ခါန် 5
လွင် ဆီလွယ် ပဲ့ ဘော လွင် ဂွန် မာဘူ
1 ဝါယ် အန် တီ အုဝ် ဝီ ယိုဝ် အန် ဇဝ် အီ တုတ့် ဒဲင် မာလာင် တွိုန်။ အန် ဂူင့် ဆီလွယ် ပဲ့ ခဲင် ဒဲ အန် ဘ့လာက် အာအး။ ဆီလွယ် ပဲ့ တီ ဟဲ့ ဒဲမ် ဘော နာ ရေတ့် နာ ခဲင်၊ ဟဲ့ ကာဘိတ်၊ ဟဲ့ ဒွက် ဘော ဇိုမ် ဘူ ပ့လုဝ့်။ 2 အုဝ် ပီ ဝီ ယိုဝ် ဘော အာမူ အာမာတ် ဇဝ်ဖြာ အီ မိုဝ်း အာဖုင် ဒင်ခုဝ် တာင် အူ ကာဒင်။ အန် ကာလာင် ဂြုဝ်း တာင် တဝ်း၊ “အာဆေ ဟဲ့ ကာအာပ် ပျာတ့် ဇိုမ် ဆီလွယ် ပဲ့ နီ၊ တဲး န့ ပွိုန် ဝိုဝ်း။း” 3 ဘော ခဲင် ဂါင်ဟြာဝ် ဘော ဒဲင် ကာဒါယ် ဘော ခြိုမ် ကာဒါယ်၊ အာဝ် မိုဝ်း အာဆေ အီ ပွိုန် ဝိုဝ်း ဆီလွယ် ပဲ့ တီ၊ တဲး န့ ပွိုန် ယွတ် နာ ခဲင်။ 4 ကူပ် တူ မိုဝ်း ခေါ အူ ဝီ အီ ကာအာပ် ဝိုဝ်း ဆီလွယ် ပဲ့ တီ ယွတ် နာ ခဲင်၊ အုဝ် ဘော ယာမ် တာင် အူ ဇေန့်။ 5 ဒေါ အန် တီ ခဲင် ဒါ တာင် ဂေ တွိုန် န့ မိုဝ်း အူ ဝီ၊ အန် တဝ်း ဒီ အုဝ်၊ “မဲ ကွဲ့ ယာမ်၊ တဲး မဲ ဝီ ယွတ် အီ စိူဝ် ‘မာခြင်ဆီ ခြိုဝ် အာယူဒါ’ အီ မုး လှုက်လှာန် အာဒါဝိတ်။ အန် ဟဲ့ အွင်။ ခုဝ်၊ အန် ဟဲ့ ကာအာပ် ဒိုဝ်း ဝဲန် ဇိုမ် အီ ကွယ် ဘူ ပ့လုဝ့်၊ တဲး အန် ဝိုဝ်း ဆီလွယ် ပဲ့ တီ။”
6 ဟဲ့ ဟွတ့် ပန် တီ အုဝ် ဝီ ယိုဝ် ဂွန် မာဘူ အူ ဒုဝ်။ အန် စွင့် ဒီ ခူပ် မာလာင် တွိုန်။ အာရိုပ် အန်၊ န့ ပီ အီ ဟဲ့ ဒွိုမ် ငဝ်း ယမ် အန်။ ဒုဝ် ဆတ်ဒါဝါ ဖွုန် ဒုဝ် ဘော ဂေ ဒါ တာင် တွိုန်၊ ဂေ ကွယ် ရူပ် အန်။ ဂွန် မာဘူ တီ ဟဲ့ မိုဝ်း နိုင် ဘူ ဘူင့် ဘော ငါယ် ဘူ ဘူင့်။ ဘော နိုင် ဘော ငါယ် တီ မုး နဝ်း ဖွိုမ် ဇဝ်ဖြာ ပီ တိုယ် ဇဝ်ဖြာ ဟာဝ် ကာလတ့် ဒဲင် ကာဒါယ် ဒွန် နာ ဒွန် ပ့လုဝ့်။ 7 ဂွန် မာဘူ တီ ဘော ဟာဝ် ဒိုဝ်း ဆီလွယ် ပဲ့ ပီ ဂူင့် အန် ဇဝ် အီ ကွယ် ဒဲင် မာလာင် တွိုန်။ အန် ဒိုဝ်း ဆီလွယ် ပဲ့ တီ ခဲင် ဒဲ အန် ဘ့လာက် အာအး။ 8 ဂွန် မာဘူ ဟဲ့ ဟွတ့် ဒိုဝ်း ဆီလွယ် ပဲ့ တီ၊ ဒုဝ် ဆတ်ဒါဝါ ဖွုန် ဒုဝ် ဘော ဂေ ဒါ တာင် အာ ဂိုဝ် ဒီ ဖွုန် ဝီ တွိုန်၊ ဂေ ဘော မုတ် ဂိုပ် ဒီ အာတ့် ဂွန် မာဘူ တီ။ ဂေ ဒွန် အီ ဟဲ့ ဂူင့် ဒိင် ဘော ဆီလယ့် ခြိဝ် ပီ ဟပ် ဂေ ဆီနမ် အုး ငှုန်။ ပီ ဆာခိုဝ် ဂေ ဒူအီ အီ ဆီငါ ဘွတ်၊ န့ ပီ ဆီနမ် အုး ငှုန် ခဲင် ဆီလယ့် တီ။ 9 ဂေ ဘော ကာဖြူမ် ဒီ တဝ်း မှုဝ် ကာမာယ်။ ဂေ တဝ်း၊
