ဇဝ်ဖြာ ဇွင့် ဂေ အီ တာ ညွယ် ဘာ အီ တူ မှာန်။ န့ ယီ လဝ့် နဝ်း အန် ဆေ အီ တာ ဘ့လေ ဆ အီ မွှိုမ် အီ မှာန်။

2 ဂေ အီ ပီခိုက် နဝ်း ဂေ၊ ဂေ ဒီ ဝီ လုဝ် ဆာယ် အီ။ ဂေ အီ မိုဝ်း နဝ်း တျီမ်၊ ဂေ ယီ မိုဝ်း အာငျာန်။

3 အာဆေ မိုဝ်း နဝ်း ဘွတ် နဝ်း မွှိုမ်၊ နဝ်း အန် တီ ဒီ ယဲတ့် ဒီ တိုယ် အန်။ အာဆေ ယီ တူ ဘူင် နာ မှာန် နာ မွှိုမ်၊ နာ ဂုဝ့် နာ စီစိဝ် ဒီ ဘော ပျာတ့် အန်။

4 ဆေ ဇဝ်ဖြာ ဒမ် မှာပ် ဒီ အီ၊ ကြုဝ်ကြာမ် အန် တူ ပွိုန် စွယ်၊ တဲး အန် လွတ်။ အာဆေ ယီ မိုဝ်း နဝ်း ဆိူဝ် နဝ်း မှာန်၊ နဝ်း အန် တီ ဒီ တဲး အန် လွတ်။

5 နာ ဆိူဝ် နာ မှာန် ပီ ဘူင် ဒူအီ အီ ဘွတ် အီ မွှိုမ်၊ န့ ဒီ တိုယ် အန် ဟာဝ် ဒူပ် န့တေန့် ဆိူဝ်။ ဂေ ဒူအီ ဟာယ်၊ ဂေ ဒီ စှိုမ် ကူပ် ဟာယ် ဂေ တီ။

6 နာ မုး နာ မှာန် ပီ ဘူင် ဂေ ဒူအီ အီ ဘွတ် အီ မွှိုမ်၊ န့ ဒီ ဘော ချွတ် ဂေ။ ဂေ ဒူအီ ဟာယ်၊ ဂေ ယီ ဒူပ် နဝ်း လောဖ ဂေ၊ တဲး န့ ပီ ဂေ ခြေ ခဲင် ယွတ့်။

7 ဆေ ဂေ ဒူအီ ဟာယ် ဟီ ယမ်၊ ပီ နှဝ့် န့ဒဝ့် ဂေ မိူဝ် ဒီ ယမ် ဒူပ် ဂေ။ ခဲ့ ပီ ညှိုမ် ဘိုင် ဂေ၊ အာဝ် ဘဲန် အာဂျိုဝ် မာဆေ။

8 ဂေ အီ နဝ်း ဆိူဝ် နဝ်း မှာန်၊ ဂေ ဒီ ဘော လွတ် အာဖေ အာရေ။ အာဖေ အာရေ တီ ဒီ ဝီ တာ ဒိုဝ် ဂေ အီ တူ မွှိုမ်။

9 ဂေ အီ တူ နပ် ဇဝ်ဖြာ၊ ဂေ ဘော ကာလာင် ဂြုဝ်း တူ မွှိုမ်၊ တဲး ဂိုက် ဂေ စှိုမ်။ န့ ယီ မုး အာငျာန် ဂေ ဒူအီ အီ မိုဝ်း နဝ်း ဆိူဝ် နဝ်း မှာန် အီ နပ် ဒီ ချွတ် ဂေ။

10 ဆေ ဒူအီ အီ မိုဝ်း နဝ်း ဆိူဝ် နဝ်း မှာန် ဒီ ပွိုန် ဘဲန် မျုဝ် ဘဲန် မျုဝ်၊ န့ တဲး ဒူအီ ဒွန် အီ ဒါခိုယ် ဘော မိူင်။ ဆေ ဒူအီ အီ တူ မွှိုမ် ဟီ ယမ်၊ ဂေ ဒီ ဘော ခူယ် ဆီနန် ဆီနိူင်။

