1 တဲး ဘေ ထူမ်၊ န့ ပီ အာငျာန် ဟဲ့ ဒတ် တာင်။ အာငျာန် တီ ဘော ပီ အီဘိုန့် အီ နပ် တူတ့် ဒွန် မျုဝ်၊ အီ ကာလာင် ဂြုဝ်း။

2 အန် ကွယ် ဒီ မွိုပ် န့တေန့် တဲး အီ ပွိုန် ဒီ ယိုဝ် အန်။ အန် ကွယ် ဘော ဒီ ကာယဝ်း န့တေန့်၊

3 ဘော ဒီ ဘာင် မာလုဝ်း မိူင်၊ ဒူင် ဒီ လိုပ် ဒူအီ ခဲင် မိူင်။

4 အန် ဒတ် တာင် တဝ်း၊ “အိုယ် ဘေ ဒူအီ ဒဲင် ကာဒါယ် ဒွန် အီ၊ အုဝ် ဒီ ခဲ ဒီ ကာလာင် ဒီ ဘေ။

5 ဘေ ဒူအီ အီ ဆီ နှိုမ်၊ တဲး ဘေ နပ် ဒီ ကာယဝ်း အီ မွှိုမ် အီ တူ မွှိုမ်။ တဲး ဘေ နပ် ဒီ ကာဖာ။

6 တဲး ဘေ ထူမ် ဂြုဝ်း အုဝ် အီ မုး အီ မွှိုမ်။ ခဲ့ ကွယ် ဂြုဝ်း ပီ ကာလာင် အုဝ်၊ န့ ဘော မုး တူတ့် ဂြုဝ်း ဆိူဝ်၊ ဂြုဝ်း မှာန်။

7 ဂြုဝ်း ပီ ကာလာင် အုဝ်၊ န့ ဘော မုး ဂြုဝ်း အီ မုး အီ မှာန်။ ဂြုဝ်း ကာလုဝ်၊ အုဝ် ဘော ကာအိး ကာဆဝ်။

8 ဂြုဝ်း ပီ ကာလာင် အုဝ် နီ၊ န့ ဘော မှာန် အာခါခ်ု။ အာဝ် မုး ဂြုဝ်း ဂုဝ့် ဂဲ့၊ အာဝ် မုး ဂြုဝ်း ကာလိုပ်။

9 ဂေ အီ မိုဝ်း အာငျာန်၊ ဂေ နပ်၊ ဂြုဝ်း အုဝ် ဟဲ့ မှာန်။ န့ ဘော လိုဝ်း ဆီချာ ဒီ ဂေ အီ နပ် ဘဲန် မျုဝ် ဘဲန် မျုဝ်။

10 တဲး ဘေ ဒိုဝ်း ပီ မာနုဝ် အုဝ် နီ၊ အာတ့် ဒိုဝ်း ဘေ ရွိုန်။ တဲး ဘေ ဒိုဝ်း အာငျာန် အုဝ် နီ၊ အာတ့် ဒိုဝ်း ဘေ ခြိဝ်။

11 ခုဝ်၊ အာငျာန် ဟဲ့ ဘွတ် လွှိုမ် ဆဲန့် ရေန့် အီ ငဝ်း တာင်။ ခဲ့ ပီ ဆီ ပွိုန် မဲ ဒွန် မျုဝ်၊ အာဝ် မိုဝ်း အီ ပွိုန် ကာဂဝ် ဒီ အာငျာန်။

12 အုဝ် အီ မုး အာငျာန်၊ အုဝ် ဘော ကွယ် ရိုမ် ဒူပ် ဂေ အီ နပ် ဒီ ကာဖာ။ အုဝ် ဘော နပ် ဘဲန် မျုဝ် ဘဲန် မျုဝ် ဘော နပ် ဒီ ကာယဝ်း အီ မွှိုမ် အီ တူ မွှိုမ်။

