အိုယ် ဂွန် ကာညူမ် အုဝ်၊ တဲး မဲ ထူမ် ဂြုဝ်း အုဝ်၊ တဲး မဲ နုဝ် အုန် ဂြုဝ်း အုဝ် ခဲင် နဝ်း မဲ။

2 တဲး မဲ ဘူင် ဒူပ် ပီ တဝ်း အုဝ်၊ တဲး မဲ မိုဝ်း အာဆာက်။ တဲး မဲ ဘော ဘ်ု ဆီချာ ဒါရာ အုဝ်၊ တဲး န့ ပီ မဲ လိုမ်လာ ငါယ် မဲ။

3 တဲး မဲ လှုဝ်း ဆေဆေ၊ တဲး န့ ပီ ဆီကာနူ အီ ဟဲ့ စှိုပ် ဒီ ကာနူ မဲ။ တဲး န့ ဒိုက် ဒီ နဝ်း မဲ။

4 တဲး မဲ တဝ်း၊ အာငျာန် ပီ အီကတ် မဲ။ တဲး မဲ ရီမာတ် အာငျာန် တီ ပီ ဝေါဝဲ မဲ။

5 ဆေ မဲ ဘူင် ပါယ် တီ၊ မဲ ဒီ လွတ် ဒီ ယာ မာလမ်၊ အီ မှုဝ် ဒီ ကဝ် အီ၊ အီ မှုဝ် ဒီ ကာလာင် ဂြုဝ်း။

6 အုဝ် ဟဲ့ ဒွိုမ် ကွယ် ခဲင် ကာင် အုဝ်၊ ယွတ် ဟာဝ် ခဲင် မာလုဝ်း။

7 အုဝ် ဘော ယိုဝ် ဂေ ဂွန် အီ တူ နပ် မာဆေ၊ ဂေ ကိူန် ကွယ် ဒီ တီ။ ကာတဲ ဂေ တီ၊ န့ မိုဝ်း ကာညူမ် အူ ဝီ၊ အန် ရိုဝ် ကာဆဝ်။

8 အန် ဘော ဟာဝ် ဒူပ် န့တေန့်၊ ဇမ် ကာတတ် ဒီ ဂုဝ့် န့တေန့် အီ မုး ဒူင် ကွယ် ယာ မာလမ်။ ဟဲ့ ဟွတ့်၊ အန် ဘော ဟာဝ် ဆိူဝ် ဒီ ကာင် ယာ မာလမ် တီ။

9 ဒေါ အန် တီ ဟဲ့ မုး ဘာ ဒီ အပ်။ အာဝ် ဟူ ဘော လိုဝ်း ဆီချာ၊ ဟဲ့ ရာမ် အပ် ဝွင့်။

10 အီဘိုန့် တွိုန် ဘော လေး။ အန် ဟဲ့ စှိုပ် ခြိုင် ယာ မာလမ်၊ ဟာဝ် ဘ်ု ဒီ ရွုး၊ ဘ်ု ဒီ ကဝ် ကာညူမ် တီ။

11 အီဘိုန့် တီ မိူဝ် တူ မိုဝ်း ဆာရေ။ အန် ဘော ယ ဟာဝ် ဒူပ် န့တေန့်၊

12 ဟာဝ် ဘ်ု ဒီ ဂုဝ့် န့တေန့်။ မင် ဇေန့် အန် ဘော ဘ်ု ကာတဲ န့တေန့် ဘော ခဲင် ကာလး။

13 အန် ဟီ ယိုဝ် ကာညူမ် တွိုန်၊ အန် ဘော ငျီမ် ဘော ပုတ့် ဘော အုး ဘော ယွတ် တွင့် ကာညူမ် တဝ်း၊

14 “အာတိုဝ် နီ၊ အုဝ် ဟဲ့ ရဲန် ဒီ လှူ အီ ကွယ် ကာဇု ဟူမ် ရိုမ်။ ယင် ယီ ဆီ မိုဝ်း။ အုဝ် ဟဲ့ ဟွတ့် ဒွါ ကာဒိက် ဆတ်ဇာ၊ ဟဲ့ လုဝ် ဘူင် ဒူပ် ကာဒိက် ဆတ်ဇာ တီ အာတိုဝ် နီ။

