ခါန် 119
လွင် ဒါရာ ဇဝ်ဖြာ
မှုဝ် နီ န့ ဒူပ် ဒုဝ် ထမ် ခဲင် ဂြုဝ်း ဟဲဘြဲ။
ဒုဝ် လှေး
1 ဂေ အီ ဘူင် နာ မွှိုမ် ဆေဆေ၊ ကွဲ့ တဲး အီ ဟဝ် မိုဝ်း ဒီ ကာလာင် နာ တူ မွှိုမ် လွင် ဂေ။ ဘော ဂေ အီ ဒူပ် ဆီချာ ဒါရာ ဇဝ်ဖြာ၊ ဂေ ဒီ မိုဝ်း နဝ်း ဒါခိုယ်။
2 ဂေ အီ ထူမ် ဒူပ် ဆီချာ ပီ စ်ု အန် ဇဝ် ဘော ဂေ အီ ဆီ ဘူင် မီ ပီ အိုင် ဇဝ်ဖြာ၊ ဂေ ဒီ မိုဝ်း နဝ်း ဒါခိုယ်။
3 ဂေ ဒူအီ ဇိုဝ် တီ၊ ဂေ မိူဝ် တူ ဘူင် မှာပ်။ ဂေ ဘော ဒူပ် ဆီချာ ပီ မာနုဝ် အန် ဇဝ်။
4 မဲ ဇဝ်ဖြာ ဟဲ့ ဟွတ့် ကာလာင် အုန် ပီ စ်ု မဲ ဒီ ယေ။ မဲ ဇဝ် ဘော တဝ်း၊ တဲး ယေ ဒူပ် ဆီချာ ပီ စ်ု မဲ တီ ဒွန် ဒဲ။
5 အုဝ် ဟဲ့ ဆီ ဒူပ် ဆီချာ ပီ ဒမ် မဲ ဇဝ်။ အုဝ် ဟဲ့ ဆီ ထူမ် တူတ့် ဒွန် ဒုဝ်။
6 ဆေ အုဝ် ဘော ဒူပ် တူတ့် ဒါရာ မဲ ဇဝ်၊ အုဝ် မိူဝ် တူ လုဝ် ဆာယ် ဒေါ မှဝ်။
7 ဆေ အုဝ် ဟေန် ဆေဆေ လွင် ဒါရာ မဲ ဇဝ် အီ မုး အီ မှာန်၊ အုဝ် ဒီ ဘော မိုဝ်း နဝ်း လုယ် အီ တဲး အုဝ် အိူပ် မဲ ဇဝ်။
8 အုဝ် ဟဲ့ ဆီ ဒူပ် ခဲ့ ပီ ဒမ် မဲ ဇဝ် ဒွန် မျုဝ်။ ခုဝ်၊ မဲ ဇဝ် ကွဲ့ ဘ့လေး ဝဲန် အုဝ် ဒေါ မှဝ်။
ဒုဝ် ဟာအာ
9 ဆေ န့ မုး ဂွန် ကာညူမ်၊ မှဝ် အန် ဒီ ပါယ် ဒီ ဘူင် တဲး နဝ်း အန် ဆီငါ။း အန် လုဝ် ဘူင် ဒူပ် ဂြုဝ်း ပီ ကာလာင် ဇဝ်ဖြာ။
10 အုဝ် မိူဝ် ဂျုဝ်ဂျာ ဒီ ဒူပ် မဲ ဇဝ်။ အုဝ် ဘော မှာန့်၊ ကွဲ့ တဲး အုဝ် ဝး န့တေန့် အီ ဒူပ် ဒါရာ မဲ ဇဝ်။
11 အုဝ် ဟဲ့ တဲး ဂြုဝ်း မဲ ဇဝ်ဖြာ ကွယ် ခဲင် နဝ်း အုဝ်၊ တဲး န့ စွယ် အုဝ်၊ ကွဲ့ တဲး အုဝ် ကာလိုပ် ဒီ ဘူင် မှာပ်။
12 အိုယ် မဲ ဇဝ်ဖြာ၊ အုဝ် အိူပ် မဲ ဇဝ်၊ တဲး မဲ ဇဝ် ဘော မာနုဝ် ဒါရာ မဲ ဒီ အုဝ်။
13 အုဝ် ဒီ ကာဒွါ့ ကာဖာ ဒါရာ ဒွန် ညွင့် ပဲ့ ဟဲ့ ဒွါ မဲ ဇဝ် ဒီ အုဝ်၊ ကွဲ့ တဲး အုဝ် ပိဝ်။
14 ဆေ အုဝ် ဒူပ် ပီ စ်ု မဲ ဇဝ်၊ န့ တဲး အုဝ် ဒါခိုယ် လွှိုမ် အီ ဟဝ်၊ အီ ဟဲ့ ခြမ် ကာဆဝ်။
15 အုဝ် ဘော ကာဒွါ့ ကာဖာ ပီ စ်ု မဲ ဇဝ်။ အုဝ် ဇေန့်ဇာ လွင် ပီ မာနုဝ် မဲ ဇဝ် တီ။
16 အုဝ် ဟဲ့ အိုင် ဒီ ဘူင် ဒူပ် ခဲ့ ပီ ဒမ် မဲ ဇဝ်။ အုဝ် မိူဝ် တူ ဆီ တဲး အုဝ် ပိဝ် ဂြုဝ်း မဲ ဇဝ်။
ဒုဝ် ဟာအူယ်
17 အုဝ် မှာန့်၊ တဲး မဲ ဇဝ် ဂေဇူ အုဝ်၊ တဲး အုဝ် မိုဝ်း အာဆာက်။ တဲး အုဝ် အီ မုး ဒဲစေန့် မဲ ဘူင် ဒူပ် ဂြုဝ်း မဲ ဇဝ်။
18 အုဝ် မှာန့်၊ တဲး အုဝ် ယိုဝ် အီ ဘွတ် အီ မွှိုမ် ခဲင် ဒါရာ မဲ ဇဝ်ဖြာ။
19 အုဝ် ဘော ပီ ခဲတ့် အီ ကွယ် ဒဲင် ကာဒါယ် နီ။ အုဝ် မှာန့် မဲ ဇဝ်၊ ကွဲ့ ချြီင် ဒါရာ မဲ ဒီ အုဝ်။
20 နဝ်း အုဝ် ဒီကေန် ကာဆဝ် ဒါရာ မဲ ဇဝ်။ အုဝ် မိူဝ် ဆီ ထူမ် ဆေဆေ။
21 မဲ ဇဝ် ဘော အေး ဘော ဒိူင် ဂေ အီ ပီခိုက် ဘော ဂေ အီ ဝဲန် ဒါရာ မဲ ဇဝ်။
22 အုဝ် ဘော မှာန့်၊ ကွဲ့ တဲး အီ ဟဝ် နဲန အုဝ် ဘော ကာအိး အုဝ်။ ခုဝ်၊ အုဝ် ဟဲ့ ဘူင် ဒူပ် ဆီချာ ပီ စ်ု မဲ ဇဝ်။
23 ဂေ ဒါ ကာညာ ပီ ဘော ကာမွုန် နာ တူ မွှိုမ် လွင် အုဝ်၊ အုဝ် ဒဲစေန့် မဲ ဇဝ် ယီ ကာဒွါ့ ကာဖာ လွင် ဂြုဝ်း ပီ ဒမ် မဲ ဇဝ်။
24 ဂြုဝ်း ပီ စ်ု မဲ ဇဝ် တီ၊ န့ ဘော တဲး အုဝ် ဘျုဝ် ဒါခိုယ်၊ တဲး အုဝ် မိုဝ်း အာကျာမ် အာငျာန် ဘွတ်။
ဒုဝ် မ့ဖွုန်
