ဒူအီ တူ မွှိုမ် နပ် ဒီ တဝ် ဒေါ တူ မိုဝ်း အီ ဟုဝ် အန် တဝ်။ ဒူအီ အီ မိုဝ်း နဝ်း ဆိူဝ် နဝ်း မှာန် ယီ မိုဝ်း နဝ်း ယ ပီ မာခြင်ဆီ။ အန် တူ ယုဝ် မာဆေ။

2 ကူပ် မှာပ် ဒူအီ၊ ကူပ် ပီ ရူ ဂေ ဒီ ဒါ ကာညာ ဂေ၊ ဒူအီ အီ အိုပ် မာန် မိူင်၊ ဂေ ဘော ကာဒုး ဒီ ကာပ့လု ဘဲန် ဝီ ဘဲန် ဝီ။ ဆေ န့ ယီ မိုဝ်း ဒါ ကာညာ အီ မိုဝ်း အာငျာန်၊ အန် နပ် ဒီ ဘူင် တဲး မာန် မိူင် ဒါခိုယ်။

3 ဆေ ဒူအီ ဖ့လာန် ဝီ ခါနှာပ် ဒူအီ ဂိန်၊ န့ ပီ ဂ့လာယ် အီ စုဝ်း တဲး ကာယူင့် ငှုဝ် လိုဝ်။

4 ဂေ အီ ဝဲန် ဒါရာ၊ ဂေ ဟဲ့ အိူပ် ဒူအီ ဟာယ်။ ဂေ အီ ဘူင် ဒူပ် ဒါရာ၊ ဂေ ယီ တူ ဖြူမ် ပီ ဘူင် ဒူအီ ဟာယ် တီ၊ လုဝ် ကာခတ် ဒီ ဂေ ဆေဆေ။

5 ဒူအီ ဟာယ်၊ ဂေ တူ နပ် နာ မုး နာ မှာန်။ ဂေ အီ မိုဝ်း နဝ်း ဆီ ဒူပ် ဇဝ်ဖြာ၊ ဂေ ယီ နပ် ဆီချာ နာ မုး နာ မှာန်။

6 ဒူအီ ဂိန် အီ ဘူင် နာ မုး နာ မှာန်၊ ဟဲ့ မွှိုမ် လွှိုမ် ဒူအီ ခြမ် အီ ဘူင် နာ ဂုဝ့် ဂဲ့။

7 ဂွန် အီမာယ် အီ ဘူင် ဒူပ် ဒါရာ၊ အန် မုး ဒူအီ အီ မိုဝ်း အာငျာန်။ ဆေ အီ ယီ ဘဲန် ဂိုက် ဒူအီ အီ တူ မိုဝ်း ဒီခုဝ်၊ ဂုန့် အန် ဒီ လုဝ် ဆာယ် အီ။

8 ဆေ မဲ ဟီ ဆီ ခြမ် ကာပွါ၊ ဟူမ် ကိူန် အျီင် ရွိုန်၊ ကြုဝ်ကြာမ် မဲ ဒီ ဝီ ဟာဝ် ကွယ် ဒူပ် အီ ဟဝ် အီ မိုဝ်း နဝ်း ကာဝေ ဒူအီ ဂိန်။

9 ဆေ မဲ တူ ဘူင် ဒူပ် ဒါရာ၊ မဲ ပီ ဘော ဆာခိုဝ်၊ န့ မွှိုမ် ကာအိး။

10 ဆေ မဲ ကာဆုး ဒူအီ အီ မိုဝ်း နဝ်း ဆိူဝ် တဲး အန် ဘူင် မှာပ်၊ န့ ပီ မဲ ဒီ ဝီ ခြေ ယွတ့် ပီ ဒိန့် အုန် မဲ။ ဆေ န့ ယီ တူ မိုဝ်း မာဆေ ပီ ပွိုန် အီ ဒီ ကာလာင် နာ တူ မွှိုမ် လွင် မဲ၊ မဲ ဒီ ပွိုန် ခါဂုန် ဘွတ်။

11 ဒူအီ ခြမ် ဂေ နပ် ဒီ ထာင် ဂေ ဟဲ့ မိုဝ်း အာငျာန်။ မာလဲ၊ ဒူအီ ဂိန် အီ မိုဝ်း အာငျာန် ဘွတ်၊ အန် ဘော နပ် ဒီ ဆာခိ ဒီ ထူမ် ဂြုဝ်း ဂေ။

12 ဆေ ဒူအီ အီ မိုဝ်း နဝ်း ဆိူဝ် နဝ်း မှာန် ဟဲ့ အွင်၊ ဒူအီ ကိူန် ဘော ဘဲန် နဝ်း ဒါခိုယ် ကာဆဝ်။ ဆေ ဒူအီ ဟာယ် ယီ မိုဝ်း ပွုန် ဒီ အိုပ် အီ၊ ဂေ ဒူအီ ကိူန် ဒီ ဝီ တဝ်၊ ဟာဝ် ချြီင် ဒုဝ် ဂေ။

13 ဆေ မဲ တူ ဆီ ကာလာင် မှာပ် မဲ၊ မဲ တူ နပ် ဒီ ဘျုဝ် ဒါခိုယ် ဒေါ မှဝ်။ အာဆေ ယီ ကာလာင်၊ ယီ ဝဲန် မှာပ် အန်၊ ဇဝ်ဖြာ ဒီ ဝီ ဂေဇူ၊ ဝီ ကာဝေ အန်။