13 အာဆေ ရုဝ်ဆေ ဇဝ်ဖြာ၊ အန် ဒီ ဘော ဇွင့် နာ တူ မွှိုမ်။ အုဝ် မိူဝ် ဇွင့် အီ ပီခိုက်၊ ဇွင့် ဘော ဂေ အီ နပ် ဒီ နဲန တူ ရုဝ်ဆေ အီ ဟဝ်၊ ဘော ဂေ အီ ကာလာင် ဂြုဝ်း တူ မုး တူ မှာန်။

14 အုဝ် ဘော မိုဝ်း အာကျာမ် အာငျာန်၊ ဘော စွယ် တဲး အီ ဘူင် နာ မွှိုမ်။ အုဝ် ဘော နပ် ပီ ပါယ် ဘဲန် မျုဝ် ဘဲန် မျုဝ် ဘော မိုဝ်း ပွုန်။

15 အုဝ် ဟဲ့ စွယ် ဂေ ခုန်ဒီခမ်၊ တဲး ဂေ နပ် ဒီ အိုပ် မိူင် ဂေ။ အုဝ် ဟဲ့ စွယ် ဂေ ဒါ ကာညာ အိုပ် မိူင်၊ တဲး ဂေ နပ် ဒီ ဘ့လေး အုန် ဒါရာ အီ ဒူပ် နာ မုး နာ မှာန်။

16 ကူပ် ဟဲ့ စွယ် အုဝ် ဒီ ဂေ၊ ဂေ ဒါ ကာညာ ဟဲ့ ပွိုန် ဒီ အိုပ် မိူင်။ ဘော ဂေ ဒါ တာင် နပ် ဒီ ဆုင်ဖျာတ် အာမူ အီ။

17 အုဝ် မိူဝ် ရွက့် ဂေ အီ ရွက့် အုဝ်။ ဂေ အီ ဂျုဝ်ဂျာ ဒီ ဟြေတ့် အုဝ်၊ ဂေ ဒီ ကာတုန့် အုဝ်။

18 န့ ယီ မုး အုဝ်၊ အီ မိုဝ်း ကြုဝ်ကြာမ် ဘော ဆာရေ။ ဘော အီ ဘျုဝ် အီ ခြမ်၊ အီ တူ နပ် ဒီ ဟြာယ် မိူဝ်၊ အုဝ် ဒီ ဒွါ။

19 ခဲ့ ပီ ပွိုန် မဲ ဒီ အုဝ်၊ န့ မွှိုမ် လွှိုမ် ခြိဝ် ဇဲတ်။ အာဂျိုဝ် အန် ဟဲ့ မွှိုမ် လွှိုမ် ရွိုန်။

20 အုဝ် ဟာဝ် ဒူပ် န့တေန့် ဆိူဝ်၊ ဘော ဟာဝ် ဒူပ် ဒါရာ မှာန်။

21 အုဝ် တဲး ကြုဝ်ကြာမ် ဒီ ဂေ အီ ရွက့် အုဝ်၊ တဲး ဂေ မိုဝ်း ဒီ အုန် ခါဂုန် ကိူန်။

22 အာတ့် ဘူင် ဇဝ်ဖြာ ဒွန် မျုဝ်၊ အန် ဟဲ့ ဖာန် ဘ့လေး အုဝ်။ အူ ဆိန့် ဒေါ ဂုဝ် အန်၊ အန် ဇဝ် ဟဲ့ ဘူင် ပါယ် တီ။

23 အာတ့် မိုဝ်း အာမျုဝ် ဟဝ် အုဝ် ဟဲ့ ကွယ် ဆေဆေ။ ဆိန့် အာတ့် မိုဝ်း ကာဒါယ် ဂေ ဘ့လေန့်၊ အုဝ် ဟဲ့ မိုဝ်း။

24 အုဝ် ဟဲ့ ဟွတ့် ဂွိုတ် အာတ့် မိုဝ်း နမ်မုက်ဆာရာ။ အာတ့် တုဝ်း အိုမ် ဒဲင် ကာဒါယ် နီ၊ အုဝ် ဟဲ့ ကွယ်။