25 န့ ပီ အုဝ် ဟဲ့ ကေး ခဲင် ကာပုး၊ ဟဲ့ ရိန် ဒီ ယမ်။ အုဝ် ဝီ မှာန့်၊ တဲး အုဝ် ဝီ မိုဝ်း ဟဲန့်၊ မိုဝ်း ပ့လူမ်၊ တဲး န့ ဒူပ် ကာဒိက် ဆတ်ဇာ ပဲ့ ဟဲ့ ဒွိုမ် ဒွါ မဲ ဇဝ်။
26 အုဝ် ဟဲ့ ကာလာင် တူတ့် ဒွန် မျုဝ် ပဲ့ ဟဲ့ ဒွိုမ် ဘူင် အုဝ်။ မဲ ဇဝ် မိူဝ် ဟဲ့ ထူမ်။ အုဝ် မှာန့်၊ တဲး မဲ ဇဝ် တဲး အုဝ် နပ် ပီ စ်ု မဲ ဇဝ် ဒီ ယေ။
27 အုဝ် မှာန့်၊ တဲး အုဝ် နပ် ဆီချာ လွင် ဒါင် ပီ စ်ု မဲ ဇဝ် ယေ ဘူင်။ ဆေ န့ ပါယ် တီ၊ အုဝ် ဒီ ဘော ပွိုန် ဒီ ကာဒွါ့ ကာဖာ အီ မွှိုမ် ကာဆဝ် ပီ ဘူင် မဲ ဇဝ်။
28 နဝ်း အုဝ် ဟဲ့ ဒီတဲတ် ကာဆဝ် ကူပ် က့လိုဝ် အုဝ်။ အုဝ် ဝီ မှာန့်၊ တဲး အုဝ် ဝီ မိုဝ်း ပ့လူမ် မိုဝ်း ဟဲန့်၊ တဲး န့ ဒူပ် ပဲ့ ဟဲ့ ဒွိုမ် ကာလာင် မဲ ဇဝ်။
29 အုဝ် မှာန့်၊ တဲး မဲ ဇဝ် ဝီ ယွတ် မဲန် အုဝ်၊ ကွဲ့ တဲး အုဝ် ဘူင် အီ တူ မှာန်။ တဲး မဲ ဇဝ် ဝီ ဂေဇူ အုဝ်၊ တဲး အုဝ် နပ် ဒါရာ မဲ။
30 အုဝ် ဟဲ့ ဟွတ့် ရဝ်း ဒီ ဒူပ် အီ မှာန်။ အုဝ် ဟဲ့ အုန် နဝ်း ဒီ ထူမ် ဒူပ် ပီ တဝ်း မဲ ဇဝ်။
31 အုဝ် ဒီ ဘော ထူမ် ဆီချာ ပီ စ်ု မဲ ဇဝ်။ အိုယ် မဲ ဇဝ်ဖြာ၊ အုဝ် မှာန့်၊ ကွဲ့ တဲး အုဝ် မွှိုမ် ဆာယ် ဒေါ မှဝ်။
32 အုဝ် ဟဲ့ ဂျုဝ်ဂျာ ဒီ ဒူပ် ဒါရာ မဲ ဇဝ်။ ခုဝ်၊ မဲ ဇဝ် ဟဲ့ တဲး နဝ်း အုဝ် လွတ် အီ တူ မွှိုမ်။
ဒုဝ် မ့ဖန်
33 အိုယ် မဲ ဇဝ်ဖြာ၊ တဲး မဲ ဇဝ် မာနုဝ် အုဝ်၊ တဲး အုဝ် ပွိုန် ဒီ ဒူပ် ဒါရာ မဲ၊ တဲး အုဝ် ပွိုန် ဒီ ဒူပ်၊ တဲး န့ ကော ဇမ် ပန် ဒီ တူတ့် အာဆာက် အုဝ်။
34 အုဝ် မှာန့်၊ တဲး ဒါရာ မဲ ဇဝ် ကာလှုး ဆီချာ ဒီ နဝ်း အုဝ်။ တဲး အုဝ် ပွိုန် ဒီ ဘူင် တူတ့် ခဲ့ မိုဝ်း အုဝ် နဝ်း ဘော ဖွိုမ်။
35 တဲး မဲ ဇဝ် ယဲတ့် အုဝ်၊ တဲး အုဝ် ပွိုန် ဒီ ဒူပ် ဒါရာ မဲ ဇဝ်။ ခုဝ်၊ န့ တဲး နဝ်း အုဝ် ဒါခိုယ် ကာဆဝ်။
36 တဲး မဲ ဇဝ် မ့ပြာယ် နဝ်း အုဝ်၊ တဲး အုဝ် မိုဝ်း နဝ်း ဆီ ဒူပ် ပီ စ်ု မဲ ဇဝ်၊ ကွဲ့ တဲး အုဝ် မိုဝ်း နဝ်း လောဖ။
37 အုဝ် မှာန့်၊ ကွဲ့ တဲး အုဝ် မိုဝ်း နဝ်း ကာပြာ မျုဝ် အီ တူ မိုဝ်း ဒီခုဝ်။ တဲး မဲ ဇဝ် တဲး အုဝ် မိုဝ်း နဝ်း ဒါခိုယ်၊ တဲး န့ ဒူပ် ပီ ဒွိုမ် ကာလာင် မဲ ဇဝ်။
38 အုဝ် မှာန့်၊ တဲး မဲ ဘူင် ဒီ အုဝ် ပီ ပဲ့ ဟဲ့ ဒွိုမ် ဒွါ မဲ ကာဒိက် ဆတ်ဇာ ဒီ ဂေ အီ ရုဝ်ဆေ မဲ။
39 အုဝ် မှာန့်၊ တဲး မဲ စွယ် အုဝ်၊ ကွဲ့ တဲး ဂေ ပီ ယုဝ် အုဝ်၊ ပွိုန် ဒီ ကာယွင့် အုဝ်။ ခုဝ်၊ ဒါရာ မဲ ဟဲ့ မွှိုမ်။
40 အုဝ် ဘော မိုဝ်း နဝ်း ဆီ ဒူပ် ကာဆဝ် ပီ စ်ု မဲ ဇဝ်။ ကူပ် မိုဝ်း မဲ ဇဝ် နဝ်း ဆိူဝ် နဝ်း မှာန်၊ အုဝ် မှာန့်၊ တဲး မဲ ဇဝ် ဒွါ အာဆာက် ကာမာယ် ဒီ အုဝ်။
ဒုဝ် န့ဒဝ်
41 အုဝ် မှာန့်၊ တဲး အုဝ် ယိုဝ် ပီ ဂေဇူ မဲ ဒီ အုဝ်။ တဲး မဲ ဇဝ် ချွတ် အုဝ်၊ တဲး န့ ပီ ပီ ဒွိုမ် ဒွါ မဲ ဇဝ် ကာဒိက် ဆတ်ဇာ။
42 ပါယ် တီ၊ အုဝ် ဒီ ဝီ ပွိုန် ဒီ ဝီ ဝျီ့ ဂြုဝ်း ပီ နဲန အီ ဒီ အုဝ်။ ခုဝ်၊ အုဝ် ညှိုမ် ဂြုဝ်း မဲ။
43 အုဝ် မှာန့်၊ ကွဲ့ တဲး မဲ ဇဝ် ဒိုဝ်း လေး ဂြုဝ်း မဲ ဒီ အုဝ်။ န့ မုး ဂြုဝ်း အီ မုး အီ မှာန်။ ခုဝ်၊ အုဝ် ဟဲ့ နပ်၊ ဆေ မဲ ဇဝ်ဖြာ ဆုင်ဖျာတ် ဒါရာ၊ န့ ဟဲ့ မှာန် ဟဲ့ မွှိုမ်။
