ကွဲ့ ပီဖုင် မဲ လွင် ပီ ခြာမ် မဲ ဒီ ဘူင် ခဲညှာ။ ခုဝ်၊ မဲ တူ နပ်၊ ခဲညှာ န့ ဒီ ပါယ် မှဝ်။

2 တဲး အီ ဟဝ် အိူပ် မဲ။ တဲး ဒူအီ အီ ယဲတ့် မဲ အိူပ် မဲ။ အာဝ် လုဝ် အိူပ် ဒုဝ် ဘြိမ် မဲ ဒေါ မှဝ်။

3 ဆေ မဲ ကာဒုး ဒီ ခမ် အာဖေ အာရေ ပီ ဘူင် ဒူအီ ရိုဝ် ဒီ မဲ၊ န့ စန် လွှိုမ် မာဝ် ဂေ ကာဟာတ့်။

4 နဝ်း ရူ ဘော နဝ်း ဒေါဆ၊ န့ ဘော မုး အီ ဟာယ် ကာဆဝ်။ မာလဲ၊ ဆေ ဒူအီ ယီ လှယ့် အီ ဟဝ် အာဝ် မိုဝ်း အီ ပွိုန် ခမ်။

5 ဆေ လာယ် မာနုဝ်၊ လာယ် တဝ်း ဂြုဝ်း ဆိူဝ် နာ၊ န့ မွှိုမ် လွှိုမ် လာယ် ရွက့် ချြီင်။

6 ဆေ ဂိုက် မဲ ကာလာင် ဂြုဝ်း ဆိူဝ် ဒီ မဲ၊ မဲ ပွိုန် ညှိုမ် အန်။ မာလဲ၊ ဆေ ရန်ဆူ မဲ တး ဂင်ဂုဝ် ဒီ မဲ၊ တဲး မဲ ဆာဒိက်။

7 ဒူအီ အီ ဟဲ့ ဟွတ့် ဟူမ် ဖဲ၊ န့ ပီ ဘော မုး ငါမ် မာဖျီန် မိူဝ်၊ အန် ဟဲ့ ပိုဝ်။ ဒူအီ အီ ကာပြာန့်၊ န့ ပီ ဘော ဆွင့် မိူဝ်၊ န့ ဆီငဲး ဒီ အန်။

8 ဒူအီ အီ လေး တဝ် တ ကာင် အန်၊ အန် ဘော ပီ မာဆိမ် အီ ဝဲန် ကာဟုန် အန်။

9 နာမန် အုး ငှုန် ဘော န့ကြိုဝ်း အုး ငှုန် ဒီ တဲး နဝ်း ဒူအီ ဒါခိုယ်။ ဘော အာကျာမ် အာငျာန် ပီ ဒွါ ဂိုက် မဲ ဒီ မဲ၊ တဲး မဲ ဒါခိုယ် ပါယ် တီ။

10 မဲ ကွဲ့ ဝဲန် ဂိုက် မဲ ဘော ဂိုက် ဂုန့် မဲ။ ဒေါ ဇမ် မဲ ဒုက် ဘော မိုဝ်း အာဖေ အာရေ၊ ကွဲ့ မှာန့် ဘီနွင် မဲ တး စွယ် မဲ။ ဂေ အီ ကွယ် ကာတတ် မဲ၊ ဂေ ဒီ ပွိုန် စွယ် မဲ လွှိုမ် ဘီနွင် မဲ အီ ကွယ် တူင့်။

11 အိုယ် ဂွန် ကာညူမ် အုဝ်၊ တဲး မဲ မိုဝ်း အာငျာန်။ ဆေ မဲ မိုဝ်း အာငျာန်၊ န့ တဲး နဝ်း အုဝ် ဒါခိုယ် ကာဆဝ်။ န့ တဲး အုဝ် ပွိုန် ဒီ ဝျီ့ ဂြုဝ်း ဂေ အီ နဲန အုဝ်။

12 ဒူအီ အီ မိုဝ်း အာငျာန်၊ အန် နပ် ပန် ဒီ မိုဝ်း အာဖေ အာရေ။ အန် ဘော နပ် ဒီ ဝး။ အီ မုး ဒူအီ ရိုဝ်၊ အန် ယီ တူ ကာဖာ ဘော ဟာဝ်၊ တဲး အန် ကော ဇမ် ခဲင် ဒုက်။

13 ဆေ ဒူအီ ဟဲ့ ရိုဝ်၊ ဟဲ့ ကီခမ် ဒါင် အီ ဟဝ်၊ အီ မုး ဒူအီ ပီ တူ နပ် အန်၊ ဆေ အန် ဆီ ဝီ ကာရဝ်း ဒီ မဲ၊ တဲး မဲ ဒိုဝ်း အုန် ကြုဝ် အန်၊ တဲး န့ ဘဲန် ကြုဝ် ကမ် အန်။