15 ကူပ် ပါယ် တီ၊ အုဝ် ဘော ဘ်ု ဒီ ရွုး မဲ။ ဒေါ တီ နီ အုဝ် ဟဲ့ ကာတုန့် မဲ။

16 အုဝ် ဟဲ့ ဟွတ့် ဒ အုန် မ့ဘေ၀် ဘိက် ချုဝ် ဒဲင် ကာစှူင့် အိတ် အုဝ်။ န့ ဘော မုး ဘိက် ပီ စိုဝ်း တး မိူင် အဲဂိုပ်။

17 အုဝ် ဟဲ့ ခြဝ်း ဘော န့ကြိုဝ်း အုး ငှုန် ဒဲင် ဒီနွှင့် ဒူင် အိတ် အုဝ်။ န့ မုး ကာညန် လေဘူန်၊ ဘော ဒဝ် အာလုဝ် ဘော ဂ့လဲ့ ဟေ ဆီနာမူန်။

18 တး၊ တဲး အာယ် ကွယ် ရိုမ် အိတ် ရိုမ်၊ တဲး န့ ကော ဇမ် ပြဲ ဝး။ တဲး အာယ် အိတ် လာယ် ငျီမ်၊ လာယ် ရွက့်၊ တဲး န့ ကျဝ်။

19 အီမာယ် အုဝ် မိူဝ် တူ ကွယ်၊ အန် ဟဲ့ ဟာဝ် ရဝ် တူင့်။

20 အန် ဟဲ့ ဒိုဝ်း ဒီ ဂူင့် ဟူ ရွိုန်။ မာဂျီန် ဟီ ကာလင် အန် ကော ဒီ ဝီ တး ဇမ် ဒီ ကာင် နီ။”

21 အီဘိုန့် တီ ဘော နပ် ဒီ ကာလာင် ဂြုဝ်း ဒါခိုယ် မွှိုမ် ထူမ်၊ ဝွက့်ဝဲန့် ကဝ် ကာညူမ် တီ။

22 အန် ဘော ဒူပ် အီဘိုန့် တီ အူ ဇေန့်။ အန် ဘော ပီ မာမက် ပီ တိုန့် ဟာဝ် အီ ဒီ ငဝ်း။ အန် ဘော ပီ မာဇ အီ ဟဲ့ ခြေ ယွတ့်၊

23 တဲး ဘ့လာ အ ကာလှန် ဇမ် ကာဒူမ် အန်။ အန် ဘော ပီ မာဆိမ် အီ ဟဲ့ လိုပ် ခဲင် ယွတ့်၊ ယီ တူ နပ်၊ အန် ဟဲ့ ဇမ် ဒူင် ဒီ ယမ် အန်။

24 ခုဝ် အန် တီ တဲး ဘေ ဂွန် ကာညူမ် အုဝ် ထူမ် ဂြုဝ်း အုဝ်။ တဲး ဘေ ဘော နုဝ် ပီ ကာလာင် အုန် အုဝ်။

25 ကွဲ့ တဲး အီဘိုန့် ဇိုဝ် တီ ပွိုန် ဒီ ကဝ် ဘေ။ အာဝ် လုဝ် ဟာဝ် လဲ ဟာဝ် ဝိန် ကာင် အန်။

26 ခုဝ်၊ အန် ဟဲ့ ဘူင် တဲး အီမာယ် လိုဝ် စှိုမ် ကိူန် ကာဆဝ်။ အီမာယ် ပဲ့ ဟဲ့ ပဲ အန် ဒီ ကဝ် ဟဲ့ ဘဲန် ဖိုင် ကိူန်။

27 န့ ပီ ကာင် အန် ကွယ် ဒူပ် န့တေန့် အီ ဟာဝ် ဇမ် မိူင် မာရာန၊ အီ လူင် ဒူင် ကွယ် ဂေ ဒူအီ ယမ်။