1 ဆီငဲ တီ၊ ဇဝ် ယေဆူ ဝီ လေး ခဲင် ကာင် တွိုန်၊ ဝီ ဟာဝ် ဇမ် ခူပ် ဘာင် အိုမ်၊ ဝီ တုတ့် ဒီ တီ။ 2 န့ ယီ မိုဝ်း ဒူအီ ကိူန် ကာဆဝ် တး ကာဇု၊ ကွယ် ကော ရူပ် အန်။ ခုဝ်၊ အန် ဝီ လိုပ် တုတ့် ခဲင် ရိုဝ်၊ တဲး ဂေ ဒူအီ ကိူန် ကွယ် ဒီ ခူပ် အိုမ်။ 3 ဟဲ့ ဟွတ့်၊ အန် ဝီ ကာလာင် အူဖာမာ ဘဲန် မျုဝ် ဘဲန် မျုဝ် ဒီ ဂေ။ အန် တဝ်း၊ “န့ ဟဲ့ ဒွိုမ် မိုဝ်း ဒူအီ အူ ဝီ၊ အန် ဟာဝ် ဘြတ် ဆီမာ ငှုဝ်။ 4 ဒေါ ဘြတ် အန် ဆီမာ ငှုဝ် တွိုန်၊ ဆီမာ ငှုဝ် မင် ဘူင့် စုဝ်း ဒီ ခူပ် န့တေန့်။ မာဆိမ် ဘော တး ဇုဝ့် ဟူမ် အူ ဇေန့်။ 5 ဆီမာ ငှုဝ် မင် ဘူင့် ဘော စုဝ်း ဒဲင် မာဝ်၊ အီ မုး ကာဒါယ် ဒီဟြေဝ် နာ ဒဲင်။ န့ ဘော လတ့် အူ ဇေန့် ကူပ် ဒီဟြေဝ် ကာဒါယ်။ 6 ဆီငဲ ဟီ ဆောဒါတ်၊ န့ ဘော ကြဲ ဒီ ဟျီ့။ ခုဝ်၊ ရျီး အန် တူ ပွိုန် ဒီ ဟာဝ် ခဲင် ကာဒါယ်။ 7 ဆီမာ ငှုဝ် မင် ဘူင့် ဘော စုဝ်း ဒဲင် ကာဒါယ် အီ မိုဝ်း ဒဝ် မာအာတ့်။ ဒဝ် မာအာတ့် ယီ ကြဲ ဒီ တာင်၊ ဝီ ယာပ် ငှုဝ်၊ တူ တဲး န့ မိုဝ်း ကာယူင့် အန်။ 8 ဆီမာ ငှုဝ် မင် ဘူင့် ဘော စုဝ်း ဒဲင် ကာဒါယ် ဘွတ်၊ တဲး န့ ဘဲန် ငှုဝ် ကာမာယ် အီ လေး အူ မာယဝ်း ဘုန်၊ ဒဝ် ဂိုဝ် ဘုန် ဘော အူယ် ဂိုဝ် ဘုန်။ 9 အာဆေ မိုဝ်း ဟျုဝ့် အီ နပ် ဒီ ထူမ်၊ တဲး အန် ထူမ် ဂြုဝ်း အုဝ် နီ။”

10 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဂေ ဒီဘဲ အန် ဝီ တး ချြီ့ အန်။ ဂေ ဝီ ဒီမွှတ် အန် တဝ်း၊ “ဒေါ မာနုဝ် မဲ ဂေ ဒူအီ ကိူန်၊ မှဝ် န့ ပါယ် ပီ ကာလာင် မဲ ဂြုဝ်း အူဖာမာ ဒီ ဂေ။း”

