1 ဂြုဝ်း ထုင် နီ၊ န့ ဘော မုး ပီ ဒဲမ် အာဆာလုဝ်မုဝ်။ ဆေ ဂွန် အီမာယ် မိုဝ်း အာငျာန်၊ ဂုန့် အန် ဘော ခူယ် ကာဆဝ်။ ဆေ ဂွန် အီမာယ် ယီ ရိုဝ်၊ န့ ဒီ ဘော ဒုက် ဒီ နဝ်း မာ အန်။

2 ကြုဝ်ကြာမ် ပီ ပွိုန် အီ ဒီ နာ တူ မွှိုမ် အာဝ် ဘဲန် အာဂျိုဝ် မာဆေ။ ဆေ အေ ယီ ဘူင် နာ ဆိူဝ် နာ မှာန်၊ န့ နပ် ဒီ ချွတ် ဘော အာဆာက် အေ။

3 ဇဝ်ဖြာ တူ တဲး ဂေ ဒူအီ အီ မိုဝ်း နဝ်း ဆိူဝ် နဝ်း မှာန် အေတ့် ပီ ဒီ ဟူမ်။ ပီ ဆီ ပွိုန် ဂေ ဒူအီ ဟာယ်၊ အန် ဇဝ် ယီ ဒီ ပျာတ့် ဝဲန်။

4 ဂေ ဒူအီ ကြာန်၊ ဂေ ဒီ ဘော အေတ့် ဘော ဂိန်။ ဂေ ဒူအီ အွန် ဒီ ဘူင် ဘဲန် မျုဝ် ဘဲန် မျုဝ်၊ ဂေ ဒီ ဘော ခြမ် ဘော မိုဝ်း။

5 ဝီ မှဝ် အီ နပ် ဒီ ဂဲပ် ကာဇု အုန် ပီ ဒီ ဟူမ် ဒေါ အာခြာဝ် ဆုဝ့်၊ အာခြာဝ် မး၊ အန် မုး ဂွန် အီ မိုဝ်း အာငျာန်။ ဝီ မှဝ် အီ အိတ် ဒေါ အာခြာဝ် ဆုဝ့်၊ အန် ဒီ တဲး ဂုန့် မာ အန် ဆာယ် အီ။

6 ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ဒီ ဘော ပွိုန် မွင့်ကာရာ ပီ ဒွါ ဇဝ်ဖြာ။ ဒူအီ အီ ကာလာင် မီ ဂြုဝ်း ဟာယ် တဲး န့ ဘဲန် မီ ဒုက် ဒီ အီ။

7 ဆေ အေ လှုဝ်း ဒူအီ နဝ်း ဆိူဝ် နဝ်း မှာန်၊ န့ ဒီ ဘော မွှိုမ် ဒီ အေ။ ဆေ န့ ယီ မုး ဒူအီ ဟာယ်၊ အာဝ် မိုဝ်း အာဆေ အီ နမ်လှုဝ်း အန်။

8 ဂေ ဒူအီ အီ မိုဝ်း အာငျာန်၊ ဂေ ဒီ ဘော ထူမ် ဂြုဝ်း ပီ စ်ု အီ။ ဂေ ဒူအီ ရိုဝ်၊ ဒူအီ မူတ့် ကိူန်၊ ဂေ ယီ ဒီ လိုဝ် စှိုမ် တူတ့်။

9 ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ဒီ ဘော ကွယ် ဒါခိုယ်။ ပီ ဘူင် ဒူအီ အီ မိုဝ်း နဝ်း ဂုဝ့် နဝ်း ဂဲ့၊ န့ ဒီ ဘော လိုဝ်း ဆီချာ ဒီ အီ။

10 ဂေ အီ နပ် ဒီ ကာယပ် ငါယ် ဒီ အီ၊ ဂေ ဘူင် တဲး န့ ဒုက် ဒီ အီ။ ဂေ အီ ယ ဒီ ကာလာင် ဘျ လွင် မှာပ်၊ ဂေ ဒီ တဲး အီ လာယ် ကာအေး ကာထဲန့် ဝီ လာယ် ဖြူမ်။

