1 တဲး အေ အိူပ် ဇဝ်ဖြာ။ ခုဝ်၊ အန် ဇဝ် ဟဲ့ မိုဝ်း နဝ်း ဘွတ်၊ နဝ်း မွှိုမ်။ အန် ဇဝ် ဘော ရွက့် ကာဝေ အေ ဆေဆေ။

2 တဲး ဂေ ဒူအီ အီဆာရေလ တဝ်း၊ “ဇဝ်ဖြာ ရွက့် ကာဝေ အေ ဆေဆေ။”

3 တဲး ခြိုဝ် အာရူန် တဝ်း၊ “ဇဝ်ဖြာ ရွက့် ကာဝေ အေ ဆေဆေ။”

4 တဲး ဂေ အီ ရုဝ်ဆေ ဇဝ်ဖြာ တဝ်း၊ “ဇဝ်ဖြာ ရွက့် ကာဝေ အေ ဆေဆေ။”

5 ဒေါ ဒုက် ညှာပ် ကာဆဝ် အုဝ်၊ အုဝ် ဘော ဆာခိုဝ် ဒီ ဇဝ်ဖြာ။ ဇဝ်ဖြာ ဘော ယိုဝ် ဂြုဝ်း အုဝ်၊ ဝီ တဲး အုဝ် ကွယ် ဒူင် ဘျုဝ် ဒါခိုယ်။

6 ဇဝ်ဖြာ ဟဲ့ ကွယ် ရိုမ် ဒူပ် အုဝ်၊ အုဝ် မိူဝ် တူ လုဝ် ယုဝ်။ အာဝ် မိုဝ်း အာဆေ အီ ပွိုန် ဘူင် နာ စာဝ် ဒီ အုဝ်။

7 ဇဝ်ဖြာ အီ ကွယ် ရိုမ် ဒူပ် အုဝ်၊ အန် ဇဝ် အီ စွယ် အုဝ်။ အုဝ် ဘော နပ် ဆီချာ၊ ဂေ အီ ဇွင့် အုဝ်၊ ဂေ တူ ပဲ အုဝ်။

8 ဆေ အေ ဘိုင် ဇဝ်ဖြာ၊ န့ မွှိုမ် လွှိုမ် အေ ဘိုင် ဒူအီ။

9 ဆေ အေ ဘိုင် ဇဝ်ဖြာ၊ န့ မွှိုမ် လွှိုမ် အေ ဘိုင် ဒါ ကာညာ အေ။

10 ဂေ ဒူအီ အာမျုဝ် ဟဝ် ဟဲ့ တး ရူပ် အုဝ်။ အုဝ် ဘော ဂါဝ် ပွုန် ဇဝ်ဖြာ ကာဂုဝ်း ဒီ ဂေ၊ တဲး ဂေ စှိုမ်။

11 ဂေ ဟဲ့ ကွယ် ဘ်ု ရူပ် အုဝ်၊ ဇဝ်ဖြာ ယီ စွယ် အုဝ်၊ တဲး အုဝ် ပဲ ဂေ။

12 ဂေ ဟဲ့ ကွယ် ရူပ် အုဝ် ပီ မာဖျီန် ဒီ ကိူန်။ ပွုန် ဇဝ်ဖြာ ယီ တဲး အုဝ် ဒဲပ် ဝဲန် ဂေ၊ ဂေ ဘော ဝီ ဟြာယ် အူ ဇေန့် ပီ မာအာတ့် အီ ကာဆိုမ် ခဲင် ငဝ်။

13 အီ ဟဝ် ဟဲ့ ဇုန် အုဝ်၊ တဲး ကော ရိန် ဒီ ကေး။ ဇဝ်ဖြာ ယီ စွယ်၊ တူ တဲး အုဝ် ကေး။

14 ဇဝ်ဖြာ အီ ဘဲန် ဟဲန့် ဘဲန် ပ့လူမ် ဒီ နဝ်း အုဝ်။ ခုဝ်၊ အုဝ် တဝ်း မှုဝ် လွင် ဇဝ်ဖြာ ဟဲ့ ချွတ် အုဝ်။

15 ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဝီ ကွယ် ခဲင် ထိုပ် ဘိက် ဂေ ဝါယ် ဟဲ့ ကာဂုဝ်း ဂေ။ ဂေ ဒတ် တဝ်း၊ “ဇဝ်ဖြာ မိုဝ်း ပွုန် တာင်။ အန် ဟဲ့ ပဲ ရန်ဆူ အေ။

