1 ပန် တီ အုဝ် ယွတ် ဂွန် မာဘူ ဒေါ ပျာတ့် အန် ဇိုမ် ဒေါ ဂုဝ် ခဲင် ဘူ ဘူင့် တွိုန်။ ဒေါ အန် တီ ခဲင် ဒုဝ် ဆတ်ဒါဝါ ဖွုန် ဒုဝ် တွိုန်၊ အူ ဒုဝ် ကာလာင် ဂြုဝ်း ပီ ဟမ် ကာနမ် တဝ်း၊ “တး။” 2 အုဝ် ဝီ ယိုဝ် ဘော မင်ပြွင့် လုယ် အူ ဒုဝ်။ ဒါ အီ ပဝ့် မင်ပြွင့် တီ၊ အန် ဟဲ့ ဂူင့် ဘော အ။ အန် ဟဲ့ ပွိုန် ဘော မင်ဂိုမ် အူ ဘူင့်။ ပီ ပါယ် အန် ဒီ ပဝ့် မင်ပြွင့် တီ ဟဲ့ ပီ ဒူအီ အီ ဒီ ဟာဝ် ကာဂုဝ်း၊ အီ ဒီ အွင် ရန်ဆူ အန်။

3 ပန် တီ ဂွန် မာဘူ ဘော ပျာတ့် ဇိုမ် ဟာအာ။ ဒေါ အန် တီ ခဲင် ဒုဝ် ဆတ်ဒါဝါ ဖွုန် ဒုဝ် တွိုန်၊ အုဝ် ဝီ ယိုဝ် ဂြုဝ်း ဒုဝ် ဟာအာ။ အန် တဝ်း၊ “တး။” 4 အုဝ် ပီ ဝီ ယိုဝ် မင်ပြွင့် ရေန့် အူ ဒုဝ် တး။ ဝီ အီ ပဝ့် မင်ပြွင့် တီ၊ ဇဝ်ဖြာ ဟဲ့ တဲး အန် မိုဝ်း ပွုန်၊ တဲး အန် ဘူင် တဲး ဒူအီ ဒဲင် ကာဒါယ် လာယ် ကာဂုဝ်း လာယ် ကာငဝ်း။ အန် ဟဲ့ ဂူင့် ဘော မာပွါ့ လာင် အူ ဘ့လ အီ တာင် ကာဆဝ်။

5 ဟဲ့ ဟွတ့်၊ ဂွန် မာဘူ ပျာတ့် ဇိုမ် ဟာအူယ်။ ဒေါ အန် တီ အုဝ် ဝီ ယိုဝ် ဂြုဝ်း ဒုဝ် ဆတ်ဒါဝါ တွိုန်၊ အီ မုး ဒုဝ် ဟာအူယ်။ အန် တဝ်း၊ “တး။” အုဝ် ဘော ယွတ်၊ အုဝ် ဝီ ယိုဝ် မင်ပြွင့် ဝွင့် အူ ဒုဝ်။ ဝီ အီ ပဝ့် မင်ပြွင့် တီ၊ အန် ဟဲ့ ဂူင့် လစူ အူ ဘ့လ ခဲင် ဒဲ အန်။ 6 အုဝ် ဝီ ယိုဝ် ဂြုဝ်း ကာတဲ ဂေ ဒုဝ် ဆတ်ဒါဝါ ဖွုန် ဒုဝ် တွိုန် တဝ်း၊ “ဒီဂါဝ် ခဝ်ချုင် အူ ခ့ဝါက်၊ လုဝ် ဟာဝ် ကာဝေန် အူ ဝီ။ ဘော ဆီဂူင့်ရာ အူယ် ခ့ဝါက်၊ လုဝ် ဟာဝ် ကာဝေန် အူ ဝီ။ အီ မုး အိုမ် မာငုန် ဘော နာမန်၊ ဘေ ကွဲ့ တဲး န့ လိုဝ်။”

7 ပန် တီ ဂွန် မာဘူ ဝီ ပျာတ့် ဇိုမ် မ့ဖွုန်။ ဒေါ အန် တီ အုဝ် ဝီ ယိုဝ် ဂြုဝ်း ဒုဝ် ဆတ်ဒါဝါ ဒုဝ် မ့ဖွုန်၊ အန် တဝ်း၊ “တး။” 8 အုဝ် ပီ ဝီ ယိုဝ်၊ မင်ပြွင့် ငျီန် ဆီဒိန့် အူ ဒုဝ်။ ဝီ အီ ပဝ့် မင်ပြွင့် တီ၊ အန် စိူဝ် ဇဝ် မာရာန။ မိူင် မာရာန အာဝ် ကာတူင့် ဒီ အန်။ အန် မိုဝ်း ပွုန် ဒီ တဲး အီ ယမ် ဒီ ဒါ ဆိုက်၊ ယမ် ဒီ အေတ့် ပီ ဒီ ဟူမ်၊ ဒီ ဆဝ် ရောဂါ ဘော ဒီ မာ ဒုဝ် ပြဲ။ အန် ပွိုန် ငဝ်း ဒူအီ ဒဲင် ကာဒါယ် အာဒါ ဖွုန် ဘုန် အူ ဘုန်။

