1 အိုယ် မဲ ဇဝ်ဖြာ၊ အုဝ် ဒီ အိူပ် မဲ ဇဝ်။ အုဝ် မှာန့်၊ ကွဲ့ တဲး မဲ ဇဝ် ကွယ် ဆီတွင့်၊ တူ တဝ်း မာဆေ။

2 ဂေ ဒူအီ မိူက်၊ ဒူအီ ဟာယ် ဘော ဂေ ဒူအီ ဆီမာ ကာလုဝ်၊ ဂေ ဟဲ့ ကာခဲန့် ဒီ အုဝ်။ ဂေ ဟဲ့ ကာလာင် အီ တူ မှာန် လွင် အုဝ်။

3 ဂေ ကာလာင် ဂြုဝ်း တူ မွှိုမ်၊ ဂြုဝ်း အီ ဇွင့် အုဝ်။ ဂေ ဘော ဆီ ကာဂုဝ်း ဒီ အုဝ် ပီယေန့်။

4 အုဝ် ဟဲ့ တဲး ဂေ ဘဲန် ဂိုက် အုဝ်၊ ဂေ ယီ ဝီ ဖျာက် အုဝ်။ အုဝ် ဘော ဆာခိုဝ် ဒါင် ဂေ။

5 ဒေါ ဘူင် အုဝ် နာ ဘွတ် နာ မွှိုမ် ဒီ ဂေ၊ ဂေ ဝီ ဘူင် ဝျီ့ နာ စီစိဝ် ဒီ အုဝ်။ အုဝ် မိူဝ် ရွက့် ဂေ ပီ ဂိုက် အုဝ်။ ဂေ ယီ ဝီ ဇွင့် အုဝ်။

6 အုဝ် မှာန့်၊ တဲး န့ ဝီ မိုဝ်း ဒူအီ တူ မွှိုမ်၊ တဲး အန် ဝီ ဘဲန် ရန်ဆူ ဂေ။ တဲး ရန်ဆူ ဂေ ဒီ ဝီ ဖျာက် ဂေ။

7 ဒေါ ဆုင်ဖျာတ် အီ အာမူ ဂေ၊ တဲး န့ ဘော လိုဝ်း ဆီချာ လွင် ဟဲ့ ကာလိုပ် ဂေ။ တဲး ပီ ဆာခိုဝ် ဂေ ဝီ ဘဲန် မှာပ် ဒီ ဂေ။

8 ကွဲ့ တဲး အာဆာက် ဂေ တူင့်။ တဲး န့ ဝီ မိုဝ်း အီ ဟဝ် တး ပ့လု ဂေ။

9 တဲး ဂွန် ဂေ ဘဲန် တူတ့် ဂွန် ဆီပြး။ တဲး ဘော အီဘိုန့် ဂေ ဘဲန် ယာ ဆီပြး။

10 ကွဲ့ တဲး လှုက်လှာန် ဂေ မိုဝ်း ကာင် ဒူင် ဒီ ကွယ်၊ တဲး ဂေ ဘဲန် ဒူအီ မှာန့် ဒီ ဟူမ်။ တဲး ဂေ ကာဒုး ဒီ တဝ် ခဲင် ကာင် ကာပျာတ့်၊ ကာင် ရာမ် ဂေ။

11 ခဲ့ မိုဝ်း ဂေ ကြုဝ်ကြာမ်၊ တဲး ဒါ ကာညာ နီ ဂေ ဒိုဝ်း တူတ့် ဒွန် မျုဝ်။ တဲး ဂေ ဒူအီ မိူင် ဟဝ်၊ ရဝ် ဟဝ်၊ ဒိုဝ်း တူတ့် ကြုဝ်ကြာမ် ပဲ့ ဟဲ့ ရန့် ဟဲ့ ဘူင် ဂေ။

12 ကွဲ့ တဲး န့ မိုဝ်း အာဆေ ဂေဇူ ဂေ။ ကွဲ့ တဲး န့ မိုဝ်း အီ ကာဝေ အီ လိုမ်လာ ဂွန် ဆီပြး ဂေ တီ။

13 တဲး ဘော ခြိုဝ် ဂေ ဘော စိူဝ် ဂေ ဟြာယ် ကာဒတ် ဝါယ် အန် တီ အူ ဇေန့်။

14 တဲး ဇဝ်ဖြာ ဘော လှုဝ်း ဆေဆေ မှာပ် ဒါ ဒါ ဂေ။ ကွဲ့ တဲး ဇဝ်ဖြာ ဘ့လွာ့ ဝဲန် မှာပ် ပီ ဘူင် မာ ဂေ ဒေါ မှဝ်။

15 တဲး ဇဝ်ဖြာ ဘော လှုဝ်း ဆေဆေ မှာပ် ဂေ။ တဲး ဒူအီ ဘော ကာဒါယ် နီ ပိဝ် တူတ့် ဂေ။

16 ဒူအီ တီ၊ ဂေ တူ မိုဝ်း နဝ်း ဆီ စွယ် ကာဝေ အီ ဟဝ်။ ဂေ ဘော ခါနှာပ် ဒူအီ ဒုက် ဒူအီ ဂိန်။ ဂေ ဘော ဒူပ် ဒီ ကာစွှာ့ ဒူအီ ဒီလှး၊ တဲး ဂေ ကော ယမ်။

17 ဂေ အီ အိုင် ဒီ ကာလာင် ဂြုဝ်း ဒိူင်၊ ဂြုဝ်း အေး၊ တဲး ဂေ ဝီ ခမ် ဂြုဝ်း ပီ ဒိူင် ဂေ တီ။ ဂေ အီ ဇွင့် နာ ဘွတ် နာ မွှိုမ်၊ ကွဲ့ တဲး ဂေ ဝီ ယိုဝ် နာ ဘွတ် နာ မွှိုမ် ဒေါ မှဝ်။

