ခါန် 12
လွင် ဇဝ် ယေဆူ အိုပ် ဆီငဲ ဒီလှဝ်
1 ဝါယ် အန် တီ န့ ဝီ ဇမ် ဆီငဲ ဒီလှဝ်။ ဘော ဇဝ် ယေဆူ ဘော ဒီဘဲ အန် ဟာဝ် ဒူပ် ဂြဲင် ခဲင် မာန် ခဝ်ချုင်။ ကူပ် ဟဲ့ ကာပြာန့် ဂေ ဒီဘဲ အန် ပီ ဒီ ဟူမ်၊ ဂေ ဝီ စုး ဒီ ဆီကတ် ကာယူင့် အန်၊ တဝ်း ဒီ ဟူမ်။ 2 ဂေ ဒူအီ ခဲင် ဖိုင် ဖာရီဆဲ မင် အီ၊ ဂေ ဘော ယိုဝ် ဒီဘဲ ဇဝ် ယေဆူ ဘူင် ပါယ် တီ၊ ဂေ ဝီ တဝ်း ဒီ ဇဝ် ယေဆူ၊ “မဲ ယွတ် ဒီဘဲ မဲ။ ဂေ ဘူင် ပီ တူ တဲး ဒါရာ အေ ဘူင် ဒေါ မုး ဆီငဲ ဒီလှဝ်။”
3 ဇဝ် ယေဆူ ဝီ ဝျီ့ ဂြုဝ်း တီ။ အန် တဝ်း၊ “အုဝ် ထာင်၊ ဘေ တူ ဒွိုမ် တိး ခဲင် ဘပ် ဇဝ်ဖြာ လွင် ပဲ့ ဟဲ့ ဘူင် အာဒါဝိတ် တွိုန်။ ဘော အန် ဘော ဒူအီ အီ ဒူပ် အန်၊ ဂေ ကာပြာန့် ကာဆဝ် ပီ ဒီ ဟူမ်။ 4 ဒေါ အန် တီ ဂေ လိုပ် ခဲင် ကာင် ဒူင် ကြိုပ် ဂေ ဇဝ်ဖြာ၊ ဝီ ဟူမ် ခါမုန် ပီ ဘ့လေး အီ ဒီ အာတ့် ဇဝ်ဖြာ။ ဒါရာ တူ တဲး ဂေ ဟူမ် ခါမုန် တီ။ မီ ဂေ ဒူအီ အီ လှူ ဒီ ဇဝ်ဖြာ အီ ပွိုန် ဟူမ်။a 5 န့ ပီ၊ ဘော လွင် ဒါ အီ လှူ ဒီ ဇဝ်ဖြာ ဘေ တူ ဒွိုမ် တိး။ ဆေ န့ မိုဝ်း ဒူအီ အီ တး လှူ ဒီ ဇဝ်ဖြာ ဒေါ မုး ဆီငဲ ဒီလှဝ်၊ ဂေ မိူဝ် နပ် ဒီ လှူ ဒွါ။ န့ ပီ ဘော ဂေ ဒါ အီ လှူ ဒီ ဇဝ်ဖြာ အီ ကွယ် ခဲင် ဟုဝ် ဇဝ်ဖြာ၊ ဂေ တူ ကမ် ဆီငဲ ဒီလှဝ်၊ ဂေ ဘူင် ဂါန်။ န့ ယီ တူ ဘဲန် မှာပ် ဒီ ဂေ။ 6 အုဝ် တဝ်း ဒီ ဘေ၊ အုဝ် ကွယ် ရိုမ် ဒူပ် ဘေ ဒေါ တီ နီ။ ဆေ ဘေ ဘူင် ခဲ့ ပီ ကာလာင် အုဝ် ဒီ ဘေ၊ အာရေ အန် ဟဲ့ တာင် လွှိုမ် ဒူပ် ဘေ ဒါရာ။ န့ ဘော တာင် လွှိုမ် ပီ လုဝ် ဘူင် တူ ဘူင် ဘေ ခဲင် ဟုဝ် ဇဝ်ဖြာ။ 7 ခဲင် ဘပ် ဇဝ်ဖြာ န့ ဘော တဝ်း၊ ‘ဆေ ဘေ လှူ ဒုဝ် ဆတ်ဒါဝါ အီ ဒုဝ့် ခဲင် ငဝ်၊ န့ လဝ့် နဝ်း အုဝ်။ ဆေ ဘေ ယီ ကာဝေ အီ၊ အာရေ အန် တာင် လွှိုမ် လှူ ဘေ ဒီ အုဝ် ဘဲန် မျုဝ် ဘဲန် မျုဝ်။’ ဆေ ဘေ ဟီ နပ် လွင် ဒါင် ဂြုဝ်း တီ၊ ဘေ တူ တဝ်း လွင် ဒီဘဲ အုဝ် ဂေ ဝဲန် ဒါရာ ဇဝ်ဖြာ။ ဂေ တူ မိုဝ်း မှာပ် ဇိုဝ် တီ။ 8 ခုဝ်၊ န့ မုး အုဝ်၊ အီ ဟဲ့ ဘဲန် ဂွန် ဒူအီ၊ အုဝ် မုး ဒါ ကာညာ အီ အိုပ် ဆီငဲ ဒီလှဝ်။”
9 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ ဟာဝ် လိုပ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။ 10 ခဲင် ဇူင် တွိုန်၊ န့ မိုဝ်း ဒူအီ အူ ဝီ၊ ဒဲ အန် ဟဲ့ ယမ် ဘ့လာက်။ ဂေ အီ ကွယ် ခဲင် ဇူင်၊ ဂေ ဆီ ဖျာက် ဇဝ် ယေဆူ။ ခုဝ်၊ ဂေ ဝီ ဒီမွှတ် အန် တဝ်း၊ “ဆေ အီ ပီကဲန် ဒူအီ ဆဝ် ဒေါ မုး ဆီငဲ ဒီလှဝ်၊ န့ ဒူပ် တူ ဒူပ် ဒါရာ ဇဝ်ဖြာ။း”
11 ဇဝ် ယေဆူ ဝီ တဝ်း ဒီ ဒူအီ ဘောကာဂ့လျီတ်၊ “ဆေ ဒူအီ အူ ဝီ မိုဝ်း မာဘူ အူ ဒုဝ် အီ စုဝ်း ခဲင် ကာဒဝ် ဒေါ မုး ဆီငဲ ဒီလှဝ်၊ ဘေ ထာင်၊ အန် ဒီ တူ ဟာဝ် ဒိုဝ်း လေး မာဘူ အန် တီ။း 12 ဆေ န့ ယီ မုး ဒူအီ၊ ငဝ်း အန် ဟဲ့ တာင် လွှိုမ် မာဘူ။ ခုဝ် အန် တီ ဆေ ဒူအီ အူ ဝီ စွယ် ပေါ အူ ဝီ ဒေါ မုး ဆီငဲ ဒီလှဝ်၊ အန် ဒူပ် ဒါရာ။ န့ တူ ဘဲန် မှာပ် ဒီ အန်။”
13 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ ဒီ ဂေ၊ အန် ဝီ ကာလာင် ဒီ ဒူအီ ဆဝ် တွိုန်၊ “မဲ စုဝ့် ဒဲ မဲ။” ဒူအီ တွိုန် မိူဝ် စုဝ့် ဒဲ အန်။ ဟဲ့ ဟွတ့်၊ ဒဲ အန် ဟဲ့ ကဲန်၊ ဟဲ့ ပီ ပေါ အူ ဘ့လာက်။ 14 ဂေ ဒူအီ ခဲင် ဖိုင် ဖာရီဆဲ၊ ဂေ ယီ လေး ခဲင် ဇူင် တွိုန်၊ ခြာမ် ဒီ ငဝ်း ယမ် ဇဝ် ယေဆူ၊ လာယ် ဆင်ချာင်၊ မှဝ် ဂေ ဒီ ပါယ် ဒီ ဘူင် တဲး ဂေ ပွိုန် ဒီ ငဝ်း ဝဲန် ဇဝ် ယေဆူ။
