1 ဝါယ် အန် တီ ဂွန် မာဘူ ဝိုဝ်း ဇိုမ် မ့ဘူ။ ဒေါ အန် တီ အာဒါ ကာဘက် အူ ခွါယ် နာရီ၊ န့ ဘော ငွင့် ယေန် ခဲင် ဂါင်ဟြာဝ်။

2 အုဝ် ဝီ ယိုဝ် အာမူ အာမာတ် ဇဝ်ဖြာ ဘူ ကာဒင် အီ ကွယ် နာ အာတ့် ဇဝ်ဖြာ။ ဂေ ဟဲ့ ပွိုန် ဝဝ် နိုင် ပဲ ဘူ လှာင်။

3 ဒေါ အန် တီ န့ ဝီ မိုဝ်း အာမူ အာမာတ် ဇဝ်ဖြာ ပေါ အူ ကာဒင်၊ ဝီ ဂူင့် ဆီလယ့် ခြိဝ် ပီ ဒုဝ့် ဆီနမ် အုး ငှုန်။ အန် စွင့် ခူပ် ကာစှူင့် လှူ။ အန် ဟဲ့ ပွိုန် ဆီနမ် အုး ငှုန် ကိူန်၊ တဲး အန် ဒုဝ့် လှူ ဒူပ် ပီ ဆာခိုဝ် ဂေ ဒူအီ အီ ဆီငါ ဘွတ်၊ တဲး အန် လှူ ဇိုဝ် တီ ဒဲင် ကာစှူင့် ခြိဝ် အီ ကွယ် ဒီ အာတ့် မာလာင် တွိုန်။ 4 ဒက် ဆီနမ် အုး ငှုန် ပီ ဒုဝ့် ဂေ ဘော ဂြုဝ်း ပီ ဆာခိုဝ် ဂေ ဒူအီ အီ ဆီငါ ဘွတ်၊ န့ ဘော လေး ခဲင် ဒဲ အာမူ အာမာတ် ဇဝ်ဖြာ တီ၊ ဟုဝ့် ဇမ် ဒီ အာတ့် ဇဝ်ဖြာ။ 5 ဟဲ့ ဟွတ့် ပန် တီ အာမူ အာမာတ် ဇဝ်ဖြာ တွိုန် ဝီ ဒိုဝ်း ငဝ် ဒဲင် ကာစှူင့် လှူ၊ ဝီ ဟပ် ခဲင် ဆီလယ့် ခြိဝ် ပီ ဒုဝ့် ဂေ ဆီနမ် အုး ငှုန် တွိုန်၊ ဝီ ဘျွာ လူင် ဒဲင် ကာဒါယ်။ ဒေါ အန် တီ န့ ဘော မိုဝ်း ဟမ် ကာနမ် ဘော ပ့လ မ့ပ့လေတ့် ဘော ဟမ် ဆီနန် ဆီနိူင်။ မာအိမ် မိူဝ် ယေန့် ကာဆဝ်။

6 ဂေ အာမူ အာမာတ် ဇဝ်ဖြာ ဘူ ကာဒင် အီ ဂူင့် ဝဝ် နိုင် ပဲ ဘူ လှာင် တွိုန် မိူဝ်၊ ဟဲ့ ခြိုင် ဘ်ု ဒီ ဘုတ် ဝဝ် ဂေ။

7 ဟဲ့ ဟွတ့်၊ အာမူ အာမာတ် ဇဝ်ဖြာ ကာဒင် ဒေါ ဂုဝ် ဘော ဘုတ် ဝဝ် အန်။ န့ ဘော မိုဝ်း ဘျြီ ဘော ငဝ် ကာဆူ နှာမ်၊ စုဝ်း လူင် ဒဲင် ကာဒါယ်။ ဒေါ အန် တီ ကာဒါယ် အူယ် ဘုန် အူ ဘုန် ဘော ဟေ အူယ် ဘုန် အူ ဘုန် ဘော ပြဲ ငျီန် ဘောကာဂ့လျီတ် ဘော ကာဟဝ်း ခြဲမ် တူတ့်။