11 ဇဝ် ယေဆူ ဝီ တဝ်း၊ “အုဝ် ဟဲ့ တဲး ဘေ နပ် ဆီချာ လွင် အာခြာဝ် ပီ ဒီ အိုပ် ဇဝ်ဖြာ ကာဒါယ် နီ။ ပီ တူ ဒွိုမ် နပ် အာဆေ၊ အုဝ် ဟဲ့ တဲး ဘေ နပ်။ အာဝ် မုး ဂေ ဒူအီ ကိူန် အီ ဒီ နပ် လွင် အန် တီ။ 12 အာဆေ ဆီ နပ် ဆီချာ လွင် ဇဝ်ဖြာ၊ အန် ဒီ ဘော ကြဲ ဒီ နပ် ကာပွါ၊ တဲး အန် ပီ ဒူအီ အီ ပွိုန် ကိူန် ကာဆဝ် ကြုဝ် အန်။ အာဆေ ယီ တူ မိုဝ်း နဝ်း ဆီ နပ် လွင် ဇဝ်ဖြာ၊ အန် ဒီ ဘော ပိဝ် တူတ့် ဒွန် မျုဝ် ပီ ဒွိုမ် ထူမ် အန် လွင် အန် တီ၊ တဲး န့ ပီ၊ အီ ဟဝ် ဒီ တး ဒိုဝ်း ဝဲန် ကြုဝ်ကြာမ် အန်။ 13 ခုဝ်၊ အုဝ် ကာလာင် ဒီ ဒူအီ ကိူန်၊ တဲး န့ ဘဲန် အူဖာမာ။ ပါယ် တီ ဂေ ဟဲ့ ပွိုန် ယိုဝ်၊ ယီ တူ လိုဝ်း ဆီချာ ဒီ ဂေ။ ဂေ ဘော ပွိုန် ထူမ် ဂြုဝ်း၊ ယီ တူ ကာလှုး ဒီ နဝ်း ဂေ။

14 လွင် ဂေ ဒူအီ ဇိုဝ် တီ အာအီဆာယ တွိုန် ဟဲ့ ဒွိုမ် ဒဲမ် အုန် တဝ်း၊ ‘ဘေ ဒီ ဘော ထူမ် ဆေဆေ၊ န့ ယီ တူ လိုဝ်း ဒီ နဝ်း ဘေ ဒေါ မှဝ်။ ဘေ ဒီ ဘော ယွတ် ဆေဆေ၊ ယီ တူ ယိုဝ် ဆီချာ ဒေါ မှဝ်။ 15 ခုဝ်၊ နဝ်း ဂေ ဒူအီ တီ ဟဲ့ ဒိူဝ်၊ တူ နပ် ဒီ ဘျွင်။ ဟျုဝ့် ဂေ တူ ဘော နပ် ဒီ ထူမ်။ ဂေ ဘော ကာဘိတ် ငါယ် ဂေ၊ တူ တဲး ဂေ ယိုဝ်။ ဆေ ဂေ တူ ဘူင် ပါယ် တီ၊ န့ ဒီ ဘော လိုဝ်း ဒီ ငါယ် ဂေ။ ဂေ ဒီ ဘော ပွိုန် ဒီ ထူမ်၊ တဲး န့ ဆီဘြုဝ်း။ ဟဲ့ ဟွတ့်၊ န့ ဒီ ဘော လိုပ် ခဲင် နဝ်း ဂေ၊ တဲး ဂေ ဘျွင် နဝ်း ဂေ။ ဆေ ဂေ ဘူင် ပါယ် တီ၊ အုဝ် ဒီ ဘော ဘ့လွာ့ ဝဲန် မှာပ် ဂေ၊ တဲး န့ ပီ ဒူအီ ဆဝ် ဟဲ့ ကဲန်။’ ခဲ့ တီ ဟဲ့ ဒဲမ် အုန် ခဲင် ဘပ် ဇဝ်ဖြာ။

16 အီ မုး ဘေ၊ ဘေ ဟဲ့ ဒါခိုယ်။ ခုဝ်၊ ငါယ် ဘေ ဟဲ့ ပွိုန် ယိုဝ်။ ဟျုဝ့် ဘေ ဟဲ့ နပ် ဒီ ထူမ်၊ တဲး န့ ကော လိုပ် ခဲင် နဝ်း။ 17 အုဝ် တဝ်း အာခ်ု ဒီ ဘေ၊ ခါ အာတ့် ဟဲ့ ဒွိုမ် မိုဝ်း ဒူအီ အီ ဘျာန် ဂြုဝ်း ဇဝ်ဖြာ ဘော ဂေ ဒူအီ အီ မိုဝ်း နဝ်း မှာန်၊ ဂေ ကိူန် ဆီ ယိုဝ် ပီ ပွိုန် ယိုဝ် ဘေ ဒေါ တီ နီ။ ဂေ ယီ တူ ပွိုန် ယိုဝ်။ ဂေ ဘော ဆီ ထူမ် ဂြုဝ်း ပီ ထူမ် ဘေ ဒေါ တီ နီ။ ဂေ ယီ တူ ပွိုန် ဒီ ထူမ် ဂြုဝ်း ဇိုဝ် တီ။

