ဒူပ် အန်။ ဖိုင် ဂေ တီ၊ ဟဲ့ ပီ ဘ့လေ ဒင် ပီ လှူ အီ ဒီ ဇဝ်ဖြာ ဘော ဒီ ဂွန် မာဘူ တွိုန်။ 5 ဂေ မိူဝ် တူ ကာလာင် ဂြုဝ်း တူ မှာန်။ အာဝ် မိုဝ်း အာဆေ အီ ပွိုန် ကာလာင် နာ တူ မွှိုမ် လွင် ဂေ။

6 ဝါယ် အန် တီ အုဝ် ပီ ဝီ ယိုဝ် အာမူ အာမာတ် ဇဝ်ဖြာ ပေါ အူ ကာဒင်၊ အန် ဘိုန့် စာ ဟာဝ် ခဲင် ဘ့လေန့်။ အန် မိုဝ်း ဒီ ကာလာင် လွင် အီ တဲး နဝ်း ဒူအီ ဒါခိုယ်။ လွင် အန် တီ ဟဲ့ မှာန် ဆေဆေ။ အန် ဘော ကာလာင် တဲး ဒူအီ ဒွန် မျုဝ် နပ်။ ခဲ့ ကွယ် ဒူအီ ဒဲင် ကာဒါယ် ဒွန် ဇိုဝ် ဒွန် ခြိုဝ်၊ ဒွန် မာန် ဒွန် မိူင်၊ ဘော ဂေ အီ ကာလာင် ဂြုဝ်း ဒွန် မျုဝ်၊ အန် တဲး ဂေ နပ် တူတ့်။ 7 အန် ဘော ကာလာင် ဂြုဝ်း တာင် တဝ်း၊ “တဲး ဘေ ရုဝ်ဆေ ဇဝ်ဖြာ ဘော အိူပ် မျုက် အန် ဇဝ်။ ခုဝ်၊ ဟဲ့ ဟွတ့် ဇမ် အာခြာဝ် ဒီ ဆုင်ဖျာတ် အန် ဇဝ် အာမူ ဒူအီ ဒဲင် ကာဒါယ် ဘောကာဂ့လျီတ်။ တဲး ဘေ ကြိုပ် အန် ဇဝ် အီ ဖာန် ဘ့လေး ဂါင်ဟြာဝ် ဘော ကာဒါယ်၊ အီ အိုပ် ဘော အိုမ် နမ်မုက်ဆာရာ ဘော တုဝ်း အိုမ် ဒွန် ပ့လုဝ့်။”