14 ဆေ မဲ ဟာဝ် ဘျိတ့် ဂိုက် မဲ ဆိန့်ဝး စေဝ်၊ မဲ ပီ ဘော ကာလာင် ဂြုဝ်း တာင်၊ ဂြုဝ်း မွှိုမ် ဒီ အန် မိူဝ်၊ အန် ဒီ ဝီ တဝ်း န့ မုး ဂြုဝ်း ဒိူင် ဂြုဝ်း အေး။

15 ဆေ အီဘိုန့် ဆီမာ ပိုန့်၊ န့ ဘော ပီ ဂ့လာယ် အီ ရွတ့် စုဝ်း ပွက့် ပွက့် အာခြာဝ် ဂ့လာယ်။

16 မဲ မိူဝ် တူ နပ် ပီ ဒီ ပါယ်၊ တဲး အန် စူ။ န့ ဘော ပီ ခုန်၊ အီ တူ ပွိုန် ခြွင့် ဘော နာမန် အီ တူ ပွိုန် ပါ။

17 ဟိန် လုဝ် လာ့ ဒီ ဟိန် တဲး အန် လမ် ဆီချာ။ ပါယ် တီ၊ ဒူအီ ဘော လုဝ် အူ ဂိုက်၊ တဲး ဂါယ် လာယ် မာနုဝ်၊ တဲး ဂါယ် လွှက့်။

18 ဒူအီ အီ လိုမ်လာ ဟေ ဘ့လေ ဒီပူ၊ အန် ဒီ ပွိုန် ဒီ ဟူမ် ဘ့လေ အန်။ ပါယ် တီ ဘော ဒူအီ အီ ဘူင် ဂါန် ဒါ ကာညာ အန်၊ အန် ဒီ မိုဝ်း ဆာရေ။

19 အာရိုပ် ဒူအီ လိုဝ်း ခဲင် အိုမ်။ ပီ ကာဖာ ဒူအီ ဘော တဲး အီ နပ် လွင် နဝ်း အန် ပါယ် တီ။

20 မိူင် မာရာန တူ နပ် ဒီ နုဝ့် ဘော ပွုန် အီ တဲး ဒူအီ စှိုမ် တူ နပ် ဒီ စူ။ ဘော ငါယ် ဒူအီ တူ နပ် ဒီ ပိုဝ် ပါယ် တီ။

21 ရွိုန် ဂေ ခြိဝ် လုဝ် ဟပ် ခဲင် ကာလုဝ့်၊ ဒင် ခဲင် ငဝ်၊ တဲး န့ ဇဲတ်။ ဆေ အီ ဟဝ် ယီ အိူပ် ဒူအီ၊ န့ ဇဲတ် ဒီ ယွတ် နဝ်း အန်။

22 ဒူအီ ရိုဝ်၊ မဲ ပီ ဘော ဒိုဝ်း ဒုဝ် အန် ဒုး ခဲင် မ့ဘော မူင် ဒူပ် ငှုဝ် မိူဝ်၊ ရိုဝ် အန် တူ လေး တ ဒုဝ် ဘူင့် အန်။

23 တဲး မဲ အွန် ဒီ ဟျီင် လိုမ်လာ ဆီချာ မာဘူ ဂေ မာမက် မဲ၊ တဲး မဲ နပ် ဆီချာ ပီ ပါယ် ဂေ။

24 ခုဝ်၊ ကြုဝ်ကြာမ် ဂေ ဒုဝ် ဆတ် တူ ကွယ် ဆေဆေ။ အာမျုဝ် ခြိုဝ် အေ ဒူအီ မိူဝ် တူ ပွိုန် အိုပ် အီ ဘဲန် ဇာတ် ဘဲန် ဇာတ်။

25 ဆေ ပေတ့် ဟဲ့ ဟွတ့် ဆုဝ့်၊ ပေတ့် န့စမ် ဒီ ဝီ န့လုဝ်း ကာမာယ်။ ဆေ ဟီ ဂဲပ် ကာဇု အုန် ဟျြီင် ခဲင် မာန်၊

26 မဲ ဒီ လုဝ် ဝီ ကပ် ဟိုက် မာဘူ ဝီ ဘဲန် ခြိုင် ပီ ဒီ တာ မဲ။ မဲ ဒီ ဘော ယွင့် မာပဲ တဲး န့ ဘဲန် ရွိုန်၊ တဲး မဲ ဝီ ပွိုန် ဒီ စိုဝ်း ကာဒါယ် ပေါ မ့ပွါ။

27 အိုမ် ပူ မာပဲ ဒီ ဝီ ဘဲန် ပီ ဒီ ဟူမ် ဒူအီ ခဲင် န့ဟူမ် မဲ။ ဘော ဂေ အီဘိုန့် အီ မုး မှာယ် မဲ၊ ဂေ ဒီ ဘော ပွိုန် ဒီ ဟူမ် ဖဲ ဒွန် အီ။