1 ဝါယ် အန် တီ အုဝ် ဝီ ယိုဝ် ပီ ဘျ ဇဝ်ဖြာ ပေါ အူ မျုဝ်။ အုဝ် ယိုဝ် အာမူ အာမာတ် ဇဝ်ဖြာ အူ ကာဒင် အီ မိုဝ်း ပွုန် ဘော အာဖုင် ဒင်ခုဝ် တာင်။ အန် တး ခဲင် ဂါင်ဟြာဝ် လူင်။ န့ ဘော မိုဝ်း ဘော န့အု ရူပ် အန်။ န့ ပီ ခြိုင် ပီ တာ အန်။ ဒီ ဂိန့် အန် န့ မိုဝ်း ခုန်မာယဲင် ရူပ်။ နာ အန် န့ ဘ့လာင် ပီ ဆီငဲ။ ပ့လဝ် အန် န့ ပီ ရွင့် ငဝ်။ 2 ခဲင် ဒဲ အန်၊ အန် ဂူင့် ဆီလွယ် ပဲ့ အီ ဟဲ့ ဟွတ့် ဝိုဝ်း အုန်။ ပ့လဝ် အန် ဘ့လာက် အာအး ဟဲ့ ဇာပ် ဒဲင် အိုမ် နမ်မုက်ဆာရာ။ ဘ့လာက် အာဂ ဟဲ့ ဇာပ် ဒဲင် ကာဒါယ်။ 3 အန် ဘော ဒတ် ရျီင် ပီ မာခြင်ဆီ။ အန် ဟဲ့ ဟွတ့် ရျီင်၊ န့ ဝီ မိုဝ်း ဟမ် ကာနမ် ဒီငိုန့် ဘူ ဇေန့်။ 4 ဒေါ ဟဲ့ ဒီငိုန့် ဟမ် ကာနမ် ဘူ ဇေန့် တီ၊ အုဝ် ဟဲ့ ငှာ ဒီ ဒဲမ် အုန် ဂြုဝ်း အီ လေး ခဲင် ဟမ် တီ။ မာလဲ၊ အုဝ် ဝီ ယိုဝ် ဂြုဝ်း အီ လေး ခဲင် ဂါင်ဟြာဝ် တဝ်း၊ “ဟမ် ကာနမ် ဘူ ဇေန့် တီ၊ ကွဲ့ ဒဲမ် အုန်၊ ကွဲ့ တဲး အာဆေ နပ် ဂြုဝ်း အန်။”

5 ပန် တီ အာမူ အာမာတ် ဇဝ်ဖြာ ကာဒင် ပီ ယိုဝ် အုဝ် ဒေါ စွင့် အန် ဒဲင် အိုမ် နမ်မုက်ဆာရာ ဘော ဒဲင် ကာဒါယ် တွိုန်၊ အန် ဝီ စုဝ့် ဆူင့် ဒဲ အန် ဟုဝ့် ခဲင် ဘ့လေန့်။ 6 အန် ဝီ ဒိူင် ဂါဝ် ပွုန် ဇဝ်ဖြာ အီ ကွယ် ဆေဆေ ဒွန် စုဝ် ဒွန် ဘာန်။ ပွုန် အန် ဇဝ် တီ ဟဲ့ ဖာန် ဘ့လေး ဂါင်ဟြာဝ် ဘော ဒွန် မျုဝ် အီ ကွယ် ခဲင် ဂါင်ဟြာဝ်။ အန် ဇဝ် တီ ဟဲ့ ဖာန် ဘ့လေး ဘော ကာဒါယ် ဘော အီ ကွယ် ဒဲင် ကာဒါယ် ဒွန် မျုဝ် ဘော အိုမ် နမ်မုက်ဆာရာ ဘော အီ ကွယ် ခဲင် အိုမ် တီ ဒွန် မျုဝ်။ အန် ဂါဝ် ပွုန် အန် ဇဝ် တီ တဝ်း၊ “အာဝ် ဟူ ဘော လှေန့်၊ ခဲ့ ပီ ဒွိုမ် ကာလာင် ဇဝ်ဖြာ ဒီ ဒဲစေန့် အန် အီ ဘျာန် ဂြုဝ်း အန် ဇဝ်၊ န့ ဒီ ဘဲန် တူတ့် ဒွန် မျုဝ်။ 7 ဆေ အာမူ အာမာတ် ဇဝ်ဖြာ ကာဒင် မ့ဘူ ဟီ ဘုတ် ဝဝ် အန်၊ ပီ ခြာမ် ဇဝ်ဖြာ ဒီ ဘူင်၊ ပီ တူ တဲး အန် အီ နပ် ဘော ပဲ့ ဟဲ့ ဒွိုမ် ကာလာင် အန် ဒီ ဒူအီ အီ ဘျာန် ဂြုဝ်း ဇဝ်ဖြာ၊ အီ မုး ဒဲစေန့် အန် ဇဝ်၊ န့ ဒီ ဝီ လိုဝ်း ဆီချာ ဇေ့ဇုင် တူတ့် ဒွန် မျုဝ်။”

8 ပန် အန် တီ၊ အုဝ် ဝီ ယိုဝ် ဂြုဝ်း ခဲင် ဂါင်ဟြာဝ် ပေါ အူ ဇေန့် တဝ်း၊ “တဲး မဲ ဟာဝ် ဒီ အာမူ အာမာတ် ဇဝ်ဖြာ အီ စွင့် ဒဲင် အိုမ် နမ်မုက်ဆာရာ ဘော ဒဲင် ကာဒါယ် အီ ဟဲ့ ဂူင့် ဆီလွယ် ပဲ့ တွိုန်။”

9 အုဝ် မိူဝ် ဘော ဟာဝ် ဒူင် ကွယ် အန်၊ မှာန့်၊ တဲး အန် ဒွါ ဆီလွယ် ပဲ့ တီ ဒီ အုဝ်။ အန် ဝီ တဝ်း၊ “တဲး မဲ ဒိုဝ်း ဟူမ်၊ န့ ဒီ ဆွင့် ခဲင် ဝတ့် မဲ။ မာလဲ၊ ခဲင် မူတ့် မဲ န့ ယီ ငါမ် ပီ ငါမ် မာဖျီန်။” 10 အုဝ် မိူဝ် ဒိုဝ်း ဆီလွယ် ပဲ့ ခဲင် ဒဲ အန် တီ၊ ဘော ဟူမ်။ ဒေါ ဟူမ် အုဝ်၊ န့ ငါမ် ပီ ငါမ် မာဖျီန်။ ဒေါ ဝီ မဲင် အုဝ်၊ န့ ဘော ဝီ ဆွင့် ကော အာန့် ခဲင် ဝတ့် အုဝ်။ 11 အန် ဝီ တဝ်း ဒီ အုဝ်၊ “မဲ ဒီ လုဝ် ဝီ ဘျာန် ဂြုဝ်း ဇဝ်ဖြာ လွင် ပီ ဖျာက် အန် ဒီ ဒူအီ ဒွန် မာန် ဒွန် မိူင်၊ ဒွန် ခြိုဝ် ဒွန် ဇိုဝ်၊ ဘော ဒီ ဒူအီ အီ ကာလာင် ဂြုဝ်း ဒွန် မျုဝ်၊ ဘော ဒီ ဂေ ခုန်ဒီခမ် ဘောကာဂ့လျီတ်။”