1 အိုယ် မဲ ဇဝ်ဖြာ၊ အုဝ် ဆာခိုဝ် ဒီ မဲ ဇဝ်၊ တဲး မဲ ဇဝ် ခြန် ဒီ ထူမ် ဂြုဝ်း အုဝ်။ တဲး မဲ ဇဝ် ထူမ် ဂြုဝ်း ပီ ဆာခိုဝ် ပီ တဝ်း အုဝ်။

2 အုဝ် မှာန့်၊ တဲး ဂြုဝ်း ပီ ဆာခိုဝ် အုဝ် ပီ န့ကြိုဝ်း အုး ငှုန် ပီ ဒုဝ့် လှူ အီ ဒီ မဲ ဇဝ်။ ဘော ဒေါ စုဝ့် အုဝ်၊ ဒဲ အုဝ် ကြိုပ် မဲ ဇဝ်၊ တဲး န့ ပီ ပီ ဒီ လှူ ဘာ ဒီ အပ်။

3 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ဘ်ု မူတ့် အုဝ်။ ကွဲ့ တဲး မူတ့် အုဝ် ခြန်။

4 အုဝ် မှာန့်၊ ကွဲ့ တဲး အုဝ် မိုဝ်း နဝ်း ဆီ ဘူင် အီ တူ မွှိုမ်။ ကွဲ့ တဲး အုဝ် ဘူင် အီ တူ မွှိုမ် ဒူပ် ဂေ ဒူအီ ဟာယ် ဒူအီ မိူက်။ ကွဲ့ တဲး အုဝ် ကွယ် ရိုမ် ဒူပ် ဂေ ဘော ဟူမ် အီ ဆီငဲး ပီ ဟူမ် ဂေ။

5 တဲး ဒူအီ နဝ်း ဆိူဝ် နဝ်း မှာန် မာနုဝ် အုဝ်၊ မး အုဝ်။ န့ ဘဲန် နာ မွှိုမ် ဒီ အုဝ်။ တဲး အန် အေး အုဝ်၊ န့ ပီ အန် ဖဝ်း နာမန် ဒီ ဂိန့် အုဝ်။ အုဝ် ဟဲ့ ဘျုဝ် ဒီ ခမ်။ အုဝ် ဘော ဆာခိုဝ် ဒါင် ဂေ ဒူအီ အီ ဘူင် နာ တူ မွှိုမ်၊ ကွဲ့ တဲး ဂေ အွင်။^a

6 ဂေ ဒီ ဒိုဝ်း ဒါ ကာညာ အီ အိုပ် ဒူအီ မိူက် ဘျွာ ဒီ ဒါအာင် မာဝ်။ ခဲ့ ကွယ် ဒူအီ တူ မွှိုမ်၊ ဂေ ဘောကာဂ့လျီတ် ဒီ ဘော နပ်၊ ဂြုဝ်း ပီ ကာလာင် အုဝ် ဟဲ့ မုး ဟဲ့ မှာန် အာခါခ်ု။

7 ကာအာင် ဂေ ဒူအီ ဇိုဝ် တီ ဒီ ဘော ဘုင်ဘြတ် ခူပ် ကာဒဝ် ဘာရေဝ်၊ တဲး န့ ပီ ကာဒါယ် အီ ဒီ ဂ့လုဝ့် ဒီဂ့လျီမ် ဝါယ် လုဝ့်။

8 အုဝ် ယီ ညှိုမ် ဘိုင် မဲ ဇဝ်။ မဲ ဇဝ်ဖြာ အီ အိုပ် တူတ့် ဒွန် မျုဝ်။ အုဝ် ဘော ကာပြာ ကာဆဝ် တဲး မဲ ဇဝ် စွယ် အုဝ်။ အုဝ် မှာန့်၊ တဲး အုဝ် လွတ် ယမ်။

9 အုဝ် မှာန့်၊ တဲး အုဝ် လွတ် ဒီ ယွတ့် ပီ ဒိန့် ဂေ ဒီ အုဝ်၊ တဲး အုဝ် လွတ် ဒီ ခိူမ် ပီ ဒိန့် ဂေ အီ တူ မွှိုမ် ဒွန် မျုဝ်။

10 ဒေါ ဝး အုဝ် ယွတ့် ဂေ၊ တဲး ဂေ ဒူအီ ဟာယ် ဒူအီ မိူက် ဝီ ခြေ ယွတ့် ပီ ဒိန့် ဂေ တီ။