18 တဲး ဘေ ဝီ ထူမ် လွင် ဒါင် အူဖာမာ ပဲ့ ဟဲ့ ခဲ အုဝ် လွင် ဒူအီ ဘြတ် ဆီမာ ငှုဝ်။ 19 ဆေ န့ မိုဝ်း ဒူအီ ထူမ် ဂြုဝ်း လွင် ဇဝ်ဖြာ ဒီ အိုပ် ကာဒါယ်၊ န့ ယီ တူ ကာလှုး ဒီ နဝ်း အန်၊ ကာနမ် ဟာယ် ဝီ တး၊ ဝီ ဒိုဝ်း ဝဲန် တူတ့် အီ ဟဲ့ လိုပ် ခဲင် နဝ်း အန်။ အာတီ၊ န့ ပီ ဆီမာ ငှုဝ် အီ စုဝ်း ခူပ် န့တေန့်။ 20 ဆီမာ ငှုဝ် အီ စုဝ်း ဒဲင် မာဝ် အီ မိုဝ်း ကာဒါယ် ဒီဟြေဝ် နာ ဒဲင်၊ န့ ပီ ဒူအီ အီ ထူမ် ဂြုဝ်း ဇဝ်ဖြာ။ ဟဲ့ ဟွတ့်၊ အန် ဘော ဒါခိုယ် ဒီ တဲး ဂြုဝ်း ဇဝ်ဖြာ လိုပ် ခဲင် နဝ်း။ 21 ကူပ် ဒီဟြေဝ် ကာဒါယ်၊ ရျီး ငှုဝ် တူ အး။ န့ ပွိုန် ကွယ် အူ ကာစန်။ န့ ပီ၊ ဒူအီ အီ ထူမ် ဝီ ကာဒုး ဒုက် ကူပ် ညှိုမ် အန် ဂြုဝ်း ဇဝ်ဖြာ တီ။ ခုဝ်၊ အန် ဝီ ဝဲန် ဂြုဝ်း တီ၊ အာဝ် ဟူ ညှိုမ်။ 22 ဆီမာ ငှုဝ် အီ စုဝ်း ဒဲင် ကာဒါယ် အီ မိုဝ်း ဒဝ် မာအာတ့်၊ န့ ပီ ဒူအီ အီ ထူမ် ဂြုဝ်း ဇဝ်ဖြာ။ ဟဲ့ ဟွတ့်၊ အန် ဝီ မိုဝ်း နဝ်း ကာဟွာ့ လွင် ပီ ဒီ လုဝ် အန်၊ ပီ ဒီ ဟူမ် ပီ ဒီ တာ အန်။ အန် ဒီ ဘော ကာဖာ ကာလိုပ်။ အန် ထာင်၊ ဆေ အန် ဂျုဝ်ဂျာ ဒီ ဘူင် ဘဲန် မျုဝ် ဘဲန် မျုဝ် အီ တဲး အန် ခြမ်၊ န့ ဒီ ဘဲန် နဝ်း ဒါခိုယ် ဒီ အန်။ ပီ ဘူင် အန် ဇိုဝ် တီ၊ န့ တူ တဲး ဂြုဝ်း ဇဝ်ဖြာ ကွယ် ခဲင် နဝ်း အန်၊ တူ ဘဲန် အာဂျိုဝ် ဒီ အန်။ 23 အာဆေ အီ ပီ ဆီမာ ငှုဝ် အီ စုဝ်း ဒဲင် ကာဒါယ် ဘွတ်၊ အန် မုး ဒူအီ အီ ထူမ် ဂြုဝ်း ဇဝ်ဖြာ၊ တဲး န့ ကော ကာလှုး ဆီချာ ဒီ နဝ်း အန်။ ဟဲ့ ဟွတ့်၊ ဂြုဝ်း တီ ဝီ ဘဲန် အာဂျိုဝ် အီ ပီ ဆီမာ ငှုဝ် အီ မိုဝ်း ဂဝ် အန် အူ မာယဝ်း ဘုန်၊ ဒဝ် ဂိုဝ် ဘုန် ဂေ အူယ် ဂိုဝ် ဘုန်။” ခဲ့ တီ ဇဝ် ယေဆူ ခဲ လွင် အာဘိုမ် တီ။