လွင် ဒူအီ ပီ ရဝ်း ပီ တိုယ် ဇဝ်ဖြာ
15 ဇဝ် ယေဆူ ဘော နပ် လွင် ဆီ ငဝ်း ယမ် ဂေ ဒီ အန်၊ အန် ဝီ လေး ဒူင် ကွယ် အန် တွိုန်၊ ဝီ ဟာဝ် ပေါ အူ ပ့လုဝ့်။ ဒူအီ ဂေ ကိူန် ဝီ ဒူပ် အန်။ အန် ဘော ပီကဲန် ဒူအီ ဆဝ် ဒွန် အီ အီ ကွယ် ကာတဲ ဂေ။ 16 အန် ဝီ စ်ု ဂေ၊ ကွဲ့ တဲး ဂေ ကာလာင် ဒီ အီ ဟဝ် လွင် အာဆေ အန် မုး။ 17 ဇဝ် ယေဆူ ကာလာင် ဂြုဝ်း တီ၊ ကူပ် ပဲ့ ဟဲ့ ဒဲမ် အုန် အာအီဆာယ တွိုန် လွင် အီ ဒီ တး ချွတ် ဒူအီ။ အန် ဟဲ့ ဒဲမ် အုန် ဂြုဝ်း ဇဝ်ဖြာ ပါယ် နီ၊ “ဒူအီ တီ၊ အန် မုး ဒဲစေန့် ပီ ရဝ်း အုဝ်။ အန် ဘော မုး အီ ပီ ရွက့် အုဝ်၊ အီ ဒီ ဘူင် တဲး န့ လဝ့် နဝ်း အုဝ်။
18 အုဝ် ဒီ ဒွါ နဝ်း ဖွိုမ် အုဝ် ဒီ အန်။ အန် ဒီ ဘော ဘျ ဒီ ဒူအီ အာမျုဝ် ဟဝ် လွင် ဒါရာ ဇဝ်ဖြာ အီ မှာန် အီ မွှိုမ်။
19 အန် မိူဝ် တူ ထဲန့် တူ ဒတ် တာင်။ အာဝ် ပွိုန် ယိုဝ် အန် ဒတ် ဒဲင် ဂြး။ 20 ဆေ ဒူအီ ဇမ် ဒုက်၊ ဆေ ဂေ ပီ ဂုဝ်�လင် အီ ကာဘက် ဟွယ်၊ အန် တူ ဝီ ဝဲန် ဂေ။ ဆေ ဒူအီ ဒီလှး ပီ န့ကိုဝ် ငဝ် အီ ဆီ ဒိုက် ဒီ ဆဲ ငဝ် အွမ်၊ အန် တူ ဘျတ် တဲး န့ ယတ်။ အန် ဒီ ဘူင် ပါယ် တီ၊ တဲး န့ ကော ဇမ် အာခြာဝ် ဒေါ နပ် ဂေ ဒူအီ ဘောကာဂ့လျီတ် လွင် ဇဝ်ဖြာ ချွတ် ဂေ။ ခဲ့ မိုဝ်း ရန်ဆူ အန်၊ အီ တူ ဆီ တဲး အီ နပ် လွင် အန် တီ၊ အန် ဒီ ဘော အွင် တူတ့်။ 21 ဂေ ဒူအီ အာမျုဝ် ဟဝ် အီ ကွယ် ဒဲင် ကာဒါယ်၊ ဂေ ဒီ ဘော နပ် ဆီချာ လွင် အန်။ ခုဝ်၊ ဂေ ဒီ ဘော နှဝ့် န့ဒဝ့် အန်၊ တဲး အန် ချွတ် ဘော ဂေ။” ပါယ် တီ ဟဲ့ ဒဲမ် အုန် ဒီ အာတ့် လွင် ဇဝ် ယေဆူ ခဲင် ဘပ် ဇဝ်ဖြာ။ ပါယ် တီ အန် မိူဝ် ဘူင်။