11 ကူပ် မွင့်ကာရာ ဒွါ ဇဝ်ဖြာ ဒီ ဂေ အီ မိုဝ်း နဝ်း ဘွတ် နဝ်း မွှိုမ်၊ မိူင် ဘော မိူင် ဘော ဒါခိုယ် မိုဝ်း ဇေ့ဇုင်။ ကူပ် ဂြုဝ်း ပီ ကာလာင် ဂေ ဒူအီ ဟာယ်၊ မိူင် ယီ လိုဝ် ယီ စှိုမ်။

12 ဒူအီ အီ ကာလာင် ဂြုဝ်း မွှိုမ် ကာအိး ဒီ ဂိုက် အန်၊ အန် တူ နပ် ဒီ ကာယဝ်း အီ မွှိုမ် အီ တူ မွှိုမ်။ ဒူအီ အီ လွှက့်၊ အန် ယီ ကွယ် နှိမ် နှိမ်။

13 အာဆေ အွန် ဒီ ခဲ အာဂျာင် အီ၊ အန် ဘော နပ် ဒီ ကာလာင် ပီ ချြီင် အီ ဒီ ကာလာင်။ ဆေ န့ ယီ မုး ဒူအီ အီ ပွိုန် ဘိုင်၊ အန် ဒီ ဘော နပ် ဒီ ချြီင် အုန် ပီ ကာလာင် အီ ဒီ အန်။

14 ဆေ အာဝ် မိုဝ်း အီ ဒွါ အာကျာမ် အာငျာန်၊ ဒူအီ ဘော ရဝ် ဘော မိူင် ဒီ ဘော စှိုမ် ဘော လိုဝ်။ ဆေ န့ ယီ မိုဝ်း ဒူအီ ကိူန် ဒွါ အာကျာမ် အာငျာန်၊ န့ ဒီ တဲး ဒွန် အီ ကွယ် ဒါခိုယ်၊ ကွယ် ဆီချာ။

15 ဆေ မဲ ကာဆဲန့် ဒီ ကီခမ် ဒါင် ဒူအီ ဟဝ်၊ န့ ဒီ ဘဲန် ဒုက် ကာဆဝ် ဒီ နဝ်း မဲ။ ဆေ မဲ ယီ ဇွင့် လွင် ကီခမ် ဒါင် အီ ဟဝ်၊ မဲ ဒီ လွတ် မှဲ ဒီ နဝ်း။

16 အီဘိုန့် အီ နပ် ဒီ ဂေဇူ အီ၊ အန် ဒီ မိုဝ်း ဆာရေ။ အီမာယ် အီ မိုဝ်း နဝ်း စာ၊ အန် ယီ ပွိုန် မီ ကြုဝ်ကြာမ်။

17 အာဆေ ဂေဇူ အီ၊ န့ ပီ အန် ဘူင် တဲး န့ ဘဲန် အာဂျိုဝ် ဒီ အန်။ အာဆေ မိုဝ်း နဝ်း ဟာယ်၊ န့ ပီ အန် ဘူင် တဲး န့ ဘဲန် ဒုက် ဒီ ဒုဝ် ဘြိမ် အန်။

18 အာဂျိုဝ် ပီ ပွိုန် ဒူအီ ဟာယ်၊ အာဝ် ပွိုန် ဘိုင်။ အာဂျိုဝ် ပီ ဘူင် ဒူအီ အီ မိုဝ်း နဝ်း ဆိူဝ် နဝ်း မှာန်၊ န့ ယီ မှာန် အာခါခ်ု။

19 အာဆေ ဘ့လေး နဝ်း ဒီ ဘူင် နာ ဆိူဝ် နာ မှာန် ဆေဆေ၊ အန် ဒီ ပွိုန် အာဆာက် ကာမာယ်။ ဆေ န့ ယီ မိုဝ်း ဒူအီ အီ ဒိူန် ဒီ ဘူင် နာ တူ မွှိုမ်၊ အန် ဒီ ဘော ယမ် အာခါခ်ု။

20 ဇဝ်ဖြာ ဇွင့် ဂေ အီ မိုဝ်း နဝ်း ဂုဝ့် ဂဲ့။ ဂေ အီ မိုဝ်း နဝ်း ဘွတ် နဝ်း မွှိုမ် ယီ လဝ့် နဝ်း အန်။

