ဂွန် အီ မိုဝ်း အာငျာန်၊ အန် ဒီ ဘော ထူမ် ဂြုဝ်း ပီ မာနုဝ် ဂုန့် အန်။ ဂွန် အီ မိုဝ်း နဝ်း ပီခိုက်၊ အန် ယီ ဝဲန် ပီ မာနုဝ် အီ။

2 ဒူအီ မွှိုမ် ဒီ ဝီ ယိုဝ် အာဂျိုဝ် ပီ ကာလာင် အန်။ ဒူအီ အီ ဆီမာ ကာလုဝ်၊ အန် ဆီ တဲး အီ ကာလုတ့်။

3 ဆေ မဲ ဆာဒိက် ပီ ခဲ ပီ ကာလာင် မဲ၊ မဲ ခြဲ ဘော အာဆာက် မဲ။ ဂေ အီ တူ နပ် ဒီ ဆာဒိက် ဂြုဝ်း၊ ဂေ ဘော ကာလာင် ပီယေန့်၊ တဲး အာဆာက် ဂေ စှိုမ်။

4 အာဆေ အီ မိုဝ်း နဝ်း ကြာန်၊ အန် ပီ ဘော မိုဝ်း နဝ်း လောဖ မိူဝ်၊ အန် တူ ပွိုန် မာဆေ။ အာဆေ ယီ အွန်၊ အန် ဒီ ပွိုန် ခဲ့ ပီ လုဝ် အန်။

5 ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ဘော ဇွင့် ဂြုဝ်း ကာလုဝ်၊ ဇွင့် အီ တူ မှာန်။ ဂေ ဒူအီ ဟာယ်၊ ဂေ ဘော ဘူင် အီ မွှိုမ် ကာအိး၊ အီ မွှိုမ် ဆာယ်။

6 နာ ဘွတ် နာ မွှိုမ် ဒီ ဘော ဂွင့် ဘော ရဲ ဂေ အီ တူ ကာလုဝ်။ နာ တူ မွှိုမ်၊ နာ စီစိဝ် ဒီ ဘော တဲး ဒူအီ ဟာယ် စှိုမ်။

7 ဒူအီ မင် အီ တူ မိုဝ်း မာဆေ၊ ယီ ညိုင် ဒူအီ ခြမ်။ ဒူအီ မင် အီ၊ ဟဲ့ ခြမ်၊ မိုဝ်း ကြုဝ်ကြာမ် ကိူန်၊ ယီ ညိုင် ဒူအီ ဂိန်။

8 ကြုဝ်ကြာမ် ဒူအီ ခြမ် နပ် ဒီ ထုတ် အာဆာက် အန်။ ဒူအီ ဂိန် ယီ တူ ထူမ် ပီ ကာဘျုဝ် အီ ဒီ အန်။

9 ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ပီ ငဝ် အွမ် အီ ဘ့လာင်။ ဒူအီ ဟာယ်၊ အန် ဘော ပီ ငဝ် အွမ် အီ ဟဲ့ ဟွတ့် ယတ်။

10 ဆေ ဒူအီ မိုဝ်း နဝ်း ပီခိုက်၊ အန် ဘော ဘူင် တဲး အီ ကာလုတ့်။ အာဆေ ယီ ထူမ် ပီ မာနုဝ် အီ၊ န့ ဒီ ဘဲန် အာငျာန် ဒီ အန်။

11 ကြုဝ်ကြာမ် ပီ ပွိုန် ဒူအီ ကူပ် ဘူင် အန် နာ တူ မွှိုမ်၊ န့ ဘော စေဝ် တူတ့်။ အာဆေ ယီ အွန် ဒီ ကာဇု အုန် အီ စဲက် အီ စဲက်၊ န့ ဒီ ဘော ကြဲ ဒီ ကိူန်။

12 ဆေ ပီ နှဝ့် န့ဒဝ့် အီ တူ ဘဲန်၊ န့ ဘော ဘဲန် ဆဝ် ဒီ နဝ်း။ ဆေ ပီ ခြာမ် အီ ဒီ ဘူင် ဟဲ့ ဘဲန်၊ န့ ဘော ဘဲန် ပီ ဟေ အီ တဲး အာဆာက် ဒီ အီ။

13 ဆေ မဲ ဝဲန် ဂြုဝ်း ပီ မာနုဝ် အီ၊ မဲ လုဝ် ခမ် ရုး ဝဲန် မဲ။ ဆေ မဲ ယီ ထူမ်၊ မဲ ဒီ ဘော ပွိုန် ရုး အန်။

