1 တဲး အေ အိူပ် ဇဝ်ဖြာ ဘော ဒါင် ဂုင် ဂေဇူ ဒီ အန် ဇဝ်။ ခုဝ်၊ အန် ဇဝ် ဟဲ့ မွှိုမ် ကာဆဝ်။ အန် ဘော မိုဝ်း နဝ်း ရွက့် ကာဝေ ဆေဆေ။

2 အာဝ် မိုဝ်း အာဆေ အီ နပ် ဒီ ကာလာင် လွင် အီ မွှိုမ် အာမ် ကာဆဝ် ပဲ့ ဟဲ့ ဘူင် အန် ဇဝ် ဒွန် မျုဝ်။ အာဝ် မိုဝ်း အာဆေ အီ အိူပ် အန် ဇဝ် ခဲ့ ကာအာပ် အိူပ်။

3 ဂေ အီ ဒူပ် ဆီချာ ဒါရာ ဇဝ်ဖြာ ဘော ဘူင် နာ မှာန် နာ မွှိုမ် ဆေဆေ၊ ဂေ ဒီ ဘျုဝ် ဒါခိုယ်။

4 အိုယ် မဲ ဇဝ်ဖြာ၊ ဆေ မဲ ဇဝ် စွယ် ဒူအီ အာမျုဝ် မဲ၊ အုဝ် မှာန့်၊ ကွဲ့ တဲး မဲ ဇဝ် ပိဝ် အုဝ်။ ဆေ မဲ ဇဝ် ချွတ် အီ၊ တဲး မဲ ဇဝ် ချွတ် ဘော အုဝ်။

5 အုဝ် မှာန့်၊ တဲး န့ ဘွတ် တဲး န့ မွှိုမ် ဒီ အုဝ် ပီ ဂေ ဒူအီ ပဲ့ ဟဲ့ ရဝ်း မဲ ဇဝ်။ တဲး အုဝ် ဘော ခူယ် ဒါခိုယ် ဒူပ် ဂေ၊ တဲး အုဝ် ဘော မိုဝ်း ဆာရေ ပီ ဂေ ဒူအီ အီ ဒူပ် မဲ ဇဝ် တီ။

6 ယေ ဘောကာဂ့လျီတ် ဟဲ့ ဘူင် မှာပ် ပီ ပီ ဘူင် ဒါ ဒါ ယေ ဂေ တွိုန်။ ယေ ဟဲ့ ဘူင် မှာပ် အီ တူ မွှိုမ် ဒွန် မျုဝ်။

7 ဒါ ဒါ ယေ၊ ဂေ တူ လှုဝ်း အီ မွှိုမ် အာမ် ပဲ့ ဟဲ့ ဘူင် မဲ ဇဝ် ခဲင် မိူင် အဲဂိုပ် တွိုန်။ ဂေ မိူဝ် တူ ဝီ လှုဝ်း ပဲ့ ဟဲ့ ဂေဇူ မဲ ဇဝ် ဒီ ဂေ ဘဲန် ဇေန့် ဘဲန် ဇေန့်။ ဒေါ ကွယ် ဂေ ဒီ ခူပ် အိုမ် ဒီနှူင် ရေန့် တွိုန်၊ ဂေ ဝီ ကာဖြူမ် ဒီ ပီရူ ဂေ ဒီ မဲ ဇဝ် အီ တာင် ကာဆဝ်။

8 မာလဲ၊ အန် ဇဝ် ယီ ဝီ ချွတ် ဂေ၊ တဲး န့ ဘော ဘဲန် ပီ ဒွိုမ် ကာဆဲန့် အန် ဇဝ်၊ တဲး န့ ဘော လိုဝ်း ခဲ့ တာင် အာဖုင် ဒင်ခုဝ် အန် ဇဝ်။

9 အန် ဇဝ် ဘော စ်ု အိုမ် ဒီနှူင် ရေန့် တီ၊ တဲး န့ ဟိတ်။ အိုမ် တီ ဘော ဟိတ် အူ ဇေန့်၊ ဘော လိုဝ်း ကာဒမ် အိုမ်၊ အန် ဇဝ် ဘော ယဲတ့် ဂေ ဟာဝ် ဒီ တီ၊ တဲး န့ ပီ ဂေ ဟာဝ် ခဲင် ပြဲ ကာဟဝ်း။