21 တဲး မဲ နပ် ဆီချာ၊ ဂေ အီ တူ မွှိုမ်၊ ဂေ ဒီ လုဝ် ခမ် မှာပ် ဂေ။ ဂေ အီ မိုဝ်း နဝ်း ဆိူဝ်၊ ဂေ ဒီ ဘော လွတ် ခမ်။

22 အီဘိုန့် အီ စှိတ် ယီ တူ နပ် ဒီ ဆာဒိက် ဒုဝ်၊ န့ ဘော ပီ မာကာဝဲ့ ခြိဝ် အီ ဟွယ် ဒီ ဂုင်မုး မာလေတ့်။

23 ပီ ဆီ ပွိုန် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ န့ ဘော ဘဲန် တူတ့် နာ ဘွတ် နာ မွှိုမ် ဆေဆေ။ ပီ နှဝ့် န့ဒဝ့် ဒူအီ ဟာယ်၊ န့ ယီ တဲး ဇဝ်ဖြာ ရူ ဒီ ဂေ။

24 ဒူအီ မင် အီ၊ ဂေ ပီ ဘော ကာဆာင် ဒွါ ဒီ အီ ဟဝ်၊ ကြုဝ်ကြာမ် ဂေ ဘော ဝဲ မိုဝ်း ကိူန် ကာပွါ။ ဒူအီ မင် အီ၊ ဂေ တူ မိုဝ်း နဝ်း ဆီ လှူ ဆီ ဒွါ ဒီ အီ၊ ဂေ ယီ ဝဲ ဂိန်၊ ဝဲ အေတ့်။

25 ဂေ အီ မိုဝ်း နဝ်း ဟာင် နဝ်း ဆာထာ၊ ဂေ ဒီ ဘော ဟူမ် လိုင် တာ လိုင်။ ဂေ အီ စွယ် အီ ဟဝ်၊ ဂေ ဒီ ဝီ ပွိုန် ပီ စွယ် အီ ဒီ ဂေ။

26 အာဆေ ဂဲပ် အုန် ငှုဝ် ဘ်ု တဲး န့ ငဝ်း၊ အန် ဒီ ခမ် ပီ ဒိူင် ပီ အေး အီ ဟဝ်။ ဆေ အန် ယီ ယွင့် ဒွါ ဒီ အီ ဟဝ်၊ ဂေ ဒီ အိူပ် မျုက် အန်။

27 ဆေ ဒူအီ အွန် ဒီ ဘူင် နာ ဘွတ် နာ မွှိုမ် ဆေဆေ၊ ဇဝ်ဖြာ ဒီ အိုင် အန်။ ဆေ အန် ယီ အိုင် ဒီ ဘူင် တဲး အီ ဟဝ် လိုဝ်၊ ဘော အန် ဒီ ဝီ လိုဝ်။

28 အာဆေ တဝ်း ဒီ ဘိုင် ကြုဝ်ကြာမ် အန်၊ အန် ဒီ ဘော စှိုမ် ပီ လှာ ဟေ အီ ဆီဂ့လုး စုဝ်း အာခြာဝ် ဆောဒါတ်။ အီ မုး ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဘော ဝဲ မိုဝ်း ပီ လှာ ဟေ အီ န့လုဝ်း အာခြာဝ် ဂ့လာယ်။

29 ဆေ မဲ ဘူင် တဲး န့ ဘဲန် ဒုက် ဒီ န့ဟူမ် မဲ၊ မဲ တူ ပွိုန် ခါဂုန် မာဆေ။ ဒူအီ ရိုဝ် ဒီ လုဝ် ဘဲန် မှာယ် ဒူအီ လွှက့်။

30 အာဂျိုဝ် ပီ ဘူင် ဒူအီ မွှိုမ်၊ န့ ဘဲန် အာဆာက် ကာမာယ် ဒီ အီ။ အာဆေ ယီ ဘူင် နာ စီစိဝ်၊ အန် ဘူင် တဲး အာဆာက် အီ စှိုမ်။^a

31 ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ပွိုန် အာဂျိုဝ် ပီ ဘူင် ဂေ ဒေါ မုး ဇာတ် နီ။ ပါယ် တီ ဘော ဂေ ဒူအီ ဟာယ် ဒူအီ မိူက်၊ ဂေ ဒီ လုဝ် ခမ် ကိူန် ခဲ့ ကာဒါန် မှာပ် ဂေ။