16 အေ အိူပ် ပွုန် ဇဝ်ဖြာ။ ပွုန် အန် ဟဲ့ တဲး အေ အွင်။”

17 အုဝ် မိူဝ် တူ ယမ်၊ အုဝ် ဒီ မိုဝ်း အာဆာက်။ အုဝ် ဒီ ဝီ ကာလာင် လွင် ပဲ့ ဟဲ့ ဘူင် ဇဝ်ဖြာ။

18 မာလဲ၊ ဇဝ်ဖြာ ဟဲ့ မာနုဝ် ကာဆဝ် အုဝ်။ အန် ယီ တူ တဲး အုဝ် ယမ်။

19 တဲး ဘေ ဝိုဝ်း မာလုဝ်း ဟုဝ် ဇဝ်ဖြာ အီ မုး မာလုဝ်း ပီ လိုပ် ဂေ ဒူအီ အီ ညှိုမ် ဇဝ်ဖြာ။ တဲး အုဝ် ပွိုန် ဒီ လိုပ်၊ ဒါင် ဂုင် ဂေဇူ ဒီ ဇဝ်ဖြာ။

20 အာနီ မုး မာလုဝ်း အီ တဲး ယေ ဟာဝ် ဒူင် ကွယ် ဇဝ်ဖြာ။ ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ ဟဲ့ ပွိုန် ဒီ လိုပ်။

21 အုဝ် အိူပ် မဲ ဇဝ်ဖြာ၊ မဲ ဇဝ်ဖြာ ဟဲ့ ထူမ် ဂြုဝ်း အုဝ်။ မဲ ဇဝ် ဟဲ့ ချွတ် အုဝ်။

22 မာဝ် ပီ ဝဲန် ဂေ ဒူအီ အီ ဆမ် ကာင်၊ အန် ဟဲ့ ဝီ ဘဲန် စေန့် ရွင့်။

23 လွင် အန် တီ၊ န့ မုး ဇဝ်ဖြာ အီ ဘူင်။ အေ ယီ ယွတ်၊ ဟဲ့ မွှိုမ် အာမ် ကာဆဝ်။

24 အာတိုဝ် နီ၊ န့ မုး ဆီငဲ ပဲ့ ဟဲ့ ဒွါ ဇဝ်ဖြာ ဒီ အေ။ တဲး အေ ဘူင် ဘ့လွယ် အီ ဘျုဝ် ဒါခိုယ်။

25 အိုယ် မဲ ဇဝ်ဖြာ၊ တဲး မဲ ဇဝ် ချွတ် ယေ။ တဲး မဲ ဇဝ် တဲး ယေ ပဲ ရန်ဆူ ယေ။

26 ဒူအီ ပီ တိုယ် ဇဝ်ဖြာ၊ အီ ဒီ တး လိုပ် ခဲင် ဟုဝ် ဇဝ်ဖြာ၊ အန် ဟဲ့ ဒါခိုယ်။ အေ အီ ကွယ် ခဲင် ဟုဝ် ဇဝ်ဖြာ၊ အေ ဝီ မွင့်ကာရာ ဒွါ ဒီ အန်။

27 အန် ဇဝ် မုး ဇဝ်ဖြာ အာခါခ်ု။ အာရူင် ဘ့လာင် အန် ဇဝ်၊ န့ ဟဲ့ ထွင် ဘော ဒီ အေ။ တဲး အေ ဂူင့် ဘုဝ်း ဂေ ရာ ဟေ၊ ဟာဝ် လိုပ် ဘ့လွယ်၊ ဂါ ခဲင် ဟုဝ် ဇဝ်ဖြာ၊ တဲး ကော ဇမ် ကာစှူင့် လှူ။

28 မဲ ဇဝ်ဖြာ မဲ မုး ဇဝ်ဖြာ ပီ ကြိုပ် အုဝ်။ အုဝ် ဒါင် ဂုင် ဂေဇူ ဒီ မဲ ဇဝ်။ မဲ ဇဝ်ဖြာ၊ မီ မဲ မုး ဇဝ်ဖြာ ပီ ကြိုပ် အုဝ်။ အုဝ် ဒီ အိူပ် မဲ ဇဝ်။

29 တဲး အေ အိူပ် ဇဝ်ဖြာ။ ခုဝ်၊ အန် ဇဝ် ဟဲ့ မိုဝ်း နဝ်း ဘွတ် နဝ်း မွှိုမ်။ အန် ဇဝ် ဘော ရွက့် ကာဝေ အေ ဆေဆေ။