10 အန် ဇဝ် ဘော ချွတ် ဂေ၊ တဲး ဂေ လွတ် တ ဂေ ဒူအီ အီ ဇွင့် ဂေ၊ တဲး ဂေ လွတ် ဘော ဒီ ရန်ဆူ ဂေ။

11 အိုမ် တီ ဘော ဝီ မ့ပုန် တူတ့် ရန်ဆူ ဂေ၊ အူ ဝီ မိူဝ် အာဝ် ဟူ မိုဝ်း။

12 ဒေါ အန် တီ ဂေ ဘော ထူမ် ဂြုဝ်း အန် ဇဝ် ဘော တဝ်း မှုဝ် အီ အိူပ် ဇဝ်ဖြာ။

13 အာဝ် လှေန့်၊ ဂေ ဟဲ့ ဟွတ့် ပိဝ် တူတ့် ပဲ့ ဟဲ့ ဘူင် ဇဝ်ဖြာ။ ဂေ တူ ခမ် ဒီ ဘ်ု ဒီ ဒူပ် အာကျာမ် အာငျာန် ပီ ကာလာင် ဇဝ်ဖြာ ဒီ ဂေ။

14 ဂေ ဘော ဆီ ဟူမ် ကာဆဝ် ပီ မွက့် ဂေ ခဲင် ပြဲ ကာဟဝ်း တီ။ ဂေ ဘော ထေဝ် နဝ်း ဇဝ်ဖြာ ဒေါ ကွယ် ဂေ ဒူင် ငွင့် တီ၊ ယုဝ် အန် နပ် ဒီ ဒွါ။

15 ဇဝ်ဖြာ ဘော ဒွါ ခဲ့ ပီ မှာန့် ဂေ။ မာလဲ၊ ဇဝ်ဖြာ ဘော ဘူင် တဲး ဂေ မိုဝ်း ဆဝ် ရောဂါ အီ မွှိုမ် ယုဝ် ကာဆဝ်။

16 ဒေါ ချ ဂေ ခဲင် ပြဲ ကာဟဝ်း တီ၊ ဂေ မိူဝ် တူ ဆီ ထူမ်၊ တူ အိုင် အာမုဝ်ဆဲ ဂါယ် အာရူန်၊ အီ မုး ဒဲစေန့် ဇဝ်ဖြာ။

17 ဒေါ အန် တီ ကာဒါယ် ဘော မာအ ညွှတ် ယမ် အာဒါထာန်၊ ဘော မ့ပုန် ယမ် ခဲ့ ကွယ် န့ဟူမ် အာဖီရမ်။

18 ဘော မိုဝ်း ဘော ငဝ် စုဝ်း လူင် ဒူင် ကွယ် ဂေ။ ငဝ် တီ ဘော ကာဆိုမ် ယမ် တူတ့် ဂေ ဒူအီ မိူက်။

19 ဂေ ဘော ဘူင် ဒီ ဝီ ကြိုပ် အာရိုပ် မာမက် ဒီ နွန် ဟုဝ်ရေပ် တွိုန်။^a

20 ဂေ ဟဲ့ ဝဲန် အာဖုင် ဒင်ခုဝ် ဇဝ်ဖြာ၊ ဝီ ကာရဝ်း အာရိုပ် မာမက် အီ ဟူမ် ပေတ့်။ ဂေ ဝီ ကြိုပ် အာရိုပ် ပဲ့ ဟဲ့ လှုဝ် ဂေ။

21 ဂေ ဝီ ပိဝ် ဇဝ်ဖြာ အီ ဟဲ့ ချွတ် ဂေ၊ အီ ဟဲ့ ဘူင် အီ မွှိုမ် အာမ် ကာဆဝ် ခဲင် မိူင် အဲဂိုပ် တွိုန်။

22 အန် ဇဝ် ဟဲ့ ဘူင် အီ မွှိုမ် အာမ် ခဲင် မိူင် အဲဂိုပ် တီ။ အန် ဟဲ့ ဘူင် ဘော အီ မွှိုမ် ယုဝ် ဘဲန် မျုဝ် ဘဲန် မျုဝ် ဒေါ ကွယ် ဂေ ဒီ ခူပ် အိုမ် ဒီနှူင် ရေန့် တွိုန်။

