1 ဝါယ် အန် တီ အုဝ် ဝီ ယိုဝ် အာမူ အာမာတ် ဇဝ်ဖြာ ဖွုန် ကာဒင်။ ဂေ စွင့် ဒီ ဖွုန် ကာတုဝ့် ကာဒါယ်။ ဂေ ဘော ခြဲ ခုန် အီ တး ဖွုန် ဘ့လာက်၊ ကွဲ့ တဲး ခုန် ဘုတ် ခဲင် အိုမ် နမ်မုက်ဆာရာ ဘော ဒဲင် ကာဒါယ် ဘော ဟေ ဘောကာဂ့လျီတ်။ 2 အုဝ် ဝီ ယိုဝ် အာမူ အာမာတ် ဇဝ်ဖြာ ပေါ အူ ကာဒင် တး နာ လေး ဆီငဲ။ အန် ဂူင့် ဇိုမ် ဇဝ်ဖြာ အီ မုး ဇဝ်ဖြာ အိမ်။ အန် ဝီ ဒတ် တာင် ကာဆဝ် ဒီ ဂေ အာမူ အာမာတ် ဇဝ်ဖြာ ဖွုန် ကာဒင် တွိုန် အီ ဟဲ့ ပွိုန် ဒီ ဘူင် တဲး န့ ဒုက် ဒဲင် ကာဒါယ် ဘော ခဲင် အိုမ် နမ်မုက်ဆာရာ။ 3 အန် တဝ်း၊ “အာတ့် ဒွက် အေ ဇိုမ် ဒီ ကာတဝ်း ဂေ ဒဲစေန့် ဇဝ်ဖြာ၊ ကွဲ့ တဲး န့ ဘဲန် ဒုက် ဒဲင် ကာဒါယ် ဘော ခဲင် အိုမ် နမ်မုက်ဆာရာ ဘော ဒီ ဟေ ဘောကာဂ့လျီတ်။” 4 အန် ဟဲ့ ဟွတ့် ကာလာင် ဂြုဝ်း တီ၊ အုဝ် ဝီ ယိုဝ် လွင် ဂေ အီ ဟဲ့ မိုဝ်း ဇိုမ် ဇဝ်ဖြာ ဒီ ကာတဝ်း ဂေ၊ န့ မုး အူ ဆဲန် ဒီ ဖွုန် မှိုန့် ဒီ ဖွုန် ဟြဲန့် ဝီ။ ဒူအီ ဂေ တီ၊ ဂေ မုး အာမျုဝ် ဒူအီ အီဆာရေလ၊ အီ တး ခဲင် ခြိုဝ် ဂိုဝ် ဒီ အာ ခြိုဝ် တွိုန်။

5-8 န့ ဘော မုး ခြိုဝ် အာယူဒါ၊ အာရူဘေန်၊ အာဂတ်၊ အာဆေန်၊ အာနာပ်ထာလီ၊ အာမာနာဆေ၊ အာဆီမေန်၊ အာလေဝီ၊ အာအီဆာခါ၊ အာဇေဘူလူန်၊ အာယုဝ် ဘော အာဘေန်ယာမ်။ ခဲင် ခြိုဝ် ဂေ တီ၊ အူ ခြိုဝ် ပီ ဝီ မိုဝ်း အူ မှိုန့် ဒီ အာ ဟြဲန့် ဝီ၊ အီ မိုဝ်း ဇိုမ် တီ။

9 ဝါယ် အန် တီ အုဝ် ဝီ ယိုဝ် ဖိုင် ဒူအီ ကိူန် ကာဆဝ် ကော ဟူ ပဲ နပ် ဒီ တိး။ ဒူအီ ဂေ တီ၊ န့ မုး ဒူအီ ဒွန် ဇိုဝ် ဒွန် ခြိုဝ်၊ ဒွန် မာန် ဒွန် မိူင်၊ ဂေ ဘော ကာလာင် ဂြုဝ်း ဒွန် မျုဝ်။ ဂေ ဟဲ့ စှိုပ် တူတ့် ခြိုင် လုယ်၊ ဂူင့် ဘော လှာ ဟေ စိုက်။ ဂေ ဟဲ့ တး ကွယ် နာ အာတ့် မာလာင် အန် ဇဝ် ဘော နာ အာတ့် ဂွန် မာဘူ တွိုန်။ 10 ဂေ ဘော ဒတ် တာင် တဝ်း၊ “အီ ချွတ် အေ ဟဲ့ မုး ဇဝ်ဖြာ အီ တုတ့် ဒဲင် မာလာင် ဘော ဂွန် မာဘူ တီ။”

