1 အုဝ် ဝီ ယိုဝ် မာဒုဝ် ပြဲ ဟာယ် အူ ဒုဝ် လေး ခဲင် အိုမ် နမ်မုက်ဆာရာ။ ဂိန့် အန် မိုဝ်း ဘူ ဘူင့်။ နိုင် အန် မိုဝ်း ဂိုဝ် ဘူင့်။ ဒဲင် နိုင် ဒွန် နိုင် မိုဝ်း မင်ဂိုမ်။ ဂိန့် ဒွန် ဘူင့် ပီ ဝီ မိုဝ်း စိူဝ် အီ ခဲန့် ဇဝ်ဖြာ။ 2 မာဒုဝ် ပြဲ ဟာယ် တီ၊ အန် ပီ မာဒီဝါယ် ဆိူဝ် ဇိုမ်။ ပ့လဝ် အန် ပီ ပ့လဝ် မာဂြေး။ မူတ့် အန် ပီ မူတ့် မာခြင်ဆီ။ မာကြာယ် တွိုန် ဟဲ့ အာပ် ပွုန် အန် အီ ဟဲန့် ကာဆဝ် ဘော မာလာင် အန် ဒီ မာဒုဝ် ပြဲ ဟာယ် တီ။ 3 ဒီ ဂိန့် မာဒုဝ် ပြဲ ဟာယ် တီ အာဒါ အူ ဘူင့်၊ န့ မိုဝ်း ပ့လာ ဒိမ် အီ ဟဲ့ တဲး အန် ရိန် ဒီ ယမ်။ မာလဲ၊ ဒိမ် တီ၊ ဟဲ့ ဟွတ့် ဝီ ဆီနမ် ကဲန်။ ဒူအီ ဒဲင် ကာဒါယ် ဘောကာဂ့လျီတ် ဟဲ့ အာမ် အန် ဘော ဒူပ် မာဒုဝ် ပြဲ တီ။ 4 ဂေ ဒူအီ ဘော ကြိုပ် မာကြာယ် တီ၊ ကူပ် ဟဲ့ အာပ် အန် ပွုန် အန် ဒီ မာဒုဝ် ပြဲ ဟာယ် တွိုန်။ ဂေ ကြိုပ် ဘော မာဒုဝ် ပြဲ ဟာယ် တီ။ ဂေ ဘော တဝ်း၊ “အာဝ် မိုဝ်း အာဆေ အီ ပီ မာဒုဝ် ပြဲ ဟာယ် နီ။ အာဝ် မိုဝ်း အာဆေ အီ ဒီ ပွိုန် ကာဂုဝ်း ဒီ မာဒုဝ် ပြဲ နီ။”