18 ဂေ ဘော ဒိူင် ဘော အေး ဆေဆေ၊ တဲး န့ ပီ ခြိုင် ပီ တာ ဂေ။ ဂြုဝ်း ဇိုဝ် တီ၊ န့ ဝီ လိုပ် ခဲင် ဒုဝ် ဘူင့် ဂေ ပီ အိုမ်။ န့ ဘော လိုပ် ဘော ခဲင် ကာအာင် ဂေ ပီ နာမန်။

19 တဲး ဂြုဝ်း ဒိူင် ဂြုဝ်း အေး တီ၊ ဝီ ဘဲန် ပီ ဟိုပ် ဂေ။ တဲး န့ ဘော ပီ ဆဲ့ အီ ပက် ဒီ ညွယ် ဂေ ဆေဆေ။

20 တဲး ဂြုဝ်း ဒိူင် ဂြုဝ်း အေး တီ၊ ဝီ ဘဲန် ငဝ်း ဘဲန် ရုး ဒီ ရန်ဆူ အုဝ်၊ ဘော ဂေ အီ ဟဲ့ ကာလာင် တူ ဘွတ် တူ မွှိုမ် ဒီ အုဝ် တွိုန်၊ တဲး ဂေ ဝီ ခမ် ဇိုဝ် တီ ဒီ ဇဝ်ဖြာ။

21 အိုယ် မဲ ဇဝ်ဖြာ ပီ ကြိုပ် အုဝ်၊ မဲ ဇဝ် အီ မိုဝ်း ပွုန် တာင် ကာဆဝ်၊ အုဝ် မှာန့်၊ တဲး မဲ ဇဝ် ဝီ ယွတ် အုဝ် ဘော စွယ် အုဝ်။ မဲ ဇဝ် ဟဲ့ ဘွတ် ဟဲ့ မွှိုမ် ကာဆဝ်၊ မဲ ဘော ရွက့် ကာဝေ အီ။ ခုဝ်၊ တဲး မဲ ချွတ် အုဝ်။

22 အုဝ် ဟဲ့ ဒီလှး၊ အာဝ် ဟူ မိုဝ်း မာဆေ။ န့ ဘော ဆဝ် ကာဆဝ် ဒီ နဝ်း အုဝ်။

23 အုဝ် ကြဲ ဒီ ဟြာယ် ပီ ကာမိုက် ဒီ ဟြာယ် ဒေါ ပြဲ ဒီ အပ်။ အုဝ် အာဝ် ဟူ ပွိုန် ကွယ် ဆီချာ၊ ဟဲ့ ပီ မာ အာဇူင့် ပီ ဒီယုး စုဝ်း အီ ဒီ ဟေ။

24 ကိန့်ကြူင့် အုဝ် မိူဝ် ဟဲ့ န့စမ် ကာဆဝ် ကူပ် ယိူန် အုဝ် ပီ ဒီ ဟူမ်။ ဘော ဂိတ် မီ ဟုန် ဂါယ် ကာအာင် ဒီ ဒုဝ် အုဝ်။

25 ဒေါ ယိုဝ် ဂေ ရန်ဆူ အုဝ် ဒီ အုဝ်၊ ဂေ ဘော ကာညး အုဝ်၊ ဂေ ဘော နဲန အုဝ်။

26 အိုယ် မဲ ဇဝ်ဖြာ၊ အီ မုး ဇဝ်ဖြာ ပီ ကြိုပ် အုဝ်၊ ကူပ် မိုဝ်း မဲ ဇဝ် နဝ်း ရွက့် နဝ်း ကာဝေ အီ၊ အုဝ် မှာန့်၊ တဲး မဲ ဇဝ် ချွတ် အုဝ် ဘော စွယ် အုဝ်။

27 တဲး ဂေ ရန်ဆူ ဘောကာဂ့လျီတ် ကော နပ်၊ မဲ ဇဝ် မုး အီ ချွတ် အုဝ်။

28 ဂေ ပီ ဘော အေး ဘော ဒိူင် အုဝ်၊ မဲ ဇဝ် ယီ ဝီ တဲး နာ ဘွတ် နာ မွှိုမ် ဒီ အုဝ်။ ဂေ အီ ခါနှာပ် အုဝ်၊ ဂေ ဒီ ဝီ စှိုမ် တူတ့်။ အုဝ် ယီ ဒီ ဘျုဝ် ဒါခိုယ်။

29 ဂေ ရန်ဆူ အုဝ် ဘောကာဂ့လျီတ်၊ ဂေ ဒီ စှိုမ် ဆာရေ။ ဂေ လုဝ် ဝီ ဆာယ် အီ ဟဝ် ပီ ဂေ ပ့လိုက် ဟိုပ် ဒီ ဒုဝ် ဂေ၊ အာဝ် ပွိုန် ဇး ဝဲန်။

30 အုဝ် ဒီ ဘော ဒတ် တာင်၊ အိူပ် ဂုင် ဂေဇူ မဲ ဇဝ်ဖြာ။ အုဝ် ဒီ ဘော အိူပ် အန် ဇဝ် ကာတဲ ဂေ ဒူအီ ကိူန်။

31 ခုဝ်၊ အန် ဇဝ် ဘော မုး အီ ဂွင့် အီ ရဲ ဂေ ဒူအီ ဒုက်၊ ဒူအီ ဂိန်။ အန် ဝီ ချွတ် ဂေ၊ တဲး ဂေ လွတ် ဒီ ဂေ အီ ခြာမ် ဒီ ငဝ်း ယမ် ဂေ။