1 အိုယ် ဂွန် ကာညူမ် အုဝ်၊ ဆေ မဲ ဟဲ့ တဝ်း ဒီ ဝျီ့ နီ ဒါင် အီ ဟဝ်၊ ဆေ မဲ ဟဲ့ ဖြူမ် ဒီ ဘူင် ဒါင် အန်၊

2 ဆေ ဂြုဝ်း ပီ ဒွိုမ် ကာလာင် မဲ ဟဲ့ ဝီ ဘဲန် ယွတ့် အီ ဝီ မှေတ့် မဲ၊

3 ဆေ အီ ဟဝ် ဒီ ဝီ အိုပ် မဲ ကူပ် ဘူင် မဲ ပါယ် တီ၊ တဲး မဲ ဘူင် ပီ တဝ်း အုဝ် ဒီ မဲ၊ တဲး မဲ လွတ်။ မဲ လုဝ် ပီ တျီမ် နဝ်း မဲ၊ ဟာဝ် ဒူင် ကွယ် ဒူအီ တီ၊ ဝီ ဒွင်ဘာန် အန်၊ တဲး အန် ခ့ဝါင် ဒီ မဲ။

4 ကွဲ့ တဲး မဲ ဒီလှဝ်၊ ကွဲ့ တဲး မဲ အိတ်။

5 တဲး မဲ ဂျုဝ်ဂျာ တဲး မဲ လွတ် ခဲင် ယွတ့် တီ။ တဲး န့ ပီ မာဇ ဟဲ့ လွတ် ဒီ ဒူအီ လဲ ပြဲ၊ တဲး န့ ဘော ပီ မာဆိမ် ဟဲ့ လွတ် ဒီ ခိူမ်။

6 အိုယ် မဲ ဒူအီ ကြာန်၊ တဲး မဲ ဟာဝ် ယွတ် မာပြုန့်။ တဲး မဲ ဟေန် ပီ ဘူင် ပီ ရန့် မာပြုန့် တီ၊ တဲး မဲ ပွိုန် အာငျာန်။

7 ဂေ တူ မိုဝ်း ဆာရာ၊ တူ မိုဝ်း ဒါ တာင်၊ တူ မိုဝ်း ခုန် ရဝ်။

8 ဂေ ယီ နပ် ဒီ တုဝ် တး ပီ ဒီ ဟူမ် ဂေ ဒေါ အာခြာဝ် ဆုဝ့်။ ဂေ ဘော နပ် ဒီ တုဝ် ကာဇု အုန် ပီ ဒီ ဟူမ်၊ ပီ ဒီ တာ ဂေ ဒေါ အာခြာဝ် မး။

9 အိုယ် မဲ ဒူအီ ကြာန်၊ မဲ ဒီ အိတ် လှေန့် ခဲ့ မှဝ်။း ပန် မှဝ် မဲ ဒီ ယိတ့်။း

10 ဆေ မဲ တဝ်း၊ “အုဝ် ဒီ အိတ် ပေါ အူ ကာစန်။ အုဝ် ဒီ အိတ် ဒီလှဝ် ပေါ အီ စဲက်၊”

11 အာခြာဝ် ဒေါ အိတ် မဲ တီ၊ ဖ့လာန် ဂေ အေတ့် ဒီ တး ပျာတ့် မဲ ပီ ဒါ ဇူန်။ ဂိန် ဒီ ဘော တး ဒီ မဲ ပီ ဒါ အီ ဂူင့် ခြိုင် ကာဂုဝ်း ဟဲ့ တး။

12 ဒူအီ ဟာယ် အီ တူ မိုဝ်း ဒီခုဝ်၊ အန် ဘော နပ် ဒီ ဝိန် ဒီလဲ ကာလာင် ဂြုဝ်း ဂုဝ့် ဂဲ့၊

13 ဘော နပ် ဒီ ကာယပ် ငါယ်၊ ဘော နပ် ဒီ နှဲ တာ ပ့လဝ် အန်၊ ဆီကူ တာ ကာနူ အန်။

14 အန် ခြာမ် ဒီ ဘူင် မီ နာ တူ မွှိုမ်၊ ဘူင် တဲး အီ ကာလုတ့် ဆေဆေ။

15 ခုဝ် အန် တီ အန် ဒီ ဘော ကာဒုး အာဖေ အာရေ အူ ဇေန့်။ န့ ပီ အန် ဒီ ကာဘက် လိုဝ်၊ ကွဲ့ တဲး န့ ဆီ ပွိုန် ဆီနမ်။ အန် ဒီ ဘော လုဝ် ခမ် ပါယ် တီ။

16 ပီ ဇွင့် ဇဝ်ဖြာ၊ န့ မိုဝ်း ဒဝ် မျုဝ်။ ပီ ကြာန် အန် ဒီ ယိုဝ်၊ န့ မိုဝ်း ဘူ မျုဝ်။

17 ဂေ အီ မိုဝ်း နဝ်း ပီခိုက်၊ ဂေ အီ ဆီမာ ကာလုဝ်၊ အီ ငဝ်း ယမ် ဒူအီ တူ မိုဝ်း မှာပ်၊

18 ဂေ အီ ခြာမ် ဒီ ဘူင် မီ နာ စီစိဝ်၊ ဂေ အီ အွန် ဒီ ဘူင် မှာပ်၊

19 ဂေ အီ ဘဲန် ဆက်ဆေ၊ ကာလာင် နာ တူ မှာန် ဘော ဂေ အီ နပ် ဒီ ဘူင် တဲး အူ ဝေါဝဲ လာယ် ဇွင့်၊ ဇဝ်ဖြာ ဇွင့် ဇိုဝ် တီ တူတ့် ဒွန် မျုဝ်။