24 ဇဝ် ယေဆူ ဟဲ့ ဟွတ့် ကာလာင် လွင် ဆီမာ ငှုဝ်၊ အန် ဝီ ကာလာင် အူဖာမာ ပေါ အူ မျုဝ်။ အန် တဝ်း၊ “မိူင် ပီ အိုပ် ဇဝ်ဖြာ၊ န့ ပီ ဒူအီ အူ ဝီ အီ ဘြတ် ဆီမာ ငှုဝ် အီ မွှိုမ် ခဲင် ဒူင် နာ အန်။ 25 အန် ဟဲ့ ဟွတ့် ဘူင် ပါယ် တီ၊ ခဲင် မှိုဝ် ဒေါ ဟဲ့ အိတ် ယေန် ဒွန် အီ၊ န့ ယီ မိုဝ်း ရန်ဆူ အန်၊ ဝီ တး ဘြတ် ဆီမာ ပေတ့် ကာတဲ ငှုဝ် အီ မွှိုမ်။ အန် ဟဲ့ ဟွတ့် ဘူင် ပါယ် တီ၊ အန် ဝီ ဝေန့် ဒူင် ကွယ် အန်။ 26 ငှုဝ် ယီ လတ့် ဝီ မိုဝ်း ကာယူင့် အန်။ ဒေါ အန် တီ ဘော ပေတ့် ဟဲ့ လတ့်။ 27 ယီ မိုဝ်း မှာယ် ဒါ ကာညာ ဒူင် နာ တွိုန်။ ဂေ ဝီ တး ဒူင် ကွယ် အန် ဝီ တဝ်း၊ ‘အိုယ် ဒါ၊ ယေ ထာင် မဲ ဟဲ့ ဘြတ် ဆီမာ ငှုဝ် အီ မွှိုမ်။ ဒေါ တီ နီ ယီ မိုဝ်း ပေတ့် အီ လတ့်။ ပေတ့် တီ တး နာ မှဝ်။း’ 28 အန် ဝီ တဝ်း၊ ‘ရန်ဆူ အေ ဟဲ့ ဘြတ် ပေတ့် တီ။’ ဟဲ့ ဟွတ့်၊ မှာယ် ဝီ ဒီမွှတ် တဝ်း၊ ‘မဲ ဆီ တဲး ယေ ဟာဝ် ရန့် ပေတ့် တီ။း’ 29 အန် ဝီ တဝ်း၊ ‘ကွဲ့ ဘူင် မာဆေ။ ခုဝ်၊ ဆေ ဘေ ဟာဝ် ရန့် ပေတ့် ဒေါ တီ နီ၊ ဘေ ဒီ ဘော ရိုတ့် လေး ဘော ပေတ့် ဘော ငှုဝ်။ 30 တဲး ဘေ တဲး ဘော အာ မျုဝ် ကွယ်၊ တဲး န့ ကော ဇမ် အာခြာဝ် ဒီ ဆုဝ့် ငှုဝ်။ ဟီ ဇမ် အာခြာဝ် ဆုဝ့် ငှုဝ်၊ တဲး ဘေ စ်ု ဒူအီ ဆုဝ့် ငှုဝ်၊ တဲး ဂေ ကာယဝ်း ငှုဝ် ဂါယ် ပေတ့်၊ တဲး ဂေ ပက် ကာဇု မ့ပူင့် ပေတ့်၊ ဝီ ဒုဝ့် ခဲင် ငဝ်။ ဟဲ့ ဟွတ့်၊ အီ မုး ငှုဝ်၊ တဲး ဂေ ဝီ ကာဇု အုန် ခဲင် ဂြွာ အုဝ်။’”