14 ဂြုဝ်း ပီ မာနုဝ် ဒူအီ အီ မိုဝ်း အာငျာန်၊ န့ ဘော ပီ အိုမ် တုဝ်း အီ ဒွါ အာဆာက်။ ဂြုဝ်း ဇိုဝ် တီ ဒီ စွယ် တဲး မဲ လွတ် ယမ်။

15 အာဆေ မိုဝ်း အာငျာန် ဘွတ်၊ အန် ဒီ မိုဝ်း ဆာရေ။ ဆေ န့ ယီ မုး အီ တူ မွှိုမ် ညှိုမ်၊ န့ ပီ အန် ဒူပ် န့တေန့် အီ လိုဝ်၊ န့တေန့် အီ တဲး အန် စှိုမ်။

16 ဒူအီ လွှက့်၊ အန် ဘော နပ် လွင် ပီ ဒီ ဘူင် အန်။ ဒူအီ ရိုဝ်၊ အန် ယီ နပ် ဒီ ဘူင် တဲး န့ လိုဝ်း ဆီချာ ခဲ့ ရိုဝ် အန်။

17 ဒူအီ ပီ ဆုတ့် ပီ စ်ု အီ တူ ပွိုန် ညှိုမ်၊ အန် ဘော ဘူင် တဲး အီ ဇမ် ဒုက်။ အာမူ အာမာတ် အီ ပွိုန် ညှိုမ်၊ အန် ဘော ဘူင် တဲး န့ ယေန် ဒါခိုယ်။

18 အာဆေ တူ ထူမ် ပီ မာနုဝ် အီ ဟဝ်၊ အန် ဒီ ဘဲန် ဒူအီ ဂိန်၊ ဒူအီ ဖ့လာန်။ အန် ဘော လုဝ် ဆာယ် အီ။ အာဆေ ယီ ထူမ်၊ အန် ဒီ မိုဝ်း ဆာရေ။

19 ဆေ ပီ ကာပြာ မဲ ဟဲ့ ဟွတ့် ဇေ့ဇုင် တူတ့် ဒွန် မျုဝ်၊ န့ ဘော ဒါခိုယ် ဒီ နဝ်း ဒီ ဖွိုမ်။ ဒူအီ ဟာယ်၊ ယီ ကာအိး ဘော ဇွင့် ဒီ ဝး နာ စီစိဝ်။

20 အာဆေ ဒူပ် ဒူအီ အီ မိုဝ်း အာငျာန်၊ ဘော အန် ဒီ မိုဝ်း အာငျာန်။ အာဆေ ကာဂိုက် ဒီ ဒူအီ ဟာယ် ဒူအီ မိူက်၊ ဘော အန် ဒီ ဇမ် ဒုက်။

21 အာဖေ အာရေ ဒီ ဘော ဒူပ် ဂေ အီ မိုဝ်း မှာပ်။ ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဘော ပွိုန် အာဂျိုဝ် အီ ကွယ် ဒါခိုယ်။

22 ဒူအီ ဘွတ် ဒူအီ မွှိုမ်၊ အန် နပ် ဒီ ကာဇု အုန် ခါဂုန် ဒီ လှုက်လှာန် အန်။ ဒူအီ အီ မိုဝ်း မှာပ်၊ အန် ဘော နပ် ဒီ ကာဇု အုန်၊ ယီ မုး ဂေ အီ မိုဝ်း နဝ်း မွှိုမ် နဝ်း ဘွတ်၊ ဂေ ဒီ ပွိုန် တူတ့်။

23 ဒူအီ ဂိန် ပီ ဘော ဟဲ့ မိုဝ်း ဒူင် နာ အီ ပွိုန် ကိူန် ပီ ဒီ ဟူမ်၊ ဒူအီ တူ မွှိုမ် ယီ နပ် ဒီ ဒိုဝ်း တူတ့်။

24 ဆေ မဲ တူ ဝျီန် တူ ဆီဘျြီ့ ဂွန် မဲ၊ မဲ တူ ရွက့် အန်။ ဆေ မဲ ရွက့် ဂွန် မဲ၊ မဲ လုဝ် မာနုဝ် ဒီငန့်။

25 ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ဒီ ဘော ပွိုန် ဒီ ဟူမ် ဖဲ။ ဒူအီ ဟာယ်၊ အန် ယီ ကာပြာန့် ဆေဆေ။