14 အာဆေ ရုဝ်ဆေ ဇဝ်ဖြာ ဆေဆေ၊ အန် ဒီ ဘျုဝ် ဒါခိုယ်။ အာဆေ ယီ မိုဝ်း နဝ်း ဒိူဝ်၊ အန် ဒီ ကာဒုး ဒုက်။

15 ဒါ ကာညာ အီ တူ မွှိုမ် အီ ခါနှာပ် ဒူအီ အီ ဒုက် အီ ညှာပ်၊ အန် ဘော ပီ မာခြင်ဆီ အီ ရျီင် တာင် ဘော မာဂြေး အီ ခုင်ခြး ဒီ ကဝ့် အီ။

16 ဒါ ကာညာ အီ တူ မိုဝ်း အာငျာန်၊ အန် ဘော နပ် ဒီ ခါနှာပ် ကာဆဝ် အီ ဟဝ်။ ဒါ ကာညာ အီ ဇွင့် နဝ်း လောဖ၊ အာဆာက် အန် ဒီ တူင့်။

17 ဒူအီ အီ မိုဝ်း မှာပ် ကူပ် ငဝ်း အန် ဒီ အီ၊ အန် လုဝ် ဟာဝ် တဝ် ဆေဆေ။ အာဝ် မိုဝ်း အာဆေ အီ စွယ် အန်။

18 ဆေ မဲ မိုဝ်း နဝ်း ဆိူဝ် နဝ်း မှာန်၊ မဲ ဒီ လွတ် အာဖေ အာရေ။ ဆေ မဲ မိုဝ်း နဝ်း ဂုဝ့် နဝ်း ဂဲ့၊ မဲ ဒီ စှိုမ် ဒေါ တူ လှုဝ်း မဲ။

19 ဒူအီ အီ အွန် ဒီ ရန့် မာန် ဂေ နာ၊ အန် ဒီ မိုဝ်း ဒီ ဟူမ် လိုင် တာ လိုင်။ ဒူအီ အီ ကွယ် ဒီလူယ် ဒီလာယ်၊ အန် ဒီ ဂိန် ဆေဆေ။

20 ဒူအီ အီ ဘူင် နာ မှာန် ဆေဆေ၊ အန် ဒီ ပွိုန် မွင့်ကာရာ ဘဲန် မျုဝ် ဘဲန် မျုဝ်။ ဒူအီ အီ ဆီ တဲး အန် ခြမ် ဟဲ ဟဲ၊ အန် မိူဝ် တူ လွတ် ခမ် မှာပ် အန်။

21 ဆေ ဒူအီ မိုဝ်း ဒူင် ရွက့် ဒူင် ဇွင့်၊ န့ တူ မွှိုမ်။ မာလဲ၊ ဒူအီ ဘော နပ် ဒီ ဘူင် နာ တူ မွှိုမ်၊ တဲး အန် ပွိုန် ခါမုန် အီ စဲက်။

22 ဒူအီ အီ ဂျြီ့ အီ ဆီ ဘူင် ဟဲ ဟဲ တဲး အန် ခြမ်၊ အန် တူ နပ်၊ နာ အာတ့် အန် ဒီ ဝီ ဂိန်။

23 ဆေ ဒူအီ မာနုဝ် အီ ဟဝ်၊ ကာလာင် ပီ လုတ့် အန်၊ နာ အာတ့် ဟာဝ် ဒူအီ ဟဝ် ဒီ ဘော အိုင် အန် လွှိုမ် ဒူအီ အီ မှုဝ် ဒီ ကဝ် အီ။

24 ဆေ ဒူအီ ပြာ ကြုဝ် ဂုန့် မာ ဂေ၊ ယီ ထာင် အာဝ် ဘဲန် မှာပ်၊ အန် ဘော ပီ ဂိုက် ဒါ ဇူန်။

25 ဒူအီ အီ မိုဝ်း နဝ်း လောဖ၊ အန် ဘူင် တဲး အီ လာယ် ကာလုတ့်။ ဂေ အီ ညှိုမ် ဘိုင် ဇဝ်ဖြာ၊ ဂေ ဒီ ဘော ဘျုဝ် ဒါခိုယ်။

26 ဆေ မဲ ဒူပ် နဝ်း ဒုဝ် ဘြိမ် မဲ၊ မဲ တူ မိုဝ်း အာငျာန်။ ဆေ မဲ ကာဒိုက် ကာဒဝ့် ဒီ ဒူအီ အီ နပ် ဒီ မာနုဝ် အာငျာန်၊ မဲ ဒီ ဘျုဝ် ဒါခိုယ်။

27 ဆေ မဲ ကာဆာင် ဒွါ ဒီ ဒူအီ ဂိန်၊ မဲ ဒီ ပွိုန် ခဲ့ ပီ လုဝ် မဲ။ ဆေ မဲ တူ မိုဝ်း နဝ်း ဇိုဝ် တီ၊ ဒူအီ ကိူန် ဒီ ဘော ဒိူင် မဲ။

28 ဆေ ဒူအီ ဟာယ် မိုဝ်း ပွုန် ဒီ အိုပ် အီ၊ ဂေ ဒူအီ ကိူန် ဒီ ဟာဝ် တဝ်၊ ချြီင် ဒုဝ် ဂေ။ ဆေ ဒူအီ ဟာယ် ယီ စှိုမ်၊ ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ မိုဝ်း ဇေ့ဇုင် တူတ့် ဒွန် မျုဝ်။