11 ဂြုဝ်း ပီ ကာလာင် ဒူအီ အီ မိုဝ်း နဝ်း ဆိူဝ် နဝ်း မှာန်၊ န့ ပီ အိုမ် အီ တဲး ဒူအီ မိုဝ်း အာဆာက်။ ဂြုဝ်း ဂေ ဒူအီ ဟာယ် ယီ တဲး န့ ဘဲန် ဒုက် ဒီ အီ။

12 ဆေ အီ လာယ် ဇွင့်၊ န့ တဲး ဂေ လာယ် ကာလုတ့် ကာထဲန့်။ ဆေ အီ လာယ် ရွက့်၊ န့ တဲး ဂေ လာယ် ဂဝ်း ဝဲန် မှာပ်။

13 အာဆေ နပ် ဒီ ကာယဝ်း အီ မွှိုမ် အီ တူ မွှိုမ်၊ အန် ဘော နပ် ဒီ ကာလာင် ဂြုဝ်း အီ မိုဝ်း အာငျာန်။ ဒူအီ ရိုဝ် ယီ လုဝ် ခမ် မ့ဖျီ့။

14 ဒူအီ အီ မိုဝ်း အာငျာန်၊ အန် ကြဲ ဒီ နပ် ဘဲန် မျုဝ် ဘဲန် မျုဝ်။ ဂြုဝ်း ပီ ကာလာင် ဒူအီ ရိုဝ်၊ န့ ဒီ တဲး အန် စှိုမ်။

15 ကြုဝ်ကြာမ် ဂေ ဒူအီ ခြမ်၊ န့ ပီ မိူင် အီ မိုဝ်း ရဲင် အီ တဲး ဂေ ကွယ် ဆီချာ။ ကူပ် ဟဲ့ ကိူန် ကာဆဝ် ပီ တူ မိုဝ်း ဒူအီ ဂိန်၊ န့ ဒီ တဲး ဂေ စှိုမ်။

16 အာဂျိုဝ် ပီ ဘူင် အေ နာ ဘွတ် နာ မွှိုမ်၊ န့ တဲး အေ မိုဝ်း အာဆာက်။ အာဂျိုဝ် ပီ ဘူင် အေ နာ တူ မွှိုမ်၊ န့ ဘဲန် မှာပ် ဒီ အေ။

17 အာဆေ ထူမ် ပီ မာနုဝ် အီ၊ အန် ဒီ မိုဝ်း အာဆာက် ကာမာယ်။ အာဆေ ယီ ဝဲန် ပီ မာနုဝ် အီ၊ အန် ဒီ ကာလိုပ်။

18 ဂေ အီ ချြီင် နဝ်း ဇွင့် ဂေ၊ ဂေ မုး ဒူအီ ဆီမာ ကာလုဝ်။ ဂေ အီ ကာယွင့် အီ ဟဝ်၊ ဂေ မုး ဒူအီ ရိုဝ်။

19 အာဆေ ကာလာင် ဂြုဝ်း ကိူန်၊ န့ ဘော နပ် ဒီ ဘဲန် မှာပ် ဒီ အန်။ အာဆေ ပဲ ဒီ အူတ်၊ ပဲ ဒီ ယိူန် မူတ့် အန်၊ အန် ဟဲ့ မိုဝ်း အာငျာန်။

20 ဂြုဝ်း ပီ ကာလာင် ဒူအီ အီ မိုဝ်း နဝ်း ဆိူဝ် နဝ်း မှာန်၊ န့ ဘော ပီ ရွိုန် ဇဲတ်။ ပီ ဇေန့်ဇာ ဒူအီ ဟာယ်၊ န့ ယီ တူ မိုဝ်း ဒီခုဝ်။

21 ဂြုဝ်း ပီ ကာလာင် ဒူအီ အီ မိုဝ်း နဝ်း ဆိူဝ် နဝ်း မှာန်၊ န့ ဘော ဘဲန် အာဂျိုဝ် ဒီ ဒူအီ ကိူန်။ ဂေ ဒူအီ ရိုဝ်၊ ဂေ ဒီ ဘော ယမ် ကူပ် တူ မိုဝ်း ဂေ အာငျာန်။