31 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ ခဲ အူဖာမာ ပေါ အူ မျုဝ်။ အန် တဝ်း၊ “မိူင် ပီ အိုပ် ဇဝ်ဖြာ၊ န့ ပီ ကာအာင် ဒဝ် ဆျီမ် အူ မျုဝ်။ ဒူအီ အူ ဝီ ဒိုဝ်း ကာအာင် တီ၊ ဝီ ဟာဝ် ဆမ် ခဲင် မာန် အန်။ 32 ဒေါ ဆမ် ဒူအီ ကာအာင် ဒဝ် ဆျီမ် တီ၊ န့ ဒီတဲတ် လွှိုမ် ဆီမာ ကာအာင် မျုဝ် ဟဝ်။ ဆေ အန် ဟီ လတ့်၊ ဟီ တာင်၊ န့ ဒီ ဝီ ဘဲန် ဒဝ် အီ တာင် လွှိုမ် ဒဝ် ဒွန် မျုဝ်။ န့ ဝီ ဘဲန် ယွုန်၊ တဲး မာဆိမ် ပွိုန် ဒီ တး ဒီလှဝ် ဒဲင် ရာ အန်။”

33 ဇဝ် ယေဆူ ဟဲ့ ဟွတ့် ကာလာင် လွင် အန် တီ၊ အန် ဝီ ခဲ အူဖာမာ ပေါ အူ မျုဝ်။ အန် တဝ်း၊ “မိူင် ပီ အိုပ် ဇဝ်ဖြာ၊ န့ ဘော ပီ ဆီနမ် ဘြး ခါမုန်။ န့ ပီ၊ အီဘိုန့် အူ ဝီ ဒိုဝ်း ဆီနမ် ဘြး ခါမုန် တီ၊ ဝီ ကာဝ်ု ခဲင် ကာပဲ့ ခဝ်ချုင် အူယ် ဆီလယ့်။ အန် ဝီ ကာဝ်ု တဲး န့ ကော ပြာင် ကော ဘြး တူတ့် ကာပဲ့ တီ။”

34 ပါယ် တီ ပီ ကာလာင် ဇဝ် ယေဆူ ဒွန် မျုဝ်၊ န့ ဘဲန် တူတ့် အူဖာမာ။ အန် တူ တဝ်း မာဆေ အီ မုး ဂြုဝ်း ဆိူဝ်။ 35 ပီ ကာလာင် ဇဝ် ယေဆူ၊ န့ ဟဲ့ ဘဲန် တူတ့် ပီ ပဲ့ ဟဲ့ ဒွိုမ် ကာလာင် ဒူအီ အီ ဘျာန် ဂြုဝ်း ဇဝ်ဖြာ လွင် ဇဝ် ယေဆူ။ န့ တဝ်း၊ “အုဝ် ဒီ ကာလာင် ဂြုဝ်း ဒီ ဒူအီ၊ တဲး န့ ဘဲန် အူဖာမာ။ ပါယ် တီ အုဝ် ဒီ ကာလာင် လွင် ပီ တူ ဒွိုမ် နပ် ဒူအီ အူ ဆိန့် ဒေါ ဘူင် ဘ့လေး ဇဝ်ဖြာ ကာဒါယ် နီ။”

36 ဇဝ် ယေဆူ ဟဲ့ ဟွတ့် ကာလာင် အူဖာမာ ဘဲန် မျုဝ် ဘဲန် မျုဝ်၊ အန် ဝီ လေး ဒူင် ကွယ် ဂေ ဒူအီ ကိူန်၊ ဝီ ဟာဝ် လိုပ် ခဲင် ကာင်။ ဒေါ အန် တီ ဒီဘဲ အန် ဝီ တး ကာလာင် ဂြုဝ်း ဒီ အန်။ ဂေ တဝ်း၊ “တဲး မဲ ကာလာင် ဒီ ယေ လွင် ဒါင် အူဖာမာ၊ တဲး န့ ကာလှုး ဆီချာ ဒီ နဝ်း ယေ လွင် ပေတ့် အီ လတ့် ကာတဲ ငှုဝ်။”

