1 တဲး အေ အိူပ် ဇဝ်ဖြာ ဘော ဒါင် ဂုင် ဂေဇူ ဒီ အန်။ ခုဝ်၊ အန် ဇဝ် ဟဲ့ မွှိုမ် ကာဆဝ်။ အန် ဘော မိုဝ်း နဝ်း ရွက့် ကာဝေ ဆေဆေ။

2 ဂေ ဒူအီ ပဲ့ ဟဲ့ ဟွတ့် ထုတ် လေး ဇဝ်ဖြာ ဒီ ရန်ဆူ ဂေ၊ တဲး ဂေ တဝ်း ပါယ် နီ။

3 ဂေ အီ ကွယ် နာ လေး ဆီငဲ နာ ဂေတ့် ဆီငဲ၊ ဂေ အီ ကွယ် နာ တေတ့် နာ ကွာ ဒွန် မိူင်၊ ဂေ ဒူအီ ပီ ဒဲ့ လေး ဇဝ်ဖြာ တီ၊ တဲး ဂေ အိူပ် အန် ဇဝ်။

4 မင် အီ ဟဲ့ ဟာဝ် ဟာဝ် တး တး ဒူင် တူ မိုဝ်း ဒူအီ။ ဂေ ယီ တူ ယိုဝ် ဒူင် ပွိုန် ကွယ် ဂေ။

5 ဂေ ဘော ဆီ ဒျီင် အိုမ် ဘော ကာပြာန့် ကာဆဝ် ပီ ဒီ ဟူမ်။ နဝ်း ဂေ မိူဝ် ဟဲ့ လိုဝ်။

6 ဒေါ ဟဲ့ ဇမ် ဂေ ဒုက် တီ၊ ဂေ ဘော ဆာခိုဝ် ဇဝ်ဖြာ။ ဇဝ်ဖြာ ဘော စွယ် တဲး ဂေ လေး တ ဒုက် ဂေ တီ။

7 ဇဝ်ဖြာ ဘော ယဲတ့် တဲး ဂေ ဟာဝ် ဒူပ် န့တေန့် ဆိူဝ်၊ တဲး ဂေ ဇမ် ဒူင် ဒီ ပွိုန် ကွယ် ဂေ။

8 တဲး ဒူအီ ဒွန် အီ ဒါင် ဂုင် ဂေဇူ ဒီ ဇဝ်ဖြာ ကူပ် ရွက့် ကာဝေ အန် ဇဝ် ဒီ အီ ဆေဆေ၊ ကူပ် ဘူင် အန် အီ မွှိုမ် အာမ် ကာဆဝ် ဒီ ဂေ။

9 ခုဝ်၊ ဇဝ်ဖြာ ဟဲ့ ဘူင် တဲး ဂေ အီ ဆီ ဒျီင် အိုမ် ဝီ ပွိုန် ဒီ ဒျီင် ဖဲ၊ တဲး ဂေ အီ ကာပြာန့် ဘူမ် ဝီ ပွိုန် ဒီ ဟူမ် မျုဝ် အီ ဘွတ် အီ မွှိုမ်။

10 မင် အီ ဟဲ့ ကွယ် ခဲင် အပ် ဝွင့်၊ အီ မွှိုမ် ယုဝ်။ ဂေ ဟဲ့ ခမ် ဒုက် ကွယ် ခဲင် ကာပိုမ်၊ ဟဲ့ ကာဒုး ပက် တာ ဝန် ဟိန်။

11 ဂေ ခမ် ဒုက် တီ ကူပ် ဟဲ့ ဝဲန် ဂေ ဂြုဝ်း ဇဝ်ဖြာ၊ ကူပ် တူ ထူမ် ဂေ အာကျာမ် အာငျာန် အန် ဇဝ် အီ အိုပ် တူတ့် ဒွန် မျုဝ်။

12 ခုဝ်၊ ဇဝ်ဖြာ ဟဲ့ တဲး အီ ခါနှာပ် ဂေ၊ တဲး ဂေ ဘူင် ဂါန် စန်။ ဂေ ဘော ကေး၊ ယီ တူ မိုဝ်း အီ စွယ် အီ ဂမ် ဂေ။

13 ဒေါ ဟဲ့ ဇမ် ဂေ ဒုက် တီ၊ ဂေ ဘော ဆာခိုဝ် ဒီ ဇဝ်ဖြာ။ ဇဝ်ဖြာ ဘော စွယ် တဲး ဂေ လေး တ ဒုက် ဂေ တီ။

14 ဇဝ်ဖြာ ဘော စွယ် ဂေ၊ တဲး ဂေ လေး ခဲင် အပ် ဝွင့် အီ မွှိုမ် ယုဝ်။ အန် ဘော ဂဝ်း ဝဲန် ဝန် ဟိန် ပီ ပက် အီ ဒီ ဂေ။