44 အုဝ် ဒီ ဘော ဘူင် ဒူပ် ဒါရာ မဲ ဇဝ် ဆေဆေ။
45 အုဝ် ဟဲ့ ပွိုန် ဒီ ကွယ် ဒါခိုယ် ထင်ဟာင်။ ခုဝ်၊ အုဝ် ဟဲ့ ဂျုဝ်ဂျာ ဒီ ဒူပ် ပီ စ်ု မဲ။
46 အုဝ် ဒီ ဝီ ကာလာင် လွင် ဒါရာ မဲ ဇဝ် ဒီ ဂေ ခုန်ဒီခမ်။ အုဝ် မိူဝ် တူ လုဝ် ဆာယ် မာဆေ။
47 အုဝ် ဟဲ့ ဘျုဝ် ဒါခိုယ် ဒီ ဒူပ် ဒါရာ မဲ ဇဝ် ကူပ် ရွက့် အုဝ် ဒါရာ တီ။
48 အုဝ် ဘော ရုဝ်ဆေ ဒါရာ မဲ ဇဝ် ပဲ့ ဟဲ့ ရွက့် အုဝ်။ အုဝ် ဘော ကာဒွါ့ ကာဖာ ပီ ဒမ် မဲ ဇဝ်။
ဒုဝ် န့ ဘူ
49 အုဝ် မှာန့်၊ မဲ ဇဝ် လှုဝ်း ကာဒိက် ဆတ်ဇာ ပဲ့ ဟဲ့ ဒွိုမ် ဒွါ မဲ ဇဝ် ဒီ ဒဲစေန့် မဲ။ ခုဝ်၊ န့ ဟဲ့ တဲး အုဝ် နှဝ့် န့ဒဝ့် လွင် အန် တီ။
50 အုဝ် ပီ ဘော ဟဲ့ ဒုက် ကာဆဝ် မိူဝ်၊ နဝ်း အုဝ် ယီ ဒါခိုယ် ကူပ် ကာဒိက် ဆတ်ဇာ ပီ ဒွါ မဲ ဇဝ် ဒီ အုဝ်။ န့ တူ တဲး အာဆာက် အုဝ် စှိုမ်။
51 ဂေ အီ ပီခိုက် ပီ ဘော ဟဲ့ ကာယွင့် ကာဆဝ် အုဝ် မိူဝ်၊ န့ တူ တဲး အုဝ် နဝ်း ဘ့လိူင်။ အုဝ် တူ ဝး န့တေန့် မဲ ဇဝ်။
52 အိုယ် မဲ ဇဝ်ဖြာ၊ အုဝ် ဘော လှုဝ်း ဒါရာ ပဲ့ ဟဲ့ ဒွိုမ် ဘ့လေး အုန် မဲ အာတ့် နီ။ န့ တဲး အုဝ် ဘဲန် နဝ်း နှိမ် နဝ်း ယေန်။
53 အုဝ် ဘော ကာအိး ကာဆဝ် ဂေ ဒူအီ ဟာယ်၊ အီ တူ ထူမ်၊ အီ ဝဲန် ဒါရာ မဲ ဇဝ်။
54 ဒေါ ကွယ် အုဝ် ဒဲင် ကာဒါယ် နီ အာဒါ အူ ကာစန်၊ အုဝ် ဘော ဒိုဝ်း ဂြုဝ်း ပီ စ်ု မဲ ဇဝ်၊ ဝီ တဝ်း တဲး န့ ဘဲန် န့စေန့်။
55 အိုယ် မဲ ဇဝ်ဖြာ၊ ကာတဲ ဆွိုမ် အုဝ် ဘော လှုဝ်း မဲ ဇဝ်။ အုဝ် ဘော ဒူပ် ဒါရာ မဲ ဇဝ်။
56 ဒါရာ ပီ တဲး မဲ ဇဝ် အုဝ် ဒူပ်၊ န့ ဘဲန် ပီ မွင့်ကာရာ မဲ ဇဝ် ဒီ အုဝ်။
ဒုဝ် န့ ဒါ
57 မဲ ဇဝ် ဘော ပီ ခါဂုန် ပဲ့ ဟဲ့ ပွိုန် အုဝ်။ အုဝ် မိူဝ် ဟဲ့ ဒွါ ကာဒိက် ဆတ်ဇာ၊ တဝ်း ဒီ ဘူင် ဒူပ် ဂြုဝ်း မဲ ဇဝ်ဖြာ။
58 ဘော နဝ်း ဘော ဖွိုမ် အုဝ် ဂျုဝ်ဂျာ ဒီ ဘူင် တဲး မဲ ဇဝ် အိုင် ပီ ဘူင် အုဝ်။ တဲး မဲ ဇဝ် ကာဝေ အုဝ်၊ တဲး န့ ဒူပ် ခဲ့ ပီ ဒွိုမ် ဒွါ မဲ ကာဒိက် ဆတ်ဇာ။
59 အုဝ် ဟဲ့ ကာဖာ လွင် ပဲ့ ဟဲ့ ဘူင် အုဝ်။ ဟဲ့ ဟွတ့်၊ အုဝ် ဘော ဝီ ဒူပ် ဆီချာ ဒါရာ ပီ မာနုဝ် မဲ ဇဝ်။
60 အုဝ် မိူဝ် တူ ဘ်ု တဲး န့ လှေန့်။ အုဝ် ဘော ပီခြန် ဒီ ဒူပ် ဒါရာ မဲ ဇဝ် တီ။
61 ဂေ ဒူအီ ဟာယ် ပီ ဘော ဟဲ့ ဒိန့် ယွတ့် ဂေ ခူပ် အုဝ်၊ အုဝ် မိူဝ် တူ ပိဝ် ဒါရာ မဲ ဇဝ်။
62 ခဲင် မှိုဝ် ကာတဲ ဆွိုမ်၊ အုဝ် ဘော န့ဆိုဝ်း၊ ယိတ့်၊ ဒါင် ဂုင် ဂေဇူ ဒီ မဲ ဇဝ် ကူပ် ပီ ဆုင်ဖျာတ် မဲ ဇဝ် ဟဲ့ မုး ဟဲ့ မှာန်။
63 အုဝ် ဘော ကွယ် ရိုမ်၊ ဘဲန် ဂိုက် ဂေ ဒွန် အီ အီ ရုဝ်ဆေ မဲ ဇဝ်၊ ဘော ဂေ အီ ထူမ် ဒူပ် ဂြုဝ်း မဲ။
64 မဲ ဇဝ်ဖြာ၊ မဲ ရွက့် ဒူအီ ဘောကာဂ့လျီတ် အီ ကွယ် ဒဲင် ကာဒါယ် နီ ဒွန် နာ ဒွန် ပ့လုဝ့်။ တဲး မဲ ဇဝ် မာနုဝ် အုဝ်၊ တဲး အုဝ် နပ် ဒါရာ မဲ တီ။
ဒုဝ် န့ ဒိမ်
65 အိုယ် မဲ ဇဝ်ဖြာ၊ မဲ ဟဲ့ ဂေဇူ အုဝ်။ ဟဲ့ ဒူပ် ပီ ဒွိုမ် ဒွါ မဲ ဇဝ် ကာဒိက် ဆတ်ဇာ။
66 ကူပ် ညှိုမ် အုဝ် ဂြုဝ်း ဒါရာ မဲ ဇဝ်၊ အုဝ် မှာန့်၊ တဲး မဲ ဇဝ် မာနုဝ် အုဝ်၊ တဲး အုဝ် ဘူင် ဒူပ် အာငျာန် မဲ ဇဝ်။
67 အာတ့် ဒွါ မဲ ဇဝ် ဒုက် ဒီ အုဝ်၊ အုဝ် ဟဲ့ ကာလိုပ်။ ဒေါ တီ နီ၊ အုဝ် ယီ ဝီ ဒူပ် ဂြုဝ်း မဲ ဇဝ်ဖြာ။