5 မာဒုဝ် ပြဲ တီ၊ အန် ဟဲ့ ပွိုန် ကာလာင် ဂြုဝ်း အီ ခဲန့် ဇဝ်ဖြာ။ အန် ဟဲ့ မိုဝ်း ပွုန် အီ ပွိုန် ဒီ ဘူင် ပါယ် တီ၊ အာဒါ ဖွုန် ဂိုဝ် ဒီ အာ မာဂျီန်။ 6 အန် ကာလာင် ဂြုဝ်း အီ ခဲန့် ဇဝ်ဖြာ ဘော ပွုန် ဇဝ်ဖြာ။ အန် ခဲန့် ဘော ဒူင် ကွယ် ဇဝ်ဖြာ ဘော ဂေ ဒူအီ အီ ကွယ် ခဲင် ဂါင်ဟြာဝ်။ 7 ဇဝ်ဖြာ ဟဲ့ ခ့ဝါင် အန်၊ တဲး အန် မိုဝ်း ပွုန် ဒီ ကာဂုဝ်း ဒီ ဂေ ဒူအီ အီ ညှိုမ် ဇဝ်ဖြာ။ အန် ဘော ပွိုန် ဒီ ပဲ ဂေ။ ဘော ဂေ ဒူအီ ဒွန် မျုဝ် ဒွန် ခြိုဝ်၊ ဂေ အီ ကာလာင် ဂြုဝ်း ဒွန် မျုဝ်၊ ဘော ဂေ အီ ကွယ် ခဲင် မိူင် ဒွန် မိူင်၊ အန် ပွိုန် ဒီ အိုပ် တူတ့်။ 8 ဂေ ဒူအီ ဒဲင် ကာဒါယ် ဘောကာဂ့လျီတ်၊ ဂေ ဒီ ကြိုပ် မာဒုဝ် ပြဲ တီ။ ဆိန့် ဒေါ ဖာန် ဘ့လေး ဇဝ်ဖြာ ကာဒါယ်၊ ဇဝ်ဖြာ ဟဲ့ မိုဝ်း ဇာရာင် ပီ ဒဲမ် အန် စိူဝ် ဂေ ဒူအီ အီ မိုဝ်း အာဆာက် ကာမာယ်၊ န့ မုး ဇာရာင် ဂေ ဒူအီ အီ ညှိုမ် ဂွန် မာဘူ အီ ဟဲ့ ခမ် ဒီ ယမ် တွိုန်။ ဂေ ဒူအီ အီ တူ မိုဝ်း စိူဝ် ခဲင် ဇာရာင် တီ၊ ဂေ ဘောကာဂ့လျီတ် ဒီ ကြိုပ် မာဒုဝ် ပြဲ တီ။

9 ပါယ် တီ၊ ဆေ ဘေ မိုဝ်း ဟျုဝ့် အီ နပ် ဒီ ထူမ်၊ တဲး ဘေ ထူမ်။

10 ဝီ မှဝ် ပဲ့ ဟဲ့ အာပ် ဇဝ်ဖြာ တဲး အီ မှေတ့် အန်၊ အန် ဒီ ကာဒုး မှာန် မှေတ့် အီ။ ဝီ မှဝ် ပဲ့ ဟဲ့ အာပ် ဇဝ်ဖြာ တဲး အန် ယမ် ဒီ ဘ့လာ လျီး၊ အန် ဒီ ကာဒုး မှာန် ဒီ ယမ် ဒီ ဘ့လာ လျီး။ ကူပ် န့ ပါယ် တီ ဒွန် မျုဝ်၊ ဘေ အီ မုး ဒူအီ အီ ဆီငါ ဘွတ်၊ တဲး ဘေ ခမ် ဒီ အူတ် ဆေဆေ ဘော ယိူန် ဒွန် မျုဝ် ဘော ညှိုမ် ဘိုင် ဇဝ်ဖြာ ဆေဆေ။