37 ဇဝ် ယေဆူ ဝီ တဝ်း၊ “ဒူအီ အီ ဘြတ် ဆီမာ ငှုဝ် အီ မွှိုမ်၊ အန် ပီ အုဝ်၊ အီ ဟဲ့ ဘဲန် ဂွန် ဒူအီ။ 38 ကာဒါယ် ဒူင် ဘြတ် အန် ငှုဝ် တီ၊ န့ ပီ ဒွန် နာ ဒွန် ပ့လုဝ့် ဒဲင် ကာဒါယ် နီ။ ဆီမာ ငှုဝ် အီ မွှိုမ်၊ န့ ပီ ဂေ ဒူအီ အီ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။ ပေတ့် တီ ယီ ပီ ဂေ ဒူအီ အီ ဒူပ် ကာနမ် ဟာယ်။ 39 ရန်ဆူ အီ တး ဘြတ် ပေတ့် တွိုန်၊ အန် ပီ ဘုဝ် အီ အိုပ် ဂေ ကာနမ် ဟာယ်။ အာခြာဝ် ဒီ ဆုဝ့် ဂေ ငှုဝ် တီ၊ န့ ပီ အာခြာဝ် ဒီ တူတ့် ဇာတ် နီ။ ဂေ ဒူအီ အီ ဆုဝ့် ငှုဝ်၊ ဂေ ပီ အာမူ အာမာတ် ဇဝ်ဖြာ။

40 ဒေါ ဇမ် အာခြာဝ် ဒီ တူတ့် ဇာတ် နီ၊ န့ ဒီ ပီ၊ ဂေ ကာဇု ပေတ့် တွိုန်၊ ဝီ ဒုဝ့် ခဲင် ငဝ်။ 41 ဒေါ အန် တီ အုဝ် အီ ဟဲ့ ဘဲန် ဂွန် ဒူအီ၊ အုဝ် ဒီ စ်ု အာမူ အာမာတ် အုဝ်၊ တဲး ဂေ ဟာဝ် ကာယဝ်း နာ မွှိုမ် ဘော နာ တူ မွှိုမ်၊ ကွဲ့ တဲး နာ တူ မွှိုမ် မိုဝ်း ခဲင် မိူင် ပီ အိုပ် ဇဝ်ဖြာ။ ဘော ဒွန် မျုဝ် အီ တဲး ဒူအီ ဘူင် မှာပ်၊ ဘော ဒွန် အီ အီ ဘူင် နာ တူ မွှိုမ်၊ အာဝ် ပွိုန် ကွယ် ခဲင် မိူင် ပီ အိုပ် ဇဝ်ဖြာ။ န့ ပီ ဂေ ဒူအီ ဆုဝ့် ငှုဝ်၊ ဂေ ဒီ ဒိုဝ်း ဝဲန် ပေတ့်။ 42 အာမူ အာမာတ် အုဝ်၊ ဂေ ဒီ ဒိုဝ်း ဒူအီ တူ မွှိုမ် ဇိုဝ် တီ၊ ဘူင် တဲး ဂေ စုဝ်း ခဲင် ငဝ်၊ တဲး ဂေ ဘော ယာမ် တာင်၊ တဲး ကုင်ကာပ် ဂေ ကော ကာဒွယ် ကူပ် ယုဝ် ဂေ။ 43 ဒေါ အန် တီ န့ ယီ မိုဝ်း ဂေ ဒူအီ အီ ဟဲ့ ဘူင် နာ မှာန် ဆေဆေ၊ ဂေ ဒီ မိုဝ်း အာဖုင်၊ မိုဝ်း ဆာရေ ခဲင် မိူင် ပီ အိုပ် ဇဝ်ဖြာ၊ အီ မုး ဂုန့် ဂေ။ အာဖုင် ဆာရေ ဂေ တီ န့ ဒီ ပီ ဆီငဲ အီ ဘ့လာင် ကာဆဝ်။ အာဆေ နပ် ဒီ ထူမ်၊ တဲး အန် ထူမ် ဂြုဝ်း နီ။” ခဲ့ တီ ဇဝ် ယေဆူ ကာလာင် လွင် ဒါင် အူဖာမာ အန်။

