1 တဲး အေ အိူပ် ဇဝ်ဖြာ။ အာဆေ ရုဝ်ဆေ ဇဝ်ဖြာ၊ အာဆေ ဘျုဝ် ဒီ ဒူပ် ဒါရာ ဇဝ်ဖြာ၊ အန် ဒီ ဒါခိုယ်။

2 ဂွန် အန်၊ ဂေ ဒီ မိုဝ်း ဟဲန့် ခဲင် မိူင် နီ။ ခြိုဝ် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဘျုဝ် ဒါခိုယ်။

3 ဂေ ဒီ မိုဝ်း ကြုဝ်ကြာမ် ကိူန် ကာဆဝ် ခဲင် ကာင် ဂေ။ ကူပ် မိုဝ်း ဂေ နဝ်း ဆိူဝ် နဝ်း မှာန် ဂေ တူ စှိုမ် ဒေါ မှဝ်။

4 ဂေ အီ မိုဝ်း နဝ်း ဆိူဝ် နဝ်း မှာန်၊ အီ မိုဝ်း နဝ်း ဆီ ဂေဇူ အီ၊ ဂေ ပီ ဘော ကွယ် ခဲင် အပ် ဝွင့်၊ ဘ့လာင် ယီ ဒီ ဝီ လိုဝ်း ဒီ ဂေ။

5 အာဆေ မိုဝ်း နဝ်း ဟာင်၊ ဒွါ အီ ဟဝ် ကာရဝ်း ကာဝါယ် ဒီ အန်၊ အန် ဒီ ပွိုန် နာ ဘွတ် နာ မွှိုမ်။ အန် ဒီ ဘူင် တူတ့် ဒွန် မျုဝ် အီ ဒူပ် နာ ဆိူဝ် နာ မှာန်။

6 အန် မိူဝ် တူ စှိုမ် ဒေါ မှဝ်။ အီ ဟဝ် မိူဝ် နမ်လှုဝ်း အန် ဆေဆေ။

7 ဆေ ဟီ ယိုဝ် ဆာဒါင် တူ မွှိုမ်၊ အန် တူ လုဝ် ယုဝ် မာဆေ။ နဝ်း အန် ဒီ မန် ဆီချာ။ အန် ဘော ညှိုမ် ဆီချာ ဇဝ်ဖြာ။

8 နဝ်း အန် မိူဝ် တူ ကာဟွာ့။ အန် မိူဝ် တူ လုဝ် ယုဝ် မာဆေ။ ဟဲ့ ဟွတ့်၊ အန် ဒီ ယိုဝ် ပန် ဒီ စှိုမ် ဂေ ရန်ဆူ အန်။

9 အန် မိူဝ် ကာဆာင် ဒွါ ကြုဝ် အန် ဒီ ဒူအီ အေတ့်၊ ဒူအီ ဂိန်။ အန် ဘော မိုဝ်း နဝ်း ဆိူဝ် နဝ်း မှာန် ဆေဆေ။ အန် ဘော မိုဝ်း အာဖုင် ဒင်ခုဝ်၊ တဲး အီ ဟဝ် ရုဝ်ဆေ အန်။

10 ဂေ ဒူအီ မိူက် ဟီ ယိုဝ် အန်၊ ဂေ ဒီ ဘော ရူ ကာဆဝ် ဘော ဆီဂိတ် ဟြာင် ဂေ။ ဂေ ယီ ဒီ ဟြာယ် တူတ့်။ ပီ ဆီ ပွိုန် ဂေ ဒွန် မျုဝ်၊ န့ ဒီ လိုဝ် စှိုမ် တူတ့်။