1 အိုယ် မဲ ဇဝ်ဖြာ၊ မဲ ဇဝ် ဟဲ့ ဇဲတ် ဒီ ယွတ် နဝ်း အုဝ်။ မဲ မိူဝ် နပ် ဆီချာ နဝ်း အုဝ်။

2 မဲ ဇဝ် ဟဲ့ နပ် ဒေါ တုတ့် ဒေါ စွင့် အုဝ်။ မဲ ဇဝ် ပီ ဘော ကွယ် တူင့် ကာဆဝ် မိူဝ်၊ မဲ ဟဲ့ နပ် တူတ့် ပီ ခြာမ် အုဝ် ဒီ ဘူင်။

3 မဲ ဘော နပ် ဆီချာ ဘော ဒေါ ဟာဝ် ဒေါ အိတ် အုဝ်။ မဲ ဇဝ် ဘော ယိုဝ် တူတ့် ဒွန် ပ့လုဝ့် ဒူင် ဝဝ့် အုဝ်။

4 ဆိန့် အာတ့် လေး ဂြုဝ်း ခဲင် မူတ့် အုဝ်၊ မဲ ဇဝ် ဟဲ့ ဟွတ့် နပ် တူတ့်။

5 မဲ ဇဝ်ဖြာ ဟဲ့ ဘ်ု ရူပ် အုဝ် ဘော နာ ပန် နာ အာတ့် အုဝ်။ န့ ဘော ပီ မဲ ဇဝ် ဟဲ့ ပါ အုဝ်။

6 ပီ ဟဲ့ နပ် မဲ ဇဝ် တီ၊ န့ ဟဲ့ မွှိုမ် အာမ် ကာဆဝ်။ အုဝ် မိူဝ် တူ ပွိုန် မိုဝ်း အာငျာန် ပီ မဲ ဒေါ မှဝ်။

7 အုဝ် ဘော ဟာဝ် နာ မှဝ်၊ အုဝ် တူ နပ် ဒီ တဝ် ဒီ နဝ်း ဖွိုမ် မဲ ဇဝ်ဖြာ ဒေါ မှဝ်။ အုဝ် ပီ ဘော တဝ် ဟာဝ် ဒီ မှဝ်၊ မဲ ဇဝ်ဖြာ ယီ ဆီ နဲ့ ယိုဝ် အုဝ်။

8 ဆေ အုဝ် ဘော ဟုဝ့် ခဲင် ဂါင်ဟြာဝ်၊ မဲ ဇဝ် ဘော ကွယ် ဒီ တီ။ ဆေ အုဝ် ဘော တဝ် လေး အိတ် ခဲင် မိူင် မာရာန၊ မဲ ဇဝ် မိူဝ် ကွယ် ဒီ တီ။

9 ဆေ အုဝ် ပီ ဘော ဟဲ့ နပ် ဒီ ဟပ် ဖျီင်၊ တဝ်း ဒီ ဘိုန့် ဆိန့် ဆိန့်ဝး စေဝ်၊ တဲး အုဝ် ဇမ် နာ ဒွယ် အိုမ် နမ်မုက်ဆာရာ၊

10 မဲ ဇဝ်ဖြာ ဘော ဝီ ယဲတ့် အုဝ် ဒီ တီ၊ ဝီ ပါ ဒဲ အုဝ်၊ ကွဲ့ တဲး အုဝ် ကာလိုပ်။

11 ဆေ အုဝ် ပီ ဘော တဝ်း၊ “တဲး အပ် ဝွင့် တး ကာဘိတ် ရူပ် အုဝ်၊ တဲး ဘ့လာင် ဝီ ဘဲန် ပီ ခဲင် မှိုဝ်၊”

12 အပ် ဝွင့် တီ ယီ တူ နပ် ဒီ ဆီဘ့လိုက် ငါယ် မဲ ဇဝ် ဒေါ မှဝ်။ အပ် ဝွင့် ခဲင် မှိုဝ် နပ် ဒီ ဝီ ဘ့လာင် ပီ ကာတဲ ဆီငဲ ဒီ ငါယ် မဲ ဇဝ်။

13 ခုဝ်၊ မဲ ဇဝ်ဖြာ ဟဲ့ ဘူင် ဘ့လေး တူတ့် ဒွန် မျုဝ် အီ ကွယ် ခဲင် ဒုဝ် အုဝ်။ မဲ ဟဲ့ ကာဒုတ့် ကာဒိုက် ဒုဝ် အုဝ် ဆိန့် ခဲင် ဝတ့် မာ အုဝ်။