8 အန် ဟဲ့ ဟွတ့် ကာလာင် ဂြုဝ်း တီ၊ အာမူ အာမာတ် ဇဝ်ဖြာ ကာဒင် ဟာအာ ပီ ဝီ ကာလာင် ဂြုဝ်း တဝ်း၊ “မိူင် ဘာဘဲ ဟဲ့ ဟွတ့် လိုဝ်။ ဒူအီ ခဲင် မိူင် တီ၊ ဂေ ဟဲ့ ဘူင် တဲး ဒူအီ ဒွန် မျုဝ် ဘူင် အီ တူ မွှိုမ်။ န့ ပီ ဂေ လာယ် လုတ့် လာယ် လာယ် ဝါယ် ဟဲ့ ဒျီင် ဂေ အိုမ် မာငုန် ဘော ယိုတ့် ပဝ်း။” 9 ပန် တီ အာမူ အာမာတ် ဇဝ်ဖြာ ကာဒင် ဟာအူယ် ပီ ဝီ ကာလာင် ဂြုဝ်း တာင် တဝ်း၊ “အာဆေ ကြိုပ် မာဒုဝ် ပြဲ ဟာယ်၊ ကြိုပ် ဘော အာရိုပ် အန်၊ အာဆေ ဒိုဝ်း ဘော ဇိုမ် မာဒုဝ် ပြဲ ဟာယ် တီ၊ ဒွက် ဒီ ကာတဝ်း အန်၊ ဆေ အာဝ် ပါယ် တီ၊ ဒွက် ဘော ဒီ ဒဲ အန်၊ 10 အန် ဒီ လုဝ် ခမ် ကာဆဝ် နဝ်း ရူ ဇဝ်ဖြာ၊ တဲး န့ ပီ အန် လုဝ် ဒျီင် အိုမ် ပဝ်း အီ တဲး အန် ယိုတ့် ပဝ်း။ ပဝ်း တီ ဟဲ့ ပီ နဝ်း ရူ ဇဝ်ဖြာ အီ ဟဲ့ ဟွတ့် ဟပ် ခဲင် ကွက့်၊ အာဝ် ကာဆူ မာဆေ။ ဒူအီ ဂေ တီ ဒီ လုဝ် ခမ် ဘော ဒုက် တာင် ခဲင် ငဝ် ဂန်ဒိူက် နာ အာတ့် အာမူ အာမာတ် ဇဝ်ဖြာ အီ ဆီငါ ဘွတ် ဘော နာ အာတ့် ဂွန် မာဘူ တွိုန်။ 11 ဒက် ငဝ် ဒီ ဘော လေး ဒူင် ခမ် ဂေ ဒုက် ဇိုဝ် တီ ဒွန် စုဝ် ဒွန် ဘာန်။ ဂေ ဒူအီ အီ ကြိုပ် မာဒုဝ် ပြဲ ဟာယ်၊ ဂေ အီ ကြိုပ် ဘော အာရိုပ် အန် ဘော ဒိုဝ်း ဇိုမ် ဘော စိူဝ် အန်၊ ဂေ တူ မိုဝ်း ဒေါ ဒါခိုယ် ဆီငဲ မှဝ်။ 12 ဂေ အီ မုး ဒူအီ အီ ဆီငါ ဘွတ်၊ အီ ဘူင် ဒူပ် ဒါရာ ဇဝ်ဖြာ ဘော တူ ဝဲန် ဇဝ် ယေဆူ၊ ဂေ ယီ လုဝ် ခမ် ဒီ အူတ်၊ ခမ် ဒီ ယိူန် ဘဲန် မျုဝ် ဘဲန် မျုဝ်။”

13 ဝါယ် အန် တီ အုဝ် ပီ ဝီ ယိုဝ် ဂြုဝ်း အီ လေး ခဲင် ဂါင်ဟြာဝ် တဝ်း၊ “တဲး မဲ ဒဲမ် အုန်၊ ဆိန့် ဒေါ တီ နီ၊ ဂေ အီ ဟဲ့ ညှိုမ် ဇဝ်ဖြာ၊ ဆေ ဂေ ဒီ ဘော ယမ်၊ ဂေ ဒီ ဘျုဝ် ဒါခိုယ်။” နဝ်း ဖွိုမ် ဇဝ်ဖြာ ပီ ဝီ တဝ်း၊ “ဟဲ့ မှာန်၊ ဂေ ဒီ ဘျုဝ် ဒါခိုယ် ခါခ်ု။ ဂေ ဟဲ့ ပွိုန် ဒီ ဒီလှဝ် ဒီ ဂါန် ပီ ဘူင် ဂေ အီ ဒုက် အီ ညှာပ်။ ဂေ ဒီ ဘော ပွိုန် အာဂျိုဝ် ပီ ဘူင် ဂေ တီ။”