15 တဲး ဒူအီ ဂေ တီ ဒါင် ဂုင် ဂေဇူ ဒီ ဇဝ်ဖြာ ကူပ် ရွက့် ကာဝေ အန် ဒီ အီ ဆေဆေ၊ ကူပ် ဘူင် အန် အီ မွှိုမ် အာမ် ကာဆဝ် ဒီ ဂေ။

16 ဇဝ်ဖြာ နပ် ဒီ ကာဘက် ဝဲန် မာလုဝ်း ဘွင့်။ အန် နပ် ဒီ ကာဒဲပ် ဘော ဟိန် အီ ရဲ မာလုဝ်း။

17 ဂေ ဒူအီ ရိုဝ်၊ ဂေ ဟဲ့ ခမ် ဒုက် ကူပ် မှာပ် ပဲ့ ဟဲ့ ကာလိုပ် ဂေ။ ဂေ ခမ် ဘဲန် မျုဝ် ဘဲန် မျုဝ် ကူပ် ဘူင် ဂေ နာ တူ မွှိုမ်။

18 ဂေ ဟဲ့ ကြဲ ဒီ ဆဝ် ကာဆဝ်၊ တဲး ကော ရိန် ဒီ ယမ် ဘော ကာအိး ပီ ဒီ ဟူမ် ဒွန် မျုဝ်။

19 ဒေါ ဟဲ့ ဇမ် ဂေ ဒုက် တီ၊ ဂေ ဘော ဆာခိုဝ် ဇဝ်ဖြာ။ ဇဝ်ဖြာ ဘော စွယ် တဲး ဂေ လေး တ ဒုက် ဂေ တီ။

20 ဇဝ်ဖြာ မိူဝ် ကာလာင် ဂြုဝ်း၊ ဆဝ် ဂေ မိူဝ် ဟြာယ်၊ ကွဲ့ တဲး ဂေ ဇမ် ခဲင် ကာဒဝ် ဘာရေဝ်။

21 တဲး ဒူအီ ဂေ တီ ဒါင် ဂုင် ဂေဇူ ဒီ ဇဝ်ဖြာ၊ ကူပ် ရွက့် ကာဝေ အန် ဒီ အီ ဆေဆေ၊ ကူပ် ဘူင် အန် နာ မွှိုမ် အာမ် ကာဆဝ် ဒီ ဂေ။

22 တဲး ဂေ လှူ ပီ ဒီ လှူ ဘော ဒါင် ဂုင် ဂေဇူ ဒီ အန် ဇဝ်၊ တဲး ဂေ တဝ်း မှုဝ် ဒါခိုယ် အီ အိူပ် ဇဝ်ဖြာ။ တဲး ဂေ ကာလာင် ဘော ပဲ့ ဟဲ့ ဘူင် အန် ဇဝ် ဇိုဝ် တီ။

23 မင် အီ ပဝ့် ရိုဝ် ဆင်ဖုဝ် ခဲင် အိုမ် နမ်မုက်ဆာရာ၊ ဘူင် ဂါန် ဂေ ခဲင် ရိုဝ် ဆင်ဖုဝ်၊ တဲး ဂေ မိုဝ်း ပီ ဒီ ဟူမ် ပီ ဒီ တာ။

24 ဂေ ဟဲ့ ဟွတ့် ဒွိုမ် ယိုဝ် ပဲ့ ဟဲ့ ဘူင် ဇဝ်ဖြာ အီ မွှိုမ် အာမ် ကာဆဝ် ဒေါ ကွယ် ဂေ ခဲင် အိုမ် လိုက် တီ။

25 ဇဝ်ဖြာ ဟဲ့ ကာလာင် ဂြုဝ်း၊ တဲး န့ မိုဝ်း ခုန် တာင်၊ တး ဘုတ်၊ တဲး မာ အိုမ် ဆီလွယ် ဆီလွယ်။

26 မင် ဇေန့် န့ တဲး ဂေ ဟုဝ့် ဂါင်ဟြာဝ်၊ ပီ ဝီ စုဝ်း လူင် ဒူင် လိုက် ကာဆဝ်။ နဝ်း ဂေ မိူဝ် ဟဲ့ လိုဝ် ကူပ် ဟဲ့ ဇမ် ဂေ ဒုက် ကာဆဝ် တီ။

27 ဂေ ဘော ကာကျီင် ကာကေး၊ ကာကျီင် ကာကေး ပီ ဒူအီ ဟဲ့ ယိုတ့် ပဝ်း။ ဂေ အာဝ် ဟူ နပ် ဒီ ဘူင် မာဆေ။

28 ဒေါ ဟဲ့ ဇမ် ဂေ ဒုက် တီ၊ ဂေ ဘော ဆာခိုဝ် ဒီ ဇဝ်ဖြာ။ ဇဝ်ဖြာ ဘော စွယ် တဲး ဂေ လေး ခဲင် ဒုက် ဂေ တီ။

29 ဇဝ်ဖြာ ဘော ဝီ တဲး ခုန် ဂေ ဂ့လာယ် တာင် တီ ဝီ ယေန်။ အန် တဲး မာ အိုမ် အီ ဆီလွယ် ဆီလွယ် ဝီ ယေန် ဒါခိုယ်။