8 အာမူ အာမာတ် ဇဝ်ဖြာ ကာဒင် ဟာအာ ပီ ဝီ ဘုတ် ဝဝ် အန်၊ ပီ ဝီ မိုဝ်း အာဒါ အူ မျုဝ် အီ ပီ နွန် တာင် အီ မိုဝ်း ငဝ် ကုး။ အန် စုဝ်း ခဲင် အိုမ် နမ်မုက်ဆာရာ။ ဟဲ့ ဟွတ့်၊ အိုမ် နမ်မုက်ဆာရာ အူယ် ဘုန် အူ ဘုန် ဘဲန် နှာမ်။ 9 ဘော ဒုဝ် ဆတ်ဒါဝါ အီ ကွယ် ခဲင် အိုမ် နမ်မုက်ဆာရာ အူယ် ဘုန် အူ ဘုန် ဘော ယမ်၊ ဘော ရိုဝ် ဆင်ဖုဝ် အူယ် ဘုန် အူ ဘုန် ဘော ကာပျာတ့် လိုဝ်။

10 ဟဲ့ ဟွတ့်၊ အာမူ အာမာတ် ဇဝ်ဖြာ ကာဒင် ဟာအူယ် ပီ ဝီ ဘုတ် ဝဝ် အန်၊ န့ ဝီ မိုဝ်း ဆီမန့် တာင် အူ ဘူင့်၊ မိုဝ်း ဘော ငဝ် ကုး ပီ ငဝ် ရာင်၊ တး ခဲင် ဘ့လေန့် စုဝ်း လူင် ဒဲင် ဘ့လဲင် အိုမ် အူယ် ဘုန် အူ ဘုန် ဘော ဒဲင် တုဝ်း အိုမ် ဒွန် ပ့လုဝ့်။ 11 ဆီမန့် တီ စိူဝ် “ဆွင့်။” အိုမ် အူယ် ဘုန် အူ ဘုန် ဝီ ဆွင့်။ ဒူအီ ကိူန် ဘော ယမ် ကူပ် ဒျီင် ဂေ အိုမ် တီ။ ခုဝ်၊ အိုမ် ဆီငဲး ဟဲ့ ဝီ ဘဲန် အိုမ် ဆွင့်။

12 ဝါယ် အန် တီ အာမူ အာမာတ် ဇဝ်ဖြာ ကာဒင် မ့ဖွုန် ပီ ဝီ ဘုတ် ဝဝ် အန်။ ဟဲ့ ဟွတ့်၊ ဆီငဲ ဘော လိုဝ် အူယ် ဘုန် အူ ဘုန်။ ဘော မာဂျီန် ဂေ ဆီမန့် ဘော လိုဝ် အူယ် ဘုန် အူ ဘုန်၊ တဲး န့ အပ် ဝွင့်။ ဒေါ ကာတဲ ဆီငဲ အာဝ် ဟူ ဘ့လာင် အာဒါ ဖွုန် နာရီ။ ဘော ခဲင် မှိုဝ် န့ ဘော ပါယ် တီ။ မာဂျီန် ဂေ ဆီမန့် အာဝ် ဟူ ဘ့လာင် အာဒါ ဖွုန် နာရီ။

13 ဒေါ ယွတ် အုဝ် ဇိုဝ် တီ၊ အုဝ် ပီ ဝီ ယိုဝ် မာဂ့လာင် အူ ဒုဝ်၊ ဘိုန့် စာ ကာဆဝ် ခဲင် ဘ့လေန့်။ အန် ဘော ဒတ် တာင် တဝ်း၊ “ဝူတ်၊ ဝူတ်၊ ဂေ အာမူ အာမာတ် ဇဝ်ဖြာ အူယ် ကာဒင် အီ ဆီ ဂိတ်၊ ဂေ မိူဝ် ဟဲ့ ခြိုင် ဒီ ဘုတ် ဝဝ် ဂေ၊ တဲး ဒူအီ ဒဲင် ကာဒါယ် ဘောကာဂ့လျီတ် ခမ် ဝူတ်။”