68 မဲ ဇဝ် ဘော မိုဝ်း နဝ်း မွှိုမ်။ မဲ မိူဝ် ဘူင် နာ မွှိုမ် ဆေဆေ။ အုဝ် မှာန့်၊ တဲး မဲ မာနုဝ် အုဝ်၊ တဲး အုဝ် နပ် ဒါရာ မဲ ဇဝ်။
69 ဂေ ဒူအီ ပီခိုက်၊ ဂေ ဟဲ့ ကာလုဝ် ဒီ ကာလာင် လွင် အုဝ်။ အုဝ် ယီ တဲး ဘော နဝ်း ဘော ဖွိုမ် အုဝ် ဒူပ် တူတ့် ပီ စ်ု မဲ ဇဝ်။
70 ဒူအီ ဂေ တီ၊ ဂေ မိုဝ်း နဝ်း ဒိူဝ်။ အုဝ် ယီ ခူယ် ကာဆဝ် ဒီ ဒူပ် ဒါရာ မဲ ဇဝ်။
71 ဒုက် တာင် ပဲ့ ဟဲ့ ခမ် အုဝ်၊ န့ ဘော ဝီ ဘဲန် အီ ဘွတ် အီ မွှိုမ် ဒီ အုဝ်။ န့ တဲး အုဝ် ကော ဝီ ပွိုန် ဒီ ဟေန် ခဲ့ ပီ ဒမ် မဲ ဇဝ်ဖြာ။
72 ဒါရာ ပဲ့ ဟဲ့ ဒွါ မဲ ဇဝ်၊ န့ ဘွတ် ကာဆဝ်။ အုဝ် ထာင် န့ မွှိုမ် လွှိုမ် ရွိုန် ဂေ ခြိဝ် ဘဲန် ဟြဲန့် ဘဲန် ဟြဲန့် ဘူင့်။
ဒုဝ် ဂိုဝ်
73 မဲ ဇဝ်ဖြာ ဟဲ့ ဘူင် အာရိုပ် အုဝ် တာ ဒဲ မဲ။ ဒေါ ဟေန် အုဝ် ဒါရာ မဲ ဇဝ်၊ အုဝ် မှာန့်၊ တဲး န့ ကာလှုး ဆီချာ ဒီ နဝ်း အုဝ်။
74 တဲး ဂေ အီ ရုဝ်ဆေ မဲ ဇဝ် ခူယ် ကာဆဝ် ဒေါ ယိုဝ် ဂေ ဒီ အုဝ်။ တဲး ဂေ ဒါခိုယ် ကူပ် ညှိုမ် ဘိုင် အုဝ် ဂြုဝ်း မဲ ဇဝ်။
75 အိုယ် မဲ ဇဝ်ဖြာ၊ အုဝ် ဟဲ့ နပ် ပီ ဆုင်ဖျာတ် မဲ ဇဝ် ဟဲ့ မုး ဟဲ့ မှာန်။ ကူပ် ဘူင် မဲ နာ မှာန် ဆေဆေ၊ မဲ ဟဲ့ ဒွါ ဒုက် ဒီ အုဝ်။
76 တဲး မဲ ဇဝ် ကာဝေ အုဝ် ကူပ် ရွက့် မဲ ဆေဆေ။ တဲး န့ ဒူပ် ခဲ့ ပီ ဒွိုမ် ဒွါ မဲ ဇဝ် ကာဒိက် ဆတ်ဇာ ဒီ ဒဲစေန့် မဲ။
77 တဲး မဲ ဇဝ် ဘော ဂေဇူ အုဝ်၊ တဲး အုဝ် အိမ်။ ခုဝ်၊ ဒါရာ မဲ တဲး န့ ဘဲန် နဝ်း ဒါခိုယ် ဒီ အုဝ်။
78 တဲး ဂေ ဒူအီ ပီခိုက် ဝီ လုဝ် ဆာယ် အီ။ ခုဝ်၊ ဂေ ဟဲ့ ပျာတ့် အုဝ် ပီယေန့်။ အီ မုး အုဝ်၊ အုဝ် ဒီ ဘော ကာဒွါ့ ကာဖာ ပီ စ်ု မဲ ဇဝ်။
79 ဂေ အီ ရုဝ်ဆေ မဲ ဇဝ် ဘော ဂေ အီ ဟဲ့ နပ် ဒါရာ မဲ ဇဝ်၊ တဲး ဂေ ဘော တး ဒူင် ကွယ် အုဝ်။
80 တဲး အုဝ် ဘော ပွိုန် ဒီ ဒူပ် ဆီချာ ဒါရာ မဲ ဇဝ် ဒွန် မျုဝ်၊ ကွဲ့ တဲး အုဝ် လုဝ် ဆာယ် ဒေါ မှဝ်။
ဒုဝ် ဂိုဝ် ဒီ လှေး
81 အိုယ် မဲ ဇဝ်ဖြာ၊ အုဝ် ဘော နှဝ့် န့ဒဝ့် ကာဆဝ် ပန် ဒီ ချွတ် မဲ ဇဝ် ဒီ အုဝ်၊ တဲး နဝ်း အုဝ် ကော ဝီ ဒီလှး အာဝ် ဟူ မိုဝ်း ဟဲန့်။ ပီ ဘော ဟဲ့ ပါယ် တီ မိူဝ်၊ အုဝ် ယီ ညှိုမ် ဘိုင် ဂြုဝ်း ပီ ကာလာင် မဲ ဇဝ်ဖြာ။
82 ငါယ် အုဝ် ဟဲ့ န့စမ် ဒီ ဟြေတ့် ကာဒိက် ဆတ်ဇာ မဲ ဇဝ်။ အုဝ် ဝီ တဝ်း၊ “ပန် မှဝ် မဲ ဇဝ် ဒီ ကာဝေ အုဝ်။း”
83 အုဝ် ဟဲ့ ခမ် ဒီ ဘဲန် ပီ ကာအိး အီ ဟဝ်။ ပီ ဘော ဟဲ့ ပါယ် တီ၊ အုဝ် တူ ပိဝ် ဒါရာ မဲ ဇဝ်။
84 မဲ ဇဝ် ဒီ တဲး အုဝ် ခမ် လှေန့် ပေါ ခဲ့ မှဝ်။း ပန် မှဝ် မဲ ဇဝ် ဒီ ဒမ် မှာပ် ဒီ ဂေ အီ ခါနှာပ် အုဝ်။း
85 ဂေ ဒူအီ ပီခိုက်၊ ဂေ တူ ဒူပ် ဂြုဝ်း မဲ ဇဝ်။ ဂေ ခြာမ် ဒီ တဲး အုဝ် စှိုမ် ပီ အီ ဂိုဝ်း ကာဒဝ် တဲး မာဒုဝ် ပြဲ စုဝ်း။
86 ဒါရာ မဲ ဇဝ် ဒွန် ညွင့် ဟဲ့ မုး ဟဲ့ မှာန်၊ ဟဲ့ ပွိုန် ညှိုမ်။ အုဝ် မှာန့်၊ တဲး မဲ ဇဝ် စွယ် အုဝ်။ ခုဝ်၊ ပီ ခါနှာပ် ဂေ ဒီ အုဝ် အာဝ် မိုဝ်း ဒီခုဝ်။
87 ဂေ ဘော ဟဲ့ ရိန် ဒီ ငဝ်း ယမ် အုဝ်။ မာလဲ၊ အုဝ် ယီ တူ ဝဲန် ဂြုဝ်း မဲ ဇဝ်ဖြာ။
88 မဲ ဇဝ်၊ တဲး မဲ ဘ်ု ရိတ် အာဆာက် အုဝ်၊ ကူပ် မိုဝ်း မဲ နဝ်း ရွက့် ကာဝေ။ ပါယ် တီ အုဝ် ဒီ ဘော ဒူပ် ပီ စ်ု မဲ ဇဝ်။