30 ပါယ် တီ၊ နဝ်း ဂေ ဘော ဒါခိုယ် ကာဆဝ် ကူပ် ဟဲ့ ယေန် ခုန်။ ဟဲ့ ဟွတ့်၊ ဇဝ်ဖြာ ဘော ဝီ တိုယ် တဲး ဂေ ဇမ် ဒါခိုယ် ဒူင် ချ ဂေ။

31 တဲး ဒူအီ ဂေ တီ ဒါင် ဂုင် ဂေဇူ ဒီ ဇဝ်ဖြာ ကူပ် ရွက့် ကာဝေ အန် ဒီ အီ ဆေဆေ၊ ကူပ် ဘူင် အန် နာ မွှိုမ် အာမ် ကာဆဝ် ဒီ ဂေ။

32 တဲး ဂေ အိူပ် မျုက် ဇဝ်ဖြာ ကာတဲ ဒူအီ ကိူန် အီ တး ကြိုပ် ဇဝ်ဖြာ၊ တဲး ဂေ ဘော အိူပ် ဇဝ်ဖြာ ဒေါ ကွယ် ရိုမ် ဂေ ဒူပ် ဒါ တာင်။

33 ဇဝ်ဖြာ မိူဝ် ဘူင် တဲး ဒီလယ့် အိုမ် ဝီ ဘဲန် ပြဲ ကာဟဝ်း။ တဲး ဒူင် တုဝ်း အိုမ် ဝီ ဟိတ် တူတ့်။

34 ကူပ် မှာပ် ပီ ဘူင် ဂေ ဒူအီ ခဲင် မိူင် တီ၊ အန် ဇဝ် ဘူင် တဲး ဒူင် မုး ကာဒါယ် ဘွတ် ကာဒါယ် မွှိုမ် ဝီ ဇဲမ် ပီ ဆယ့်၊ ကွဲ့ တဲး န့ လတ့် မာဆေ။

35 ဇဝ်ဖြာ ဘော ဘူင် တဲး ခဲင် ပြဲ ကာဟဝ်း ဝီ မိုဝ်း အိုမ်။ တဲး ဒူင် ဟေန့် ကာဒါယ် ဝီ မိုဝ်း အိုမ် တုဝ်း။

36 အန် ဇဝ် ဘော ဝီ တဲး ဂေ အီ အေတ့် ဘူမ် ဝီ တး ကွယ် ဒီ တီ၊ တဲး ဂေ ဝီ ဒဲ မိူင်၊ တဲး န့ ဘဲန် မိူင် ဂေ။

37 ဂေ ဘော ဆမ် ခြိုင် ဆီမာ ခဲင် မာန် ခဲင် ဒူင် နာ၊ ဘော ဆမ် မာငုန် ခဲင် မာန် ဂေ။ ဟေ ဘ့လေ ပီ ဆမ် ဂေ၊ န့ ဘော မိုဝ်း ဒွန် မျုဝ်။

38 ဇဝ်ဖြာ ဘော မွင့်ကာရာ တဲး ဒီ ဂေ၊ တဲး ဂေ ဘြဲ ကိူန်။ အန် မိူဝ် တူ တဲး မာဘူ မာမက် ဂေ ယူမ်။

39 ဝါယ် အန် တီ ဂေ ယီ ဝီ ကာဒုး ဒုက် ကာဆဝ်။ အီ ဟဝ် ဘော ခါနှာပ် ဂေ၊ တဲး ဂေ ခမ် ကာဆဝ်။ ဂေ မိူဝ် ဝီ ကြဲ ဒီ ယူမ်၊ ကြဲ ဒီ ပြေတ့်။

40 အန် ဇဝ် ဘော ဘူင် တဲး ဂေ ဒါ တာင် ဝီ မွှိုမ် ဆာယ်၊ တဲး ဂေ ဝီ ဟာဝ် ဟာဝ်၊ တး တး ခဲင် ပြဲ။

41 ယီ မုး ဂေ အီ ဂိန်၊ အန် ဇဝ် တဲး ဂေ လေး ခဲင် ဒုက်၊ ဝီ တဲး ဂေ စေဝ် ဘြဲ၊ စေဝ် ကိူန် ပီ ဖိုင် မာဘူ။

42 ဂေ ဒူအီ နဝ်း ဆိူဝ် နဝ်း မှာန်၊ ဂေ ဘော ယိုဝ်၊ ဘော ခူယ် ကာဆဝ်။ ဂေ အီ ဟာယ် အီ မိူက် ယီ တူ ပွိုန် တဝ်း မာဆေ။

43 အာဆေ မိုဝ်း အာငျာန်၊ တဲး အန် ထူမ် လွင် ဇိုဝ် တီ။ တဲး အန် ဇေန့်ဇာ လွင် ပီ ပါယ် နဝ်း ရွက့် ဇဝ်ဖြာ။