1 တဲး အေ အိူပ် ဇဝ်ဖြာ။ ဘော နဝ်း ဘော ဖွိုမ် အုဝ် ဘော တူတ့် ဒီ အိူပ် ဇဝ်ဖြာ။ အုဝ် ဒီ အိူပ် ဇဝ်ဖြာ ကာတဲ ဂေ ဒူအီ ကိူန် အီ တး ကြိုပ် မဲ ဇဝ်။

2 ပဲ့ ဟဲ့ ဘူင် ဇဝ်ဖြာ ဒွန် မျုဝ် ဟဲ့ မွှိုမ် အာမ် ကာဆဝ်။ ဂေ အီ အိုင် အီ ဝုဝ် လွင် အန် တီ၊ ဂေ ဘော ဇေန့်ဇာ လွင် အန် တီ။

3 ပဲ့ ဟဲ့ ဘူင် အန် ဇဝ် ဇိုဝ် တီ ဒွန် မျုဝ်၊ န့ ဘော ဘျ၊ အာဖုင် ဒင်ခုဝ် အန် ဟဲ့ တာင် ကာဆဝ်။ အန် ဇဝ် ဒီ ဘော ဘူင် နာ ဆိူဝ် နာ မှာန် ဆေဆေ။

4 ဇဝ်ဖြာ မိူဝ် တဲး အေ ဒူအီ လှုဝ်း ဆေဆေ ပဲ့ ဟဲ့ ဘူင် အန် ဇဝ် အီ မွှိုမ် အာမ် ကာဆဝ်၊ ကွဲ့ တဲး အေ ပိဝ် ဒေါ မှဝ်။ အန် ဇဝ် ဘော မိုဝ်း နဝ်း ရွက့် ကာဝေ ဘော ဂေဇူ အီ ဆေဆေ။

5 အန် ဇဝ် ဘော ကာဆာင် ပီ ဒီ ဟူမ် ဒီ ဂေ အီ ရုဝ်ဆေ အန်။ အန် ဇဝ် မိူဝ် တူ ပိဝ် ကာဒိက် ဆတ်ဇာ ပီ ဒွိုမ် ဒွါ အန်။

6 အန် ဇဝ် ဘျ တဲး ဂေ ဒူအီ အာမျုဝ် အန် နပ် ပွုန် အန်။ အန် ဟဲ့ ဒိုဝ်း မိူင် အီ ဟဝ်၊ ဝီ အာပ် ဒီ ဂေ။

7 ခဲ့ ပီ ဘူင် အန် ဇဝ် ဒွန် မျုဝ် ဟဲ့ ဒူပ် နာ မုး နာ မှာန်။ ဒါရာ ပီ ကာလာင် အန် ဒွန် ညွင့် ဟဲ့ မွှိုမ် ညှိုမ်၊ မွှိုမ် ဘိုင်။

8 ဒါရာ တီ ဘော ကွယ် ဆေဆေ ကူပ် ဒူပ် ဇဝ်ဖြာ နာ မုး နာ မှာန် ဒေါ ကာလာင် အန် ဒါရာ တီ။

9 အန် ဇဝ် ဟဲ့ ဒွါ ဒူအီ အီ ဒီ ထုတ် လေး ဂေ ဒူအီ အာမျုဝ် အန်။ ပီ ကာဆဲန့် ဇဝ်ဖြာ ဒီ အီ၊ အန် ဇဝ် တဲး န့ ကွယ် ဆေဆေ။ အန် ဇဝ် ဟဲ့ ဘွတ် ကာဆဝ်။ ဟဲ့ ကာအာပ် အေ ရုဝ်ဆေ အန် ဘော ယုဝ် အန်။

10 အာဆေ ရုဝ်ဆေ ဇဝ်ဖြာ၊ အန် ဒီ မိုဝ်း အာငျာန် ဘွတ်။ အာဆေ ဒူပ် ဒါရာ ဇဝ်ဖြာ၊ အန် ဒီ မိုဝ်း အာငျာန် အီ မွှိုမ်။ တဲး ဒူအီ အိူပ် ဇဝ်ဖြာ ဆေဆေ။