44 ဝါယ် အန် တီ ဇဝ် ယေဆူ ဝီ တဝ်း၊ “မိူင် ပီ အိုပ် ဇဝ်ဖြာ၊ န့ ပီ ကြုဝ်ကြာမ် အီ ငဝ်း ကာဆဝ် အီ ပီ ပီ ဒိပ် ဒူအီ ခဲင် မာန်၊ ကွဲ့ တဲး အီ ယိုဝ်။ န့ ယီ မိုဝ်း ဒူအီ အူ ဝီ၊ အန် ဝီ ကာဒုး ကြုဝ် တီ။ အန် ဝီ ချြီင် ဆီချာ၊ ကွဲ့ တဲး အာဆေ ယိုဝ်။ ဟဲ့ ဟွတ့်၊ နဝ်း အန် ကော ခူယ် ကာဆဝ်။ အန် ဝီ ဝေန့် ယွင့် တူတ့် ကြုဝ် အန် ဒွန် မျုဝ်၊ ဝီ ဟာဝ် စိုဝ်း မာန် တွိုန်၊ တဲး ဘော ကြုဝ်ကြာမ် တွိုန် ဘဲန် ကြုဝ် အန်။

45 မိူင် ပီ အိုပ် ဇဝ်ဖြာ န့ ဘော ပီ ဒူအီ အူ ဝီ အီ တဝ်း ဒီ စိုဝ်း ပွိုန် မာဟွယ် အီ ဘွတ်။ 46 အန် ဘော ယိုဝ် ပွိုန် မာဟွယ် အီ ငဝ်း ကာဆဝ်၊ အန် ဟာဝ် ယွင့် တူတ့် ဒွန် မျုဝ် အီ မုး ကြုဝ်ကြာမ် အန်၊ ဝီ စိုဝ်း ပွိုန် မာဟွယ် တီ။”

47 ပန် တီ ဇဝ် ယေဆူ ခဲ အူဖာမာ ပေါ အူ မျုဝ်။ အန် တဝ်း၊ “မိူင် ပီ အိုပ် ဇဝ်ဖြာ၊ န့ ပီ န့ရပ်။ ဂေ ဟီ ဘျွာ န့ရပ် တီ ခဲင် အိုမ်၊ မာဂါ ပီ ပွိုန် ဂေ ဘော မိုဝ်း ဘဲန် မျုဝ် ဘဲန် မျုဝ် ကော နုဝ့် နာ ခဲင်။ 48 ဟဲ့ ဟွတ့် ဂေ ဒူအီ မှေတ့် မာဂါ တွိုန်၊ ဂေ ဝီ ဒိူတ် လေး န့ရပ် ခဲင် အိုမ်၊ တဲး မာဂါ ကော ဇမ် ဒီ ခူပ် အိုမ်။ ဂေ ဝီ ရဝ်း မာဂါ အီ ဆီချာ၊ ဝီ ဟပ် ကာဇု အုန် ခဲင် ခွန်။ မာဂါ အီ တူ မွှိုမ်၊ ဂေ ယီ ဝဲန်။ 49 ဆေ ဇာတ် နီ ဟီ ဒီ တူတ့်၊ ဂေ အာမူ အာမာတ် ဇဝ်ဖြာ၊ ဂေ ဒီ ဘော ဘူင် ပါယ် တီ။ ဂေ ဒီ တး ကာယဝ်း ဂေ ဒူအီ ဟာယ် ဘော ဂေ ဒူအီ အီ မိုဝ်း နဝ်း ဆိူဝ် နဝ်း မှာန်။ 50 ဂေ ဒီ ဘော ဝဲန် ဒူအီ ဟာယ်၊ တဲး ဂေ ကွယ် ခဲင် ငဝ်။ ခဲင် ငဝ် တီ ဂေ ဒီ ယာမ် တာင်။ ကုင်ကာပ် ဂေ ဒီ ဘော ကာဒွယ် ကူပ် ယုဝ် ကာဆဝ် ဂေ။”

