ဟဲ့ ဟွတ့် ပါယ် တီ၊ အာမူ အာမာတ် ဇဝ်ဖြာ ကာဒင် မ့ဖန် ပီ ဝီ ဘုတ် ဝဝ် အန်။ ဒေါ အန် တီ အုဝ် ဝီ ယိုဝ် ဆီမန့် အူ ဘူင့် အီ ဟဲ့ စုဝ်း ဒဲင် ကာဒါယ်။ အန် ဟဲ့ ပွိုန် လခတ်ဆဝ် အီ ဝိုဝ်း ကာဒဝ် ဟူလဝ်။

2 ဒေါ ဝိုဝ်း ဆီမန့် တီ ဒီ ကာဒဝ် ဟူလဝ်၊ န့ ဘော မိုဝ်း ဒက် ငဝ် လေး ခဲင် ကာဒဝ် တီ။ ဒက် ငဝ် တီ၊ န့ ပီ ဒက် ငဝ် ခဲင် ကာဝှါင် အီ တာင် ကာဆဝ်၊ အီ မုး ဒူင် စိုမ် အီ ဟိန်။ ဒက် တီ၊ တဲး ဘ့လာင် ဆီငဲ ဘော ဘ့လေန့် အပ် ဝွင့် ဘောကာဂ့လျီတ်။

3 မာ အာဇူင့် ဘော လေး တး ခဲင် ဒက် ငဝ် တီ၊ ဇမ် ဒဲင် ကာဒါယ်။ မာ အာဇူင့် ဂေ တီ၊ မိုဝ်း ပွုန် အီ ပီ ပွုန် မာ မဲင်ငဝ် အီ ကွယ် ဒဲင် ကာဒါယ် နီ။

4 ဂေ ယီ တူ ပွိုန် ဒွါ ဒုက် ဒီ ပေတ့် ဘော ပြဲ ဂေ ဟေ အီ ဆီ ငျီန် ဆီ အိမ်။ ဂေ ယီ ပွိုန် ဒွါ ဒုက် ဒီ ဂေ ဒူအီ အီ တူ မိုဝ်း ဇိုမ် ပီ ဒွက် ဇဝ်ဖြာ ဒီ ကာတဝ်း ဂေ။

5 မာ အာဇူင့် ဂေ တီ တူ ပွိုန် ဘူင် တဲး ဒူအီ ဂေ တီ ယမ်။ ဂေ ယီ ပွိုန် ဒွါ ဒုက် ဒီ ဂေ အာဒါ ဖန် မာဂျီန်။ ပီ ပါယ် ဂေ ဒူအီ ဒီ ခမ် ဒုက် တီ၊ န့ ပီ မာ မဲင်ငဝ် ဟဲ့ ဒွက် ဂေ။

6 အာဒါ ဖန် မာဂျီန် တီ၊ ဂေ ဒူအီ ဆီ ဘူင် တဲး ဂေ ယမ်။ ဂေ ယီ တူ ယမ်။ ဂေ ပီ ဘော ဟဲ့ ဆီ ယမ် မိူဝ်၊ ဇဝ် မာရာန ယီ တူ ဒိုဝ်း ဂေ။

7 အာရိုပ် ရာင် မာ အာဇူင့် ဂေ တီ၊ န့ ပီ မင်ပြွင့် အီ ဟဲ့ ခြိုင် ဒီ ဟာဝ် ကာဂုဝ်း။ ဒဲင် ဂိန့် ဂေ၊ န့ ပီ ဂေ ဟဲ့ စှိုပ် မင်ဂိုမ် ခြိဝ်။ နာ ဂေ ပီ နာ ဒူအီ။

8 ဟိုက် ဂိန့် ဂေ၊ န့ ပီ ဟိုက် ဂိန့် အီဘိုန့်။ ဟြာင် ဂေ၊ ပီ ဟြာင် မာခြင်ဆီ။

9 ပီ ဂွင့် ဂေ ဒီ ဘာင်နဝ်း ဂေ ပီ မင် ဂွင့် ဟိန်။ ဟမ် ဖျီင် ဂေ၊ န့ ပီ ဂြန့် မင်ပြွင့် လက်လဝ် ပီ ပဝ့် ဒါ ဆိုက် အီ ကာဘ့လဲပ် ဒီ ဟာဝ် ကာဂုဝ်း။

10 ဆီဒါ မာ အာဇူင့် ဂေ တီ ဘော မိုဝ်း အာယ် အီ ပီ အာယ် မာ မဲင်ငဝ်။ ဆီဒါ ဂေ တီ ဟဲ့ ပွိုန် ဒွါ ဒုက် ဒီ ဒူအီ အာဒါ ဖန် မာဂျီန်။

11 န့ မိုဝ်း ကာနမ် အူ ကာဒင် အီ အိုပ် ကာဒဝ် ဟူလဝ် တီ၊ အန် အီ ဘဲန် ခုန်ဒီခမ် အီ အိုပ် ဘော မာ အာဇူင့် တီ။ စိူဝ် အန် ခဲင် ဂြုဝ်း ဟဲဘြဲ န့ တဝ်း၊ အာဘာဒုင်။ ဂြုဝ်း ဂြိက် ဘော တဝ်း၊ အာပေါလီအူန်။ (လွင် ဒါင် အန် န့ လေး၊ ဘုဝ် အီ ပျာတ့် လိုဝ်)။

12 ပါယ် တီ ဝူတ် ဒေါ ဂုဝ် ဟဲ့ ဟွတ့် ပွုန်။ ပီ ဆီ မိုဝ်း ဝူတ် ပေါ အာ မျုဝ် အီ ဒီ ဝီ တး နာ အာတ့် နီ။

