1 ဇဝ် ယေဆူ ဟဲ့ ဟွတ့် မာနုဝ် ဒီဘဲ အန် ဂိုဝ် ဒီ အာ ဝီ လွင် ဘဲန် မျုဝ် ဘဲန် မျုဝ် ဇိုဝ် တီ။ ဝါယ် အန် တီ အန် ဝီ လေး ဒူင် ကွယ် အန်၊ ဝီ ဟာဝ် ကာလာင် လွင် ဇဝ်ဖြာ ခဲင် မိူင် ဘဲန် မိူင် ဘဲန် မိူင် အီ ကွယ် အိူင် ဂါလီလေ။

2 ဒါ ဆာရာ အာယောဟာန် တွိုန်၊ အန် ယီ ဆီ ကွယ် ခဲင် ကာပိုမ်။ အန် ဘော ယိုဝ် လွင် ဘဲန် မျုဝ် ဘဲန် မျုဝ် ပီ ဘူင် ဒူအီ တွိုန် အီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ပန် တီ အန် ဝီ တိုယ် ဒီဘဲ အန်၊ တဲး ဂေ ဟာဝ် ဒူင် ကွယ် ဇဝ် ယေဆူ၊ 3 တဲး ဂေ ဒီမွှတ် အန် တဝ်း၊ “ဟဲ့ မှာန် မုး မဲ ဒူအီ အီ ဒီ တး ချွတ် ယေ။း ဆေ အာဝ် ပါယ် တီ၊ ယေ လုဝ် နှဝ့် ပေါ ဝီ။း”

4 ဂါယ် ဟဲ့ ဟွတ့် ဟာဝ် ဒူင် ကွယ် ဇဝ် ယေဆူ၊ ဟဲ့ ဟွတ့် ဒီမွှတ် အန်၊ ဇဝ် ယေဆူ ဝီ တဝ်း၊ “တဲး ဘာယ် ဝေန့်၊ ကာလာင် ဒီ ဒါ ဆာရာ ဘာယ် လွင် ပဲ့ ဟဲ့ ယိုဝ် ပဲ့ ဟဲ့ ထူမ် ဘာယ်။ 5 ဂေ ဒူအီ ငါယ် အပ် ဟဲ့ ပွိုန် ဝီ ယိုဝ်။ ဂေ ဒူအီ ပ့လဝ် ယမ် ဟဲ့ ပွိုန် ဝီ ဟာဝ်။ ဂေ ဒူအီ အီ မိုဝ်း ဆဝ် ဒု^a ဟဲ့ ကဲန်။ ဂေ ဒူအီ ဟျုဝ့် ကာအာဝ် ဝီ ပွိုန် ထူမ်။ ဂေ ဒူအီ အီ ဟဲ့ ဟွတ့် ယမ်၊ ဂေ ဝီ ယိတ့် ဝီ အိမ်။ ဘော ဂေ ဒူအီ အီ ဇမ် ဒုက်၊ ဂေ ဒူအီ ဂိန်၊ ဂေ ပွိုန် ဒီ ထူမ် လွင် ဇဝ်ဖြာ ချွတ် အီ။ 6 တဲး ဘာယ် ဘော တဝ်း ဒီ အန်၊ အာဆေ တူ မိုဝ်း နဝ်း ကာလိင် ကာလဲ ကူပ် အုဝ်၊ အန် ဒီ မိုဝ်း နဝ်း ဒါခိုယ်။” ခဲ့ တီ ဇဝ် ယေဆူ ကာလာင် ဒီ ဒီဘဲ အာယောဟာန် ဂါယ် တွိုန်။

