အာဆေ အိုင် ဆေ အီ ဟဝ် မာနုဝ် အန်၊ အန် မိူဝ် မိုဝ်း နဝ်း ဆီ နပ် ဒွန် မျုဝ်။ အာဆေ ယီ ဇွင့် ပီ မာနုဝ် အီ၊ အန် ပီ ဒုဝ် ဆတ်။

2 ဆေ ဒူအီ ယီ ဘူင် နာ မွှိုမ်၊ န့ လဝ့် နဝ်း ဇဝ်ဖြာ။ ဆေ န့ ယီ မိုဝ်း ဒူအီ အီ ခြာမ် ဒီ ဘူင် နာ စီစိဝ်၊ ဇဝ်ဖြာ ဒီ ဒမ် မှာပ် ဒီ အန်။

3 ဆေ ဒူအီ ဘူင် နာ ဟာယ် နာ စီစိဝ်၊ န့ တူ တဲး အန် မိုဝ်း ဂျာမ်ဆာ။ ဆေ အန် ယီ မိုဝ်း နဝ်း ဆိူဝ် နဝ်း မှာန်၊ အန် ဒီ ကွယ် ဆီချာ ပီ ဟေ အီ မိုဝ်း ရျီး အီ လူင် လိုက်။

4 ဆေ အီမာယ် မိုဝ်း အီဘိုန့် အီ ဘွတ် အီ မွှိုမ်၊ န့ ပီ အန် ဟဲ့ စှိုပ် မင်ဂိုမ်။ ဆေ အန် ယီ မိုဝ်း အီဘိုန့် အီ ဘူင် တဲး အန် မွှိုမ် ဆာယ်၊ န့ ပီ အန် ဘူင် တဲး ကာအာင် အန် ကြဲ ဒီ ရာမ် လိုဝ် တူတ့်။

5 ပီ ခြာမ် ဂေ အီ မိုဝ်း နဝ်း ဆိူဝ် နဝ်း မှာန် ဟဲ့ မုး ဟဲ့ မှာန်။ အာကျာမ် အာငျာန် ဒူအီ ဟာယ်၊ န့ ယီ တူ မှာန်။

6 ဂြုဝ်း ပီ ကာလာင် ဂေ ဒူအီ ဟာယ် နပ် ဒီ ငဝ်း ယမ် အာဆာက် အီ။ ဂြုဝ်း ဂေ ဒူအီ ဘွတ် ဒူအီ မွှိုမ် နပ် ဒီ ချွတ် အီ။

7 ဒူအီ ဟာယ် ဂေ ဒီ ကေး စှိုမ် တူတ့်။ ဘော ခြိုဝ် ဂေ ဒီ ဟြာယ်။ ဆေ န့ မုး ခြိုဝ် ဂေ ဒူအီ အီ မိုဝ်း နဝ်း ဆိူဝ်၊ ဂေ ဒီ ကွယ် ဆေဆေ။

8 ဆေ မဲ ကာဒွါ့ ကာဖာ နာ လွှက့် လှဲမ်၊ ဂေ အီ ဟဝ် ဒီ အိူပ် မဲ။ ဆေ မဲ ကာဖာ နာ ရိုဝ်၊ ဂေ ဒီ လုက်တာယ် မဲ။

9 ဆေ န့ မိုဝ်း ဒူအီ အီ တူ ခိုက်ခမ်၊ ယီ မိုဝ်း ဒဲစေန့် အူ ဝီ၊ န့ မွှိုမ် လွှိုမ် ဒူအီ အီ ပီဖုင် အန်၊ ယီ အေတ့် ဘူမ်။

10 ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ဘော နပ် ဒီ လိုမ်လာ ဆီချာ ဒုဝ် ဆတ်ဒါဝါ ပီ ဟျီင် အန်။ ဆေ ဒူအီ မိူက် ယီ တဝ်း ဒီ ဘူင် နာ မွှိုမ်၊ န့ ယီ ဆီ နဲ့ ဟာယ် ကာဆဝ်။

11 ဒူအီ အီ အွန် ဒီ ဘူင် မာန် ဂေ နာ၊ အန် ဘော ပွိုန် ဒီ ဟူမ် လိုင် တာ လိုင်။ ဂေ အီ ဒီလိန့် ပီယေန့် တူ မိုဝ်း ဒီခုဝ်၊ ဂေ တူ မိုဝ်း အာငျာန်။

12 ခဲ့ ကွယ် ဂေ ဒူအီ ဟာယ်၊ ဂေ ဆီ ပွိုန် ကြုဝ် ပဲ့ ဟဲ့ ဖာတ် တး ဒူအီ ဟာယ် ဒူအီ မိူက်။ ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ ယီ ပီ ဟေ အီ မိုဝ်း ရျီး လိုက် ဘော မိုဝ်း ဘ့လေ ကိူန်။^a

13 ဂေ ဒူအီ ဟာယ် ဂေ ပီ ဒူအီ အီ လိုပ် ခဲင် ယွတ့် ကူပ် ဂြုဝ်း ပီ ကာလာင် ဂေ။ ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဘော လွတ် ဇမ် ဒုက်။