ဒုဝ် ဂိုဝ် ဒီ ဟာအာ
89 အိုယ် မဲ ဇဝ်ဖြာ၊ ဂြုဝ်း မဲ ဘော ကွယ် ဆေဆေ။ ဘော ဂေ ခဲင် ဂါင်ဟြာဝ် ဒီ ဘော ဒူပ် ဂြုဝ်း မဲ တီ။
90 မဲ ဇဝ် ဘော မိုဝ်း နဝ်း ဆိူဝ် နဝ်း မှာန် ဒီ ဒူအီ ဒွန် စုဝ် ဒွန် ဘာန်။ မဲ ဇဝ် ဘော ဖာန် ဘ့လေး ကာဒါယ်၊ တဲး န့ ကွယ် ဆေဆေ။
91 ဒါရာ မဲ ဘော ကွယ် ဇမ် အာတိုဝ် နီ။ ခဲ့ ကွယ် ဒွန် မျုဝ် ဒဲင် ကာဒါယ် နီ၊ န့ ဘဲန် တူတ့် ပီ ဆုတ့် ပီ စ်ု မဲ ဇဝ်။
92 ဆေ အုဝ် တူ ဘျုဝ် ဒါခိုယ် ဒီ ဒူပ် ဒါရာ မဲ ဇဝ်၊ ဒေါ ကာဒုး အုဝ် ဒုက် တာင် တွိုန်၊ အုဝ် ဟဲ့ ဟွတ့် ယမ်။
93 အုဝ် မိူဝ် တူ ပိဝ် ပီ စ်ု မဲ ဇဝ် ဒေါ မှဝ်။ ခုဝ်၊ န့ ဘော မုး ပီ စ်ု မဲ ဇဝ် တီ အီ တဲး အုဝ် မိုဝ်း အာဆာက်။
94 အုဝ် ဘော မုး ဒူအီ ပီ အိုပ် မဲ ဇဝ်။ အုဝ် မှာန့်၊ တဲး မဲ ဇဝ် ချွတ် အုဝ်။ အုဝ် ဘော ဂျုဝ်ဂျာ ကာဆဝ် ဒီ ဒူပ် ဂြုဝ်း မဲ ဇဝ်။
95 ဂေ ဒူအီ ဟာယ် ဒူအီ မိူက်၊ ဂေ ဘော ဘ်ု ဒီ ငဝ်း ယမ် အုဝ်။ မာလဲ၊ အုဝ် ဝီ ကာဒွါ့ ကာဖာ ပီ စ်ု မဲ ဇဝ်။
96 ခဲ့ ကွယ် ဒွန် မျုဝ်၊ အာဝ် မိုဝ်း ခေါ အူ မျုဝ် အီ ဇေ့ဇုင်။ န့ ယီ မုး ဒါရာ မဲ ဇဝ်ဖြာ အီ ဟဲ့ ဇေ့ဇုင်။
ဒုဝ် ဂိုဝ် ဒီ ဟာအူယ်
97 အုဝ် ရွက့် ဂြုဝ်း မဲ ဇဝ်။ န့ လဝ့် ကာဆဝ် နဝ်း အုဝ်။ အုဝ် ဘော ကာဒွါ့ ကာဖာ ဂြုဝ်း မဲ ဇဝ်ဖြာ ဒွင် ဝန်။
98 ဒါရာ မဲ ဇဝ် တီ၊ အုဝ် ဘော လှုဝ်း ဆေဆေ၊ န့ တဲး အုဝ် မိုဝ်း အာငျာန် လွှိုမ် ဂေ ရန်ဆူ အုဝ်။
99 ကူပ် ကာဒွါ့ ကာဖာ အုဝ် ဂြုဝ်း မဲ ဇဝ် တီ၊ အုဝ် ဘော နပ် ဆီချာ ပီ ပါယ် ဘဲန် မျုဝ် ဘဲန် မျုဝ်။ ဂေ ဒါ ဆာရာ အုဝ်၊ ဂေ ဒွန် အီ တူ နပ် ခဲ့ တီ။
100 ကူပ် ဒူပ် အုဝ် ဂြုဝ်း မဲ ဇဝ် တီ၊ န့ မိုဝ်း ဘဲန် မျုဝ် ဘဲန် မျုဝ် အီ ကာလှုး ဒီ နဝ်း အုဝ်။ ဂေ ဒူအီ ကတ် ဒူအီ ဂဲ တူ နပ် ခဲ့ တီ။
101 အုဝ် ဟဲ့ ဝဲန် အာဂျာင် အီ တူ မွှိုမ် ဒွန် မျုဝ်၊ တဲး အုဝ် ပွိုန် ဒီ ဒူပ် ဆီချာ ဂြုဝ်း ပီ ကာလာင် မဲ ဇဝ်။
102 အုဝ် မိူဝ် တူ ဘ့လေး တူ ဝဲန် ဒါရာ မဲ ဇဝ် တီ။ ခုဝ်၊ န့ မုး မဲ ဇဝ် အီ ဘဲန် ဒါ ဆာရာ အီ မာနုဝ် အုဝ်။
103 ဆေ အုဝ် ဟေန် ဂြုဝ်း ပီ ကာလာင် မဲ ဇဝ်၊ န့ ဒါခိုယ် ကာဆဝ်။ ဆေ အုဝ် ဟူမ် ဆီငဲး ခဲင် ဘ့လွယ်၊ အာဝ် ကျဝ် ခဲ့ တီ။
104 ဒေါ ထူမ် အုဝ် ဂြုဝ်း မဲ ဇဝ် တီ၊ န့ ကာလှုး ဘဲန် မျုဝ် ဘဲန် မျုဝ် ဒီ နဝ်း အုဝ်။ န့ တဲး အုဝ် ဘော ကာအိး အာဂျာင် အီ တူ မွှိုမ် ဒွန် မျုဝ်။
ဒုဝ် ဂိုဝ် ဒီ မ့ဖွုန်
105 ဂြုဝ်း မဲ ဇဝ်ဖြာ ဘော ပီ ငဝ် ရာင် အီ ဆွိုန် ဒူပ် န့တေန့် အုဝ်၊ တဲး န့ ဘ့လာင် ဒူင် ဟာဝ် အုဝ်။
106 အုဝ် ဟဲ့ ကာဆဲန့် ဒီ ဒူပ် ဒါရာ မဲ ဇဝ် အီ မှာန် အီ မုး။ အုဝ် ဒီ ဘော ဘူင် ပီ ကာဆဲန့် အုဝ် တီ။
107 အိုယ် မဲ ဇဝ်ဖြာ၊ အုဝ် ဟဲ့ ဇမ် ဒုက် တာင် ကာဆဝ်။ အုဝ် မှာန့်၊ တဲး မဲ ဇဝ် ဘ်ု ရိတ် အာဆာက် အုဝ်၊ တဲး န့ ဒူပ် ပီ ဒွိုမ် ကာလာင် မဲ ဇဝ်။
108 အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ အိူပ် အုဝ် ဒီ မဲ။ တဲး မဲ ဇဝ် မာနုဝ် ဒါရာ မဲ ဒီ အုဝ်။
109 အုဝ် ဟဲ့ ကာဒုး အီ မွှိုမ် ယုဝ် ကာဆဝ်။ မာလဲ၊ အုဝ် ယီ တူ ပိဝ် ဒါရာ မဲ ဇဝ်။
110 ဂေ ဒူအီ ဟာယ် ဒူအီ မိူက် ဟဲ့ ဒိန့် ယွတ့် ဂေ ဒီ အုဝ်။ မာလဲ၊ အုဝ် ယီ တူ ဝး တူ ဘ့လိူင် ပီ စ်ု မဲ ဇဝ်။