7 ဒေါ ဒီ ဝေန့် ဂါယ် တီ၊ ဇဝ် ယေဆူ ဝီ စုး ဒီ ကာလာင် ဒီ ဂေ ဒူအီ ကိူန် လွင် ဒါ ဆာရာ အာယောဟာန် တွိုန်။ အန် တဝ်း၊ “ဒေါ ဟာဝ် ယွတ် ဘေ အာယောဟာန် ဒီ ပြဲ ကာဟဝ်း၊ မာဆေ ပီ ဆီ ယိုဝ် ဘေ။း ဘေ ထာင် အန် မုး ဒူအီ အီ ပီ ကာဘာင် ဂုဝ်�လင်၊ အီ ကျီင် ဝိဝ် ကျီင် ဝေန့် ပီ ဘုတ် ခုန်။း အန် တူ မုး ဒူအီ ဇိုဝ် တီ။ 8 ဆေ အာဝ် မုး ပါယ် တီ၊ မာဆေ န့ မုး၊ ပီ ဆီ ယိုဝ် ဘေ။း ဘေ ထာင် အန် မုး ဒူအီ အီ စှိုပ် ခြိုင် စှိတ်။း အာဝ် မုး ပါယ် တီ။ ဘေ ဘော နပ် ဆီချာ၊ ဂေ ဒူအီ အီ စှိုပ် ခြိုင် စှိတ်၊ ဂေ တူ ကွယ် ခဲင် ပြဲ။ ဂေ ကွယ် ခဲင် ဟုဝ် ခုန်ဒီခမ်။ 9 ဆေ အာဝ် မုး ပါယ် တီ၊ မာဆေ န့ မုး၊ ပီ ဆီ ယိုဝ် ဘေ။း ဘေ ထာင် အန် မုး ဒူအီ အီ ဘျာန် ဂြုဝ်း ဇဝ်ဖြာ။း အာတီ ဟဲ့ မုး၊ ဟဲ့ မှာန်။ အုဝ် တဝ်း ဒီ ဘေ၊ အန် မုး ဒူအီ အီ တာင် လွှိုမ် ဒူအီ အီ ဘျာန် ဂြုဝ်း ဇဝ်ဖြာ။ 10 လွင် ဒူအီ တီ န့ ဟဲ့ ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊ ‘အုဝ် ဒီ တိုယ် အာမူ အာမာတ် အုဝ်၊ တဲး အန် ယဲတ့် ဒီ အာတ့် မဲ။ အန် ဒီ မ့ပြာယ် န့တေန့် မဲ။’

11 အုဝ် တဝ်း အာခ်ု ဒီ ဘေ။ အူ ဆိန့် ဒေါ ဂုဝ် အန် ကော ဇမ် အာတိုဝ်၊ န့ တူ ဒွိုမ် မိုဝ်း ဒူအီ ခေါ အူ ဝီ အီ တာင် လွှိုမ် ဒါ ဆာရာ အာယောဟာန် အီ စိုပ် ဒူအီ ခဲင် အိုမ် တီ။ ဆေ န့ ယီ မုး ခဲင် မိူင် ပီ အိုပ် ဇဝ်ဖြာ၊ ဒူအီ အီ တူ မိုဝ်း ဒီခုဝ် မာဆေ၊ အန် ဟဲ့ တာင် လွှိုမ် အာယောဟာန် တီ။ 12 အူ ဆိန့် ဒေါ မာနုဝ် ဒါ ဆာရာ အာယောဟာန် တွိုန် ကော ဇမ် အာတိုဝ်၊ န့ မိုဝ်း ဒူအီ အီ ဆီ ကာဂုဝ်း မိူင် ပီ အိုပ် ဇဝ်ဖြာ။ ဂေ ဒူအီ အီ ကာဂုဝ်း ဒီ မိူင် ပီ အိုပ် ဇဝ်ဖြာ တီ၊ ဂေ တဝ်း ဒီ ခါနှာပ် ဒိုဝ်း တူတ့် ဒီ ဂေ ဒူအီ အီ ညှိုမ် ဇဝ်ဖြာ။ 13 အူ ဆိန့် ဒေါ ဂုဝ် အန် ကော ဇမ် စုဝ် အာယောဟာန်၊ ဘော ဒါ ဆာရာ အာမုဝ်ဆဲ အီ ဒဲမ် အုန် ဒါရာ ဇဝ်ဖြာ ဘော ဂေ ဒူအီ အီ ဘျာန် ဂြုဝ်း ဇဝ်ဖြာ၊ ဂေ ဒွန် အီ ဟဲ့ ကာလာင် ဒီ အာတ့် လွင် ဇဝ်ဖြာ ဒီ အိုပ် ကာဒါယ်။ 14 ဂေ မိူဝ် တဝ်း၊ ဒါ အာအေလီယ တွိုန် လုဝ် ဝီ တး လူင် ဒဲင် ကာဒါယ် အာတ့် တး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ဆေ ဘေ ညှိုမ် ဆီချာ ဂြုဝ်း ဂေ တီ၊ အုဝ် ဝီ တဝ်း ဒီ ဘေ၊ ဒါ ဆာရာ အာယောဟာန်၊ အန် ပီ ဒါ အာအေလီယ အီ ဟဲ့ ဟွတ့် တး။ 15 အာဆေ မိုဝ်း ဟျုဝ့် အီ နပ် ဒီ ထူမ်၊ တဲး အန် ထူမ် ဂြုဝ်း အုဝ် တီ။”