13 ပန် တီ အာမူ အာမာတ် ဇဝ်ဖြာ ကာဒင် န့ဒဝ် ဝီ ဘုတ် ဝဝ် အန်။ ဒေါ အန် တီ အုဝ် ဝီ ယိုဝ်၊ န့ မိုဝ်း ဂြုဝ်း အီ လေး ဒီ ကာတူတ့် ဘတ့် အီ ကွယ် ဒီ ဖွုန် ကာတုဝ့် ဒီ ကာစှူင့် ခြိဝ်။ န့ မုး ကာစှူင့် အီ ကွယ် နာ အာတ့် ဇဝ်ဖြာ။

14 ဂြုဝ်း တီ၊ န့ ကာလာင် ဒီ အာမူ အာမာတ် ဇဝ်ဖြာ ကာဒင် န့ဒဝ်။ အန် တဝ်း၊ “န့ မိုဝ်း ကာနမ် ဖွုန် ကာဒင် ပဲ့ ဟဲ့ ပက် အုန် ဇဝ်ဖြာ။ ဂေ ကွယ် ဒီ ဘ့လဲင် အိုမ် တာင် အီ စိူဝ် အူဖာရာတ်။ တဲး မဲ ဟာဝ် ဂဝ်း ဝန် ဂေ တီ။”

15 ပါယ် တီ၊ ဇဝ်ဖြာ ဟဲ့ တဲး ကာနမ် ဖွုန် ကာဒင် တီ လွတ်၊ တဲး ဂေ ငဝ်း ယမ် ဒူအီ အူယ် ဘုန် အူ ဘုန်။ အန် ဟဲ့ ဒွိုမ် ပက် အုန် ဂေ တဲး န့ ကော ဇမ် အာခြာဝ် အန်၊ ဆီငဲ အန်၊ မာဂျီန် အန်၊ ဆီနမ် အန်။

16 အုဝ် ပီ ဝီ ယိုဝ် ဂြုဝ်း အီ တိး ဒါ ဆိုက် အီ ပဝ့် မင်ပြွင့်။ ဂေ ကွယ် အာ မာယဝ်း လာန်။

17 ဒေါ ယိုဝ် အုဝ် ဇိုဝ် တီ ခဲင် ပီ ဘျ ဇဝ်ဖြာ ဒီ အုဝ်၊ မင်ပြွင့် တီ ဘော ဒါ ဆိုက် အီ ပဝ့် မင်ပြွင့် တီ၊ ဂေ မိုဝ်း အာရိုပ် ပါယ် နီ။ ဂေ တာ ဆီတုဝ် ဟိန် အီ ဂွင့် ဘာင်နဝ်း ဂေ။ ဂေ ရေန့် ပီ ငဝ် ဘော ခွင် ပီ ဆဲန့် ခွင် ဘော ဒေန့် ပီ ဂန်ဒိူက်။ ဂိန့် မင်ပြွင့် ဂေ တီ၊ န့ ပီ ဂိန့် မာခြင်ဆီ။ ခဲင် မူတ့် ဂေ ဘော ငဝ် ဘော ဒက် ငဝ် ဘော ဂန်ဒိူက် ဟဲ့ လေး။

18 ဒူအီ အူယ် ဘုန် အူ ဘုန်၊ ဂေ ယမ် ဒီ ဒုက် အူယ် မျုဝ် အီ လေး ခဲင် မူတ့် မင်ပြွင့် ဂေ တီ။ န့ ဘော မုး ငဝ် ဘော ဒက် ငဝ် ဘော ဂန်ဒိူက်။

19 ခုဝ်၊ ပွုန် မင်ပြွင့် ဂေ တီ၊ န့ ကွယ် ခဲင် မူတ့် ဂေ ဘော ဒီ ဆီဒါ ဂေ။ ဆီဒါ ဂေ၊ န့ ပီ မာဟန့်။ ဂိန့် မာဟန့် ဂေ တီ အီ နပ် ဒီ ဒွါ ဒုက် ဒီ ဒူအီ။

20 ဂေ ဒူအီ အီ ဆီ ဂိတ် အီ တူ ယမ် ဒီ ဒုက် ဇိုဝ် တီ၊ ဂေ ယီ တူ ကာပ့လု နဝ်း၊ တူ ဝဲန် အာဂျာင် ဘြိမ် ပီ ဒွိုမ် ဘူင် ဂေ။ ဂေ တူ ဝဲန် ကာနမ် ပီ ကြိုပ် ဂေ၊ ယီ ဆီ ကြိုပ် အာရိုပ် အီ မုး ခြိဝ် ဂေ ရွိုန် ဘော ဘွင့် ဘော အာရိုပ် မာဝ် ဂေ ဟေ ပီ ဘူင် ဂေ ဒီ ဒဲ ဂေ။ အာရိုပ် တီ၊ ယီ တူ နပ် ဒီ ထူမ်၊ တူ နပ် ဒီ ယိုဝ်၊ တူ နပ် ဒီ ဟာဝ်။

21 ဂေ မိူဝ် တူ ကာပ့လု နဝ်း၊ တူ လှုဝ်း မှာပ် ပဲ့ ဟဲ့ ဒွိုမ် ငဝ်း ဂေ ဒီ အီ၊ ဘော မှာပ် ပဲ့ ဟဲ့ ဘူင် ဂေ မျလှယ့်၊ မှာပ် ပဲ့ ဟဲ့ လာယ် လုတ့် လာယ် လာယ် ဂေ ဘော မှာပ် ပဲ့ ဟဲ့ ပြာ ဂေ ဒီ အီ ဟဝ်။