ခါန် 11
လွင် အာ ဝီ အီ ခမ် ဒီ ဘဲန် ဆက်ဆေ
1 န့ မိုဝ်း အူ ဝီ ဒွါ ဂင်ခါ ဒီ အုဝ်။ အီ ပီ ကာဘ့လ မင် ဂဝ်။ အန် ဝီ စ်ု အုဝ် တဝ်း၊ “တဲး မဲ ဟာဝ် ဂဝ် ဟုဝ် ဇဝ်ဖြာ ဘော ကာစှူင့် လှူ။ တဲး မဲ တိး ဘော ဒူအီ အီ ကြိုပ် ဇဝ်ဖြာ ခဲင် ဟုဝ် တီ။ 2 ဝဲင် ရေတ့် အာဝ် လုဝ် ဂဝ်၊ ဘ့လေး အုန် ပါယ် တီ။ ခုဝ်၊ ဝဲင် တီ ဟဲ့ အာပ် ဒီ ဂေ ဒူအီ အာမျုဝ် ဟဝ်။ ဂေ ဒီ ညဲတ့် ဒီ အိုပ် မိူင် ဘွတ် တီ အာဒါ ဖွုန် ဂိုဝ် ဒီ အာ မာဂျီန်။ 3 အုဝ် ဒီ ဒွါ ပွုန် ဒီ ဒူအီ အာ ဝီ၊ တဲး ဂါယ် ဘဲန် ဆက်ဆေ လွင် အုဝ်။ ဂါယ် ဒီ စှိုပ် ခြိုင် စာန် ဘော ကာလာင် ဂြုဝ်း ဇဝ်ဖြာ အာဒါ အူ ဟြဲန့် ဒီ အာ မာယဝ်း ဒီ ဒဝ် ဂိုဝ် ဆီငဲ။” 4 အာ ဝီ အီ ဘဲန် ဆက်ဆေ လွင် အုဝ် တီ၊ ဂါယ် ပီ ဟေ နာမန် အာ ကာဒင် ဘော ငဝ် အွမ် အာ ဘူင့်။ ဂါယ် ကွယ် နာ အာတ့် ဇဝ်ဖြာ အီ အိုပ် ကာဒါယ်။ 5 ဆေ န့ မိုဝ်း ဒူအီ အီ ခြာမ် ဒီ ဘူင် နာ စီစိဝ် ဒီ ဂါယ် အာ ဝီ တီ၊ န့ ဒီ မိုဝ်း ငဝ် အီ လေး ခဲင် မူတ့် ဂါယ် ဘော ပျာတ့် ရန်ဆူ ဂါယ် ဘောကာဂ့လျီတ်။ အာဆေ ဘူင် နာ တူ မွှိုမ် ဒီ ဂါယ်၊ အန် မိူဝ် ဒီ ကာဒုး ဒီ ယမ် ပါယ် တီ။ 6 ဂါယ် မိုဝ်း ပွုန် ဒီ ကာဘိတ် ဘ့လေန့်၊ တူ တဲး ဂ့လာယ် စုဝ်း ဒေါ ဘျာန် ဂါယ် ဂြုဝ်း ဇဝ်ဖြာ။ ဂါယ် ဘော ပွိုန် ဘူင် တဲး အိုမ် ဘဲန် နှာမ်။ ဂါယ် ပွိုန် ဘူင် ဒုက် ဒွန် မျုဝ် ဒဲင် ကာဒါယ်၊ ပွိုန် ဒိုဝ်း နဝ်း ပီ ဆီ ဘူင် ဂါယ်။