16 ဝါယ် အန် တီ ဇဝ် ယေဆူ ဝီ တဝ်း၊ “ဂေ ဒူအီ အီ ကွယ် ဇာတ် နီ၊ အုဝ် ဒီ လုဝ် ကာဂဝ် ဂေ ဒီ အာဆေ။း ဂေ ဘော ပီ အာဆေ။း ဂေ ပီ ဂွန် အီ ကွယ် ဒဲင် ဂြး၊ လာယ် ဒီလာဝ်၊ ကာလာင် ဒီ ဂိုက် ဂေ။ 17 ဂေ တဝ်း၊ ‘ဒေါ ဟဲ့ က်ု ယေ ဂြိုင် ဒီ ဘေ၊ ဘေ တူ ဂါ၊ တူ ဘူင် ပီ အိုင် ယေ။ ဒေါ ဟဲ့ ယာမ် ယေ၊ ဘေ တူ ကာဖြူမ် ဒီ ယာမ် ရိုမ် ဒူပ် ယေ။’

18 ပီ ဘူင် ဂေ ဂွန် တီ၊ န့ ပီ ပီ ဘူင် ဂေ အီ ဟဝ် ဒီ ဒါ ဆာရာ အာယောဟာန်။ အန် ဟဲ့ တး၊ တူ ဟူမ် တူ ဒျီင် ပီ ဂေ ဒူအီ ဟဝ်။ ဂေ ယီ တူ အိုင် ပီ ဘူင် အန် ပါယ် တီ။ ခုဝ်၊ ဂေ တဝ်း၊ အန် မိုဝ်း ကာနမ် လိုပ် ခဲင် ဒုဝ် ဘူင့် အန်။ 19 ပါယ် တီ န့ ဘော မုး ဝီ အီ ဟဲ့ ဘဲန် ဂွန် ဒူအီ။ ဘော အန် ဟဲ့ တး၊ ဘော ဟူမ် ဘော ဒျီင် ပီ ဒူအီ ဟဝ်။ ဂေ ယီ တဝ်း၊ ‘တဲး ဘေ ယွတ် ဒူအီ နီ။ အန် ဘော ဟူမ် တာင်၊ ဟူမ် ဖဲ၊ အန် မိူဝ် ဒျီင် ပဝ်း။ အန် ဘဲန် ဂိုက် ဂေ ဒူအီ အီ ဂဲပ် ရွိုန် စိုင် ဘော ဂေ ဒူအီ အီ မိုဝ်း မှာပ်။’ အန် ဘော ဘူင် မာဆေ၊ ဘေ တူ အိုင်။ ဆေ ဒူအီ ယီ မိုဝ်း အာငျာန် ပီ ဒွါ ဇဝ်ဖြာ၊ န့ ဒီ လိုဝ်း ဆီချာ လွင် ဟဲ့ မုး ဟဲ့ မှာန် ပီ စ်ု ဇဝ်ဖြာ ဂေ ဘူင်။”

20 ပန် တီ ဇဝ် ယေဆူ ဝီ အေး ဂေ ဒူအီ အီ ကွယ် ခဲင် မိူင် ဒူင် ဟာဝ် ဇဝ် ယေဆူ ဘူင် နာ မွှိုမ် အာမ် အီ ကိူန် ကာဆဝ်။ အန် အေး ဂေ ကူပ် တူ ဝဲန် ဂေ မှာပ် ဂေ၊ တူ ညှိုမ် ဂေ ဇဝ်ဖြာ။ 21 အန် တဝ်း၊ “ဘေ ဒူအီ အီ ကွယ် ခဲင် မိူင် ခုဝ်ရာဆိန် ဂါယ် မိူင် ဘေတ်ဆီဒါ၊ ဘေ ဒီ ဇမ် ဒုက် တာင်။ အီ မွှိုမ် အာမ် ကာဆဝ် ပဲ့ ဟဲ့ ဘူင် အုဝ် ခဲင် မိူင် ဘေ၊ အုဝ် တူ မိုဝ်း ဒီ ဘူင် ခဲင် မိူင် ထူရုဝ် ဂါယ် မိူင် ဆီဒူန် အီ ဟဲ့ ဟွတ့် လိုဝ် တွိုန်။ ဆေ အုဝ် ဟီ ဘူင် ဇိုဝ် တီ ခဲင် မိူင် ထူရုဝ် ဂါယ် မိူင် ဆီဒူန် တီ၊ ဂေ ဒူအီ အီ ကွယ် ခဲင် မိူင် တီ၊ ဂေ ဒီ ဘော စှိုပ် ခြိုင် စာန် ဘော ကွယ် ခဲင် ဘြဝ် ငဝ် အူ ဇေန့်၊ တဲး ဂေ ဘျ၊ ဂေ ဝဲန် နဝ်း ဘြိမ်၊ ဒိုဝ်း နဝ်း ကာမာယ်။ 22 အုဝ် ယီ တဝ်း ဒီ ဘေ၊ ဆေ န့ ဒီ ဇမ် ဆီငဲ ဒီ ဆုင်ဖျာတ် ဇဝ်ဖြာ အာမူ ဒွန် အီ၊ ဂေ ဒူအီ ခဲင် မိူင် ထူရုဝ် ဂါယ် မိူင် ဆီဒူန် တွိုန်၊ ဂေ တူ လုဝ် ခမ် မှာပ် ခဲ့ ပီ လုဝ် ခမ် ဘေ။ 23 ဘေ ဒူအီ အီ ကွယ် မိူင် ကာပေနာရိုမ်၊ ဘေ ထာင်၊ ဘေ ဒီ ပွိုန် ဒီ ဟုဝ့် ဂါင်ဟြာဝ်။း အာဝ် မုး ပါယ် တီ။ ဘေ ဒီ လုဝ် လူင် ခဲင် မိူင် မာရာန။ ဆေ ဂေ ဒူအီ အီ ကွယ် ခဲင် မိူင် ဆုဝ်ဒူမ် တွိုန် ဟီ ဒွိုမ် ယိုဝ် နာ မွှိုမ် အာမ် ကာဆဝ် ပဲ့ ဟဲ့ ယိုဝ် ဘေ၊ မိူင် ဆုဝ်ဒူမ် တွိုန် အာဝ် ကာပျာတ့်၊ န့ ဒီ ဘော မိုဝ်း ကော ဇမ် ဒေါ တီ နီ။ 24 အုဝ် ယီ တဝ်း ဒီ ဘေ၊ ဆေ ဇဝ်ဖြာ ဒီ ဆုင်ဖျာတ် မှာပ် ဒွန် အီ၊ ဘော ဂေ ဒူအီ ခဲင် မိူင် ဆုဝ်ဒူမ် တွိုန်၊ ဂေ တူ လုဝ် ခမ် ကိူန် မှာပ် ခဲ့ ပီ လုဝ် ခမ် ဘေ။”