လွင် ဘုဝ် ကာနမ်
22 ပန် တီ န့ မိုဝ်း ဒူအီ အူ ဝီ၊ အီ မိုဝ်း ကာနမ် ခဲင် ဒုဝ် ဘူင့် အန်။ အန် တူ နပ် ဒီ ကာလာင် ဂြုဝ်း။ ဘော ငါယ် အန် ဟဲ့ အပ်။ ဂိုက် အန် တး တိုယ် ဒူအီ တီ ဒီ ဇဝ် ယေဆူ။ ဇဝ် ယေဆူ ပီကဲန် အန်၊ တဲး အန် ဝီ ပွိုန် ဒီ ကာလာင် ဂြုဝ်း၊ တဲး ငါယ် အန် ဝီ ပွိုန် ဒီ ယိုဝ်။ 23 ဂေ ဒူအီ ယီ အာမ် ကာဆဝ်။ ဂေ ဝီ တဝ်း၊ “အော၊ ယေ တူ နပ် ဒူအီ တီ၊ ယုဝ် န့ မုး လှုက်လှာန် အာဒါဝိတ် တွိုန် အီ ချွတ် ဒူအီ။”
24 ဂေ ဒူအီ ခဲင် ဖိုင် ဖာရီဆဲ၊ ဂေ ယီ ထူမ် ဂြုဝ်း တီ၊ ဂေ ဝီ တဝ်း၊ “န့ မုး ပွုန် ဘုဝ် ကာနမ် အီ စိူဝ် ဘေဆေဘူ၊ အီ တဲး အန် ဆုတ့် ကာနမ် လေး ခဲင် ဒုဝ် ဘူင့် အီ ဟဝ်။”
25 ဇဝ် ယေဆူ ယီ နပ် ပီ ဇေန့်ဇာ ဂေ။ အန် ဝီ တဝ်း ဒီ ဂေ၊ “ဆေ န့ မိုဝ်း မိူင် အူ မိူင်၊ ဂေ ဒူအီ အီ ကွယ် ခဲင် မိူင် တီ ဟဲ့ လာယ် ကာယဝ်း၊ လာယ် ကာဂုဝ်း၊ မိူင် တီ၊ န့ ဒီ လိုဝ်။ အာဝ် ပွိုန် ကွယ်။ န့ဟူမ် ဒူအီ ဘော ပါယ် တီ။ ဆေ ဂေ အီ ကွယ် အူ န့ဟူမ် လာယ် ကာယဝ်း၊ န့ ဒီ ဘော လိုဝ် တူတ့်။ 26 ဆေ ကာနမ် အီ စိူဝ် ဆာတာန် ဝီ လာယ် ကာလုတ့် ဒီ ဂေ ကာနမ် ခဲင် ဖိုင် အန်၊ န့ ပီ အန် ကာဂုဝ်း ဒီ ဒုဝ် အန်။ မိူင် ပီ အိုပ် အန် အာဝ် ပွိုန် ကွယ်။ 27 ဘေ တဝ်း၊ အုဝ် ဒိုဝ်း ပွုန် ကာနမ် ဘေဆေဘူ တွိုန်၊ ဆုတ့် ကာနမ် လေး ခဲင် ဒုဝ် အီ။ ဆေ အုဝ် ဘူင် ပီ တဝ်း ဘေ တီ၊ တဲး ဘေ ယွတ် ဂေ ဒူအီ ခဲင် ဖိုင် ဘေ။ ဘော ဂေ ဟဲ့ ဒိုဝ်း ပွုန် ဇိုဝ် တီ၊ ဆုတ့် ကာနမ် လေး ခဲင် ဒုဝ် ဘူင့် အီ ဟဝ်။ န့ ယီ မုး ဒူအီ ဂေ တီ၊ ဂေ ဒီ ဝီ ဆုင်ဖျာတ် လွင် ဂြုဝ်း ဘေ၊ တဝ်း န့ တူ မှာန်။ 28 ဆေ န့ ယီ မုး နဝ်း ဖွိုမ် ဇဝ်ဖြာ၊ အီ တဲး အုဝ် ဆုတ့် ကာနမ် လေး ခဲင် ဒုဝ် ဘူင့် အီ၊ န့ လိုဝ်း ဆီချာ လွင် မိူင် ပီ အိုပ် ဇဝ်ဖြာ။ အန် ဇဝ် ဟဲ့ ဟွတ့် တး ဇမ် ဒူင် ကွယ် ဘေ၊ တဲး အန် အိုပ် တူတ့် ဒွန် မျုဝ် ဒဲင် ကာဒါယ် နီ။
29 အုဝ် တဝ်း ဒီ ဘေ အူဖာမာ အန် ပေါ အူ မျုဝ် လွင် အိုပ် အုဝ် ဘုဝ် ကာနမ်။ ဆေ န့ မိုဝ်း ဒူအီ အီ မိုဝ်း ပ့လူမ် တာင်၊ ဒါ ပြာ တူ ပွိုန် ဟာဝ် ဆိူဝ်၊ လိုပ် ခဲင် ကာင် အန်၊ ဒိုဝ်း ဟာဝ် ကြုဝ်ကြာမ် ဒူအီ တီ။ အန် လုဝ် မှေတ့် ဒါ ကာညာ ကာင် အီ မိုဝ်း ပ့လူမ် တာင် တွိုန် ဘော ပက် အန် ဒီ အာတ့်။ ဟဲ့ ဟွတ့်၊ အန် ကော ဒီ ပွိုန် လိုပ် ဒိုဝ်း ကြုဝ်ကြာမ် ခဲင် ကာင် တီ။
30 အာဆေ တူ ဖြူမ် အုဝ်၊ န့ ပီ၊ အန် ဘဲန် ရန်ဆူ အုဝ်။ အာဆေ တူ ဒဲ့ အီ ဟဝ် တး ကာဇု ဒူပ် အုဝ်၊ န့ ပီ အန် ဟဲ့ ဆုတ့် ဂေ လေး ဒူင် ကွယ် အုဝ်။ 31 ခုဝ်၊ အုဝ် တဝ်း ဒီ ဘေ၊ ခဲ့ မိုဝ်း မှာပ် ဘဲန် မျုဝ် ဘဲန် မျုဝ် ပီ ဘူင် ဒူအီ ဘော ဂြုဝ်း စီစိဝ် ပီ ကာလာင် ဂေ ဒွန် မျုဝ် လွင် ဇဝ်ဖြာ၊ ဇဝ်ဖြာ ဒီ ဘ့လွာ့ ဝဲန် မှာပ် ဇိုဝ် တီ။ ဆေ န့ ယီ မိုဝ်း ဒူအီ၊ ဆေ အန် ကာလာင် နာ စီစိဝ် လွင် နဝ်း ဖွိုမ် ဇဝ်ဖြာ၊ မှာပ် ဇိုဝ် တီ၊ ဇဝ်ဖြာ တူ ဘ့လွာ့ ဝဲန် ဒေါ မှဝ်။ အာဆေ ဘူင် မှာပ် ဇိုဝ် တီ၊ အန် လုဝ် ခမ် ဆေဆေ မှာပ် အန် တီ။ 32 ဆေ န့ ဘော မိုဝ်း ဒူအီ၊ အီ ကာလာင် နာ တူ မွှိုမ် လွင် အုဝ်၊ အီ ဟဲ့ ဘဲန် ဂွန် ဒူအီ၊ ဇဝ်ဖြာ ဒီ ဘ့လွာ့ ဝဲန် မှာပ် အန် တီ။ အာဆေ ယီ ကာလာင် နာ တူ မွှိုမ် လွင် နဝ်း ဖွိုမ် ဇဝ်ဖြာ၊ ဇဝ်ဖြာ တူ ဘ့လွာ့ ဝဲန် မှာပ် အန် တီ ဒေါ မှဝ်။ ဘော ဇာတ် နီ၊ ဘော ဇာတ် ဒီ တး၊ ဇဝ်ဖြာ တူ ဘ့လွာ့ ဝဲန် မှာပ် တီ။”