14 ဒူအီ အီ နပ် ဒီ ကာလာင် နာ ဘွတ် နာ မွှိုမ်၊ အန် ဒီ ပွိုန် နာ မွှိုမ် ကူပ် ဂြုဝ်း ပီ ကာလာင် အန်။ ခဲ့ ပီ ဘူင် အန်၊ န့ တဲး အန် ပွိုန် အာဂျိုဝ် အန်။

15 ဒူအီ ရိုဝ် ဘော ထာင် ပီ ဘူင် အန် ဟဲ့ မွှိုမ် ဆေဆေ။ ဂေ ဒူအီ အီ မိုဝ်း အာငျာန်၊ ဂေ ယီ ထူမ် အာကျာမ် အာငျာန် ပီ ဒွါ အီ ဟဝ်။

16 ဆေ ဒူအီ ဟာယ် ဟီ ရူ၊ န့ ဘော လိုဝ်း အူ ဇေန့်။ ဂေ အီ မိုဝ်း အာငျာန်၊ ဂေ ယီ တူ ဒိူန် ဂြုဝ်း အီ မွှိုမ် ဆာယ် ပီ ကာလာင် အီ ဟဝ်။

17 ဒေါ ကာလာင် မဲ ဂြုဝ်း မှာန်၊ မဲ ဘော ဘျ နဝ်း ဆိူဝ် နဝ်း မှာန်။ ဆေ မဲ ယီ ဘဲန် ဆက်ဆေ အီ ကာလာင် ဂြုဝ်း တူ မှာန်၊ န့ ဘော ဘျ နဝ်း ကာလုဝ်။

18 ဂြုဝ်း ပီ တူ ဇေန့်ဇာ ယီ ဟဲ့ ဟွတ့် ကာလာင်၊ န့ ဘော ပီ မာပွါ့ လာင် အီ ဆတ် ဘဲန် ဒိမ်။ ဂြုဝ်း ပီ ကာလာင် ဒူအီ အီ မိုဝ်း အာငျာန်၊ န့ ဘော ပီ ဆီနမ် အီ တဲး ဆဝ် ဟြာယ်။

19 အီ မှာန် ပီ ကာလာင် အီ၊ န့ ဘော ကွယ် ဆေဆေ။ အီ ကာလုဝ် ပီ တဝ်း ဂေ၊ ယီ ကွယ် အူ ကာစန်။ ဟဲ့ ဟွတ့် န့ ဝီ ဟြာယ်။

20 ဂြုဝ်း ကာလုဝ်၊ ဂြုဝ်း တူ မှာန်၊ န့ ဘော ကွယ် ခဲင် နဝ်း ဂေ အီ ဆီ ဘူင် နာ စီစိဝ်။ ဂေ အီ ခြာမ် ဒီ ဘူင် နာ ဘွတ် နာ မွှိုမ်၊ န့ ယီ တဲး ဘော နဝ်း ဂေ ဘျုဝ် ဒါခိုယ်။

21 မျုဝ် အီ တူ မွှိုမ်၊ န့ တူ ဇမ် ဒီ ဒူအီ အီ မိုဝ်း နဝ်း ဆိူဝ် နဝ်း မှာန်။ ဂေ ဒူအီ ဟာယ်၊ ဂေ ယီ မိုဝ်း ဒုက် ဆေဆေ။

22 ဇဝ်ဖြာ ဇွင့် ဒူအီ ဆီမာ ကာလုဝ် ဘော အိုင် ဂေ အီ ဒူပ် နာ မုး နာ မှာန်။

23 ဒူအီ အီ မိုဝ်း အာငျာန်၊ အန် တူ ကာလာင် တူတ့် ခဲ့ ပီ နပ် အန်။ ဒူအီ ရိုဝ် ယီ ကာလာင် ဘျ တူတ့် ခဲ့ ရိုဝ် အန်။

24 ဒူအီ အီ အွန် ဒီ ဘူင် ဘဲန် မျုဝ် ဘဲန် မျုဝ်၊ အန် ဒီ ပွိုန် ဒီ အိုပ် အီ။ ဒူအီ အီ ကြာန်၊ အန် ယီ လုဝ် ဘဲန် မှာယ် အီ။

25 အာဆေ ယုဝ် ဆေဆေ၊ န့ တဲး အန် ဘဲန် နဝ်း ဒီတဲတ်။ ဂြုဝ်း ဒါခိုယ် ယီ တဲး အီ ဘဲန် နဝ်း တာင်။

26 ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ဒီ နပ် ဒီ ယဲတ့် န့တေန့် ဂိုက် အန်။ ဒူအီ ဟာယ် ဘော ယဲတ့် တဲး အီ ဟဝ် ကာလိုပ်။

27 ဆေ ဒူအီ ကြာန် ပီ ဘော ဟဲ့ မှေတ့် ဒုဝ် ဆတ်ဒါဝါ၊ အန် ယီ တူ ခမ် ဒီ ဘူင် တဲး န့ ဘဲန် ဟာပ်။ ဆေ န့ ယီ မိုဝ်း ဒူအီ အီ အွန်၊ အန် ဒီ ဘော ခြမ် ဘော မိုဝ်း။

28 အာဆေ ဒူပ် န့တေန့် အီ မုး အီ မှာန်၊ အာဆာက် အန် ဒီ တူင့်။ အာဆေ ယီ ဘူင် နာ စီစိဝ် နာ တူ မွှိုမ်၊ အန် ဒီ ယမ်။^b