25 အုဝ် ဟဲ့ ဂွိုတ် ဆိန့် အာတ့် မိုဝ်း နွန် အီ ကုက် ယိတ့် ဒွန် ပ့လုဝ့်၊

26 အာတ့် ဖာန် ဘ့လေး ဇဝ်ဖြာ ကာဒါယ် ဘော ဒူင် ဂ့လင် ဒွန် ပ့လုဝ့်၊ အာတ့် မိုဝ်း ကာပုး ဒဲင် ကာဒါယ်၊ အုဝ် ဟဲ့ ကွယ်။

27 အုဝ် ဟဲ့ ကွယ် ဒေါ ဘူင် ဇဝ်ဖြာ ဂါင်ဟြာဝ်၊ ဒေါ ဆိး အန် ဒူင် ဆိူတ် ဘ့လေန့် အီ ကွယ် ဒဲင် အိုမ် နမ်မုက်ဆာရာ၊

28 ဒေါ တဲး ဇဝ်ဖြာ န့အု ကွယ် ခဲင် ဘ့လေန့်၊ ဒေါ ဘူင် အန် တဲး အိုမ် တုဝ်း ခဲင် ကာဒဝ် ဒူင် လိုက်။

29 အုဝ် မိူဝ် ဟဲ့ ကွယ် ဒေါ ကာလာင် ဇဝ်ဖြာ ဒီ အိုမ် နမ်မုက်ဆာရာ တဝ်း၊ ‘မဲ တူ ပွိုန် မ့ပုန် ခူပ် ပီ ကာလာင် အုန် အုဝ် ဒီ မဲ နီ။’ ဆိန့် ဘ့လေး အန် ဇဝ် ဒင် ကာဒါယ် နီ၊ အုဝ် ဟဲ့ ကွယ်။

30 ဒေါ အန် တီ အုဝ် ဟဲ့ ကွယ် ခူပ် အန် ဇဝ် ပီ ဒါ ဆာရာ အီ နပ် ဒီ ဘူင် ဒွန် မျုဝ်။ ပါယ် တီ၊ အန် ဇဝ် ဘော ဒါခိုယ် ဒွန် ဆီငဲ။ အုဝ် မိူဝ် ခူယ် ဆေဆေ ဒူပ် အန် ဇဝ်။

31 အုဝ် ဟဲ့ ဒါခိုယ် ကူပ် မိုဝ်း ကာဒါယ် နီ။ အုဝ် ဘော ဘျုဝ် ဘော ခူယ် ကူပ် ကွယ် ဂေ ဒူအီ ဒွန် မျုဝ်။

32 ဒေါ တီ နီ၊ တဲး ဘေ ဂွန် ကာညူမ် အုဝ် ထူမ် ဂြုဝ်း အုဝ်၊ ဘူင် ဒူပ် ခဲ့ ပီ ကာလာင် အုဝ် ဒီ ဘေ။ ဆေ ဘေ ဘူင် ပါယ် တီ၊ ဘေ ဒီ ဘျုဝ် ဒါခိုယ်။

33 တဲး ဘေ ထူမ် ပဲ့ ဟဲ့ ဟွတ့် ဘေ ဟေန် တီ။ တဲး ဘေ မိုဝ်း အာငျာန်။ ဘေ ကွဲ့ ဘ့လေး၊ ကွဲ့ ဝဲန် အန်။

34 အာဆေ ထူမ် ဂြုဝ်း အုဝ်၊ ဘော ကွယ် ဘာင် မာလုဝ်း ကာင် အုဝ် ဒွန် ဆီငဲ၊ ဘော နှဝ့် ဒီ ထူမ် ဘာင် မာလုဝ်း အုဝ်၊ အန် ဒီ ဘျုဝ် ဒါခိုယ်။

35 အာဆေ ကာတုန့် အုဝ်၊ အန် ဒီ ပွိုန် အာဆာက် ကာမာယ်။ အန် ဒီ ဘော ပွိုန် ပီ ဂေဇူ ဇဝ်ဖြာ ဒီ အန်။

36 အာဆေ ယီ ကာဂဝ်း ဒီ အုဝ်၊ အန် လုဝ် ခမ် ပီ ဘူင် အန်။ ဂေ ဒွန် အီ အီ ဇွင့် အုဝ်၊ ဂေ ရွက့် မိူင် မာရာန။”