33 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ တဝ်း၊ “ဆေ န့ မိုဝ်း ဟေ အူ ကာဒင်၊ ဆေ ဘေ လိုမ်လာ ဟေ တီ တဲး အန် မွှိုမ်၊ ဘော ဘ့လေ အန် ဒီ မွှိုမ်။ ဆေ ဘေ တူ လိုမ်လာ ဘော တဲး ဟေ တီ လိုဝ်၊ ဘော ဘ့လေ အန် ဒီ လိုဝ်။ ပါယ် တီ၊ ဆေ ဘေ ယိုဝ် ဘ့လေ အီ ကွယ် ဒီ ဟေ၊ ဘေ ဒီ ဘော နပ်၊ ဟေ တီ ဟဲ့ မွှိုမ် တူ မွှိုမ်။ 34 ဘေ ယီ ပီ ဂွန် ဟန့် ငျီန်။ ကူပ် တူ မွှိုမ် ဘေ၊ ဘေ တူ ပွိုန် ကာလာင် ဂြုဝ်း အီ မွှိုမ်။ ခုဝ်၊ မာဆေ အီ ကွယ် နုဝ့် ခဲင် နဝ်း ဒူအီ၊ မူတ့် အန် မိူဝ် နပ် ဒီ ကာလာင် လွင် အန် တီ။ 35 ဆေ န့ မိုဝ်း ဒူအီ မွှိုမ်၊ ခဲ့ ကွယ် နာ မွှိုမ် ခဲင် နဝ်း အန်၊ န့ ဒီ ဘော လေး။ ဆေ န့ ယီ မိုဝ်း ဒူအီ တူ မွှိုမ်၊ န့ ဒီ လေး ခဲ့ ကွယ် အီ တူ မွှိုမ် ခဲင် နဝ်း အန်။ 36 အုဝ် ယီ တဝ်း ဒီ ဘေ၊ ဆေ ဇဝ်ဖြာ ဒီ ဆုင်ဖျာတ် အာမူ ဒူအီ ဒွန် အီ၊ ဂေ ဒီ လုဝ် ကာလာင် ဂြုဝ်း ပဲ့ ဟဲ့ ဒွိုမ် ကာလာင် ဂေ။ ဂြုဝ်း တီ ဒွန် ဒဲ အီ တူ မိုဝ်း ဒီခုဝ်၊ ဂေ လုဝ် ကာလာင်၊ မှဝ် န့ ပါယ် ပီ ကာလာင် ဂေ ဂြုဝ်း တီ။ 37 ခုဝ်၊ န့ မုး ဂြုဝ်း ပီ ဒွိုမ် ကာလာင် ဘေ အီ တဲး ဇဝ်ဖြာ ဘ့လွာ့ ဝဲန် မှာပ် ဘေ။ န့ ဘော မုး ဂြုဝ်း ဘေ အီ တဲး ဇဝ်ဖြာ ဒမ် မှာပ် ဘေ။” ခဲ့ တီ ဇဝ် ယေဆူ ကာလာင် ဒီ ဂေ ဒူအီ ခဲင် ဖိုင် ဖာရီဆဲ တွိုန်။
38 ဝါယ် အန် တီ န့ ဝီ မိုဝ်း ဒူအီ ခဲင် ဖိုင် ဖာရီဆဲ မင် အီ ဘော ဂေ ဒါ ဆာရာ အီ မာနုဝ် ဒါရာ ယူဒါ မင် အီ။ ဂေ ဝီ တဝ်း ဒီ ဇဝ် ယေဆူ၊ “ဆာရာ၊ ယေ ဆီ ယိုဝ် မဲ ဘူင် နာ မွှိုမ် အာမ် ကာဆဝ်၊ တဲး န့ ဘျ ပွုန် မဲ။”