111 ဒါရာ မဲ ဇဝ် ဘော ပီ ခါဂုန် ပဲ့ ဟဲ့ ဘိုင် အုဝ် ဆေဆေ၊ အီ တဲး နဝ်း အုဝ် ဒါခိုယ်။
112 အုဝ် ဟဲ့ အုန် နဝ်း ဒီ ဒူပ် ဒါရာ မဲ ဇဝ်၊ တဲး န့ ကော ဇမ် ပန် ဒီ တူတ့် အာဆာက် အုဝ်။
ဒုဝ် ဂိုဝ် ဒီ မ့ဖန်
113 အုဝ် ဘော ဇွင့် ဂေ အီ မိုဝ်း နဝ်း အာ မျုဝ်။ မာလဲ၊ အုဝ် ယီ ရွက့် ဒါရာ မဲ ဇဝ်ဖြာ။
114 မဲ ဇဝ် မုး အီ ဂွင့် အီ ရဲ အုဝ်။ မဲ မုး ဘော ဒူင် ဘိုင် အုဝ်။ အုဝ် ဘော နှဝ့် န့ဒဝ့် ပန် ဒီ ဘူင် မဲ ဇဝ် ပီ ကာလာင် မဲ။
115 အိုယ် ဘေ ဒူအီ မိူက်၊ တဲး ဘေ လေး တဝ် ဒူင် ကွယ် အုဝ်၊ တဲး အုဝ် ပွိုန် ဒီ ဒူပ် ဒါရာ ဇဝ်ဖြာ။
116 အုဝ် မှာန့်၊ တဲး မဲ ဇဝ် ဒွါ ပ့လူမ် ဒွါ ဟဲန့် ဒီ အုဝ်၊ တဲး န့ ဒူပ် ပီ ဒွိုမ် ဒွါ မဲ ဇဝ် ကာဒိက် ဆတ်ဇာ။ တဲး အုဝ် အိမ်၊ ကွဲ့ တဲး အုဝ် ယမ်။ ပီ နှဝ့် န့ဒဝ့် အုဝ်၊ ကွဲ့ တဲး န့ ကာလုတ့် နဝ်း။
117 တဲး မဲ ဇဝ် စွယ် အုဝ်၊ တဲး အုဝ် ကွယ် ဆီချာ။ အုဝ် ဒီ ဘော လှုဝ်း ဘော ဒူပ် ပီ ဒမ် မဲ ဇဝ် ဆေဆေ။
118 မဲ ဇဝ် ဘော ဝဲန် တူတ့် ဂေ အီ တူ ဒူပ် ပီ ဒမ် မဲ ဇဝ်။ ဂေ ပီ ဘော လွှက့် ခဲ့ မှဝ်၊ ယီ တူ မိုဝ်း ဒီခုဝ်။
119 ခဲ့ ကွယ် ဂေ ဒူအီ ဟာယ် ဒူအီ မိူက် ဒဲင် ကာဒါယ် နီ၊ မဲ ဇဝ် ဝဲန် ဂေ၊ တဲး န့ ပီ အီ ဝဲန် အျီင် ရွိုန်။ ကူပ် ပါယ် တီ၊ ဒါရာ မဲ ဇဝ် ဟဲ့ လဝ့် ကာဆဝ် နဝ်း အုဝ်။
120 န့ ဘော ဘဲန် ဟိုက် ကာဘြး၊ ဘော ကာဒွါ့ ယင် အျီန် ဘော လေး ဒီ အုဝ် ကူပ် ယုဝ် အုဝ် မဲ ဇဝ်။ အုဝ် ဘော ယုဝ် လွင် ပီ ဒီ ဆုင်ဖျာတ် မဲ ဇဝ် အာမူ ဒူအီ။
ဒုဝ် ဂိုဝ် ဒီ န့ဒဝ်
121 မဲ ဇဝ်၊ အုဝ် ဟဲ့ ဘူင် နာ ဘွတ် နာ မွှိုမ် ဘော နာ မုး နာ မှာန်။ အုဝ် မှာန့်၊ ကွဲ့ တဲး မဲ ဇဝ် အာပ် အုဝ် ဒီ ရန်ဆူ အုဝ်။
122 အုဝ် မှာန့်၊ တဲး မဲ ဇဝ် စွယ် အုဝ် အာခါခ်ု။ ကွဲ့ တဲး ဂေ ဒူအီ ပီခိုက် ပွိုန် ဒီ ခါနှာပ် အုဝ်။
123 အုဝ် ဘော ဘ်ု ကာဆဝ် ပန် ဒီ ချွတ် မဲ ဇဝ် ဒီ အုဝ် ဘော ပန် ဒီ ဘူင် မဲ ဇဝ် ပီ ဒွိုမ် ဒွါ မဲ ကာဒိက် ဆတ်ဇာ ဒီ အုဝ်။
124 တဲး မဲ ဇဝ် ဘူင် ဒီ ဒဲစေန့် မဲ ခဲ့ မိုဝ်း မဲ ဇဝ် နဝ်း ရွက့် ကာဝေ။ တဲး မဲ ဇဝ် မာနုဝ် ဒါရာ မဲ ဒီ ဒဲစေန့် မဲ။
125 အုဝ် ဘော မုး ပီ ဆုတ့် ပီ စ်ု မဲ ဇဝ်။ အုဝ် မှာန့်၊ တဲး အာကျာမ် အာငျာန် မဲ ဇဝ် ဒွန် မျုဝ် ကာလှုး ဆီချာ ဒီ နဝ်း အုဝ်။
126 အိုယ် မဲ ဇဝ်ဖြာ၊ ဟဲ့ ဟွတ့် ဇမ် အာခြာဝ် ဒီ လုဝ် ဒမ် မဲ မှာပ် ဒီ ဒူအီ။ ခုဝ်၊ ဂေ ဟဲ့ ဝဲန် ဒါရာ မဲ ဇဝ်။
127 အုဝ် ဘော ရွက့် ဒါရာ မဲ ဇဝ် လွှိုမ် ရွက့် အုဝ် ခြိဝ် ဇဲတ်။
128 အုဝ် ထာင် ပီ စ်ု မဲ ဇဝ် ဒွန် မျုဝ် ဟဲ့ မှာန် ဟဲ့ မုး။ ခုဝ်၊ အုဝ် ကာအိး အီ တူ မွှိုမ် ဒွန် မျုဝ်။
ဒုဝ် ဂိုဝ် ဒီ မ့ဘူ
129 ပီ စ်ု မဲ ဇဝ်၊ န့ မွှိုမ် အာမ် ကာဆဝ်။ ခုဝ်၊ အုဝ် ဒူပ် တူတ့် ဒွန် ဒဲ။
130 ဆေ ဂြုဝ်း မဲ ဇဝ်ဖြာ ကာလှုး ဒီ နဝ်း၊ န့ ပီ ဟဲ့ ဘ့လာင် ဒီ နဝ်း။ န့ ဘော တဲး ဒူအီ ရိုဝ် ဝီ ဘဲန် ဒူအီ လွှက့်။
131 အုဝ် ဆီ ထူမ် ကာဆဝ် ဒါရာ မဲ ဇဝ်။ န့ ပီ အုဝ် ကာပြာန့် ကာဆဝ် ပီ ဒီ ဟူမ်။
132 အုဝ် မှာန့်၊ တဲး မဲ ဇဝ် ဝီ ယွတ် အုဝ်၊ ဝီ ဂေဇူ အုဝ်၊ တဲး န့ ပီ ပဲ့ ဟဲ့ ဘူင် မဲ ဆေဆေ ဒီ ဂေ အီ ရွက့် မဲ။