11 ခဲ့ ကွယ် ဂေ အာမူ အာမာတ် ဇဝ်ဖြာ ဘောကာဂ့လျီတ် ဘော စွင့် ရူပ် အန် ဇဝ် ဘော ရူပ် ဒါ တာင် ဂေ ဒုဝ် ဆတ်ဒါဝါ ဖွုန် ဒုဝ် တွိုန်၊ ဂေ ဘော ကာဖြူမ် ဒီ မုတ် ဂိုပ် ဒီ မာလာင်၊ ကြိုပ် ဇဝ်ဖြာ။ 12 ဂေ ဘော တဝ်း၊ “ဆာတူ၊ ယေ အိူပ် မျုက် မဲ ဇဝ်ဖြာ။ မဲ မိုဝ်း အာဖုင် ဒင်ခုဝ်။ မဲ မိုဝ်း အာငျာန်။ ယေ ဘော ဒါင် ဂုင် ဂေဇူ ဒီ မဲ ဇဝ်။ မဲ ဘော မိုဝ်း ဆာရေ ဘွတ် ဘော ပွုန် ဂေ ဟဲန့်။ တဲး န့ ဘော ဘဲန် ပါယ် တီ ဒွန် စုဝ် ဒွန် ဘာန်၊ ဆာတူ။”

13 ဒေါ အန် တီ န့ မိုဝ်း ဒါ တာင် အူ ဝီ၊ အန် ဒီမွှတ် အုဝ် တဝ်း၊ “ဂေ အီ စှိုပ် ခြိုင် လုယ် နီ၊ ဂေ မုး အာဆေ။း ဂေ တး နာ မှဝ်။း”

14 အုဝ် ဝီ တဝ်း၊ “အိုယ် မဲ ဇဝ်၊ အုဝ် တူ နပ်။ မဲ အီ ဟဲ့ နပ်။” အန် ဝီ တဝ်း ဒီ အုဝ်၊ “ဒူအီ ဂေ တီ၊ ဂေ မုး ဒူအီ အီ ဟဲ့ လွတ် လေး ခဲင် ဒုက် တာင် ကာဆဝ်။ ခြိုင် ဂေ ဟဲ့ လုယ် ဆီငါ။ န့ ပီ ဂေ ဟဲ့ လး ခြိုင် ဂေ ခဲင် နှာမ် ဂွန် မာဘူ တွိုန်။

15 ခုဝ်၊ ဇဝ်ဖြာ ဟဲ့ ဒွိုမ် ကာလာင် လွင် ဂေ၊ ဂေ ဒီ ပွိုန် ဒီ ကွယ် နာ အာတ့် မာလာင် ဇဝ်ဖြာ။ ဂေ ပွိုန် ဒီ ကြိုပ် ဇဝ်ဖြာ၊ ဘူင် ဂါန် ဇဝ်ဖြာ ခဲင် ဟုဝ် အန် ဒွင် ခိူန် ဒွင် ဝန်။ အန် ဇဝ် အီ တုတ့် ဒဲင် မာလာင်၊ အန် ဟဲ့ ကွယ် ကာချြီ့ ဒီ ဂေ၊ တဲး အန် ရဲ ဂွင့် ဂေ။

16 ဝါယ် နီ၊ ဂေ မိူဝ် ဟူ အေတ့် ပီ ဒီ ဟူမ်၊ ဟူ အေတ့် အိုမ် ဒေါ မှဝ်။ ဂေ မိူဝ် အာဝ် ဟူ လုဝ် ခမ် ဆောဒါတ် ဂေ ကာဟွာ့ ဆီငဲ ဒေါ မှဝ်။

17 ခုဝ်၊ ဂွန် မာဘူ အီ ကွယ် ခူပ် မာလာင် တီ၊ အန် ဒီ ဟျီင် လိုမ်လာ ဂေ။ အန် ဇဝ် ဒီ ယဲတ့် ဂေ ဟာဝ် ဒူင် မိုဝ်း အိုမ် တုဝ်း အီ ဒွါ အာဆာက်။ ဇဝ်ဖြာ မိူဝ် ဒီ ခုတ် ဝဲန် အိုမ် ငါယ် အီ ဒိုက် ဒီ ငါယ် ဂေ။”