1 မဲ ဇဝ်ဖြာ၊ မဲ မုး ခုန်ဒီခမ် အီ အိုပ် အုဝ်။ အုဝ် ဒီ ကြိုပ် မဲ ဇဝ်။ အုဝ် ဒီ လှုဝ်း ဂေဇူ မဲ ဇဝ် ဆေဆေ။

2 ဒွန် ဆီငဲ အုဝ် ဒီ အိူပ် မဲ ဇဝ်ဖြာ ဆေဆေ။ အုဝ် ဒီ အိူပ် ပီ ပါယ် မဲ ဇဝ် ဒွန် စုဝ် ဒွန် ဇာတ်။

3 ဇဝ်ဖြာ ဟဲ့ တာင် ကာဆဝ်။ ဟဲ့ မွှိုမ် အိူပ် ကာဆဝ် အန်။ အန် ဇဝ် ဘော ဟဲ့ တာင် လွှိုမ် ခဲ့ ပီ နပ် အေ။

4 ဂေ ဒူအီ အူ စုဝ် ဒီ အိူပ် ပဲ့ ဟဲ့ ဘူင် မဲ ဇဝ်ဖြာ၊ ဝီ တဲး ဒူအီ ပေါ အူ စုဝ် ထူမ်။ ဂေ ဒီ ဘော ကာလာင် ဘျ ပီ ပါယ် အာဖုင် ဒင်ခုဝ် မဲ ဇဝ်။

5 ဂေ ဒီ ကာလာင် လွင် မိုဝ်း မဲ ဇဝ် အာဖုင် ဒင်ခုဝ် တာင်။ ဘော အုဝ် ဒီ ကာဒွါ့ ကာဖာ လွင် ပဲ့ ဟဲ့ ဘူင် မဲ ဇဝ် အီ မွှိုမ် အာမ် ကာဆဝ်။

6 ဂေ အီ ဟဝ် ဒီ ဘော ကာလာင် လွင် အာဖုင် ဒင်ခုဝ် မဲ ဇဝ် အီ ဟဲ့ မွှိုမ် ယုဝ် ကာဆဝ်။ အုဝ် ဒီ ဘော ကာလာင်၊ မဲ ဇဝ် ဟဲ့ ဘွတ် မျာတ် ကာဆဝ်။

7 ဂေ ဒီ ဘော အိူပ် မဲ ဇဝ် အီ ဟဲ့ မွှိုမ် ကာဆဝ်။ ဂေ ဒီ တဝ်း မှုဝ် ဒါခိုယ် လွင် နဝ်း ဆိူဝ် နဝ်း မှာန် မဲ ဇဝ်။

8 မဲ ဇဝ်ဖြာ နပ် ဒီ ဂေဇူ အီ။ မဲ ဇဝ် ကာဝေ အီ။ မဲ မိူဝ် တူ ငှိုယ် ရူ ဘော မိုဝ်း နဝ်း ရွက့် ကာဆဝ်။

9 ဇဝ်ဖြာ ဘော မိုဝ်း နဝ်း မွှိုမ် ဒီ ဒူအီ ဒွန် အီ။ အန် ဇဝ် ဘော ကာဝေ ပဲ့ ဟဲ့ ဖာန် ဘ့လေး အန် ဒွန် မျုဝ်။

10 မဲ ဇဝ်ဖြာ၊ ခဲ့ ကွယ် ပဲ့ ဟဲ့ ဖာန် ဘ့လေး မဲ ဇဝ်၊ ဂေ ဝီ ဒါင် ဂုင် ဂေဇူ ဒီ မဲ ဇဝ်။ ဂေ ဒူအီ အီ ဆီငါ ဘွတ်၊ ဂေ ဒီ အိူပ် မျုက် မဲ ဇဝ်။

11 ဂေ ဒီ ဘော ကာမွုန် ပီ ပါယ် အာဖုင် ဒင်ခုဝ် မဲ ခဲင် မိူင် ပီ အိုပ် မဲ။ ဂေ ဒီ ဘော ကာလာင် ခဲ့ တာင် ပွုန် မဲ ဇဝ်၊