23 ဒေါ အန် တီ ဇဝ်ဖြာ ဟဲ့ ဟွတ့် တဝ်း ဒီ ဘူင် တဲး ဂေ စှိုမ် တူတ့်။ န့ ယီ မုး အာမုဝ်ဆဲ အီ မုး ဒူအီ ပီ ရဝ်း ဇဝ်ဖြာ၊ အန် ဘော ဝီ ဆာခိုဝ် ဇဝ်ဖြာ၊ ကွဲ့ တဲး ဇဝ်ဖြာ ရူ စာဝ် ဒီ ဂေ၊ ကွဲ့ တဲး အန် ဘူင် တဲး ဂေ စှိုမ်။

24 မိူင် ဘွတ်၊ မိူင် မွှိုမ် တီ မိူဝ်၊ ဂေ တူ လုဝ်။ ဂြုဝ်း ဇဝ်ဖြာ မိူဝ်၊ ဂေ တူ ညှိုမ် ဆီချာ။

25 ဂေ ဘော ပိုန့် ဘော အေး ဒေါ ကွယ် ဂေ ခဲင် ထိုပ် ဂေ။ ဂြုဝ်း ဇဝ်ဖြာ မိူဝ်၊ ဂေ တူ ထူမ်။

26 ခုဝ်၊ ဇဝ်ဖြာ ဒွါ ဆာဒိက် ဒီ ဂေ၊ တဝ်း ဒီ တဲး ဂေ ယမ် ခဲင် ပြဲ ကာဟဝ်း တီ။

27 အန် ဇဝ် ဘော တဝ်း ဒီ ဘူင် တဲး လှုက်လှာန် ဂေ ကာယဝ်း ကွယ် ကာတဲ ဒူအီ အာမျုဝ် ဟဝ်၊ တဲး ဂေ ဘော ယမ် ခဲင် မိူင် အီ ဟဝ်။

28 ဂေ ဘော ဝီ ကြိုပ် ဇဝ် ဘာလ အီ ကွယ် ခဲင် မိူင် ဘေအောရ။ ဂေ ဘော ဝီ ဟူမ် ပီ လှူ အီ ဒီ ဒူအီ ယမ်။

29 ကူပ် ဘူင် ဂေ ပါယ် တီ၊ န့ တဲး ဇဝ်ဖြာ ရူ ဒီ ဂေ၊ တဲး ဂေ ဝီ မိုဝ်း ဆဝ်။

30 ဒေါ အန် တီ အာဖီနေဟာတ် ဘော ဒမ် မှာပ် ဒီ ဂေ အီ ဟဲ့ ကာလိုပ် တွိုန်။ ဟဲ့ ဟွတ့်၊ ဆဝ် ဂေ တီ ဘော ဝီ ယေန် ဝီ ဟြာယ်။

31 ကူပ် ပီ ဘူင် အန် တီ၊ ဇဝ်ဖြာ ဘော တဲး အန် မိုဝ်း နဝ်း လုယ်၊ တဲး န့ ကော ဇမ် ဒွန် စုဝ် ဒွန် ဘာန်။

32 ဒေါ ကွယ် ဂေ ခူပ် တုဝ်း အိုမ် မေရီဘာ မိူဝ်၊ ဂေ ဘော ဘူင် တဲး ဇဝ်ဖြာ ရူ ကာဆဝ် ဒီ ဂေ။ ကူပ် ဘူင် ဂေ ပါယ် တီ၊ န့ ဘော တဲး ဘော အာမုဝ်ဆဲ ခမ် ဒုက်။

33 ခုဝ်၊ ဂေ ပျာတ့် နဝ်း ဖွိုမ် အာမုဝ်ဆဲ၊ တဲး အန် ရူ စာဝ် ဘဲန် ကာလာင် ဂြုဝ်း တူ မွှိုမ်။

34 ဂေ မိူဝ် တူ ပျာတ့် ဒူအီ အာမျုဝ် ဟဝ်၊ တဲး န့ ဒူပ် ပီ တဝ်း ဇဝ်ဖြာ ဒီ ဂေ။

35 ဂေ ဘော ကွယ် ကာဆူ ဒူပ် ဒူအီ အာမျုဝ် ဟဝ်။ ဂေ ဘော ဘူင် ညိုင် ပီ ဘူင် ဂေ ဒူအီ ဟဝ် တီ။

36 ဂေ မိူဝ် ဝီ ကြိုပ် အာရိုပ် ရာင် ပီ ကြိုပ် ဂေ ဒူအီ အာမျုဝ် ဟဝ် တီ၊ တဲး န့ ဘဲန် ယွတ့် ဒီ ဂေ၊ တဲး ဂေ စှိုမ်။