7 ဝါယ် ဟဲ့ ဟွတ့် ဂါယ် ဘဲန် ဆက်ဆေ လွင် ဇဝ်ဖြာ၊ န့ ဒီ မိုဝ်း မာဒုဝ် ပြဲ ဟာယ် ကာဆဝ် အီ လေး ခဲင် ကာဒဝ် ဟူလဝ်။ အန် ဒီ တး ကာဂုဝ်း ဒီ ဂါယ်။ အန် ဒီ ပဲ ဂါယ် ဘော ငဝ်း ယမ် ဂါယ်။ 8 အီ မုး ဒုဝ် ယမ် ဂါယ်၊ န့ ကွယ် ဒူပ် န့တေန့် ခဲင် မိူင် တာင်။ ဒူင် တီ ဘော မုး ဒူင် ခမ် ဒါ ကာညာ ဂါယ် ဒီ ယမ် ဒဲင် ရွင့် ကာဝဲ့။ ဆေ ဒူအီ ကာလာင် လွင် မိူင် တာင် တီ၊ ဂေ ဘော နပ် တဝ်း၊ န့ မုး မိူင် ဆုဝ်ဒူမ်။ ဆေ အာဝ် ပါယ် တီ ဂေ ဘော တဝ်း မိူင် အဲဂိုပ်။ 9 ဂေ ဒူအီ ဒွန် မျုဝ် ဒွန် ခြိုဝ်၊ ဒွန် မာန် ဒွန် မိူင် ဒီ ယွတ် ဒုဝ် ယမ် ဂါယ် တီ အာဒါ အူယ် ဆီငဲ ဒီ အူ ကာတဲ။ ဂေ တူ ခ့ဝါင် အာဆေ ဒိပ် ဒုဝ် ယမ် ဂါယ် တီ။ 10 ဒူအီ ဒဲင် ကာဒါယ် ဒီ ဘော ခူယ် ကာဆဝ် ကူပ် ဟဲ့ ယမ် ဂါယ်။ ဂေ ဒီ ဘော ဘူင် ဘ့လွယ် လာယ် ဒွါ လက်ဆွင်။ ခုဝ်၊ ဒူအီ အီ ဘျာန် ဂြုဝ်း ဇဝ်ဖြာ အာ ဝီ တီ ဟဲ့ ဒွါ ဒုက် ကာဆဝ် ဒီ ဒူအီ ဒဲင် ကာဒါယ်။ 11 ဝါယ် ဟဲ့ နုဝ့် အူယ် ဆီငဲ ဒီ အူ ကာတဲ၊ ဇဝ်ဖြာ ဝီ ဟိုဝ်း ဖွိုမ် အန်၊ တဲး ဂါယ် ဝီ ယိတ့် ဝီ အိမ်။ ဂေ ဒူအီ ဘောကာဂ့လျီတ် အီ ယိုဝ် လွင် အန် တီ၊ ဂေ ဘော ယုဝ် ကာဆဝ်။ 12 ဒေါ အန် တီ ဂေ ဒူအီ ဘောကာဂ့လျီတ် ယိုဝ် ဂြုဝ်း တာင် အီ လေး ခဲင် ဂါင်ဟြာဝ် တဝ်း ဒီ ဂါယ်၊ “တး ဟုဝ့် ဒီ နီ။” ဒေါ ဘ်ု ဒီ ယွတ် ရန်ဆူ ဂါယ် တီ၊ ဂါယ် ဘော ကွယ် ခဲင် န့အု ဝီ ဟုဝ့် ခဲင် ဂါင်ဟြာဝ်။
13 ဒေါ အန် တီ မာအိမ် မိူဝ် ယေန့် ကာဆဝ် အူ ဇေန့်။ ခဲင် မိူင် တာင် တီ ဂိုဝ် ဘုန် အူ ဘုန် ဘော လိုဝ်။ ဒူအီ ဘူ ဟြဲန့် ဝီ ဘော ယမ်။ ဂေ အီ ဆီ ဂိတ်၊ ဂေ ဘော ယုဝ် ကာဆဝ်။ ဂေ ဘော ဝီ အိူပ် မျုက် ဇဝ်ဖြာ အီ ကွယ် ခဲင် ဂါင်ဟြာဝ်။
14 ပါယ် တီ ဝူတ် ဟာ အာ ဟဲ့ ဟွတ့် ပွုန်၊ ဝူတ် ဟာအူယ် ပီ ဒီ ဝီ စေဝ် တး။
