အာဖုင် ဂေ ဆာရေ တူ ကာအာပ် ဒီ ဒူအီ ရိုဝ်။ န့ ပီ အိုမ် ဒါတ် အီ စုဝ်း အာခြာဝ် ဆောဒါတ် ဘော အိုမ် ဂ့လာယ် အီ စုဝ်း အာခြာဝ် ဆုဝ့် ငှုဝ်။

2 ဂြုဝ်း ဒိူင် အီ တူ မိုဝ်း ဒီခုဝ်၊ အန် တူ ဒိုဝ် ဒုဝ် မဲ။ န့ ပီ မာဆီလဝ်း ဂေ မာလေဝ် အီ ဘိုန့်၊ ယီ တူ မိုဝ်း ဒူင် ဒီ စုး။

3 အေ လုဝ် ဆီဘျြီ့ မင်ပြွင့်၊ လုဝ် ဒိူတ် ကဝ့် မာလာ။ ဆေ ယီ မုး ဒူအီ ရိုဝ်၊ လုဝ် မး ကာတု အန် တာ န့ ဖျီ့။

4 ကွဲ့ ဝျီ့ ဂြုဝ်း ဒူအီ ရိုဝ် ဒူပ် ရိုဝ် အန်။ ယုဝ် ဘော မဲ ဒီ ဝီ ပီ အန်။

5 ဆေ မဲ ဝျီ့ ဂြုဝ်း အန်၊ လုဝ် ဝျီ့ အီ ကာအာပ် ဒီ ရိုဝ် အန်၊ ကွဲ့ တဲး အန် ထာင် အန် ဟဲ့ မိုဝ်း အာငျာန်။

6 ဆေ မဲ တဲး ဒူအီ ရိုဝ် ဘဲန် ဒါလာမ် မဲ၊ န့ ပီ မဲ ဒဲပ် ဝဲန် ပ့လဝ် မဲ ဘော တဲး န့ ဘဲန် အာဖေ အာရေ ဒီ မဲ။

7 ဂြုဝ်း မာကာထ ပီ ကာလာင် ဒူအီ ရိုဝ် အာဝ် မိုဝ်း ဒီခုဝ်။ န့ ပီ ပ့လဝ် ဂဲ့ အီ တူ မိုဝ်း ပ့လူမ်။

8 အာဆေ အိူပ် မျုက် ဒူအီ ရိုဝ်၊ အာဝ် မိုဝ်း အာဂျိုဝ် မာဆေ။ န့ ဘော ပီ အီ ဒိုဝ်း မာဝ် ပက် ဒိုက် ဒီ ဝန် ဘော ဝိုန့်။

9 ဂြုဝ်း မာကာထ ပီ ကာလာင် ဒူအီ ရိုဝ်၊ န့ ဘော ပီ ဒီခွင့် အီ ဟဲ့ လိုပ် ခဲင် ဒဲ ဒူအီ အီ ယိုတ့် ပဝ်း။

10 အာဆေ တဝ်း ဒီ ဇာင် ဒူအီ ရိုဝ် ဂါယ် ဒူအီ ပီ တူ နပ် အန်၊ အန် ပီ ဒူအီ အီ ဘန့် အ၊ ယီ တူ ယွတ် နာ ဒီ ဘန့် အန်။

11 ဆေ ဒူအီ ရိုဝ် ဝီ ဘူင် နာ ရိုဝ် ပေါ အူ ဇေန့်၊ အန် ဘော ပီ မာဆုဝ် အီ ဝီ ဟာဝ် ဟူမ် ဟိုဝ် ဘြိမ် အန်။

12 ဆေ မဲ ထေဝ် ဒီ မာနုဝ် ဒူအီ ရိုဝ်၊ န့ ဆီ ကဲန် လွှိုမ် မဲ မာနုဝ် ဒူအီ အီ ပီဖုင် အန် ဘော ထာင် အန် မိုဝ်း အာငျာန် ဘွတ်။

13 ဒူအီ ကြာန် နပ် ဒီ တဝ်း၊ “န့ မိုဝ်း မာခြင်ဆီ ကွယ် ဒူပ် န့တေန့်။ ခုဝ်၊ အာဝ် ပွိုန် လေး။”

14 မာလုဝ်း ကာဘတ် ဝိဝ် ကာဘတ် ဝေန့် ဒဲင် ဘန်ဒူက်။ ဒူအီ ကြာန် ဘော အိတ် ကာဘ့လျီ့ ကာဘ့လ ဒဲင် ကာစှူင့် အိတ် အန် ပါယ် တီ။