51 ဇဝ် ယေဆူ ဟဲ့ ဟွတ့် ကာလာင် အူဖာမာ ဇိုဝ် တီ ဒွန် မျုဝ်၊ အန် ဝီ ဒီမွှတ် ဂေ ဒီဘဲ အန် တဝ်း၊ “ဘေ ဟဲ့ နပ် လွင် ဒါင် အူဖာမာ တီ ဒွန် မျုဝ်။း” ဂေ ဝီ တဝ်း၊ “ဟဲ့ နပ်။”

52 ပန် တီ အန် ဝီ ခဲ အူဖာမာ ပေါ အူ မျုဝ်။ အန် တဝ်း၊ “ဆေ န့ မုး ဒူအီ အီ မာနုဝ် ဒါရာ ဇဝ်ဖြာ၊ ဆေ အန် ဟဲ့ ဟွတ့် ဟေန် လွင် ပီ ပါယ် ခဲင် မိူင် ပီ အိုပ် ဇဝ်ဖြာ၊ အန် ပီ ဒါ ကာညာ ကာင်။ ဒါ ကာညာ ကာင် နပ် ဒီ အုန် ကြုဝ်ကြာမ် ဘဲန် မျုဝ် ဘဲန် မျုဝ် ခဲင် ကာင် အန်။ ပါယ် တီ၊ ဘော မုး ကြုဝ် အီ ဘြိမ် ဘော ကြုဝ် အီ ကာမာယ်၊ အန် ဟဲ့ ပွိုန် ဝီ ဒိုဝ်း လေး ဒွါ ဒီ အီ။” ခဲ့ တီ ဇဝ် ယေဆူ ကာလာင် ဒီ ဒီဘဲ အန်။

53 ဇဝ် ယေဆူ ဟဲ့ ဟွတ့် ခဲ အူဖာမာ ဇိုဝ် တီ ဒွန် မျုဝ်၊ အန် ဝီ လေး ဒူင် ကွယ် အန် တွိုန်။ 54 အန် ဝီ ဟာဝ် ဇမ် မိူင် ဘြိမ် အန်။ အန် ဝီ ဟာဝ် လိုပ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ၊ ဝီ မာနုဝ် လွင် ဇဝ်ဖြာ။ ဂေ ဒူအီ အီ ထူမ် ဂြုဝ်း အန်၊ ဂေ အာမ် ကာဆဝ်။ ဂေ တဝ်း၊ 55 “မှဝ် အန် ပါယ် ဒီ ပွိုန် အာငျာန် ဇိုဝ် တီ။း ပွုန် အာဆေ န့ မုး၊ အီ တဲး အန် ဘူင် နာ မွှိုမ် အာမ် ကာဆဝ်။း” ဂေ ဘော တဝ်း၊ “အန် မုး ဂွန် ဒါ လက်ဆာမာ။ မာ အန် မုး နာင် မာရီ။ ဝါ အန် ဂေ ဘော မုး အာယာကူပ်၊ အာယုဝ်ဆေ၊ အာဆီမူန် ဘော အာယူဒတ်။ 56 ဘော ဝါ အန် အီ မုး အီဘိုန့်၊ ဂေ ကွယ် ရိုမ် ဒူပ် ယေ။ မှဝ် န့ ပါယ် ပီ နပ် အန် အာငျာန် ဇိုဝ် တီ ဒွန် မျုဝ်။း အာဆေ ဟဲ့ မာနုဝ် အန်။း” 57 ခုဝ်၊ ဂေ တူ ရုဝ်ဆေ အန်။ ဇဝ် ယေဆူ ယီ တဝ်း ဒီ ဂေ၊ “ဆေ န့ မုး ဒူအီ အီ ဘျာန် ဂြုဝ်း ဇဝ်ဖြာ၊ ဂေ ဒီ ရုဝ်ဆေ အန် ဒွန် နာ ဒွန် ပ့လုဝ့်။ န့ ယီ မုး ဂေ အီ ကွယ် ခဲင် မိူင် ဘြိမ် အန်၊ မီ ဂေ တူ ရုဝ်ဆေ အန်။” 58 ကူပ် တူ ညှိုမ် ဂေ၊ အန် တူ ကူပ် ဘူင် နာ မွှိုမ် အာမ် ကာဆဝ် ဒီ တီ။