133 တဲး မဲ ဇဝ် နှဲ န့တေန့် အီ ဒူပ် ဒါရာ မဲ ဒီ အုဝ်၊ ကွဲ့ တဲး အုဝ် စှိုမ်၊ ကွဲ့ တဲး မှာပ် မျုဝ် မှဝ် ပွိုန် ဒီ အိုပ် အုဝ်။
134 တဲး မဲ ဇဝ် ချွတ် အုဝ်၊ တဲး အုဝ် လွတ် ဒီ ဂေ အီ ခါနှာပ် အုဝ်။ တဲး အုဝ် ဘော ပွိုန် ဒီ ဘူင် ပီ စ်ု မဲ ဇဝ်။
135 တဲး မဲ ဇဝ် ကာဝေ အုဝ်။ တဲး မဲ ဘော မာနုဝ် အုဝ်၊ တဲး အုဝ် နပ် ပီ ဒမ် မဲ ဇဝ်။
136 အိုမ် ငါယ် အုဝ် ဘော လှဲ ကူပ် တူ ထူမ် ဂေ ဒူအီ ဟဝ် ဒါရာ မဲ ဇဝ်။
ဒုဝ် ဂိုဝ် ဒီ န့ဒါ
137 အိုယ် မဲ ဇဝ်ဖြာ၊ မဲ မိုဝ်း နဝ်း ဆိူဝ် နဝ်း မှာန်။ ဒါရာ မဲ ဇဝ် န့ ဟဲ့ မုး ဟဲ့ မှာန် ဒွန် မျုဝ်။
138 ပီ စ်ု မဲ ဇဝ်၊ န့ ဘော မှာန် အာခါခ်ု၊ ဟဲ့ ပွိုန် ညှိုမ်။
139 အုဝ် ခမ် ယမ် ဒီ ရွက့် ဂြုဝ်း မဲ ဇဝ်ဖြာ။ ကူပ် ဟဲ့ ဝဲန် ဂေ ရန်ဆူ အုဝ် ဂြုဝ်း မဲ၊ န့ ဝီ ဘဲန် နဝ်း ဒီလှး ဒီ အုဝ်။
140 ကာဒိက် ဆတ်ဇာ မဲ ဇဝ် ဟဲ့ မှာန် အာခါခ်ု။ ခုဝ်၊ န့ ဘော လဝ့် ကာဆဝ် နဝ်း အုဝ် အီ မုး ဒဲစေန့် မဲ။
141 အုဝ် တူ မုး ဒူအီ အီ အာရေ တာင်၊ အုဝ် မုး ပီ တူ ရုဝ်ဆေ အီ ဟဝ်။ မာလဲ၊ အုဝ် ယီ တူ ပိဝ် ပီ စ်ု မဲ ဇဝ်။
142 နဝ်း ဆိူဝ် နဝ်း မှာန် မဲ ဇဝ်၊ န့ ဘော ကွယ် ဆေဆေ။ ဒါရာ မဲ ဇဝ် န့ ဘော မုး ဒါရာ မှာန် အာခါခ်ု။
143 နဝ်း အုဝ် ဘော က့လိုဝ် ဘော ကာဟွာ့။ မာလဲ၊ ဒါရာ မဲ ဇဝ် ဝီ တဲး နဝ်း အုဝ် ဘျုဝ် ဒါခိုယ်။
144 ပီ စ်ု မဲ ဇဝ်၊ န့ ဘော မှာန် ဆေဆေ။ အုဝ် မှာန့်၊ တဲး န့ ကာလှုး ဆီချာ ဒီ နဝ်း အုဝ်၊ တဲး အုဝ် အိမ်၊ ကွဲ့ တဲး အာဆာက် အုဝ် စှိုမ်။
ဒုဝ် ဂိုဝ် ဒီ န့ဒိမ်
145 ခဲ့ ကွယ် ဘော နဝ်း ဘော ဖွိုမ် အုဝ်၊ အုဝ် ဒတ် ဒဲ့ မဲ ဇဝ်။ အိုယ် မဲ ဇဝ်ဖြာ၊ တဲး မဲ ဇဝ် ဝျီ့ ဂြုဝ်း အုဝ်။ အုဝ် ဒီ ဘော ဒူပ် ပီ ဒမ် မဲ ဇဝ်။
146 အုဝ် ဒတ် ဒဲ့ မဲ ဇဝ်၊ တဲး မဲ ချွတ် အုဝ်။ တဲး အုဝ် ဒူပ် ပီ စ်ု မဲ ဇဝ်။
147 ဆိန့် အာတ့် ဝး ပြဲ၊ အုဝ် ဟဲ့ န့ဆိုဝ်း၊ ဒတ် ဒဲ့ မဲ ဇဝ်၊ မှာန့် တဲး မဲ စွယ် အုဝ်။ အုဝ် ဘော နှဝ့် န့ဒဝ့် ပန် ဒီ ဘူင် မဲ ဇဝ် ပီ ဒွိုမ် ကာလာင် မဲ။
148 အုဝ် ဘော ကာဒွါ့ ကာဖာ ဂြုဝ်း ပီ မာနုဝ် မဲ ဇဝ် ဒွင် ခိူန် ကော ဟူ ဘဲန် ဆီ အိတ်။
149 တဲး မဲ ဇဝ် ထူမ် ဂြုဝ်း အုဝ်၊ တဲး န့ ကာဒါန် ခဲ့ ရွက့် မဲ။ တဲး မဲ ဇဝ် ဘ်ု ရိတ် အာဆာက် အုဝ်၊ တဲး န့ ကာဒါန် ခဲ့ ပီ ဆုင်ဖျာတ် မဲ နာ မုး နာ မှာန်။
150 ဂေ ဒူအီ ဟာယ် အီ ဆီ ဘူင် နာ စာဝ် ဒီ အုဝ်၊ ဂေ ဟဲ့ တး ကာတတ် အုဝ်။ ဂေ ယီ တူ မိုဝ်း နဝ်း ဆီ ထူမ် ဂြုဝ်း မဲ ဇဝ်။
151 မဲ ဇဝ် မိူဝ် ဟဲ့ ဟွတ့် ကွယ် ကာတတ် အုဝ်၊ ဘော ဒါရာ မဲ ဇဝ် ဒွန် မျုဝ်၊ န့ ဟဲ့ မှာန် ဆေဆေ။
152 ဆိန့် ဒေါ မွိုန်၊ အုဝ် ဟဲ့ ဟေန် လွင် ပီ စ်ု မဲ ဇဝ်။ မဲ ဇဝ် ဟဲ့ တဲး န့ ကွယ် ဆေဆေ။
ဒုဝ် အာ ဂိုဝ်
153 တဲး မဲ ဇဝ် ဘော ယွတ် ခဲ့ ဟဲ့ ဒုက် အုဝ်။ တဲး မဲ ဇဝ် ဘော ချွတ် အုဝ်။ ခုဝ်၊ အုဝ် မိူဝ် တူ ပိဝ် ဒါရာ မဲ ဇဝ်။
154 တဲး မဲ ဇဝ် ကာလာင် လွင် တူ မိုဝ်း အုဝ် မှာပ်။ တဲး မဲ စွယ် အုဝ်။ တဲး အုဝ် ပွိုန် ဒီ ကွယ် ဒါခိုယ်။ တဲး မဲ ဇဝ် ချွတ် အာဆာက် အုဝ်၊ တဲး န့ ဒူပ် ပီ ဒွိုမ် ကာဆဲန့် မဲ ဇဝ် ဒီ အုဝ်။