“မဲ ဇဝ်၊ မဲ ဟဲ့ ကာအာပ် ဒိုဝ်း ဆီလွယ် ပဲ့ တီ၊ တဲး မဲ ပွိုန် ဒီ ပျာတ့် ဇိုမ် ဂေ တီ။ ခုဝ်၊ အီ ဟဲ့ ဒွိုမ် ငဝ်း ယမ် မဲ။ ကူပ် ဟဲ့ လေး နှာမ် မဲ ဇဝ်၊ မဲ ဟဲ့ ပွိုန် ဒီ ထုတ် လေး ဒူအီ ဘောကာဂ့လျီတ် ခဲင် မှာပ်၊ တဲး ဂေ ဝီ ပွိုန် ဒီ ဒူပ် ဇဝ်ဖြာ။ ဂေ ဒူအီ ဒွန် မာန် ဒွန် မိူင်၊ ဒွန် ဇိုဝ် ဒွန် ခြိုဝ်၊ အီ ကာလာင် ဂြုဝ်း ဒွန် မျုဝ်၊ ဂေ ပွိုန် ဒီ ဘဲန် တူတ့် ဒူအီ ပီ အိုပ် ဇဝ်ဖြာ။
10 မဲ ဇဝ် ဟဲ့ တဲး ဂေ ပွိုန် ဒီ ဘဲန် အူ ဖိုင် အီ မုး ဒူအီ အီ လှူ ဒီ ဇဝ်ဖြာ။ တဲး ဂေ ပွိုန် ဒီ ဘူင် ဂါန် ဇဝ်ဖြာ အီ အိုပ် အေ၊ တဲး ဂေ အိုပ် ဒဲင် ကာဒါယ်။”
11 ဂေ ဟဲ့ ဟွတ့် ကာလာင် ဂြုဝ်း တီ၊ အုဝ် ပီ ဝီ ယွတ်၊ အုဝ် ဝီ ယိုဝ် ဂြုဝ်း အာမူ အာမာတ် ဇဝ်ဖြာ ဂေ ကိူန် ကာဆဝ်၊ ကော မိုဝ်း ဘဲန် ဆဲန် ဘဲန် လာန် ကော ဟူ ပဲ ဒီ တိး။ ဂေ ဟဲ့ စွင့်၊ ဟဲ့ ရူပ် ဘော မာလာင် ဘော ဒုဝ် ဆတ်ဒါဝါ ဖွုန် ဒုဝ် ဘော ဒါ တာင် ဂေ တွိုန်။
12 ဂေ ဘော ဒတ် တာင် တဝ်း မှုဝ်။ ဂေ တဝ်း၊
“ဂွန် မာဘူ ပဲ့ ဟဲ့ ငဝ်း ယမ် အီ၊ အေ ဟဲ့ ကာအာပ် အိူပ် အန်။ အေ ဘော အိူပ် အန် ကူပ် ဟဲ့ ကိူန် ပွုန် အန် ဘော ကြုဝ်ကြာမ် အန်။ အေ အိူပ် ဘော အာငျာန် ဘွတ် ဘော ပ့လူမ် ဂေ ဟဲန့် အန်။ ဟဲ့ ကာအာပ် အိူပ် အာဖုင် ဒင်ခုဝ် အန် ဇဝ်၊ တဲး အန် မိုဝ်း ဆာရေ။ ယေ ဘော ဒါင် ဂုင် ဂေဇူ ဒီ အန်။”
13 ဝါယ် အန် တီ အုဝ် ပီ ဝီ ယိုဝ် ဂြုဝ်း ဂေ အီ မိုဝ်း ဖွိုမ် ဒွန် မျုဝ်။ ဘော အီ ကွယ် ခဲင် ဂါင်ဟြာဝ် ဘော အီ ကွယ် ဒဲင် ကာဒါယ်၊ ဘော အီ ကွယ် ခြိုမ် ကာဒါယ် ဘော အီ ကွယ် ခဲင် အိုမ် နမ်မုက်ဆာရာ၊ ဂေ ဘောကာဂ့လျီတ် တဝ်း၊
“အေ အိူပ် အန် ဇဝ် အီ တုတ့် ဒဲင် မာလာင် ဘော ဂွန် မာဘူ တွိုန်၊ တဲး ဂါယ် မိုဝ်း ပွုန်၊ မိုဝ်း ဆာရေ။ တဲး ဂါယ် မိုဝ်း ဘော အာဖုင် ဒင်ခုဝ် ဆေဆေ ဒွန် စုဝ် ဒွန် ဘာန်။”
14 ဂေ ဟဲ့ ဟွတ့် ကာလာင် ပါယ် တီ၊ ဒုဝ် ဆတ်ဒါဝါ ဖွုန် ဒုဝ် တွိုန် ဝီ တဝ်း၊ “ဟဲ့ မှာန်၊ ဟဲ့ မုး၊ ဆာတူ။” ဒါ တာင် ဂေ တွိုန် ဘော မုတ် ဂိုပ် ကြိုပ် အူ ဇေန့်။