1 အုဝ် အိူပ် ဇဝ်ဖြာ အီ ပီ ဒါအာင် မာဝ် ဒူင် ဘိုင် အုဝ်။ အန် ဇဝ် ဟဲ့ မာနုဝ် အုဝ်၊ တဲး အုဝ် နပ် ဒီ ကာဂုဝ်း၊ တဲး ဘော ဒဲ အုဝ် နပ် ဒီ ဘန့် ဒါ ဆိုက်။

2 အန် ဇဝ် မုး အီ ရဲ အီ ဂွင့် အုဝ်။ အန် ဘော မုး ဒူင် ဘိုင် အုဝ်၊ အီ ချွတ် အုဝ်။ န့ ပီ အန် တဲး အုဝ် ချြီင် ဒူင် ကွယ် အန်။ အန် ဇဝ် ဘော ဒါင် အုဝ် တဲး အုဝ် အိုပ် ဒူအီ ဟဝ်၊ တဲး ဂေ ကွယ် ခြိုမ် အုဝ်။

3 အိုယ် မဲ ဇဝ်ဖြာ၊ ယေ အာမျုဝ် ဒူအီ တူ မုး ခဲ့ မှဝ်၊ မဲ ယီ လိုမ်လာ ယေ။ ဘော ဂွန် ယေ ဒူအီ တူ ခုဝ် မာဆေ၊ မဲ ယီ တူ ပိဝ် ယေ။

4 ယေ ဘော ပီ ဟိုတ့် ဂေ ဒက်။ စုဝ် ယေ ဘော ပီ ကာမိုက် အီ ကွယ် အူ ကာစန်၊ ဝီ ဟြာယ်။

5 အိုယ် မဲ ဇဝ်ဖြာ၊ တဲး မဲ ဇဝ် ဝိုဝ်း ဂါင်ဟြာဝ် လူင် ဒဲင် ကာဒါယ် နီ။ တဲး မဲ ဇဝ် ဒိုဝ် ကာဒဲ့ နွန်၊ တဲး ဒက် ငဝ် လေး။

6 တဲး မဲ ဇဝ် ဘ့လေး ဘ့လေ ကာဆး ဒီ ဂေ ရန်ဆူ မဲ ဇဝ်၊ တဲး ဂေ တဝ် ဟာဝ် ဒွန် ဘ့လာက်။ တဲး မဲ ဇဝ် ဘန့် ဘော ဘ့လာ အ မဲ၊ တဲး ဂေ ကာစှူတ့် တဝ်။

7 မဲ ဇဝ် ပီ ဘော ကွယ် ဒူင် စာ မိူဝ်၊ အုဝ် မှာန့်၊ တဲး မဲ ဇဝ် ဒိူတ် လေး အုဝ် ခဲင် ဒုက်၊ တဲး န့ ပီ မဲ ဒိူတ် လေး အုဝ် ခဲင် အိုမ် လိုက်။ တဲး မဲ ချွတ် အုဝ် ဒီ ဂေ ဒူအီ အာမျုဝ် ဟဝ်။

8 ဂေ ဒူအီ တီ၊ ဂေ တူ ကာလာင် ဂြုဝ်း မှာန် ဒေါ မှဝ်။ ဂေ ပီ ဘော ဒိူင် တဝ်း၊ ဂြုဝ်း ဂေ ဟဲ့ မှာန်၊ ဂေ ယီ ကာလုဝ်။

9 အိုယ် မဲ ဇဝ်ဖြာ၊ အုဝ် ဒီ တဝ်း မှုဝ် ကာမာယ် ဒီ မဲ ဇဝ်။ အုဝ် ဒီ ဘး ဒိင် အီ မိုဝ်း ဝန် ဂိုဝ် ညွင့် ဘော တဝ်း မှုဝ် ဒီ မဲ။

10 မဲ ဇဝ် ဟဲ့ တဲး ခုန်ဒီခမ် အွင် ရန်ဆူ အန်။ မဲ မိူဝ် ဟဲ့ စွယ် အာဒါဝိတ် အီ မုး ဒဲစေန့် မဲ ဇဝ်၊ တဲး အန် လွတ် ဒီ မာပွါ့ လာင် အီ ငဝ်း ယမ် အီ ဟဝ် ဆေဆေ။

11 အုဝ် မှာန့်၊ တဲး မဲ ဇဝ် စွယ်၊ တဲး အုဝ် လွတ် ဒီ ဒူအီ အာမျုဝ် ဟဝ် အီ တူ ကာလာင် ဂြုဝ်း မှာန် ဒေါ မှဝ်။ ဂေ ပီ ဘော ဒိူင် တဝ်း၊ ဂြုဝ်း ဂေ ဟဲ့ မှာန်၊ ဂေ ယီ ကာလုဝ်။

12 ဆေ န့ ပါယ် တီ၊ ဂွန် အီမာယ် ယေ ကြဲ ဒီ တာင် ပီ ဟေ အီ ဘွတ် ကူပ် ရိုက် အီ အိုမ် ဆေဆေ။ ဘော ဂွန် အီဘိုန့် ယေ ဒီ ပီ ရွင့် ပီ ဒွက် အီ ရာင် ဘုဝ်း၊ ဘ့လေး ခဲင် ဟုဝ် ခုန်ဒီခမ်။

13 ဘော ဂြွာ ငှုဝ် ယေ ဒီ ဘော နုဝ့် ငှုဝ် ဒီဂါဝ် ဒွန် မျုဝ်။ ဘော မာဘူ ပီ ဘ့လေး ယေ ခဲင် ဒူင် နာ၊ ဂေ ဒီ ဘော ဂွိုတ် ဂွန် ဘဲန် ဟြဲန့် ဘဲန် မှိုန့်။

14 မက် အာ လူင့် ယေ ဒီ ဒါင် ကြုဝ် စန်။ ဂေ ရန်ဆူ မိူဝ် တူ ပွိုန် ဒီ လိုပ် ခဲင် မိူင်၊ တူ ပွိုန် ဒီ ပြာ ဒူအီ၊ တိုယ် ဟာဝ် မိူင် ဂေ။ န့ မိူဝ် တူ မိုဝ်း အီ ဒတ်၊ အီ ကာစွှာ့ ခဲင် မိူင်။

15 ဂေ ဒူအီ အီ ပွိုန် မွင့်ကာရာ ပါယ် တီ၊ ဂေ ဒီ ဘျုဝ် ဒါခိုယ်။ ဂေ အီ ကြိုပ် ဇဝ်ဖြာ အီ အိုပ် တူတ့်၊ ဂေ ဒီ ဘော ဘျုဝ် ဒါခိုယ်။