12 တဲး ဒွန် အီ နပ် လွင် ပဲ့ ဟဲ့ ဘူင် မဲ အီ ဘျ ပွုန် မဲ၊ တဲး ဂေ နပ် ဘော ခဲ့ တာင် အာဖုင် ဒင်ခုဝ် မဲ။

13 မိူင် ပီ အိုပ် မဲ ဇဝ်၊ န့ ဒီ ကွယ် ဆေဆေ။ မဲ ဇဝ် မုး ဒါ ကာညာ အီ အိုပ် မိူင် တီ ဒွန် စုဝ် ဒွန် ဘာန်။ ဇဝ်ဖြာ ဘူင် ဆေဆေ ပီ ဒွိုမ် ဒွါ အန် ကာဒိက် ဆတ်ဇာ။ အန် ဘော ရွက့် တူတ့် ဒွန် မျုဝ် ပဲ့ ဟဲ့ ဖာန် ဘ့လေး အန်။

14 ဂေ အီ ပီ ဒူအီ အီ ဟဲ့ ရိန် ဒီ ကေး၊ အန် ဇဝ် ဒီ ဝီ စွယ် တဲး ဂေ ယိတ့် ဒွန် အီ။ ဂေ အီ ဟဲ့ မိုဝ်း နဝ်း လိုဝ် နဝ်း တျီ့၊ အန် ဇဝ် ဒီ ဝီ တဲး ဂေ မိုဝ်း နဝ်း ကြွိုမ် ဒွန် အီ။

15 ခဲ့ ကွယ် ဒူအီ ဘောကာဂ့လျီတ် ဒီ ဘော ယွတ် ဘော နှဝ့် မဲ ဇဝ်ဖြာ။ မဲ ဇဝ် ဒီ ဟျီင် တဲး ဂေ ဟူမ် ဒွန် မ့ပြာ ဒေါ ဇမ် အာခြာဝ် အန်။

16 ခဲ့ ကွယ် မျုဝ် အီ မိုဝ်း ဖွိုမ် ဒဲင် ကာဒါယ်၊ မဲ ဇဝ်ဖြာ ဘော ဒွါ ခဲ့ ပီ လုဝ် ဂေ ဒွန် မျုဝ်။

17 ခဲ့ ပီ ဘူင် ဇဝ်ဖြာ ဒွန် မျုဝ်၊ အန် ဘူင် တူတ့် ဒူပ် နဝ်း ဆိူဝ် နဝ်း မှာန် အန်။ အန် ဇဝ် ဘော ရွက့် ကာဝေ ဒွန် မျုဝ် ပဲ့ ဟဲ့ ဘူင် အန်။

18 ဒူအီ အီ ဆာခိုဝ် ဒဲ့ ဇဝ်ဖြာ၊ ဘော ဂေ အီ ဘိုင် ဆီချာ အန်၊ အန် ဇဝ် ဘော ကွယ် ကာတတ် ဂေ ဒွန် အီ။

19 ဂေ အီ ရုဝ်ဆေ ဇဝ်ဖြာ၊ အန် ဇဝ် ဒီ ဘော ဒွါ ခဲ့ ပီ ဆီ ပွိုန် ဂေ။ အန် ဇဝ် ဘော ထူမ် ဂြုဝ်း ပီ ဆာခိုဝ် ဂေ ဘော ချွတ် ဂေ။

20 ဇဝ်ဖြာ ဘော ဘ်ု ရိတ် ဒွန် အီ အီ ရွက့် အန်။ ဂေ အီ တူ မွှိုမ်၊ အန် ဇဝ် ယီ ဒီ ဝဲန် ဂေ၊ တဲး ဂေ စှိုမ်။

21 မူတ့် အုဝ် ဒီ ဘော ကာလာင် ဂြုဝ်း အီ အိူပ် ဇဝ်ဖြာ။ ခဲ့ ကွယ် မျုဝ် အီ မိုဝ်း ဖွိုမ်၊ တဲး ဂေ ဘောကာဂ့လျီတ် အိူပ် အန် ဇဝ် ဆေဆေ။