25 ဝါယ် အန် တီ ဇဝ် ယေဆူ ဝီ ဆာခိုဝ် တဝ်း၊ “အိုယ် မဲ ဂုန့် အုဝ်၊ မဲ မုး ဒါ ကာညာ အီ အိုပ် ဘော ဂါင်ဟြာဝ် ဘော ကာဒါယ်။ အုဝ် အိူပ် မဲ ဇဝ်။ လွင် ပီ မာနုဝ် အုဝ် ဇိုဝ် တီ၊ မဲ တူ တဲး န့ လိုဝ်း ဒီ ဒါ တာင် ဘော ဒီ ဂေ ဒူအီ အီ မိုဝ်း အာငျာန်။ န့ ယီ မုး ဂေ ဒူအီ အီ ပီ ဂွန် ဒီတဲတ်၊ ဂေ နပ် ဆီချာ လွင် အန် တီ ကူပ် ဟဲ့ ဘျ မဲ၊ တဲး န့ လိုဝ်း ဒီ နဝ်း ဂေ။ 26 မဲ ဂုန့် အုဝ်၊ မဲ ဟဲ့ အိုင် ဒီ ဘူင် ပါယ် တီ။ ခုဝ်၊ အုဝ် အိူပ် မဲ။”

27 ဇဝ် ယေဆူ ဟဲ့ ဟွတ့် ဆာခိုဝ် ပါယ် တီ၊ အန် ဝီ တဝ်း ဒီ ဂေ အီ ကွယ် ဒူပ် အန်၊ “ဂုန့် အုဝ် ဟဲ့ အာပ် ဒွါ တူတ့် ဒွန် မျုဝ် ဒီ အုဝ်၊ တဲး အုဝ် ကော နပ် တူတ့်။ န့ မိူဝ် တူ မိုဝ်း အာဆေ အီ နပ် ဂွန် ဇဝ်ဖြာ။ န့ မုး မီ ဂုန့် အုဝ် အီ နပ် လွင် ဂွန် အန်။ န့ မိူဝ် တူ မိုဝ်း အာဆေ အီ နပ် ဇဝ်ဖြာ အီ မုး ဂုန့် အုဝ်။ န့ မုး မီ ဂွန် အန် အီ နပ် ဂုန့် အန်။ ဘော ဂေ ဒူအီ အီ ပွိုန် ယိုဝ် ဂြုဝ်း ပီ ကာလာင် ဂွန် ဇဝ်ဖြာ လွင် ဂုန့် အန်၊ ဘော ဂေ ဒီ နပ် ဇဝ်ဖြာ အီ မုး ဂုန့် အုဝ်။”

28 ပန် တီ ဇဝ် ယေဆူ ဝီ တဝ်း၊ “ဘေ ဒူအီ အီ ပီ ဒူအီ အီ ဟဲ့ နုန် ဒီ ဘူင် ဂါန်၊ ဘေ ဒူအီ အီ ပီ ဒူအီ အီ ဂွတ် ကြုဝ် စန်၊ တဲး ဘေ တး ဒူပ် အုဝ်။ အုဝ် ဒီ တဲး ဘေ ပီ ဒူအီ အီ ဒီလှဝ်၊ မိုဝ်း ဂျာမ်ဆာ။ 29 တဲး ဘေ ဒူပ် အုဝ်၊ ဟေန် အီ ဘွတ် ဒီ အုဝ်၊ တဲး န့ ပီ မာမက် စှိုပ် အဲ့မဝ် တဲး အန် လာက် လဝ်။ အုဝ် တူ စ်ု ဘေ ဘူင် စန်။ အုဝ် မိူဝ် မိုဝ်း နဝ်း နှိမ်။ ခုဝ်၊ ဆေ ဘေ ဒူပ် အုဝ်၊ န့ တဲး နဝ်း ဘေ ဒီလှဝ်။ 30 ဆေ ဘေ ဒူပ် အုဝ်၊ န့ ပီ အဲ့မဝ် ပီ စှိုပ် အီ ဒီ မာမက်။ ပီ စ်ု အုဝ်၊ န့ ငှိုယ် ဘူင်။ ဆေ ဘေ ဒူပ် အုဝ်၊ န့ ဘော ပီ အုဝ် ဒွါ ကြုဝ်၊ တဲး ဘေ ပး။ ကြုဝ် တီ၊ အန် န့စိုဝ်၊ အာဝ် စန်။”