20 အိုယ် ဂွန် ကာညူမ် အုဝ်၊ တဲး မဲ ဘူင် ဒူပ် ပီ ကာလာင် ဂုန့် မဲ၊ ကွဲ့ တဲး မဲ ပိဝ် ပီ မာနုဝ် မာ မဲ။

21 တဲး မဲ ဒိုဝ်း ဂြုဝ်း တီ အုန် ခဲင် နဝ်း မဲ၊ တဲး မဲ နုဝ် ဆေဆေ၊ တဲး န့ ပီ မာကာဝဲ့ အီ ဟွယ် ဒီ မဲင် မဲ။

22 ဂြုဝ်း ဇိုဝ် တီ၊ န့ ဒီ ယဲတ့် ဒီ တိုယ် မဲ ဒေါ ဟာဝ် မဲ ဒူပ် န့တေန့်။ ဒေါ အိတ် မဲ ခဲင် မှိုဝ်၊ န့ ဒီ ဘော ရဲ ဘော ဂွင့် မဲ။ ဒေါ န့ဆိုဝ်း မဲ၊ န့ ဒီ တဲး မဲ ဇေန့်ဇာ လွင် အန် တီ။

23 ဒါရာ တီ၊ န့ ဘော ပီ ဘ့လာင်။ ဘော ပီ မာနုဝ် ဂုန့် မာ မဲ ဟဲ့ ပီ ငဝ် အွမ် တာင်။ ပီ ဒမ် ဒါရာ တီ၊ န့ ဘော မာနုဝ် တဲး မဲ နပ် ပီ ဒီ ပါယ် ဒီ ဘူင်။

24 န့ ဒီ ဘော စွယ် ဘော ခြဲ မဲ ဒီ အီဘိုန့် ဟာယ်၊ အီ နပ် ဒီ ကဝ် ဝွက့်ဝဲန့် မဲ၊ ဘော အီဘိုန့် အီ ဟဝ် အီ ဒဲ့ မဲ။

25 ကွဲ့ တဲး နဝ်း မဲ ဒိုက် ကူပ် စှိတ် အန်။ ကွဲ့ တဲး မဲ ဟဝ့် ကူပ် ကာလှဲ ငါယ် အန်။

26 ခုဝ်၊ ငဝ်း ယာ မာလမ် တီ ဒါန် ခါမုန် အူ ဘူင့်။ အာဆေ ယီ လုတ့် အီဘိုန့် အီ၊ အန် ဘော နပ် ဒီ စှိုမ် အာဆာက် အန်။

27 အီမာယ် အီ ဘူင် ပါယ် တီ၊ န့ ပီ အန် ဂြူပ် ငဝ် ဘ့လေး ဒဲင် ဘာင် နဝ်း အန်။ အာဝ် ပွိုန် ဘူင်၊ ကွဲ့ တဲး ခြိုင် အန် ကာဆိုမ်။

28 န့ ဘော ပီ အန် ညဲတ့် ဟာဝ် ဒဲင် န့ကိုဝ် ငဝ်။ အာဝ် ပွိုန် ဘူင်၊ ကွဲ့ တဲး ပ့လဝ် အန် ဘ့လုး။

29 ဆေ ဒူအီ အူ ဝီ လုတ့် အီဘိုန့် အီ၊ န့ ဘော ပါယ် တီ။ ဒူအီ အီ ဘူင် ပါယ် တီ၊ အန် တူ လွတ် ခမ် မှာပ် အန်။

30 ဆေ န့ မိုဝ်း ဒူအီ အူ ဝီ အီ ဟဲ့ ကာပြာန့် ဘူမ်၊ ဆေ အန် ဘော ပြာ ပီ ဒီ ဟူမ် ကူပ် အေတ့် အန်၊ ဒွန် အီ နပ် ဒီ ကာဝေ အန်။

31 မာလဲ၊ ဆေ အီ ဟီ ယိုဝ် ဒေါ ပြာ အန်၊ အန် ဒီ လုဝ် ဆေ လုဝ် ယဝ် ဝိဝ် ဒီ အီ ဘူ ဘုန်။ ခဲ့ ကွယ် ကြုဝ်ကြာမ် ခဲင် ကာင် အန်၊ အန် ဒီ ကာဒုး ဒီ ဒွါ တူတ့် ဒီ အီ။

32 ဒူအီ အီ လုတ့် အီဘိုန့် အီ ဟဝ်၊ အန် တူ မိုဝ်း အာငျာန်။ အန် ဘူင် တဲး အာဆာက် အန် စှိုမ်။

33 အန် ဒီ ကာဒုး ဒီ ခမ် အီ မး အန် ဘော စှိုမ် ဆာရေ။ အန် ဒီ ဘော လုဝ် ဆာယ် အီ ဆေဆေ။

34 အီမာယ် ဘြိမ် အီဘိုန့် တီ၊ အန် ဒီ ဘော နပ် ဒီ ရူ ကာဆဝ်၊ တူ ခမ် အီ ဟဝ် လာယ် အီဘိုန့် အန်။ ခုဝ်၊ ဒေါ ဝီ ဘူင် ဝျီ့ အန် နာ တူ မွှိုမ် ဒီ အီမာယ် ပေါ အူ ဝီ၊ အန် တူ မိုဝ်း နဝ်း ကာဝေ။

35 အန် မိူဝ် တူ ဒိုဝ်း ပီ ဆီ ဒွါ အီမာယ် ပေါ အူ ဝီ တွိုန်၊ န့ ပီ ဘော ကိူန် ခဲ့ မှဝ်၊ န့ တူ ဘြေ့ ဒီ နဝ်း အန်။