15 အာဆေ ကြာန် ကာဆဝ်၊ အန် နပ် ဒီ ဘ့လေး ဒဲ အန် ခဲင် ဆီလယ့် ဘူမ်။ အန် ယီ ကြာန် ဒီ ဘာဝ် ဘူမ် ဘ့လိုပ် ခဲင် မူတ့် အန်။

16 ဒူအီ ကြာန် ဘော ထာင်၊ အန် ဟဲ့ မိုဝ်း အာငျာန် လွှိုမ် ဘူ ဝီ အီ နပ် ဒီ ကာလာင် ဆီချာ လွင် ဒါင် ဘဲန် မျုဝ် ဘဲန် မျုဝ်။

17 ဆေ ဒူအီ အီ ဝိန် ဒီ လိုပ် ဒူင် ကာအေး အီ၊ ယီ တူ မုး အာရေ အန်၊ န့ ဘော ပီ အန် တိုန့် ဟျုဝ့် မာဆုဝ်။

18-19 ဆေ ဒူအီ ကာလုဝ် အီ ဟဝ်၊ အန် ပီ ဝီ တဝ်း၊ “အုဝ် လင်ဂ့လွိုန် ပီယေန့်၊” အန် ဘော ပီ ဒူအီ ယွင်၊ ဒူအီ ဝှိုန့်၊ အီ ဒိုဝ်း ဘ့လာ အီ ဒုဝ့် ငဝ်၊ ဘန့် တဲး အီ ယမ်။

20 ဆေ အာဝ် မိုဝ်း ဟေ၊ ငဝ် ဒီ ယတ်။ ဆေ အာဝ် မိုဝ်း ဂြုဝ်း လာယ် ကာယွင့်၊ အာဝ် မိုဝ်း အီ လာယ် ကာအေး ကာထဲန့်။

21 ဆေ အီ ဟပ် ကာဆဝ်း ဒီ န့ကိုဝ် ငဝ် ဘော ကာဆုး မာဆီဘ့လာဝ် ခဲင် ကာဝှါင်၊ န့ တဲး န့ ကုး ဘဲန် ငဝ်။ ဒူအီ အီ အွန် ဒီ ကာအေး ကာထဲန့် ဒီ အီ ဘော ဘူင် တဲး အီ ကာလုတ့်၊ အန် ဘော ပါယ် တီ။

22 ဆေ ဒူအီ အွန် ဒီ ခဲ အာဂျာင် အီ၊ န့ ဘော ပီ ပီ ဒီ ဟူမ် အီ ဆီငဲး ဒီ အန်။ န့ ပီ၊ ဟဲ့ လိုပ် လူင် ခဲင် ဝတ့် အန်၊ တဲး န့ ဒါခိုယ်။

23 ဂြုဝ်း ငါမ် အီ ဆီဘ့လိုက် နဝ်း ဂုဝ့်၊ န့ ပီ ကာလုဝ့် ကာဒါယ် အီ ဟဲ့ ဖဝ်း အိုမ် ရွိုန်။

24 ဒူအီ အီ ဇွင့် အီ ဟဝ်၊ အန် နပ် ဒီ ကာလာင် ဂြုဝ်း ငါမ်။ ခဲင် နဝ်း အန်၊ အန် ယီ တူ ဆိူဝ်။

25 ဂြုဝ်း အန် ပီ ဘော ဒါခိုယ် မိူဝ်၊ အာဝ် ပွိုန် ညှိုမ်။ ခဲင် နဝ်း အန်၊ န့ ဘော မုး တူတ့် အီ မွှိုမ် ကာအိး ဒီလူယ်။

26 အန် ပီ ဘော ပါယ် မှဝ် ဒီ ချြီင် ဒီ အီ ဟဝ် မိူဝ်၊ မှာပ် အန် ယီ ဒီ ဝီ လိုဝ်း ဆီချာ။

27 ဆေ ဒူအီ အီ ဂိုဝ်း ကာဒဝ်၊ တဝ်း တဲး အီ ဟဝ် စုဝ်း၊ အန် အီ ဒီ ဝီ စုဝ်း။ ဆေ အန် ဘော ကာလွှယ် မာဝ် ညတ့် အီ၊ မာဝ် တီ နပ် ဒီ ဝီ ကာလွှယ် ညတ့် အန်။^a

28 ဒူအီ အီ ဆီမာ ကာလုဝ်၊ အန် ဇွင့် ဒူအီ ပီ ကာလုဝ် အန်။ ဒူအီ အီ နပ် ဒီ ဝွက့်ဝဲန့် အီ ဟဝ်၊ အန် ဘူင် တဲး အီ လိုဝ် စှိုမ်။