1 အိုယ် မဲ ဇဝ်ဖြာ၊ နဝ်း အုဝ် ဟဲ့ မန် ဆီချာ၊ အုဝ် ဒီ ဝီ တဝ်း မှုဝ်၊ ဝီ အိူပ် မဲ ဇဝ်ဖြာ။

2 အုဝ် တူ တဲး နဝ်း အုဝ် ဒီလှး၊ တူ တဲး အုဝ် ကွယ် ပီယေန့်။ အုဝ် ဒီ ယိတ့် အာတ့် ဘ့လာင် ပြဲ၊ ဝီ ဘး ဒိင်၊ တဝ်း မှုဝ်။

3 အိုယ် မဲ ဇဝ်ဖြာ၊ အုဝ် ဒီ အိူပ် မဲ ဇဝ်၊ တဲး ဘော ဂေ ဒူအီ အာမျုဝ် ဟဝ် ကော နပ်။ အုဝ် ဒီ တဝ်း မှုဝ် အီ အိူပ် မဲ ဇဝ်ဖြာ၊ တဲး ဒူအီ ဘောကာဂ့လျီတ် ကော ယိုဝ်။

4 ခုဝ်၊ မဲ ဇဝ်ဖြာ ဟဲ့ မိုဝ်း နဝ်း ရွက့် ကာဝေ ယေ။ မဲ ရွက့် တူတ့် ဒွန် မျုဝ် အီ ကွယ် ဒဲင် ကာဒါယ် ကော ဇမ် ဂါင်ဟြာဝ်။ ဘော နာ မှာန် နာ မွှိုမ် မဲ ဇဝ် ဘော ပါယ် တီ ဆေဆေ။

5 အိုယ် မဲ ဇဝ်ဖြာ၊ တဲး ဒွန် အီ နပ် ခဲ့ တာင် အာဖုင် ဒင်ခုဝ် မဲ။ မဲ ဇဝ် ဟဲ့ တာင် လွှိုမ် အီ ကွယ် ခဲင် ဂါင်ဟြာဝ်။ မဲ ဘော အိုပ် တူတ့် ဒဲင် ကာဒါယ် နီ ဒွန် ပ့လုဝ့်။

6 အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် ယေ၊ ဘော ဝီ တဲး ပ့လူမ် ဒီ ယေ။ တဲး မဲ ချွတ် ဂေ ဒူအီ ပီ ရွက့် မဲ ဇဝ်။

7 ဇဝ်ဖြာ ဘော ကွယ် ဒူင် ဘွတ် ဒူင် ကြိုပ် အီ ဒီ အန်။ အန် ဟဲ့ တဝ်း၊ “အုဝ် ဒီ ဘူင် ဘ့လွယ် ဟဲ့ ကာဂုဝ်း အွင်။ အုဝ် ဒီ ဘော ကာဆာင် မိူင် ဆေခေမ်။ အုဝ် ဒီ ဂဝ် ဒီ ကာဆာင် ဒီလယ့် အိုမ် ဆူခူတ်၊ ဒွါ ဒီ ဒူအီ အာမျုဝ် အုဝ်။

8 အိူင် ဂီလေအာတ် ဘော မုး မိူင် အုဝ်။ အိူင် မာနာဆေ ဘော မုး မိူင် အုဝ်။ အိူင် အေဖာရိမ် ဘော ပီ မာဂိန့် ဟိန် အုဝ်။ အိူင် ယူဒါ ဘော ပီ လျီး ပီ ဂူင့် အုဝ်။

9 မိူင် မုဝ်အာပ် ဘော ပီ မ့ပါန်၊ ဒူင် တာ အုဝ် ဒီ အိုမ်။ မိူင် အေဒူမ် ဘော ဘဲန် ဒူင် ဘုတ့် အုန် အုဝ် ခူဒိန့် အုဝ်။ အုဝ် ဒီ ဘော ဒတ် တာင် ကူပ် ဟဲ့ ပဲ ဟဲ့ အွင် အုဝ် ရန်ဆူ ခဲင် မိူင် ဖီလီထီ။” ခဲ့ တီ ဇဝ်ဖြာ တဝ်း။

10 အိုယ် မဲ ဇဝ်ဖြာ၊ အာဆေ ဒီ ယဲတ့် ဟာဝ် အုဝ်၊ ဇမ် ခဲင် မိူင် အီ မိုဝ်း ရဲင် တာင်။း အာဆေ ဒီ ဟာဝ် ရိုမ် ဒူပ် အုဝ်၊ တဲး ကော ဇမ် မိူင် အေဒူမ်။း

11 န့ မုး မဲ ဇဝ်ဖြာ၊ အုဝ် လုဝ် မဲ ဟာဝ် ရိုမ် ဒူပ် အုဝ်။ မဲ ဇဝ် ယဲ့ ဟဲ့ ဝဲန် ယေ။ မဲ ဇဝ် အာဝ် ဟူ ဟာဝ် ဒူပ် ဒါ ဘုဝ် ဒါ ဆိုက် ယေ။

12 အုဝ် မှာန့်၊ တဲး မဲ ဇဝ် ဝီ စွယ်၊ တဲး ယေ ပဲ ရန်ဆူ ယေ။ ခုဝ်၊ ဆေ န့ မုး ပီ စွယ် ဒူအီ၊ န့ တူ ခုဝ် မာဆေ။

13 ခုဝ်၊ န့ မုး မဲ ဇဝ်ဖြာ၊ အီ ဘူင် တဲး ယေ ပဲ ရန်ဆူ ယေ၊ တဲး ဂေ စှိုမ် တူတ့်။