22 နာ ဘွတ် နာ မွှိုမ် ပီ မွင့်ကာရာ ဒွါ ဇဝ်ဖြာ၊ န့ တဲး ဒူအီ မိုဝ်း၊ တဲး ဒူအီ ခြမ်။ အန် ဇဝ် ယီ တူ တဲး န့ ဘဲန် နဝ်း ကာဟွာ့ ဒီ ဒူအီ ခြမ် တီ။

23 ဒူအီ ရိုဝ် ဘော ဘျုဝ် ဒီ ဘူင် မှာပ်။ ဂေ ဒူအီ လွှက့် လှဲမ် ယီ အိုင် ဒီ ဒူပ် အာငျာန်။

24 ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ပွိုန် ပီ ဆီ ပွိုန် ဂေ။ အီ မုး ဂေ ဒူအီ ဟာယ်၊ ဂေ ယီ ပွိုန် ပီ ယုဝ် ဂေ။

25 ဂေ ဒူအီ ဟာယ်၊ ဂေ ဒီ ဘော ဟြာယ် ဒေါ မိုဝ်း ခုန် တာင် တး။ ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ယီ ကွယ် ဆီချာ၊ ကွယ် ဒါခိုယ် ဆေဆေ။

26 ဆေ မဲ စ်ု ဒူအီ ကြာန် ရန့် ဂါန် မဲ။ န့ ဒီ ပီ မဲ ဟူမ် ပြာင် အီ တဲး ဟြာင် မဲ ကာဟိဝ်။ န့ ဒီ ဘော ပီ ဒက် လိုပ် ခဲင် ငါယ် မဲ။

27 တဲး မဲ ရုဝ်ဆေ ဇဝ်ဖြာ။ န့ ဒီ တဲး အာဆာက် မဲ တူင့်။ အီ မုး ဂေ ဒူအီ ဟာယ်၊ ဂေ ယီ စေဝ် ယမ်။

28 ပီ နှဝ့် န့ဒဝ့် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ န့ မုး နာ ဘျုဝ် ဒါခိုယ်။ ပီ နှဝ့် န့ဒဝ့် ဂေ ဒူအီ ဟာယ်၊ န့ ယီ တဲး ဂေ ကာလုတ့် နဝ်း။

29 ဇဝ်ဖြာ ဒီ ဘော ရဲ ဘော ဂွင့် ဂေ အီ မိုဝ်း နဝ်း ဘွတ် နဝ်း မွှိုမ်၊ အန် ယီ ဝဲန် ဂေ အီ ဘူင် မှာပ်၊ တဲး ဂေ စှိုမ်။

30 ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ပွိုန် ဒီ ကွယ် ဒါခိုယ် ခဲင် မိူင် ဒူင် ကွယ် ဂေ။ ဂေ အီ တူ မွှိုမ် ယီ တူ ပွိုန် ဒီ ကွယ် ခဲင် မိူင် ပီ ဒွါ အန် ဇဝ် ဒီ ဂေ။

31 ဂြုဝ်း ပီ ကာလာင် ဂေ အီ မိုဝ်း နဝ်း ဆိူဝ် နဝ်း မှာန်၊ န့ ဘော မိုဝ်း အာငျာန်။ ဂြုဝ်း ပီ ကာလာင် ဒူအီ ဟာယ်၊ ဒူအီ တူ မွှိုမ်၊ ယီ လုဝ် ဝဲန်၊ ကွဲ့ တဲး အီ ထူမ်။

32 ခဲ့ ကွယ် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ နပ် ဒီ ကာလာင် ဂြုဝ်း ဒါခိုယ် အီ မွှိုမ် ထူမ် ဘော လဝ့် နဝ်း အီ။ ဂေ အီ တူ မွှိုမ် ယီ နပ် ဒီ ကာလာင် မီ ဂြုဝ်း ဂုဝ့် ဂဲ့။