9 ဂွန် မာဘူ ဝီ ပျာတ့် ဇိုမ် မ့ဖန်။ ဒေါ အန် တီ အုဝ် ဝီ ယိုဝ် ကာပြဝ် ဂေ ဒူအီ အီ ဟဲ့ ခမ် ဒီ ယမ် ကူပ် ကာလာင် ဂေ ဂြုဝ်း ဇဝ်ဖြာ ဘော ကူပ် ကာလာင် ဂေ ပဲ့ ဟဲ့ ယိုဝ် ဟဲ့ နပ် ဂေ လွင် ဇဝ် ယေဆူ။ ဂေ ကွယ် ခြိုမ် ကာစှူင့် လှူ။ 10 ဂေ ဘော ဒတ် တာင် တဝ်း၊ “အိုယ် မဲ ဇဝ် အီ အိုပ် တူတ့် ဒွန် မျုဝ် အီ ဆီငါ ဘွတ်၊ အီ ဘူင် နာ မုး နာ မှာန် အာခါခ်ု၊ န့ ဒီ လှေန့် ပေါ ခဲ့ မှဝ်၊ တဲး န့ ဇမ် ပန် ဒီ ဆုင်ဖျာတ် မဲ ဇဝ် အာမူ ဂေ ဒူအီ ဒဲင် ကာဒါယ်။း ပန် မှဝ် မဲ ဒီ ဒမ် မှာပ် ဒီ ဂေ အီ ဟဲ့ ငဝ်း ယမ် ယေ။း” 11 ဂေ ဟဲ့ ဟွတ့် တဝ်း ပါယ် တီ၊ ဂေ ဒွန် အီ ဟဲ့ ပွိုန် ဒီ စှိုပ် ခြိုင် လုယ်။ အန် ဇဝ် ဝီ ကာလာင် ဒီ ဂေ၊ တဲး ဂေ ဘ်ု ပေါ အီ စဲက်။ တဲး ဂေ နှဝ့်၊ တဲး န့ ကော နုဝ့် ခဲ့ ကွယ် ဘီနွင် ဂေ ဘော ဂိုက် အီ ဘူင် ဂါန် ရိုမ် ဒူပ် ဂေ၊ အီ ဆီ လုဝ် ခမ် ဒီ ယမ် ပီ ဂေ။

12 အုဝ် ဘော ယွတ် ဂွန် မာဘူ ဒေါ ပျာတ့် အန် ဇိုမ် န့ဒဝ်။ အုဝ် ဝီ ယိုဝ် မာအိမ် ဟဲ့ ယေန့် ကာဆဝ်။ ဘော ဆီငဲ အာဝ် ဟူ ဘ့လာင်၊ ဟဲ့ အပ် ဝွင့် တူတ့်။ မာဂျီန် မိူဝ် ဟဲ့ ရေန့် ပီ နှာမ်။ 13 ဂေ ဆီမန့် မိူဝ် ဟဲ့ စုဝ်း ဒဲင် ကာဒါယ်၊ ပီ ဘ့လေ ဒီပူ အီ ဆီဂ့လုး စုဝ်း အာတ့် ဆိန် ဒေါ မိုဝ်း ခုန် တာင် တး ဘုတ် ဒီယုး ဟေ အန်။ 14 ဘ့လေန့် မိူဝ် ဟဲ့ ဟြာယ် ပီ ပဲ့ ပီ ဆီလွယ် အုန် အီ။ နွန် ဒွန် နွန် ဘော ဂုန် အိုမ် ဒွန် ပ့လုဝ့် ဟဲ့ ကာထုဝ့် ဒူင် ကွယ် ဂေ။

15 ဒေါ အန် တီ ခဲ့ ကွယ် ဂေ ခုန်ဒီခမ် ဒဲင် ကာဒါယ် ဘော ဂေ ဒါ ကာညာ၊ ဘော ဂေ ဒါ တာင် အီ အိုပ် ဒါ ဆိုက်၊ ဘော ဒူအီ ခြမ် ဘော ဒူအီ အီ မိုဝ်း ပွုန်၊ မိုဝ်း အာဖုင် ဒင်ခုဝ်၊ ဘော ဒူအီ ဟဝ် ဘောကာဂ့လျီတ်၊ ဂေ အီ မုး မှာယ် ဘော ဂေ ဒူအီ အီ ကွယ် ထင်ဟာင်၊ ဂေ ဒွန် အီ ဟဲ့ တဝ် ဟာဝ် ချြီင် ဂေ ဒီ နွန် အီ မိုဝ်း ကာဒဝ် မာဝ် ဂေ ကာဒဝ် မာဝ်။ 16 ဂေ ဘော ဒတ် တဝ်း၊ “တဲး ဘေ နွန် ကေး ထိပ် ယေ၊ တဲး ဘေ ကာဒး ယေ ဒီ အန် ဇဝ် အီ တုတ့် ဒဲင် မာလာင် ခဲင် ဂါင်ဟြာဝ်၊ ဘော ကာဒး ယေ ဒီ ဂွန် မာဘူ အီ ဒီ ဒမ် မှာပ် ဒီ ယေ။ 17 ခုဝ်၊ ဆီငဲ ဒီ ဆုင်ဖျာတ် ဇဝ်ဖြာ အာမူ အီ ဟဲ့ ဇမ်။ အာဝ် မိုဝ်း အာဆေ အီ လွတ် ဇဝ်ဖြာ ဒမ် မှာပ် ဒီ အန်။”