37 ဂေ ဝီ ငဝ်း ဂွန် အီဘိုန့် ဂွန် အီမာယ် ဂေ၊ ဝီ လှူ ဒီ အာရိုပ် ရာင် အီ ကွယ် ခဲင် မိူင် ကာနန့် တီ။

38 ဂေ ငဝ်း ယမ် ဂွန် ဒီရွယ်၊ ဂွန် ဒီရာ့၊ အီ တူ မိုဝ်း မှာပ် မာဆေ၊ တဲး မိူင် ဘော မိူင် ကာဒါတ့် ကူပ် နှာမ် ဂေ တီ။

39 ကူပ် ဘူင် ဂေ ပါယ် တီ၊ န့ တဲး ဒုဝ် ဘူင့် ဂေ ကာဒါတ့်။ ပီ ဘူင် ဂေ ဒီ ဇဝ်ဖြာ၊ န့ ပီ ပီ ဘူင် ယာ မာလမ် ဒီ အီ။

40 ခုဝ်၊ ဇဝ်ဖြာ ဘော ရူ ကာဆဝ် ဒီ ဂေ ဒူအီ ပီ အိုပ် အန်။ အန် ဇဝ် ဘော ကာအိး ဂေ အီ ပီ ခါဂုန် အန်။

41 အန် ဘော ဝီ အာပ် ဂေ ဒီ ဒူအီ အာမျုဝ် ဟဝ်၊ တဲး ရန်ဆူ ဂေ ဝီ အိုပ် ဂေ။

42 ရန်ဆူ ဂေ ဘော ခါနှာပ် ကာဆဝ် ဂေ။ ဂေ ဘော ကာဒုး ဒီ ဂူမ်၊ ကာဒုး ဒီ ခမ် ပီ ဘူင် ရန်ဆူ ဂေ ဒီ ဂေ။

43 ဇဝ်ဖြာ ဟဲ့ စွယ် ဂေ ဘဲန် ဇေန့် ဘဲန် ဇေန့်။ ဂေ ယီ ဝီ ရူ စာဝ် ဘော ခြာမ် ဒီ ဝဲန် အန် ဇဝ်။ န့ တဲး ဂေ ဝဲ ခမ် ကိူန် မှာပ် ဂေ။

44 ပီ ဘော ဟဲ့ ပါယ် တီ မိူဝ်၊ ဇဝ်ဖြာ ယီ ယိုဝ် ဂြုဝ်း ပီ ဆာခိုဝ် ဂေ။ အန် ဇဝ် ယွတ် ဂေ ဒေါ ကွယ် ဂေ ခဲင် ဒုက် တာင် တီ။

45 အန် ဇဝ် ယီ ဝီ လှုဝ်း ဂြုဝ်း ပီ ဒွိုမ် ကာဆဲန့် အန် ဒီ ဂေ ကူပ် ကာဝေ အန် ဒီ ဂေ။ နဝ်း ရူ အန် ဘော ဝီ ရာမ် ယေန်၊ ကူပ် ရွက့် အန် ဒီ ဂေ။

46 ဇဝ်ဖြာ ဘော တဲး ဒူအီ အီ ခါနှာပ် ဂေ ဝီ မိုဝ်း နဝ်း ဆီ ကာဝေ ဂေ။

47 အိုယ် မဲ ဇဝ်ဖြာ ပီ ကြိုပ် ယေ၊ ယေ မှာန့်၊ တဲး မဲ ဇဝ် ချွတ် ယေ ဘော ဒိုဝ်း လေး ယေ ခဲင် ဒူအီ အာမျုဝ် ဟဝ်၊ ဝီ တဲး ယေ ပွိုန် ဒီ ဝီ ဒါင် ဂုင် ဂေဇူ ဒီ မဲ ဇဝ် အီ မိုဝ်း ပွုန် တာင် ကာဆဝ်၊ ဝီ တဲး ယေ မိုဝ်း ဆာရေ ဒေါ အိူပ် ယေ ဒီ မဲ ဇဝ်။

48 အေ အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ အေ ဒီ အိူပ် အန် ဇဝ် ဆိန့် ဒေါ တီ နီ ဟာဝ် နာ အာတ့် ဆေဆေ။ တဲး ဒူအီ ဘောကာဂ့လျီတ် တဝ်း၊ “ဆာတူ၊ ဆာတူ။” တဲး ဘေ အိူပ် ဇဝ်ဖြာ ပါယ် တီ။