14 အုဝ် အိူပ် မဲ ဇဝ်ဖြာ ကူပ် ဟဲ့ ဘူင် မဲ ဒုဝ် အုဝ် အီ မွှိုမ် အာမ် ကာဆဝ်။ ပဲ့ ဟဲ့ ဘူင် မဲ ဒွန် မျုဝ် ဟဲ့ မွှိုမ် အာမ် ကာဆဝ်။ ကူပ် နပ် အုဝ် လွင် အန် တီ၊ န့ တဲး နဝ်း အုဝ် ရုဝ်ဆေ ဘော ယုဝ် မဲ ဇဝ်။

15 ဒေါ ဆီ ကွယ် အုဝ် ဒူင် တူ ပွိုန် ယိုဝ်၊ မဲ ဇဝ်ဖြာ ဟဲ့ ယိုဝ် ပီ ပါယ် အာရိုပ် ရာင် အုဝ်။ မဲ မိူဝ် ဟဲ့ ယိုဝ် ဒေါ ကာဒိုက် ကာငီ ဒုဝ် ဘူင့် အုဝ် ဒေါ ကွယ် အုဝ် ဒူင် တီ။

16 မဲ ဇဝ် ဟဲ့ ယိုဝ် အုဝ် ဆိန့် အာတ့် မိုဝ်း အုဝ် ဒီ ဒုဝ် ဘူင့်။ ပီ ဒီ ပါယ် အာဆာက် အုဝ် ဒွန် ဆီငဲ၊ မဲ ဇဝ် ဟဲ့ ဟွတ့် ဒဲမ် အုန် ခဲင် ဘပ် မဲ ဒီ အာတ့် ဒေါ ညှမ် ဇမ် ဆီငဲ ဂေ တီ ခေါ အူ ဆီငဲ။

17 အိုယ် မဲ ဇဝ်ဖြာ၊ အာကျာမ် အာငျာန် မဲ ဇဝ် ဟဲ့ ငဝ်း တာင် ကာဆဝ် ဒီ အုဝ်။ အီ လေး ခဲင် အာငျာန် မဲ ဟဲ့ ကိူန် ကာဆဝ်။

18 ဆေ အုဝ် တဝ်း ဒီ တိး၊ န့ ဟဲ့ ကိူန် လွှိုမ် ဘူင့် ကာဟာတ့်။ ဒေါ ဝီ န့ဆိုဝ်း အုဝ်၊ မဲ ဇဝ်ဖြာ ဆီ ကွယ် ရိုမ် ဒူပ် အုဝ်။

19 အုဝ် ဆီ မှာန့်၊ တဲး မဲ ဇဝ် တဲး ဂေ ဒူအီ မိူက် ယမ် တူတ့်။ ဂေ ဒူအီ အီ ဆီ ငဝ်း ယမ် အီ ဟဝ်၊ တဲး ဂေ တဝ် ဒူင် ကွယ် အုဝ်။

20 ဒူအီ ဂေ တီ၊ ဂေ ကာလာင် နာ တူ မွှိုမ် လွင် မဲ ဇဝ်ဖြာ။ ဂေ ရန်ဆူ မဲ ဇဝ်၊ ဂေ ဘော ဒဲ့ မဲ ဇဝ်ဖြာ ပီယေန့်၊ တူ မိုဝ်း ဒီခုဝ်။

21 အိုယ် မဲ ဇဝ်ဖြာ၊ အုဝ် ဇွင့် ဂေ အီ ဇွင့် မဲ ဇဝ်။ အုဝ် ဘော ကာအိး ဂေ ဒူအီ အီ ဆီ ကာခဲန့် ဒီ မဲ ဇဝ်ဖြာ။

22 အုဝ် ဟဲ့ ဇွင့် ကာဆဝ် ဂေ။ ဂေ ဟဲ့ ဘဲန် ဘော ရန်ဆူ အုဝ်။

23 မဲ ဇဝ်ဖြာ၊ အုဝ် မှာန့်၊ တဲး မဲ ယိုဝ် ခဲင် နဝ်း ဖွိုမ် အုဝ်။ တဲး မဲ ဇဝ် ထေဝ် နဝ်း အုဝ်၊ တဲး မဲ နပ် ပီ ကာဖာ အုဝ်။

24 အုဝ် မှာန့်၊ တဲး မဲ ဇဝ် ဇဲတ် ဒီ ယွတ် ပီ ဘူင် အုဝ်၊ ယုဝ် န့ မွှိုမ် တူ မွှိုမ်။ တဲး မဲ ဇဝ် ယဲတ့် အုဝ် ဒူပ် န့တေန့် အီ ဇမ် မိူင် ပီ အိုပ် မဲ။