11 ဝါယ် အန် တီ အုဝ် ပီ ဝီ ယိုဝ် မာဒုဝ် ပြဲ ဟာယ် ပေါ အူ ဒုဝ် လေး တး ခဲင် ကာဒါယ်။ အန် မိုဝ်း နိုင် အာ ဘူင့် အီ ပီ နိုင် ဂွန် မာဘူ။ အန် ယီ ကာလာင် ဂြုဝ်း ပီ မာကြာယ်။ 12 အန် ကွယ် ဒီ အာတ့် မာဒုဝ် ပြဲ ဟာယ် အီ မုး ဒုဝ် ဘြိမ် တွိုန်။ အန် မိူဝ် ဟဲ့ မိုဝ်း ပွုန် ဒွန် မျုဝ် အီ ပီ ပီ မိုဝ်း ဒုဝ် တီ။ အန် ဘော ခါနှာပ် ဒူအီ ဒဲင် ကာဒါယ်၊ တဲး ဂေ ကြိုပ် မာဒုဝ် ပြဲ ဟာယ် တွိုန်၊ အီ ဟဲ့ ဒွိုမ် မိုဝ်း ဒိမ် အီ ဟဲ့ တဲး အန် ရိန် ဒီ ယမ်၊ အီ ဟဲ့ ဝီ ဆီနမ် ကဲန် တွိုန်။ 13 အန် ဘော နပ် ဒီ ဘူင် အီ မွှိုမ် အာမ် ကာဆဝ်။ အန် ဘော ဘူင် တဲး ငဝ် စုဝ်း ခဲင် ဂါင်ဟြာဝ် ဇမ် ဒဲင် ကာဒါယ်၊ တဲး ဒူအီ ဘောကာဂ့လျီတ် ယိုဝ်။ 14 ကူပ် နပ် အန် ဒီ ဘူင် ဘျ အီ မွှိုမ် အာမ် ဇိုဝ် တီ အာဒါ မာဒုဝ် ပြဲ ဟာယ် ဒုဝ် ဒေါ ဂုဝ် တွိုန်၊ အန် ပွိုန် ဒီ ကာလုဝ် ဒူအီ ဘော ကာဒါယ် ဘော စ်ု ဂေ ဘူင် အာရိုပ် မာဒုဝ် ပြဲ ဟာယ် အီ ဟဲ့ မိုဝ်း ပ့လာ ဒိမ် ဒီ မာပွါ့ လာင် ယီ တူ ယမ်။ 15 အန် ဟဲ့ ပွိုန် ဘူင် တဲး အာရိုပ် မာဒုဝ် ပြဲ ဟာယ် တီ မိုဝ်း ဖွိုမ် ဘော ပွိုန် ကာလာင် ဂြုဝ်း။ ဂေ အီ တူ ကြိုပ် အာရိုပ် မာဒုဝ် ပြဲ တီ၊ မာဒုဝ် ပြဲ တီ ဟဲ့ ပွိုန် ဘူင် တဲး ဂေ ယမ်။ 16 အန် ဘော ခါနှာပ် ဒူအီ ဘောကာဂ့လျီတ် ဘော ဒူအီ တာင် ဒူအီ တျီ့၊ ဘော ဒူအီ ခြမ် ဒူအီ ဂိန်၊ ဘော အီ မုး မှာယ် အီ တူ မုး မှာယ်၊ တဲး အန် ဒွက် ဇိုမ် ဒီ ကာတဝ်း ဂေ။ ဆေ အာဝ် မုး ဒီ ကာတဝ်း၊ ဒွက် ဒီ ဒဲ ဂေ ဘ့လာက် အာအး။ 17 အာဆေ တူ မိုဝ်း ဇိုမ် အန် တီ၊ အန် တူ ပွိုန် ဒီ ကာစိုဝ်း ကာယွင့် ခေါ အူ မျုဝ်။ ဇိုမ် တီ၊ န့ ဘော မုး စိူဝ် မာဒုဝ် ပြဲ ဟာယ် တွိုန်။ ဆေ အာဝ် မုး စိူဝ် မာဒုဝ် ပြဲ တီ၊ န့ ဘော မုး ဒုဝ် ခါနှာန် အီ ကာဒါင် စိူဝ် အန်။

18 လွင် အန် တီ၊ တဲး ဘေ မိုဝ်း အာငျာန်။ အာဆေ မိုဝ်း အာငျာန်၊ တဲး အန် နပ် ဒီ ဇေန့်ဇာ ကာဖာ ပီ ပါယ် ဆီဖဝ် လွင် ဒါင် ဒုဝ် ခါနှာန် အီ မုး စိူဝ် မာဒုဝ် ပြဲ ဟာယ် တီ။ ခုဝ်၊ ဒုဝ် ခါနှာန် တီ၊ န့ ဟဲ့ ကာဒါင် ဒုဝ် ပဲ့ အီ မုး စိူဝ် ဒူအီ။ ဒုဝ် ခါနှာန် တီ ဘော မုး ဒဝ် မာယဝ်း ဒီ ဒဝ် ဂိုဝ် ဒီ န့ဒဝ် (666)။