1 အိုယ် မဲ ဇဝ်ဖြာ၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ်။ တဲး မဲ ဇဝ် ဘူင် ပီ မှာန့် အုဝ်။ မဲ ဇဝ်ဖြာ မိုဝ်း နဝ်း ဆိူဝ် နဝ်း မှာန် ဘော နဝ်း ဘွတ် နဝ်း မွှိုမ် ဆေဆေ။ ခုဝ်၊ တဲး မဲ စွယ် အုဝ်။

2 မဲ ဇဝ် ကွဲ့ ဒမ် မှာပ် ဒီ အုဝ်။ ခုဝ်၊ အာဝ် မိုဝ်း ခေါ အူ ဝီ၊ အီ တူ မိုဝ်း မှာပ် ဒီ အာတ့် မဲ ဇဝ်။

3 ဂေ ရန်ဆူ အုဝ် ဟဲ့ ခုင်ခြး ကာဂုဝ်း ပဲ အုဝ်။ ဂေ ဟဲ့ ဘ့လိုပ် အုဝ် ခဲင် အပ် ဝွင့်။ အုဝ် ဟဲ့ ပီ ဂေ အီ ဟဲ့ ဟွတ့် ယမ်။

4 နဝ်း ဖွိုမ် အုဝ် ဘော ဒီလှး ဘော နုန် ကာဆဝ်။ နဝ်း အုဝ် မိူဝ် ဟဲ့ ဟွတ့် လိုဝ်။

5 အုဝ် ဝီ လှုဝ်း ဒေါ မွိုန် အာတ့် နီ ဒေါ ကာဒွါ့ ကာဖာ အုဝ် လွင် ပဲ့ ဟဲ့ ဘူင် အုန် မဲ ဇဝ် ဒွန် မျုဝ်။

6 အုဝ် ဟဲ့ စုဝ့် ဒဲ အုဝ်၊ ကြိုပ် ဆာခိုဝ် ဒီ မဲ ဇဝ်။ နဝ်း ဖွိုမ် အုဝ် ဘော ဒီကေန် ကာဆဝ် မဲ ဇဝ်။ န့ ပီ ကာဒါယ် အီ ဟဲ့ ဒး မာအ လုဝ် ဂ့လာယ်။

7 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ဝျီ့ ခြန် ခြန် ဂြုဝ်း အုဝ်။ နဝ်း အုဝ် ဟဲ့ ဟွတ့် လိုဝ်။ မဲ ဇဝ် ကွဲ့ ဝဲန် အုဝ်။ ကွဲ့ တဲး အုဝ် ပီ ဂေ အီ ကွယ် ခဲင် ကာဒဝ် ဘာရေဝ်။

8 အုဝ် မှာန့်၊ ဘာင် ဒီ ဝး ပြဲ တဲး အုဝ် ယိုဝ် လွင် ဂြုဝ်း မဲ ဇဝ် အီ ရွက့် ကာဝေ အုဝ်။ ခုဝ်၊ အုဝ် ညှိုမ် ဘိုင် မဲ ဇဝ်။ တဲး မဲ ဇဝ် နှဲ န့တေန့် ပီ ကာအာပ် အုဝ် ဒူပ်။ ခုဝ်၊ အုဝ် မှာန့် ဒီ မဲ ဇဝ်။

9 အိုယ် မဲ ဇဝ်၊ အုဝ် တး ကာတတ်၊ တး ဘိုင် မဲ ဇဝ်၊ တဲး မဲ တဲး အုဝ် လွတ် ဒီ ဂေ ရန်ဆူ အုဝ်။

10 မဲ ဇဝ် ဘော မုး ဇဝ်ဖြာ ပီ ကြိုပ် အုဝ်။ တဲး မဲ ဇဝ် မာနုဝ် တဲး အုဝ် နပ် ပီ အိုင် မဲ၊ တဲး နဝ်း ဖွိုမ် မဲ ဇဝ် အီ ဘွတ် အီ မွှိုမ်၊ ဘော ယဲတ့် အုဝ်၊ တဲး အုဝ် ပွိုန် ဒီ ဒူပ် န့တေန့် ဘွတ်၊ န့တေန့် မွှိုမ်။

11 အိုယ် မဲ ဇဝ်ဖြာ၊ ကူပ် မုး မဲ ဇဝ်ဖြာ အီ ဘွတ်၊ တဲး မဲ ချွတ် အုဝ်။ ကူပ် မိုဝ်း မဲ ဇဝ်ဖြာ နဝ်း ဆိူဝ် နဝ်း မှာန်၊ တဲး မဲ ဇဝ် ချွတ် အုဝ်၊ တဲး အုဝ် လေး ခဲင် ဒုက် ခဲင် ညှာပ်။

12 ကူပ် မိုဝ်း မဲ ဇဝ် နဝ်း ရွက့် ကာဝေ၊ တဲး မဲ ဇဝ် ဒိုဝ်း ဝဲန် ဂေ ရန်ဆူ အုဝ်။ ကူပ် မုး အုဝ် ဒဲစေန့် မဲ ဇဝ်၊ တဲး မဲ ပျာတ့် ဝဲန် ဂေ အီ ခါနှာပ် အုဝ်။