1 အာငျာန် ပီ အီဘိုန့် အီ ဟဲ့ ဆမ် ကာင်။ အန် ဟဲ့ ဆမ် ရွင့် အာဒါ ဘူ ညွင့်၊ တဲး န့ ဇေ့ဇုင် တူတ့် ဒွန် မျုဝ်။

2 အန် ဟဲ့ ဟွတ့် ငဝ်း ဒုဝ် ဆတ်ဒါဝါ၊ တဝ်း ဒီ ဘူင် ဘ့လွယ်။ အန် ဟဲ့ ရဲန် အုန် ဘော အိုမ် မာငုန်၊ ဟဲ့ ဘ့လေး ဒဲင် မာတိန့်၊ တဲး ဂေ ဟူမ်။

3 အန် ဟဲ့ စ်ု ဒဲစေန့် အန် အီ မုး အီဘိုန့်၊ တဲး ဂေ ဟာဝ် ဘာင် ခဲတ့်။ တဲး ဂေ ကာလာင် ဒီ ဒူင် စာ ခဲင် မိူင် တဝ်း၊

4 “အိုယ် ဘေ ဒူအီ ဒွန် အီ၊ ဝီ မှဝ် အီ ရိုဝ်၊ တဲး အန် တး ဒူင် ကွယ် အုဝ်။” ဟဲ့ ဟွတ့်၊ အန် ပီ ဝီ တဝ်း ဒီ ဂေ ဒူအီ အီ တူ နပ် ဒီ ကာဖာ၊

5 “တး၊ အုဝ် တဲး ဘေ တး ဟူမ် ပီ ဒီ ဟူမ်၊ ဒျီင် အိုမ် မာငုန် ပဲ့ ဟဲ့ ရဲန် အုန် အုဝ်။

6 တဲး ဘေ ဝး အီ ရိုဝ်၊ တဲး ဘေ အိမ်၊ ကွဲ့ တဲး ဘေ စေဝ် ယမ်၊ တဲး ဘေ မိုဝ်း အာငျာန်။”

7 ပါယ် တီ၊ ဝီ မှဝ် အီ မာနုဝ် ဒူအီ ပီခိုက်၊ အန် အီ ဒီ ကာဒုး အေး။ ဝီ မှဝ် အီ ကာလာင် မှာပ် ဒီ ဒူအီ ဟာယ် ဒူအီ မိူက်၊ အန် ဒီ ကာဒုး နာ စီစိဝ်။

8 ကွဲ့ မာနုဝ် ဒူအီ ပီခိုက်၊ အန် ဒီ ဇွင့် မဲ။ ဆေ မဲ မာနုဝ် ဒူအီ အီ မိုဝ်း အာငျာန်၊ အန် ဒီ ရွက့် မဲ။

9 ဆေ မဲ ကာလာင် ဘဲန် မျုဝ် ဘဲန် မျုဝ် ဒီ ဒူအီ အီ မိုဝ်း အာငျာန်၊ အာငျာန် အန် ဒီ ဝဲ မိုဝ်း ကာပွါ။ ခဲ့ ပီ ကာလာင် မဲ ဒီ ဒူအီ အီ မိုဝ်း နဝ်း ဆိူဝ် နဝ်း မှာန်၊ န့ ဒီ တဲး အန် ဝဲ နပ် ကာပွါ။

10 အာဆေ ဆီ ပွိုန် အာငျာန် ဘွတ် လုဝ် ရုဝ်ဆေ ဇဝ်ဖြာ ဒီ အာတ့်။ ဆေ မဲ နပ် ဇဝ်ဖြာ အီ ဘွတ် ကာဆဝ်၊ မဲ ဒီ မိုဝ်း ဘော အာငျာန်။

11 အုဝ် အီ မုး အာငျာန် တီ၊ အုဝ် ဒီ စွယ် တဲး အာဆာက် မဲ တူင့်၊ တဲး မဲ ကွယ် ဘဲန် ဆီနမ် ဘဲန် ဆီနမ်။

12 ဆေ မဲ မိုဝ်း အာငျာန်၊ န့ ဒီ ဘဲန် အာဂျိုဝ် ဒီ မဲ။ ဆေ မဲ ယီ ဝဲန်၊ န့ ဘဲန် ဒုက် ဒီ မဲ။

13 လွင် အီ တူ လွှက့် တီ၊ န့ ပီ အီဘိုန့် အီ ရိုဝ် ဘော ကာလာင် ဂြုဝ်း တာင်၊ ယီ တူ နပ် မာဆေ။

14 အန် ဘော တုတ့် ဘာင် မာလုဝ်း ခဲင် ကာင် အန်။ မင် ဇေန့် ဘော တုတ့် ဒူင် စာ ကာတဲ မိူင်။

15 အန် ဒဲ့ ဂေ အီ ဟာဝ် ဒူပ် န့တေန့်၊ ဂေ အီ ဟာဝ် ဟာဝ်၊ တး တး။

16 အန် တဝ်း၊ “အိုယ် ဘေ ဒွန် အီ၊ ဝီ မှဝ် အီ ရိုဝ်၊ တဲး အန် တး ဒူင် ကွယ် အုဝ်။” ဟဲ့ ဟွတ့်၊ အန် ပီ ဝီ တဝ်း ဒီ ဒူအီ အီ တူ နပ် ဒီ ကာဖာ၊

17 “အိုမ် ပီ ပြာ အီ ဒီ ဒျီင်၊ န့ ဆီငဲး ကာဆဝ်။ ပီ ဒီ ဟူမ် ပီ ပြာ အီ ဒီ ဟူမ် ဘော ဝဲ ဆီငဲး။”

18 ဂေ အီ ထူမ် ဂြုဝ်း ပီ ကာလုဝ် အန် တီ၊ ဂေ ယီ တူ နပ်၊ ကာင် အန် မုး ဒူင် ကွယ် ကာပြဝ် ဒူအီ ယမ်။ ဂေ အီ ဟာဝ် ဒီ ကာင် အန်၊ န့ ပီ ဂေ လူင် မိူင် မာရာန။