15 ဝါယ် အန် တီ အုဝ် ဝီ ယိုဝ် အာမူ အာမာတ် ဇဝ်ဖြာ ကာဒင် မ့ဘူ၊ အန် ဘုတ် ဝဝ် အန်။ ဒေါ အန် တီ န့ ဘော မိုဝ်း ဂြုဝ်း တာင်၊ ဂြုဝ်း ကိူန် ဘော ဆီနန် ခဲင် ဂါင်ဟြာဝ် တဝ်း၊
“ပွုန် အီ အိုပ် ကာဒါယ် ဟဲ့ ဘဲန် ပွုန် ဇဝ်ဖြာ ဘော ပွုန် ဇဝ် ယေဆူ အီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အန် ဇဝ် ဒီ အိုပ် ဆေဆေ ဒွန် စုဝ် ဒွန် ဇာတ်။”
16 ဒေါ အန် တီ ဂေ ဒါ တာင် အာ ဂိုဝ် ဒီ ဖွုန် ဝီ အီ တုတ့် ဒဲင် မာလာင် နာ အာတ့် ဇဝ်ဖြာ တွိုန်၊ ဂေ ဘော မုတ် ဂိုပ် ကြိုပ် ဇဝ်ဖြာ တဝ်း၊
17 “အိုယ် မဲ ဇဝ်ဖြာ၊ မဲ အိုပ် တူတ့် ဒွန် မျုဝ်။ မဲ ဇဝ် ဟဲ့ ကွယ် ဆိန့် ဒေါ ဂုဝ် အန် ကော ဇမ် ဒေါ တီ နီ။ မဲ ဒီ ဘော ကွယ် ဆေဆေ နာ အာတ့် နီ ဟာဝ်။ ယေ ဒါင် ဂုင် ဂေဇူ ဒီ မဲ ဇဝ်ဖြာ။ ခုဝ်၊ မဲ ဇဝ် ဟဲ့ တဲး ပွုန် တာင် မဲ လိုဝ်း ဒေါ တီ နီ။ မဲ ဟဲ့ စုး ဒီ အိုပ် ကာဒါယ်။
18 ဂေ ဒူအီ အာမျုဝ် ဟဝ်၊ ဂေ ဟဲ့ ဒွိုမ် ရူ ကာဆဝ်။ မဲ ဇဝ် ယီ ဒမ် မှာပ် ဒီ ဂေ။ ဒေါ တီ နီ ဟဲ့ ဇမ် အာခြာဝ် ဒီ လုဝ် ဆုင်ဖျာတ် မဲ ဇဝ် အာမူ ဂေ ဒူအီ ယမ်။ ဟဲ့ ဇမ် ဘော အာခြာဝ် ဒီ ဒွါ မဲ ဇဝ် ရုး ဒီ ဂေ ဒဲစေန့် မဲ ဘော ဒီ ဒူအီ အီ ဘျာန် ဂြုဝ်း ဇဝ်ဖြာ။ မဲ ဒီ ဂေဇူ ဂေ အီ ရုဝ်ဆေ မဲ ဇဝ်၊ ဘော အီ တျီ့ အီ တာင်။ န့ ဟဲ့ ဇမ် ဘော အာခြာဝ် ဒီ ပျာတ့် မဲ ဂေ ဒူအီ အီ ဟဲ့ ဒွိုမ် ပျာတ့် ကာဒါယ်။”
19 ဂေ ဟဲ့ ဟွတ့် တဝ်း ပါယ် တီ၊ ဟုဝ် ဇဝ်ဖြာ အီ ကွယ် ခဲင် ဂါင်ဟြာဝ် ဘော န့ ဝိုဝ်း အူ ဇေန့်။ ခဲင် ဟုဝ် တီ၊ ဟဲ့ ပွိုန် ယိုဝ် ဇီဒိူက် ပီ အုန် ဂေ လွင် ပီ လာယ် ကာဆဲန့် ဇဝ်ဖြာ ဂါယ် ဒူအီ။ န့ ဘော မိုဝ်း ဘော ပ့လ မ့ပ့လေတ့် ဘော ဟမ် ကာနမ်။ မာအိမ် ဘော ယေန့်။ ဘော ဂ့လာယ် ဂေ ဘျြီ တာင် ဘော စုဝ်း။