14 ဝါယ် အန် တီ အုဝ် ဝီ ယိုဝ် န့အု လုယ်။ န့ ဝီ မိုဝ်း အူ ဝီ ကွယ် ဒဲင် န့အု တီ။ အာရိုပ် အန် ပီ ဂွန် ဒူအီ။ ဒဲင် ဂိန့် အန် မိုဝ်း မင်ဂိုမ် ခြိဝ်။ ခဲင် ဒဲ အန်၊ အန် ဘော ဂူင့် န့ဝါတ့် အီ လမ် ကာဆဝ်။ 15 န့ ပီ ဝီ မိုဝ်း အာမူ အာမာတ် ဇဝ်ဖြာ ပေါ အူ ကာဒင် လေး ခဲင် ဟုဝ် ဇဝ်ဖြာ။ အန် ဘော ဒတ် တာင် ဒီ အန် ဇဝ် အီ ကွယ် ဒဲင် န့အု တွိုန် တဝ်း၊ “တဲး မဲ ဇဝ် ဆုဝ့် ငှုဝ် တာ န့ဝါတ့် မဲ တီ။ ခုဝ်၊ ဟဲ့ ဟွတ့် ဇမ် အာခြာဝ် လုဝ် ဆုဝ့်။ ငှုဝ် ဒဲင် ကာဒါယ် ဟဲ့ ဆိန်၊ ဟဲ့ လုဝ် ဆုဝ့် ဒီဘူမ် ဒီမျီပ် ဒိုဝ်း အုန်။” 16 အန် ဇဝ် အီ ကွယ် ဒဲင် န့အု တွိုန်၊ အန် ဘော ဒိုဝ်း န့ဝါတ့် အန်၊ လူင် ဒဲင် ကာဒါယ်၊ ဆုဝ့် ငှုဝ် ဒဲင် ကာဒါယ်။

17 အာမူ အာမာတ် ဇဝ်ဖြာ ပေါ အူ ကာဒင် ပီ ဝီ လေး ခဲင် ဟုဝ် ဇဝ်ဖြာ အီ ကွယ် ခဲင် ဂါင်ဟြာဝ်။ အန် မိူဝ် ဂူင့် န့ဝါတ့် အီ လမ် ကာဆဝ် အူ ဘ့လ။ 18 န့ ပီ ဝီ မိုဝ်း အာမူ အာမာတ် ဇဝ်ဖြာ ပေါ အူ ကာဒင် အီ လေး ဒီ ကာစှူင့် လှူ။ အန် မုး အီ အိုပ် ငဝ်။ အန် ဘော ကာလာင် ဂြုဝ်း တာင် ဒီ အာမူ အာမာတ် ဇဝ်ဖြာ အီ ဂူင့် န့ဝါတ့် လမ် တွိုန် တဝ်း၊ “တဲး မဲ ဒိုဝ်း န့ဝါတ့် မဲ၊ ဆုဝ့် ကာယူင့် ဘ့လေ မာငုန် အီ ကွယ် ဒီ ဟေ မာငုန်။ ခုဝ်၊ ဘ့လေ အန် ဟဲ့ ဟွတ့် ဆိန်။ ဟေ တီ ယီ မုး ကာဒါယ်။” 19 ပါယ် တီ၊ အာမူ အာမာတ် ဇဝ်ဖြာ တီ ဘော ဒိုဝ်း န့ဝါတ့် အန် လူင် ဒဲင် ကာဒါယ်၊ ဆုဝ့် ကာယူင့် ဘ့လေ မာငုန် အီ ကွယ် ဒဲင် ကာဒါယ်၊ ဝီ ဟပ် ဒူင် ကြိတ် အီ ဘ့လေ မာငုန်။ ဒူင် ကြိတ် ဂေ ဘ့လေ မာငုန် တီ၊ န့ ပီ ဝူတ် ပီ တဲး ဇဝ်ဖြာ အီ ခမ်။ 20 ဒူင် ကြိတ် ဂေ ဘ့လေ မာငုန် တီ၊ န့ ကွယ် နာ ရေတ့် မိူင်။ နှာမ် ဘော လေး ဒူင် တီ၊ လှဲ ဟာဝ် အာဒါ ကာဘက် အာ မာယဝ်း လွှက့်။ န့ ဘော လိုက် ဇမ် မူတ့် မင်ပြွင့်။