155 မဲ ဇဝ်ဖြာ တူ ချွတ် ဒူအီ ဟာယ် ဒူအီ မိူက် ကူပ် တူ လှုဝ်း တူ ဒူပ် ဂေ ပီ ဒမ် မဲ ဇဝ်။
156 အိုယ် မဲ ဇဝ်ဖြာ၊ မဲ ရွက့် ကာဝေ ကာဆဝ် ဒူအီ။ အုဝ် မှာန့်၊ တဲး မဲ ဇဝ် ချွတ် အုဝ်၊ တဲး န့ ကာဒါန် ခဲ့ ပီ ဆုင်ဖျာတ် မဲ နာ မုး နာ မှာန်။
157 ဂေ ရန်ဆူ အုဝ်၊ ဂေ အီ ခါနှာပ် အုဝ်၊ ဂေ ဟဲ့ ကိူန် ကာဆဝ်။ မာလဲ၊ အုဝ် ယီ တူ ဝး န့တေန့် အီ ဒူပ် ဒါရာ မဲ ဇဝ်။
158 ဒေါ ယွတ် အုဝ် ဂေ အီ တူ ဒူပ် ဒါရာ၊ န့ တဲး အုဝ် ကာအိး ပီ ဘူင် ဂေ။ အုဝ် ဘော ကာအိး ကာဆဝ် ကူပ် တူ ဒူပ် ဂေ ဂြုဝ်း ဇဝ်ဖြာ။
159 တဲး မဲ ဇဝ် ယွတ် ခဲ့ ရွက့် ခဲ့ အိုင် အုဝ် ဒါရာ ပီ စ်ု မဲ ဇဝ်။ တဲး မဲ ဇဝ် ချွတ် အာဆာက် အုဝ်၊ တဲး န့ ကာဒါန် ခဲ့ ရွက့် မဲ ဇဝ် ဒီ အုဝ်။
160 ဂြုဝ်း ပီ ကာလာင် မဲ ဇဝ်ဖြာ၊ န့ ဘော မှာန် အာခါခ်ု။ လွင် ပီ ဆုင်ဖျာတ် မဲ ဇဝ် ဒွန် မျုဝ်၊ န့ ဘော ကွယ် ဆေဆေ။
ဒုဝ် အာ ဂိုဝ် ဒီ လှေး
161 ဂေ ဒါ ကာညာ အီ အိုပ် မိူင် ဘော ခါနှာပ် အုဝ် ပီယေန့်။ မာလဲ၊ အုဝ် ရုဝ်ဆေ ဂြုဝ်း မဲ ဇဝ်။
162 အုဝ် ဘော ဒါခိုယ် ကာဆဝ် ကူပ် ကာဒိက် ဆတ်ဇာ ပီ ဒွါ မဲ ဇဝ်။ န့ ပီ အုဝ် ဟဲ့ ကာဒုး ကြုဝ် ဘွတ် အီ ငဝ်း တာင် ကာဆဝ်။
163 အုဝ် ဘော ကြာန် ဒီ ထူမ် ဘော ကာအိး ဂြုဝ်း တူ မှာန်။ အီ မုး ဒါရာ မဲ ဇဝ်၊ အုဝ် ယီ ရွက့်။
164 ကူပ် ဟဲ့ ဘ့လေး အုန် မဲ ဇဝ် ဒါရာ အီ မုး အီ မှာန်၊ အုဝ် ဘော အိူပ် မဲ ဇဝ် အူ ဆီငဲ ဘူ ဇေန့်။
165 ဂေ အီ အိုင် အီ ရွက့် ဒါရာ မဲ ဇဝ်၊ နဝ်း ဂေ ဘော နှိမ် ဘော ယေန်။ နဝ်း ဂေ မိူဝ် တူ လိုဝ် ဒေါ မှဝ်။
166 အိုယ် မဲ ဇဝ်ဖြာ၊ အုဝ် ဘော ကာပြာ ကာဆဝ်၊ တဲး မဲ ဇဝ် ဂေဇူ ချွတ် အုဝ်။ အုဝ် မိူဝ် ဒူပ် ဒါရာ မဲ ဇဝ်။
167 အုဝ် ဟဲ့ ဒူပ် ပီ စ်ု မဲ ဇဝ်။ ခုဝ်၊ နဝ်း အုဝ် ဟဲ့ အိုင် ကာဆဝ်။
168 အုဝ် ဟဲ့ ဒူပ် ဒါရာ မဲ ဇဝ်။ ခုဝ်၊ ခဲ့ ပီ ဘူင် အုဝ် ဒွန် မျုဝ်၊ မဲ ဇဝ် ဘော ယိုဝ် တူတ့်။
ဒုဝ် အာ ဂိုဝ် ဒီ ဟာအာ
169 အိုယ် မဲ ဇဝ်ဖြာ၊ တဲး ဂြုဝ်း ပီ ဒတ် ပီ ဒဲ့ အုဝ် လိုဝ်း ဒီ မဲ ဇဝ်။ အုဝ် မှာန့်၊ တဲး ဂြုဝ်း ပီ ကာလာင် မဲ ကာလှုး ဆီချာ ဒီ နဝ်း အုဝ်။
170 အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ်၊ တဲး မဲ ချွတ် အုဝ်၊ တဲး န့ ဘော ဘဲန် ခဲ့ ပီ ဒွါ မဲ ဇဝ် ကာဒိက် ဆတ်ဇာ။
171 နဝ်း ဆီ အိူပ် အုဝ် မဲ ဇဝ်၊ အာဝ် နပ် ဒီ တူတ့်။ ခုဝ်၊ မဲ ဟဲ့ မာနုဝ် အုဝ်၊ တဲး အုဝ် နပ် ဒါရာ မဲ။
172 ကူပ် ဟဲ့ မှာန် ဒါရာ မဲ ဇဝ်၊ အုဝ် ဘော ဒိုဝ်း ဂြုဝ်း မဲ ဇဝ် တဲး န့ ဘဲန် မှုဝ် လွင် အန် တီ။
173 ကူပ် ဒူပ် အုဝ် ဒါရာ မဲ ဇဝ်၊ အုဝ် မှာန့်၊ တဲး မဲ ဇဝ် ဘော ဖြူမ် ဒီ စွယ် အုဝ် ဆေဆေ။
174 အိုယ် မဲ ဇဝ်ဖြာ၊ အုဝ် ဘော ကာပြာ ကာဆဝ် တဲး မဲ ဇဝ် ချွတ် အုဝ်။ အုဝ် မိူဝ် ဟဲ့ ဘျုဝ် ဒါခိုယ် ဒီ ဒူပ် ဒါရာ မဲ ဇဝ်။
175 မဲ ဇဝ် တဲး အုဝ် အိမ်၊ ကွဲ့ တဲး အုဝ် ယမ်၊ တဲး အုဝ် ပွိုန် ဒီ အိူပ် မဲ ဇဝ်။ ဘော ဒါရာ ပီ မာနုဝ် မဲ ဇဝ်၊ တဲး န့ စွယ် အုဝ်။
176 အုဝ် ဘော ဟာဝ် ဝိဝ် ဟာဝ် ဝေန့် ပီ မာဘူ အီ ဟဲ့ ဘျုဝ်း။ ကူပ် တူ ဘ့လေး တူ ဝဲန် အုဝ် ဒါရာ မဲ ဇဝ်၊ အုဝ် မှာန့်၊ တဲး မဲ ဇဝ် ဝီ ဟြေတ့် အုဝ် အီ မုး ဒဲစေန့် မဲ ဇဝ်။