1 အိုယ် မဲ ဇဝ်ဖြာ၊ အုဝ် ဒီ ဟပ် ဘော နဝ်း ဘော ဖွိုမ် အုဝ်၊ အိူပ် ဂုင် ဂေဇူ မဲ ဇဝ်။ အုဝ် ဒီ ဘော တဝ်း မှုဝ် ဒါခိုယ် အီ အိူပ် မဲ ဇဝ် နာ အာတ့် ဇဝ် ပီ ကြိုပ် အီ ဟဝ်။

2 အုဝ် ဒီ မုတ် ဂိုပ် နာ ကွယ် ဟုဝ် မဲ ဇဝ် အီ ဘွတ် ကာဆဝ်။ အုဝ် ဒီ ဘော ကြိုပ် မဲ ဇဝ်။ ခုဝ်၊ မဲ ဇဝ် ဟဲ့ မိုဝ်း နဝ်း ရွက့် ကာဝေ ဘော ဘူင် နာ မုး နာ မှာန်။ မဲ ဇဝ် မိူဝ် ဟဲ့ တဲး ပွုန် မဲ ဘော ဂြုဝ်း မဲ ဘဲန် အာမျုဝ် အီ တာင် လွှိုမ် တူတ့် ဒွန် မျုဝ်။

3 ဒေါ ဒဲ့ အုဝ် ဒီ မဲ၊ မဲ ဇဝ် ဟဲ့ ထူမ် ဂြုဝ်း အုဝ်၊ ဝီ တဲး နဝ်း အုဝ် ဝီ မိုဝ်း ပ့လူမ် မိုဝ်း ဟဲန့်။

4 အိုယ် မဲ ဇဝ်ဖြာ၊ ခဲ့ ကွယ် ဂေ ခုန်ဒီခမ် ဒဲင် ကာဒါယ် နီ၊ တဲး ဂေ အိူပ် မဲ ဇဝ် ကူပ် ဟဲ့ ယိုဝ် ဂေ ဂြုဝ်း ပီ ကာလာင် မဲ ဇဝ်။

5 တဲး ဂေ တဝ်း မှုဝ် အီ အိူပ် ပဲ့ ဟဲ့ ဘူင် မဲ ဇဝ်။ ခုဝ်၊ အာဖုင် ဒင်ခုဝ် မဲ ဇဝ် ဟဲ့ တာင်။

6 ဇဝ်ဖြာ ပီ ဘော ဟဲ့ ဘွတ် ကာဆဝ်၊ အန် ယီ ယွတ် မဲန် ဂေ အီ နဝ်း တျီမ်။ ဂေ အီ မိုဝ်း နဝ်း စာ၊ အန် ဇဝ် မိူဝ် နပ် တူတ့် ပီ ပါယ် ခဲင် နဝ်း ဂေ။

7 အုဝ် ပီ ဘော ဇမ် ဒုက် တာင်၊ မဲ ဇဝ် ယီ ဘ်ု ဒီ ယွတ်၊ ဘ်ု ဒီ စွယ် အုဝ်၊ ဝီ တဲး အုဝ် ခ ဂျာမ်ဆာ။ မဲ ဇဝ် ဘော ဝီ ဘူင် ဝျီ့ ဒီ ဂေ ရန်ဆူ အုဝ်။ ပွုန် မဲ ဇဝ် ဒီ ဘော ချွတ် အုဝ်။

8 အန် ဇဝ် ဒီ ဘော ဘူင် ဒီ အုဝ် တဲး န့ ဘဲန် တူတ့် ဒွန် မျုဝ် ခဲ့ ပီ ဒွိုမ် ခြာမ် အန်။ အိုယ် မဲ ဇဝ်ဖြာ၊ နဝ်း ရွက့် မဲ ဇဝ် ဒီ ကွယ် ဆေဆေ။ ပဲ့ ဟဲ့ ဘူင် မဲ ဇဝ်၊ ကွဲ့ တဲး မဲ ပိဝ်၊ တဲး မဲ ယွတ် မဲန် ဆေဆေ။