39 ဇဝ် ယေဆူ ဝီ တဝ်း၊ “ဘေ ဒူအီ ဇာတ် နီ၊ ဘေ ဟာယ်။ ဘေ ဘော ဝဲန် ဇဝ်ဖြာ၊ ဝီ ဒူပ် ဒါရာ ဘဲန် မျုဝ် ဘဲန် မျုဝ်။ န့ ပီ ပီ ဘူင် ဂေ အီ လုတ့် အီဘိုန့်။ ဘေ တူ ညှိုမ် ဂြုဝ်း အုဝ်၊ ယီ မှာန့် အုဝ် ဘူင် နာ မွှိုမ် အာမ် ကာဆဝ်၊ တဲး ဘေ နပ် လွင် ပွုန် အုဝ်။ ဇဝ်ဖြာ ဟဲ့ ဟွတ့် ဘူင် နာ မွှိုမ် အာမ် ကာဆဝ် ဒီ ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာယုဝ်နာ တွိုန်။ အာတီ ဟဲ့ ဘျ လွင် အုဝ်။ ဒဲင် တီ အာဝ် မိုဝ်း ပီ ဒီ ဘျ ဒီ ဘေ။ 40 ဒါ အာယုဝ်နာ တွိုန်၊ အန် ဟဲ့ ဒွိုမ် ကွယ် ခဲင် ဝတ့် မာဂါ အီ တာင် ကာဆဝ်။ အာဒါ အူယ် ဆီငဲ ဒီ အူယ် မှိုဝ် အန် ဟဲ့ ကွယ် ခဲင် ဝတ့် မာဂါ တာင် တွိုန်။ ပါယ် တီ ဘော အုဝ်၊ အီ ဟဲ့ ဘဲန် ဂွန် ဒူအီ၊ အုဝ် ဒီ ဘော ကွယ် ခဲင် ကာဒဝ် ဘာရေဝ် အာဒါ အူယ် ဆီငဲ ဒီ အူယ် မှိုဝ်။ 41 ဆေ ဇဝ်ဖြာ ဒီ ဆုင်ဖျာတ် အာမူ ဒွန် အီ၊ န့ ဒီ မိုဝ်း ဂေ ဒူအီ အီ ဒွိုမ် ကွယ် ခဲင် မိူင် နီနီဝေ တွိုန်၊ ဂေ ဒီ ဘော ဒမ် မှာပ် ဒီ ဘေ ဒူအီ အီ ကွယ် ဇာတ် နီ။ ဂေ ဒီ ဘော ဖျာက် ဘေ၊ တဝ်း ဘေ တူ မွှိုမ်။ ခုဝ်၊ ဂေ ဟဲ့ ထူမ် ဂြုဝ်း အာယုဝ်နာ တွိုန်၊ ဝီ လှုဝ်း မှာပ် ဂေ၊ ဝီ ဝဲန် နဝ်း ဘြိမ် ဂေ။ မာလဲ၊ ဘေ ဒူအီ ဇာတ် နီ၊ ဘေ ဟဲ့ ပွိုန် ထူမ် ဂြုဝ်း အုဝ်၊ အီ ဟဲ့ တာင် လွှိုမ် အာယုဝ်နာ တွိုန်။ ဘေ ယီ တူ ညှိုမ်။ 42 ဒေါ မွိုန်၊ န့ ဘော မိုဝ်း နာင် ဟောခမ်၊ အီ ကွယ် ခဲင် မိူင် နာ တေတ့်။ အန် ဟဲ့ လေး ခဲင် မိူင် အန်၊ အီ ဟဲ့ တူင့် ကာဆဝ်၊ ဇမ် မိူင် အာဆာလုဝ်မုဝ် တွိုန်၊ တဲး အန် ပွိုန် ဒီ ယိုဝ် ဒီ ထူမ် အာငျာန် အာဆာလုဝ်မုဝ်။ ဘော အန် ဒီ ဖျာက် ဘေ ဒီ အာတ့် ဇဝ်ဖြာ ဒေါ ဆုင်ဖျာတ် ဇဝ်ဖြာ အာမူ ဒွန် အီ။ ဘော အန် ဒီ တဝ်း၊ ဘေ တူ မွှိုမ်။ ခုဝ်၊ ဘေ ဟဲ့ ပွိုန် ဒီ ထူမ် ဂြုဝ်း အုဝ် အီ မိုဝ်း အာငျာန် လွှိုမ် အာဆာလုဝ်မုဝ် တွိုန်။ ဘေ ယီ တူ ညှိုမ်။
43 ဘေ ဒူအီ ဇာတ် နီ၊ ဘေ ဟာယ် ကာဆဝ်။ ဘေ ပီ ဒူအီ အီ မိုဝ်း ကာနမ် ခဲင် ဒုဝ် ဂေ။ ဆေ ကာနမ် လေး ခဲင် ဒုဝ် ဘူင့် ဒူအီ၊ အန် ဝီ ဟာဝ် ဝိန် ဒီလဲ ခဲင် ဒူင် ကာဟဝ်း၊ တဲး အန် ဟြေတ့် ဒူင် ဒီ ပွိုန် ကွယ် အန်၊ ယီ တူ ယိုဝ်။ 44 ဟဲ့ ဟွတ့်၊ အန် ဝီ တဝ်း၊ ‘အုဝ် ဒီ ဝီ ဝေန့် လိုပ် ခဲင် ဒူင် ကွယ် ဘြိမ် အုဝ်။’ န့ ပီ၊ အန် ဝီ ဝေန့် ခဲင် ကာင် အန်။ ဒေါ ဇမ် အန် ခဲင် ဒူင် ကွယ် ဘြိမ် အန်၊ အန် ဝီ ယိုဝ်၊ ဒူအီ တွိုန် ဟဲ့ ဟွတ့် ဘိး ကာင် အန်၊ ဟဲ့ ဟွတ့် ဘူင် တဲး န့ ဆီဂြး တူတ့်။ 45 ပန် တီ အန် ဝီ ဟာဝ် ဝီ ဒဲ့ ကာနမ် ပေါ ဘူ ဒုဝ် အီ ဟာယ် လွှိုမ် အန်၊ တဲး ဂေ တး ဒူပ် အန်၊ တဲး ဂေ ဘောကာဂ့လျီတ် ဝီ လိုပ် ကွယ် ခဲင် ကာင် ဘြိမ် တွိုန်။ န့ ယီ မုး ဒူအီ ဝီ ပီ လိုပ် ကွယ် ဂေ တွိုန်၊ အန် ဝီ ဇမ် ဒုက် လွှိုမ် ခါ အာတ့်။”
လွင် မာ ဂေ ဝါ ဇဝ် ယေဆူ
46 ဒေါ ကာလာင် ဇဝ် ယေဆူ ဂြုဝ်း ဇိုဝ် တီ ဒွန် မျုဝ် ဒီ ဂေ ဒူအီ ကိူန်၊ န့ မိုဝ်း မာ ဂေ ဝါ အန်၊ ဂေ ကွယ် နာ ရေတ့် ကာင် ဒူင် ကွယ် ဇဝ် ယေဆူ တွိုန်။ ဂေ ဆီ ကာလာင် ဂြုဝ်း ဒီ အန်။ 47 ဒူအီ အူ ဝီ ဝီ တး ကာလာင် ဒီ ဇဝ် ယေဆူ။ အန် တဝ်း၊ “မာ မဲ ဂေ ဝါ မဲ၊ ဂေ ကွယ် နာ ရေတ့် ကာင်။ ဂေ ဆီ ကာလာင် ဂြုဝ်း ဒီ မဲ။”